MATEO 9
9
Jesús kachakátsin juk paralitikuta
1Tseynam, Jesús barkaman yeykurir wak tsinpaman pasarqan i shamorqan markanman. 2I susederqan peyman apayámorqan juk paralitikuta, kámanchow iskareykaqta; i Jesús peykunapa kreyikiyninta rikeykur paralitikuta nerqan: —Kallpakiy, tsuriy; jutseykikuna perdonashqanam.
3Tseynam judyukunapa leynin yachatseqkunapita kikinkunachow niyarqan: —¡Keyqa maldisinmi!
4I Jesús peykunapa penseyninkunata reqir, nerqan: —¿Imanirtaq mana allita yarpakacháyanki shonqiykikunachow? 5Tseynowqa, ¿imataq mas fásil, ní: Jutseykikuna perdonashqanam, ó ní: Sharkiy i puri? 6Musyayaneykipaq Nunapa Tsurinpaqa kapunmi pwedeq keynin patsachow jutsakunata perdonananpaq (tseynam nin paralitikuta): ¡Sharkiy, kameykita tsari, i wayikita ewkiy!
7Tseynam pey sharkorqan i wayinta ewkorqan. 8I nunakuna, rikarnin, almirakuyarqan i Dyosta glorifikáyarqan, nunakunata pwedeq keyta qoshqa kaptin.
Mateupa qayeynin
9Tseypita Jesús paseykar, rikarqan juk nunata Mateu jutiyoqta, tributukuna publiku tákunanchow teykaqta, i peyta nerqan: “¡Qatimey!” I sharkurnin qaterqan.
10I susederqan pey wayichow mésachow teykaptin, kaq key atskaq publikánukuna i jutsasapakuna, shayámushqa kayarqan, tákuriyarqan juntulla meysaman Jesús i disípulunkunawan. 11Farisewkuna keyta rikeykurnam, disípulukunata niyarqan: —¿Imanirtaq Maestriykikuna mikun publikánukunawan i jutsasapakunawan?
12Jesús keyta wiyarirnam, peykunata nerqan: —Sanukunaqa manam wanayantsu médikuta, sinowqa qeshyaqkunam. 13Eywayey, i yachakuyey ima ninanmi: Ankupákiytam muná, i manam sakrifisyutatsu. Manam justukunata qayaqtsu shamurqó, sinowqa jutsasapakunatam, wanakiyman.
Ayunupaq tapukiykuna
14Tseynam shayámorqan peyman Juanpa disípulunkuna, nirnin: —¿Imanirtaq noqakuna i farisewkuna ayunayá atska kuti, i disípuliykikunaqa mana ayunayantsu?
15Jesusnam nerqan: —¿Akasu pwediyanku kasamyentuchow keykaqkuna lútuyoq keyta qowa peykunawanraq keykaptin? Peru shayámonqam junaqkuna qowa peykunapita qochisqa kanqa, tseynam ayunayanqa. 16Manam pipis churantsu mushoq páñu remyenduta makwa bestiduman, tsey remyendum sutan bestiduta, i peyor rachikárin. 17Ni winayantsu mushoq bínuta awkis qara bolsakunaman; tseynow karqa bolsakuna rachikákuriyan, i bínu ramakárin, i bolsakuna ushakárin; mushoq bínutaqa winayan mushoq qara bolsakunamanmi, tseynam juknin jukninpis tsarakuyan jukllachow.
Jesús kachakátsin juk warmita
18Key kosaskunata pey nenqanyaq, shamorqan juk reqishqa nuna i qonqurikiykorqan nowpanman, nirnin: —Warmi tsuriymi wanurishqa; shamiy makikiyta churey peyman, i kawanqam.
19I Jesús sharkur, qaterqan disípulunkunawan. 20I kaq key juk warmi yawar apeywan qeshyarqan chunka ishkey watanpinna, witiykorqan qepampa i yateykorqan mantunpa kuchunta; 21kikinchow nirnin: “Mantunllatapis yateykorqa, kachakashqam kashaq.” 22Peru Jesús, qepaman tumarir i rikeykur, nerqan: —Kallpakiy, tsuriy; kreyikiynikim kachakátsishorqonki.
I warmi kachakashqa karqan tsey órapita.
Jesús kachakátsin juk warmi wamrata
23Jesús, reqishqa nunapa wayinman yeykurirna, plawta tokaqkunata rikeykur, i nuna búlla ruraqta, 24nerqan: —Witikuyey, wamraqa manam wanushqatsu, sinowqa pununmi.
I peypita burlakuyarqan. 25Peru nunakunata qarquriyaptinnam, yeykorqan, i wamrata makipita tsarirkurqan, i pey sharkamorqan. 26I tsey rurashqan musyakárerqan llapan taqey markachow.
Jesús kachakátsin ishkaq wiskukunata
27Tseypita Jesús pasarirna, qatiyarqan ishkaq wiskukuna, qayakurnin i nirnin: —¡Ankupákiyniki katsun noqakunapaq, Dabidpa Tsurin! 28I wayiman cháriptinna, shayámorqan wiskukuna peyman; i Jesusnam nerqan: —¿Kreyiyankiku key rureyta pwedináta?
Peykuna niyarqan: —Awmi, Señor.
29Tseynam yateykorqan peykunapa nawinkunata, nirnin: —Kreyikiynikikunamannow rurakátsun.
30I peykunapa nawinkuna kichakárerqan. I Jesús atikarqan peykunata sinchipa, nirnin: —Rikáyey ama pipis musyatsuntsu.
31Peru peykuna yarqurirna, willakuyarqan peypa rureyninta llapan tsey markapa.
Jesús kachakátsin juk endemoniyadu múduta
32Peykuna yarqureykáyaptin, kaq key, peyman apayámorqan juk múdu endemoniyaduta. 33I qarqorqan demoniyuta, i múdu parlarqan; i nunakuna almirakuyarqan, i niyaq: —¡Manam imeypis keynowqa rikeytsu kashqa Israyelchow!
34Peru farisewkuna niyarqan: —Demoniyukunapa apunninpam demoniyukunata jaqman qarqun.
Jesús ankupan nunakunata
35Jesús pureq llapan markakunapa i tunakunapa, peykunapa eyllukayanan wayikunachow yachatsikurnin, i reynupa ebangelyunta predikar, i pwebluchow llapan qeshyata i llapan nanatsikiyta kachakátsir. 36I atska nunakunata rikeykur, ankuparqan peykunata; jaqishqa i witsikashqa mitseqninnaq úshakunanow kayaptin. 37Tseynam nerqan disípulunkunata: “Rasonpam koséchaqa atska, uryaqkunanam wallkalla. 38Rowayey, kosechapa Señorninta, uryaqkunata kachamutsun kosechanman.”
اکنون انتخاب شده:
MATEO 9: QUEAN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Quechua Ancash New Testament © Peruvian Bible Society, 1992.