Amatiyu 15
15
Onyenye ba moadimo
1Ambla he nga moaEfarisi, pa la moa la a nye odaŋ, moa a zgi Orushalima a ba okro ba Eyesu okyku o zhĩ ŋa odlo. 2Moa a zhĩ a lu mi le, Okyku eshi moanwyeotum boŋ, moa a la a kpaŋ onyenye moadigi mbo? O ka, moa a ka a ndza abgo mo ozhẽ la o raŋ ayga a ri algo mbo! 3Eyesu a tno mo ma a lu mi le, Okyku eshi agimi e la e kpaŋ odaŋ ba Ahogbrẽ mbo, nga e kpaŋ onyenye ba eshri bimi? 4Okyku eshi Ahogbrẽ a lu mi le, Aŋo o fa olbi o da adoŋ, ta la anoŋ, nga areyaŋ a mbo la a lu odlo la o wo odzi mbo ta la adaŋ, o mbo le ta la anaŋ le, moa á bga ŋa omgbybi. 5Ambo agimi e sko lo e shri e zga, e la e lu mi le, O wo ba arekyeŋ a wo la emakyeŋ ma okyku o kpo o ghwo adaŋ, o mbo le anaŋ le, o wo baŋ a lu ma aŋa á shri lo á da Ahogbrẽ le, ma alo o wo akpu mbo, 6ma alo o wo akplokyeŋ angyiŋ baŋ a fa olbi a da adaŋ mbo. Agimi e la e kpo eka he angyiŋ nga e la e zhiŋ odlo Ahogbrẽ evom, nga e la e kpo otum ta la onyenye ba eshri bimi. 7Agimi abibli moarehwĩ! Eshaya a ta akpu ku-ku omba baŋ a ka a lu eshri bimi mbo! Aŋa a lu ma Ahogbrẽ a lu mi le,
8Moarehwĩ hi a la a hlu me eshko la anyu mo,
Ambo esõ mo e wo ogyugyuŋ pa la me.
9Ototno angyiŋ moa a la a hlu me eshko,
Okyku eshi moa a la a nye odaŋ moarehwĩ a zga eka ba Ahogbrẽ angyiŋ a zga!
Ayakplo la a tpi are ayi
10Ambla he Eyesu a lu a da eshki a lu mi le, Agimi e ngli atuŋ e gno nga e ka e bmye! 11Ekplo ba are a ri e gre e yi akpyki angyiŋ e tpi ŋa ayi mbo, ambo aga la a zgi esõ baŋ angyiŋ a tpi ŋa ayi.
12Ambla he nga, moanwyeotum a ba okro Eyesu nga a nyuŋ ŋa a lu mi le, Aŋo o yi ba odlo boŋ o lu ohuhuhi o tpi moaEfarisi esõ ayi? 13Eyesu a tno moanwyeotum ma a lu mi le, Esĩ akiyaŋ a mbo ba Adugu la a wo Ongyeŋ angyiŋ a yle mbo, aŋa á gʼbu lo. 14Agimi e da esõ e tpi gimi ayi pa la mo mbo! Moa a wo moandakʼpo la a vga ayi angyiŋ. O wo ba avgayi a shri avgayi opi le, moaha lo pyeŋ, moa á tsu á gbu enzhe. 15Ebitru a zhĩ Eyesu a lu mi le, Aŋo o wre egŋe boŋ o ta he lo o da gi e gno. 16Eyesu a nyuŋ mo a lu mi le, Okaobmye bimi o wo okyeŋ ondundum ta la okaobmye moahwõ mbo. 17Agimi e ka e bmye mbo? E ka, okyku eshi, ekployaŋ a mbo ba are a ri e gre akpyki baŋ, nga e la e bre e yi edzi. 18Ambo ayakplo la a la a zgi anyu baŋ, a la a zgi esõ angyiŋ a ba. Edgu ahi lo angyiŋ a la a tpi ŋa ayi.
19Esõ arehwĩ eshyẽ nga, aga ba o kpo ayakplobi eka o bga ebga, ta la o ri eshra, ta la o kpo ayakplo ba eshre, ta la o kpo ogʼga, ta la o sheŋ akpro, ta la o tpi eshko moare ayi, a wo ma. 20Ayakplo he angyiŋ a la a tpi are ayi. Ambo o ri algo la abgo erum, o kpo o gbu ba alo o tpi ŋa ayi mbo.
