MATEO 16
16
Farisewkuna i sadusewkuna mañayan señalkunata
1Shayámorqan farisewkuna i sadusewkuna tentayananpaq, i mañayarqan syelupita señalta rikátsinanpaq. 2Peyna yaskirnin, nerqan: “Ampíriptin niyanki: ‘Alli tyempum; syelu pukayáriptin.’ 3I qoyapana: ‘Kananqa kanqa shukukiy; syelupa pukayeynin qetqiraptin.’ ¡Motolítukuna! musyayankim syelupa keynin reqita, ¡tyempukunapa señalninkunataqa pwediyankitsu! 4Mana alli i olteron kastakuna señaltam mañakun; peru señalqa manam qoshqatsu kanqa, sinowqa profeta Jonaspa señalninllatam.”
I jaqirirninkuna, ewkorqan.
Farisewkunapa i sadusewkunapa lebaduran
5Disípulunkuna juk láduman chárirna, tanta apamiyta qonqashqa kayánaq. 6I Jesusnam nerqan: —Rikáyey, farisewkunapa i sadusewkunapa lebaduranpeq kuydakuyey.
7Peykunaqa pensayarqan kikinkunallachow, nirnin: —Keyta nin tantata mana apamushqa kaptintsikmi.
8I Jesús káyirirnam, nerqan: —¿Imanirtaq pensayanki kikikikunallachow, ichiklla kreyikíyoq nunakuna, mana tanteykikuna kanqanta? 9¿Manaraqku kayiyanki, ni yarpayanki key pitsqa tantakunapita pitsqa waranqa nunakunapaq, eyka kanastata eylluyanqeykita? 10¿Ni qanchis tantapita chusku waranqapaq, i eyka kanastakunatataq eylluyarqeyki? 11¿Imanirtaq mana kayiyankitsu manam tantapaqtsu niyarqoq sinowqa kuydakuyaneykipaq farisewkunapa i sadusewkunapa lebaduranpita?
12Tseynam káyiyarqan tantapa lebaduranpita mana nenqanta, sinowqa farisewkunapa i sadusewkunapa yachatsikiyninkunapita.
Pedrupa willakiynin
13Filipo Sesareapa ládunman Jesús shamurnin, tapurqan disípulunkunata, nirnin: —¿Nunakuna pí niyantaq Nunapa Tsurinpaq?
14Peykuna niyarqan: —Jukkunam, Juan Bawtista; wakinkunam, Eliasmi; i wakinkunanam, Jeremias, o profetakunapita meyqanchi.
15Peynam nerqan: —Qamkunaqa, ¿pí kanqátataq niyanki?
16Simon Pedru yaskirnam, nerqan: —¡Qam kanki Kristum, kaweykaq Dyospa Tsurin!
17Tseynam Jesús yaskerqan: —Kushikiyoqmi kanki, Simon, Jonaspa tsurin, manam eytsatsu ni yawartsu musyatsishorqonki, sinowqa syeluchow keykaq Teytámi. 18I noqapis neqmi, qanmi Pedru kanki, i key qaqa jananchowmi iglesyáta rurashaq; i Ádispa punkunkuna manam tsarakuyanqatsu peypa kontran. 19I qamtam qoshqeyki syelukunapa reynunpa llábinkunata; i llapan patsachow watashqeykim syeluchow watashqa kanqa; i patsachow llapan paskashqeykim syeluchowpis paskashqa kanqa.
20Tseynam disípulunkunata mandarqan ni pita mana niyánanpaq pey Jesuskristu kanqanta.
Jesús willakun waníninta i bensikiyninta
21Tseypita patsa Jesús qalleykorqan disípulunkunata willarnin Jerusalenta eywananpaq wananqanta i awkinkunapita allápa jipananta, apun saserdotikunapita i judyukunapa leynin yachatseqkunapita; wanushqa kananta, i kima junaqta kawarimunanta. 22Tseynam Pedru, jaqpitsárirlla, piñapar qalleykorqan, nirnin: —Señor, kikikita ankupákiy; ama imanowpapis keyqa pasashiytsu.
23Peru peyna, tumeykur, Pedruta nerqan: —¡Witikiy noqapita, Satanas! Trompiseními kanki, rikeynikita manam churankitsu Dyospa kosasninkunaman, sinowqa nunakunallapaman.
Jesusta qatinapaq
24Tseynam Jesús disípulunkunata nerqan: —Meyqanpis noqapa qepáta shamiy munaqqa, kikinta negakutsun, i krusninta tsaritsun, i qatimátsun. 25Meyqanpis kaweyninta salbey munaqqa, oqranqam; i meyqanpis kaweyninta oqraqqa noqapa kawsáreykur, tarenqam. 26Tseynowqa ¿imataraq probechanqa nuna, si gananman llapan munduta i almanta oqrarenqa? ¿Ó ima rantintaraq nuna qonqa almanpaq? 27Nunapa Tsurinqa shamonqa Teytampa gloryanchow angelninkunawan, i tseynam paganqa juklleyllapayan rureyninkunamannow.
28»Tseqeypam niyaq kayanmi wakinkuna keychow keykaqpita, manam wanuyanqatsu, Nunapa Tsurinta reynunpita shamonqanta rikáyanqanyaq.
انتخاب شده:
MATEO 16: QUEAN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Quechua Ancash New Testament © Peruvian Bible Society, 1992.