Senesi 19
19
Maumaui o Sotoma mo Komola
1Na kaku loa aselo e toka lua ki Sotoma i le afiafi ; kae na tonatona loa a Lote i le matapa o Sotoma. I le tio a Lote kia laua, na tuu ake loa a ia o ano o fakafelavei kia laua, ti na punou loa a ia o kaku ki le kele. 2Ti na pati loa a ia : E kau kole atu kia koulua ke kolua fakamalie o ulu mai ki loku fale, o kolua nonofo ai i le po leinei. E kolua fufulu ai loa okoulua vae, ti o kolua tutuu ake loa i le usu o soko atu lokoulua fanoga. Kae na la tali loa kiate ia : Leai ! E ma nofo fai i le po nei i le lapalasi fakafenua o le kolo. 3Kae na fakamakeke ake loa a Lote kia laua, o la ano ai loa ki lona fale, ti na la ulu loa ki lona fale. Na fai loa e Lote se kai kia laua, o tao loa e ia ni pane sala fakatupu. Ti na la kakai loa.
4Na leikiaise la momoe kae kua tanaki ake le kakai o le kolo o Sotoma o takatakai le fale. Mei tamaliki tupulaga o kaku ki le kau matua, na lotou fakatasi fuli ki ai, mei potu kesekese o le kolo. 5Na lotou kalaga loa kia Lote : Kofea a tagata ala na ulu ki lou fale i le po leinei ? Ke ke aumai laua ki fafo, ke motou iloa laua. 6Na ulu loa a Lote ki fafo kia latou i mua o lona fale, kae na tapono loa e ia le matapa i ona muli. 7Ti na pati loa a ia : Ei oku fetaina, e kau kole atu kia koutou ke aua na kotou fai le nea leia e veli ! 8Ko leinei, e i ai oku taine e toka lua ala e leikiaise iloa ia ni tagata ; e kau aumai loa laua ki fafo nei, ti e kotou fai loa kia laua le nea leia e kotou loto ki ai. Kae ke aua na kotou fai se nea ki tagata anei talie kua la au o fakamalumalu i loku fale. 9Na lotou pati loa : Soso kese ! Ti na lotou toe pati loa : Ko ia leinei na au ofaipe se matapule, ti kua loto a ia ke tui fakamaau kia tatou ! E malie, e motou fai loa kiate koe ke toe asili veli ake ia laua ana ! Ti na lotou tulei fakamakeke loa a Lote kae lotou fakafeofi ake loa ki le matapa ke lotou maumaui a ia. 10Kae na falo loa e le sa tagata ola lima o fakaulu ake a Lote ki fale, kae la tapono loa le matapa.
11Ti na la fakakivi loa a mata o le kakai leia na tuu i le mua matapa o le fale, mei le tupulaga o kaku ki le matua, o lotou pakia loa i le afa o le matapa.
12Na pati loa le sa tagata kia Lote : Ko ai ma i lou famili koi puli i leinei ? Ko ou fugao mo ou vosa mo ou taine, ti mo nea fuli ala e ke maua i le kolo leinei, ke ke fakamavae latou i le ganea leinei. 13Talie ka ma maumaui loa le ganea leinei, o tupu kua lasi ai le tagi ki lona kakai i mua o le Eteleno. Na kakau mai maua e le Eteleno ke ma au o maumaui a ia. 14Na ulu loa a Lote o masau ki ona fugao ala na avaga mo ona taine. Na pati loa a ia kia latou : Ke kotou tutuu ki aluga, ti ke kotou mavae i le ganea leinei, talie ka maumaui loa le kolo e le Eteleno. Kae na fai a ia kia latou pe se tasi leia e masau fakasuasua.
15I le mafoa ake o le ao, na pati fakamakeke loa a aselo kia Lote ke ano la. Na la pati loa : Tuu ki aluga, too lau avaga mo ou taineliki e toka lua ala e nonofo i leinei, talie ke aua na ke mate i le maumaui o le kolo. 16Kae na fakatuvatuvai aifai a Lote, koia na too ai loa e aselo lona lima, o ona Lote, mo lana avaga, ti mo ona taineliki e toka lua, talie na loto le Eteleno ke fakamauli a ia. Na la ave loa a ia o tuku ki le tua kolo.
17I le oki o lolatou tuku ki le tua kolo, na pati loa se tasi o aselo kia Lote : Sola ke ke mauli ; ke aua na ke toe tio ki muli, ti ke aua na ke toe tuu i le laumalie ; kae ke ke sola ki le mauga talie ke aua na ke mate. 18Na pati loa a Lote kia laua : Oi ! leai, ei Aliki ! 19Ko leinei, kua ke alofa kiate au, ti kua ke fakasa le lasi o lou manava alofa kiate au i lau soli mai loku mauli. Kae ko au, e leaise mafai laku sola o kaku ki le mauga, talie e maua loa au e le tutamaki i mua, ti e kau mate loa. 20Ko leinei, e ofi mai le kolo leinei ke kau sola ki ai, ti e ikiiki a ia. Oi ! Ke mafai laku sola ki ai… Pe leaise ikiiki a ia ?… ti ke kau mauli ! 21Ti na pati loa le aselo kia Lote : Ko leinei, e kau toe tuku atu kiate koe le kalasia lena, e leaise kau maumaui loa le kolo lena e ke masau ki ai. 22Sola fakatavili ki ai, talie e leaise feala ke kau fai ia se nea kae e leikiaise ke kaku ki ai. Koia na tuku ai le igoa ko Tesoale ki le kolo ikiiki lena.
23Na sopo ake loa le laa ki le kele, i le ulu a Lote ki Tesoa. 24I le temi tonu lena, na fakavilo loa e le Eteleno mei le lagi ki Sotoma mo Komola se ua fatu kaka mo se afi. 25Na maumaui loa e le Eteleno a kolo ana e lua mo ola kakai fuli, ti mo le fenua laumalie katoa lena mo ona laakau fuli. 26Na tagaki loa le avaga o Lote ki muli, ti na liliu loa a ia ko se fakatata patai.
27Na tuu ake loa Apalaamo i le pogipogi usu o ano ki le ganea leia na tuu ai a ia mo le Eteleno. 28Na tagaki loa ona mata ki le fetuu o Sotoma mo Komola, ti mo le fenua laumalie katoa ; ti ko leinei, na tio loa a ia e malaga ake i le kele se afu ofaipe se afu o se vela lasi.
29I le aso leia na maumaui ai loa e le Atua a kolo o le fenua laumalie lena, na manatui loa e ia Apalaamo ; ti na fakamauli loa e ia a Lote mei le tutamaki leia na tautea ai e ia a kolo ala na fakatuu ai e Lote lona nofoaga.
Sakoga o Lote : Moape mo Amone
30Na mavae loa a Lote i Tesoa, o ano o nofo i le mauga mo ona taineliki e toka lua, talie na i loa a ia i le nofo i Tesoa. Na nofo loa a ia i se ana mo ona taineliki. 31Na pati loa le taine uluaki ki le muli : Kua matua lota tamana, ti e leaise maua se tagata i le fenua ke au kia taua, o mulimuli ki le aga masani o fenua fuli. 32Au ke ta fakainu lota tamana ki le vino, ti ke ta momoe loa mo ia i le pouli, o tupu ke maua ai se sakoga ki lota tamana. 33Ti na la fakainu loa se vino ki lola tamana i le po lena ; ti na ano loa le uluaki o momoe mo lona tamana : Na leaise lave fua a Lote ki le lakaga leia na nake ai lona taine o momoe mo ia, ti mo le lakaga leia na tuu ake ai a ia o ano. 34I leia ake a aso, na pati loa le uluaki ki le muli : Ko leinei na kau momoe mo lota tamana i le po kua sili ; ke ta toe fakainu se vino kiate ia i le po leinei, ti ke ano loa a koe o momoe mo ia, o tupu ke maua se sakoga ki lota tamana. 35Na la fakainu loa se vino ki lola tamana i le po lena ; ti na ano loa le muli o momoe mo ia. Na leaise lave fua a Lote ki le lakaga leia na nake ai lona taine o momoe mo ia, ti mo le lakaga leia na tuu ake ai a ia o ano. 36Na tinanae loa a taineliki o Lote ki lola tamana. 37Na fanau loa le uluaki ko se tama, ti na fakaigoa loa e ia ko Moape : ko le tamana a ia o le kau Moape, o kaku mai ki le aso nei. 38Na fanau loa le muli ko se tama, ti na fakaigoa loa e ia ko Pene-Ami : ko le tamana a ia o le kau Amone, o kaku mai ki le aso nei.
انتخاب شده:
Senesi 19: FB2000
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Société Biblique de Genève, 2000-2020