Ashe la a bmi ba adlidzi
21Eyesu a kso ahe nga, a bre a gre ogʼba obiŋ ba Ataya, ta Esidoŋ. 22Ashekyeŋ a wo ahe lo. A wo a ba Akana. A ba okro Eyesu nga a lu mi le, Aŋo Anwye Adawuda, Andakʼpo! Aŋo o ka me ayiekŋe! Ogbgabi o la o kpo anwye-alashle me ewu nzenze. 23Ambo Eyesu a lu akplokyeŋ ka la ŋa mbo. Ambo moanwyeotum baŋ a ba a vẽ ŋa a lu mi le, Aŋo o kyu ŋa abgo o daŋ a yi eŋa! Okyku eshi, aŋa a lu gi ma nga a lu odlo a dzu gi esõ! 24Eyesu a tno ma a lu mi le, Moa a da me e ba okyku moarehwĩ ba Esrayila la a som ayi sha angyiŋ. 25Omba he lo nga, ashe lo a kne a shki obiŋ egi ayi ba Eyesu, nga a vẽ a lu mi le, Andakʼpo, o kpo o ghwo a me! 26Eyesu a tno ŋa ma a lu mi le, O wo odzi ba moa a shri algo moanwye a shri a ygi ebu mbo. 27Ashe lo a tno ma a lu mi le, O kom o wo eka he lo, ambo, ebu a mbo e la e ri ambro algo moadimo, la a zgi eteblo a ygi obiŋ. 28Eyesu a tno ŋa ma a lu mi le, Ashe, obmi ba adlidzi boŋ o wo oshye! Ekplo boŋ o klo nga, moa á kpo ŋo alo. Ombamba he lo nga anwye baŋ a shaŋ.
Eyesu a shaŋ moare nzenze
29Eyesu a kso ahe lo nga, a zhiŋ a sõ atam ba Egalili. A vre ezhim a dzu ma. 30Moare nzenze a ba okro baŋ. Moa a shri moa la a no elolo a shri a ba okro baŋ. Moa la a buŋ adga, pa la moa la a vga ayi, pa la moa la a shla adga, pa la moa la a buŋ olom, pa la moa la a no olo edgu ehwõ nzenze. Moa a shri mo a zga egi ayi Eyesu, nga a shaŋ mo. 31Moare a ka egbregbre eka moa a ka moa la a buŋ olom mgbyiŋ, a lu odlo, nga moa la a shla adga a sa a dzi, nga ba moa la a buŋ adga a sa a dzi, nga ba moa la a vga ayi a sa a ka. Moa a hlu Ahogbrẽ ba Esrayila eshko okyku ayakplo he lo.
Eyesu a vgi moare ezbienyi
32Eyesu a bzi moanwyeotum baŋ nga a lu mi le, Moare-hwĩ hi a wo me ayiekŋe a gre eshri, okyku eshi moa a wo ahe olum ba otra a mo, ambo moa a hwiŋ ekplokyeŋ ba oruri mbo, nga moa á dzi á gbu odne mbo okyku embyle. 33Moanwyeotum a zhĩ ŋa a lu mi le, Agi é hwiŋ algo la á ba a tse moarehwĩ hi ma ayaŋ akla he? 34Eyesu a zhĩ mo a lu mi le, Agimi e wo la agbrotsa ahrẽ e ma? Moa a tno ma a lu mi le, Agi e wo la agbrotsa afoha e ma, ta la atsa fi. 35Eyesu nga a da moare pyeŋ a dzu obiŋ. 36Ambla he nga aŋa a sko agbrotsa afoha, ta la atsa lo, nga a vye Ahogbrẽ okyku lo, ambla he nga a kplu lo a gbu nga a shri a da moanwyeotum baŋ, nga moanwyeotum a shri lo a shri a gʼba moare. 37Moa pyeŋ a ri ekplo la e tse mo ma. Moanwyeotum a pla ekplo la e ra, nga alo e bli altsu afoha. 38Moarealom pyeŋ la a taŋ agbrotsa a wo ezbienyi. Moa a tsi moashe, pa la moanwye ko mbo.
39Ambla ba Eyesu a kyu moare abgo a khwo nga, a gre amgblami nga a gre ogʼba obiŋ ba Emagada.
انتخاب شده:
Amatiyu 15: EGONT74
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria