Eyohana 3
3
Eyesu ta la Enikodimo
1Alomakyeŋ a wo ma, eshko baŋ e ri Enikodimo. A wo andakʼpo ba akuombgu moaEyahuda, nga a wo a ba ogu moaEfarisi. 2Okyukyku ondakyeŋ nga a ba okro Eyesu nga a nyuŋ ŋa a lu mi le, Agi e yi zhezheŋ, aŋo Andakʼpo, aŋo angyiŋ o wo are la a nye ba Ahogbrẽ a doŋ o ba. Arekyeŋ a kpo a gbu baŋ a kpo edgu ayakplo egbregbre boŋ o la o kpo mbo o wo le Ahogbrẽ a wo ka la ŋa ayga dne. 3Eyesu a tno Enikodimo ma a lu mi le, Ame e lu e doŋ, arekyeŋ a kpo a gbu baŋ a ka Oreŋ Ahogbrẽ mbo, o wo le moa a bla ŋa a mbre ayga dne. 4Enikodimo a tno Eyesu ma a lu mi le, Are la a sheŋ a gbu a gre bgu, moa á kpo anyu á ba a bla ŋa á sa á mbre? Are he lo a kpo a gbu baŋ a sa a bla a gre akpyki anaŋ nga a da mo a bla ŋa a mbre mbo! 5Eyesu a tno ŋa ma a lu mi le, Ame e lu adlidzi e da gimi, arekyeŋ a kpo a gbu baŋ a yi Oreŋ Ahogbrẽ mbo, o wo le moa a mbre ŋa okro amihĩ ta la Ogbgaodzi ayga dne. 6Egʼba e la e kpo edgu otum ba egʼba. Ogbgaodzi o la o kpo edgu otum ba Ogbgaodzi. 7Aŋo o ka egbregbre okyku ba ame e lu mi ma, o dzu omgbybi angyiŋ ba moa a bla gimi a sa a mbre mbo. 8Ogbga o la o hlu o yi egiyaŋ a mbo ba alo o klo, agimi e gno akyuŋ lo ambo agimi e yi okro ba alo o zgi lo o ba, ta la okro ba alo o yi mbo. O dzu ekakahelo angyiŋ ta la areyaŋ a mbo ba moa a mbre ŋa okro Ogbgaodzi. 9Enikodimo a zhĩ a lu mi le, Ohe lo o kpo anyu ó ba o kpo ó gbu? 10Eyesu a tno ŋa ma a lu mi le, Aŋo angyiŋ o wo are la a nye moaEsrayila, ambo aŋo o ka lo o bmye mbo? 11Ame e lu adlidzi angyiŋ e doŋ. Agi e lu ekplo bi e yi angyiŋ e doŋ, nga agi e lu ekplo bi e ka angyiŋ e doŋ. Ambo ekakahelo a mbo, arekyeŋ eshki bimi a bmi ba adlidzi ta la odlo bi mbo. 12Ame e lu odlo eshri ayakplo ba obiŋ hi e doŋ, ambo aŋo o bmi ba adlidzi mbo. O wo ba ame e lu odlo eshri ayakplo ba Ongyeŋ angyiŋ le, aŋo ó kpo anyu ó ba o ka ó bmye? 13Arekyeŋ obiŋ hi a gre Ongyeŋ a ka mbo ku-ku, o wo le Anwye Arehwi akyakyeŋ sha la a zgi Ongyeŋ a ba obiŋ hi.
14Eka ba Omusa a si emabi amgbaŋ abme ongyeŋ akla la opi, ekakahelo moa á ba a si Anwye Arehwi ongyeŋ, 15okyku o da areyaŋ a mbo la a bmi ba adlidzi ka la ŋa a hwiŋ eso ba gbagbu-amo. 16Ahogbrẽ a klo moarehwi ba obiŋ hi ma-me, nga a shri Anwye baŋ akyakyeŋ a shri a di, okyku o da areyaŋ a mbo la a bmi ba adlidzi ka la ŋa a yla mbo, ambo a hwiŋ eso ba gbagbu-amo. 17Ahogbrẽ a da Anwye baŋ a ba obiŋ hi okyku o daŋ a sõ moare ombgu angyiŋ mbo, ambo okyku o daŋ a dzu Areoshla moarehwi ba obiŋ hi.
