Joh 1
1
Kiugo nîgîatuîkire mûndû
1Kîambîrîriarî, Ke ûrîa wîtagwa Kiugo aarî wa kuo. Kiugo aarî vamwe na Ngai na aarî Ngai. 2Kuuma wa Kîammbîrîria, Kiugo aarî vamwe na Ngai. 3Indo cionthe ciaûmbirwe nî Ngai na njîra ya Kiugo na gûtirî kîndû wana kîmwe Kîamûmbirwe Kiugo atarî vo. 4Ndaarî yake kwarî na mwoyo, naguo mwoyo nîguo warî ûtheri wa andû. 5Ûtheri nîûkengaga ndumarî, na nduma ndîanaûvoota.
6 #
Mat 3.1; Mar 1.4; Luka 3.1-2 Ngai nîwatûmire mûnjaama wake; mûndû ûcio eetagwa Johana. 7Ke aaûkire kûva andû ûira wa ûtheri nîguo andû onthe megue ndûmîrîri îo na mamîtîkie. 8Johana tîke warî ûtheri, nwatî aaûkire nîguo ave andû ûira wa ûtheri. 9Ûyû nîguo warî ûtheri wa ma; ûtheri ûrîa ûkaga gûkû nthî na ûkamûrîkîra andû onthe.
10Kiugo aarî gûkû nthî, nwatî wana ethîrwa Ngai aaûmbire nthî na njîra yake, andû a gûkû nthî matiamwîtîkîra. 11Kiugo aathiîre vûrûrirî wake mwene na andû ake mwene matiamûnyita ûgeni. 12Nwatî andû onthe arîa maamwamûkîre na makîmwîtîkia, nîwametîkîrie gûtuîka ciana cia Ngai. 13Nao matiatuîka ciana cia Ngai na njîra îrîa andû maciaragwa, kana vinya wa mûndû wana kana wendi wa mûndû, nwatî Ngai ke mwene nîke watûmire matuîke ciana ciake.
14Kiugo nîwatuîkire mûndû na agîtûûrania natue ecûrîtwe nî wega na ûma. Natue nîtwonire riiri wake, riiri ûrîa Ngai aaveere Mûriû wake wa mûmwe.
15Johana nîwavecanire ûira wa Kiugo na akîanîrîra akiuga atîrî, “Ûyû nîke ûrîa nie naaragia ûvoro wake vîndî îrîa naugire atî, ‘Ûrîa ûraûka vuva wakwa arî na vata kûngîra, nîûndû aarî kuo mbere ya njiarwe.’ ”
16Nîtûnyitîte irathimo nyîngî mûno kuuma wegarî ûcio wake mwîngî. 17Ngai aavecanire watho na njîra ya Musa, nwatî wega na ûma ciaûkire na njîra ya Jesû Kristû. 18Gûtirî mûndû wanona Ngai. Nwatî Mûriû wake wa mûmwe ûrîa wî vakuvî mûno na îthe, nîke ûtûmîte amenyekane.
Ûira wa Johana Mûvatithania
(Mat 3.1-12; Mar 1.1-8; Luka 3.1-18)
19Atongoria a Ayahudi marî Jerusalemu, nîmaatûmire athînjîri-Ngai na Alawi mathiî kûrî Johana makamûrie atîrî, “We wî û?”
20Johana ndaarega kûmacokeria, nwatî nîwamaumbûrîre cararûkû akîmeera atîrî, “Nie tînie Mesaya.”
21 #
Gûco 18.15,18; Mal 4.5 Nao nîmaamûririe atîrî, “We wî û vi? We wî Elija?”
Nake Johana nîwamacokerie atîrî, “Naarî, nie tînie ke.”
Nao nîmaamûririe atîrî, “We nîwe Mûrathi?”#1.21 Mûrathi: Ûrîa wetererwe aûke anîrîre gûka kwa Mesaya kûrî andû.
Nake Johana nîwamacokerie atîrî, “Naarî.”
22Kwoguo athînjîri-Ngai na Alawi nîmaamwîrire atîrî, “Twîre vi we wî û, nîûndû nwa nginya tûvire macokio kûrî atongoria arîa matûtûmire. Nî ûvoro ûrîkû ûngiuga ûkwîgiî?”
23 #
Isa 40.3
Nake Johana nîwamacokerie na ciugo irîa mûrathi Isaia aaririe atî:
“Nînie Mûgambo ûranîrîra werûrî ûkiugaga atîrî:
‘Rûngariani njîra ya Mwathani!’ ”
24Nao anjaama arîa maatûmîtwe nî Afarisai, 25nîmaacokire makîûria Johana atîrî, “Angîthîrwa we tîwe Mesaya, kana Elija, kana Mûrathi, ûvatithanagia nîkî?”
26Johana nîwamacokerie atîrî, “Nie mvatithanagia na manjî, nwatî gatagatîrî kenyu varî na mûndû mûtecî. 27Ke nîagûka vuva wakwa na nie ndirî mwagîrîru wa kwovora ndigi cia iratû ciake.”
28Maûndû mama monthe meekîkire îtûûrarî rîa Bethania rîrîa rîarî mûringo wa îrathîro wa Rûnjî rwa Jorodani, kûrîa Johana aavatithanagîria.
Gatûrûme ka Ngai
29Naguo mûthenya ûcio wîngî Johana nîwonire Jesû athiîte kûrî ke na akiuga atîrî, “Taroriani Gatûrûme ka Ngai karîa kathengutagia wîvia wa andû a nthî! 30Ûyû nîke naamwîraga ûvoro ûmwîgiî rîrîa naaugire atîrî, ‘Varî na mûndû ûgûka vuva wakwa, nwatî ke arî na ûvoti kûngîra nîûndû ke aarî kuo wana mbere ya njiarwe?’ 31Nie mwene ndiamwîcî, nwatî naaûkire ngîvatithanagia na manjî nîguo andû a Isiraeli mamûmenye.”
32Johana nîwavecanire ûira ûyû: “Nînona Roho akînyûrûrûka kuuma îgûrû ekariî ta ndutuura na ekara îgûrû rîake. 33Nie mwene ndiamwîcî, nwatî Ngai ûrîa wandûmire ngavatithanie na manjî, nîwambîrire atîrî, ‘We nîûkoona Roho akînyûrûrûka na agîkara îgûrû rîa mûndû; Ke nîke ûvatithanagia na Roho Mûtheru.’ 34Nie nînona maûndû mama magîkîka na nekîra ûira atî mûndû ûyû nî Mûriû wa Ngai.”
Arutwa a mbere a Jesû
35Naguo mûthenya ûcio wîngî Johana nîwarûngamîte vau rîngî marî na arutwa ake aîrî. 36Rîrîa oonire Jesû avîtûkîrîrîte vo, nîwaugire atîrî, “Taroriani Gatûrûme ka Ngai.”
37Rîrîa arutwa acio aîrî meeguire Johana auga ûguo, nîmaarûmîrîre Jesû. 38Jesû evûgûra, nîwamoonire mamûrûmîrîrîte na akîmaûria atîrî, “Nîndûî mûracaria?”
Nao nîmaamûririe atîrî, “Rabii, Wîkaraga kû?” (“Rabii” nî kuga, “Mwarimû.”)
39Nake Jesû nîwacokerie arutwa acio atîrî, “Ûkani mûkone.” Vîndî îo kwarî ta thaa îkûmi cia mûthenya. Nao nîmaathiîre nake makîona kûrîa eekaraga na magîkarania nake nginya mûthenya ûcio ûkîthira.
40Ûmwe wa arutwa acio aîrî arîa meeguire Johana akîaria ûvoro wîgiî Jesû aarî Enderea mûrwang'ina na Simoni Petero. 41Ûndû wa mbere ûrîa Enderea eekire warî kûthiî kûrî mûrwang'ina Simoni na akîmwîra atîrî, “Tue nîtûronire Mesaya.” (Ûguo nîkuga Kristû) 42Enderea nîwacokire akîvira Simoni kûrî Jesû.
Nake Jesû nîwamûroririe na akîmwîra atîrî, “We nîwe Simoni, mûvîcî wa Johana nwatî kuuma rîu ûgeetagwa Kefa.” (Rîîtwa rîîrî na Kîngiriki nî Petero, na nî ûndû ûmwe na kuga “Îthiga.”)
Jesû nîwetire Filipu na Nathanieli
43Naguo mûthenya ûcio wîngî Jesû nîwatwire athiî Galili. Nake nîwethîrîrie Filipu na akîmwîra atîrî, “Nûmîrîra!” 44(Filipu aarî wa kuuma îtûûrarî rîa Bethisaida, kûrîa Enderea na Simoni maatûûraga). 45Nake Filipu nîwonire Nathanieli na akîmwîra atîrî, “Tue nîtwona mûndû ûrîa ûvoro wake wandîkîtwe nî Musa îvukuurî rîa Watho na ûgacoka ûkandîkwa nî arathi. Ke nîke Jesû mûriû wa Josefu wa kuuma îtûûrarî rîa Nazarethi.”
46Nake Nathanieli nîwaûririe Filipu atîrî, “Kûrî kîndû Kîamro kîngiuma îtûûrarî rîa Nazarethi?”
Nake Filipu nîwamûcokerie atîrî, “Ûka ûkone.”
47Rîrîa Jesû oonire Nathanieli athiîte kûrî ke nîwaririe ûvoro ûmwîgiî na akiuga atîrî, “Taroriani mwone Mûisiraeli wa ma, na ndarî ûcuke!”
48Nake Nathanieli nîwamûririe atîrî, “We ûmbîcî atîa?”
Nake Jesû nîwamûcokerie atîrî, “Nie nîngwonire rîrîa ûrekarîte kîrururî Kîam mûkûyû mbere ya Filipu agwîte.”
49Nathanieli nîwacokerie Jesû atîrî, “Mwarimû, we nîwe Mûriû wa Ngai! Nîwe Mûthamaki wa Isiraeli”
50Nake Jesû nîwamwîrire atîrî, “Wetîkia tu nîûndû nînakwîra nîngwonire rîrîa ûrekarîte kîrururî Kîam mûkûyû? We nîûkwona maûndû meengî manene gûkîra mama!” 51#Kîam 28.12 Jesû nîwacokire akîmeera atîrî, “Nîramwîra ûvoro wa ma atî: nîmûkoona îgûrû rîkîvingûka nao araika a Ngai makiunûkia na makînyûrûrûka îgûrû rîa Mûrû wa Mûndû.”
اکنون انتخاب شده:
Joh 1: KKB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©Bible Society of Kenya, 2019