18Areyaŋ a mbo la a bmi ba adlidzi ta la Anwye lo, moa á sõ ŋa ombgu mbo. Areyaŋ a mbo la a bmi ba adlidzi ta la Anwye lo mbo, moa a sheŋ a sõ ŋa ombgu bgu, okyku eshi a bmi ba adlidzi ta la Anwye ba Ahogbrẽ akyakyeŋ mbo. 19Ombgu lo o wo eka he angyiŋ, okyku eshi ayimom a ba obiŋ hi, ambo moarehwi a tla ayimom lo nga moa a bmi ta la evbu okyku moa a la a kpo ayakplobi. 20Areyaŋ a mbo la a kpo ayakplobi, a la a klo ayimom mbo, nga aŋa á ba okro lo mbo, okyku eshi aŋa a klo o da ayakplobi baŋ a kpo lo a ra a tspa mbo. 21Ambo areyaŋ a mbo la a kpo otum ba adlidzi a la a ba okro ba ayimom, okyku o da ayimom a tsa otum baŋ a kpo a kpo lo eka ba Ahogbrẽ a klo.
Eyesu ta la Eyohana
22Ambla he nga, Eyesu pa la moanwyeotum baŋ, moa a gre ogʼba obiŋ ba Eyahuda. A ta abyi ahe lo pa la mo ple, nga a kpo moare abaptisma. 23Omba he lo nga, Eyohana a la a kpo moare abaptisma ami ba Ayino, alo o gyuŋ ta la osku ba Asalim mbo. Ami a wo ahe lo nzenze. Moare a gre okro baŋ nga a kpo mo abaptisma. 24Omba he lo moa a vu Eyohana a ta aku a wo mbo.
25Moabze eshki moanwyeotum ba Eyohana, moa a kla odlo ta la arekyeŋ ba Eyahuda eshri ondzandza moa a la a kpo ozhẽ o lu Ahogbrẽ ma. 26Okyku eka he moa a gre okro Eyohana, nga moa a lu a daŋ a lu mi le, Andakʼpo, aŋo o yi alomakyeŋ la a wo akaŋ ondzu ba Ordu ongre ohwõ mi ma? Alom boŋ o lu odlo eshri baŋ mi. O ka, alom he lo a la a kpo moare abaptisma ohuhuhi a gre eshri, nga moare mvye a zhiŋ a la a yi okro baŋ! 27Eyohana a tno ma a lu mi le, Arekyeŋ a kpo a gbu baŋ a wo ekplokyeŋ ma mbo, o wo le Ahogbrẽ a shri lo a daŋ ayga dne. 28Agimi ababgo bimi e wo egŋe me ba ame e lu e da gimi e lu mi ma ame angyiŋ e wo Emisiya mbo, ambo moa a hom me otum a da me e ba okyku ŋa angyiŋ. Okyku eka he ame e gre ŋa ori. 29Anwyeshe a wo okyku anwyealom angyiŋ. Akyeŋazba anwyealom lo a la a tspi a gno ogno sha. A gno oraŋ omba baŋ a gno enzi ba anwyealom. Ame e gno oraŋ nzenze okyku eka he lo angyiŋ. 30O dzu omgbybi baŋ a wo la anyuanyuŋ a gre me.
Are le a zgi Ongyeŋ a ba
31Are la a gile Ongyeŋ angyiŋ a ba le, aŋa a wo la ekʼpo a gre moahwõ mvye. Are la a zgi obiŋ hi angyiŋ le, a wo ba obiŋ hi angyiŋ, nga a la a lu odlo eshri ayakplo ba obiŋ hi. Are la a zgi Ongyeŋ angyiŋ a ba a wo la ekʼpo a gre mvye. 32Aŋa a lu ekployaŋ a mbo baŋ a ka nga a gno a di, ambo arekyeŋ a yga odlo baŋ mbo. 33Areyaŋ a mbo la a yga odlo baŋ he lo, a tsa eka ba Ahogbrẽ a wo adlidzi angyiŋ. 34Are ba Ahogbrẽ a daŋ a ba lo, a la a nyum odlo ba Ahogbrẽ, okyku eshi Ahogbrẽ a mbga Ogbgaodzi ombga a shri a daŋ mbo. 35Adaŋ a la a klo Anwye baŋ, okyku eka he a shri ekployaŋ a mbo a ghwo abgo baŋ. 36Areyaŋ a mbo la a bmi ba adlidzi ta la Anwye le, aŋa á wo eso ba gbagbu-amo ma. Areyaŋ a mbo la a bmi ba adlidzi ta la Anwye lo mbo le, á hwiŋ eso mbo, nga ombgu ba Ahogbrẽ o dzu eshri baŋ gbagbu-amo.
اکنون انتخاب شده:
Eyohana 3: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria