Lúù 19
19
Zízɛ̀ wà Zakíyà
1Zízɛ̀ e ɓɔ Zɛ́lékò, áà dìè à pɛlɛí. 2Gɔ̃ doó e kɛ yía, o kɛ à sípìà Zakíyà. E kɛ ɓo‐pɛ̀ ɓo‐mì kpànazɛ̀ ká. Pɛ e kɛ à kɛ̀lɛ̀. 3E kɛ mi lɛ́ Zízɛ̀ e kɛ à káa, naapìà á dɔ. Kɛɛ e kɛ gɔ̃ ɓúlu ká. Bɛ̀i lɛ̀ɛ́ gbaa kɛ à mɔ̀ é Zízɛ̀ gɛ̃̀, ɓii mia gbũa e kɛ gbùò. 4Lɛ̀ e kɛ kília, e bàlà sí míáa wɛlɛ mɔ̀. E ló, e tɛ̀nɛ̀ síkámɔ̀‐yìlì wĩĩ́, kɛ é Zízɛ̀ gɛ̃̀, ɓii Zízɛ̀ e kɛ tópìà zí e kília píé. 5Lɛ̀ Zízɛ̀ e ɓɔ lɛ̀ e kília mɔ̀ɔ, e lɛ̀ gɛ̃̀ lɛ̀í, áà gèè Zakíyà lɛ̀ɛ, “Zakíyà, ì gbɛ̃̀ tã́ã̀ tíè‐tíèe, ɓii lɛ m mɔ̀ ḿ kɛ i píé kɛ́ì pɛ́nɛɛ.”
6Zakíyà e gbɛ̃̀ tã́ã̀ tíè‐tíèe, e Zízɛ̀ kpɛ̀ɛ̀ kɛ géli ká. 7Mia séĩ́ lɛ́ o wɔ̃́ nì e kília gɛ̃̀ɛ, o gbɛ̃̀, wáà mɛ́ĩ́ ɓò Zízɛ̀ gbĩ mɔ̀ kélɛ̀, “Gɔ̃́ e kéa aà ló kɛ‐wɔ̃̀ yɔɔ kɛ‐mì píé kɛ́ì, kɛ é kɛ lɔ̀ɔ̀‐mi ká yi.”
8Zakíyà e dɔ e gã̀ mɔ̀, áà gèè ko Dàa‐mì lɛ̀ɛ, “M dàa‐mì, ḿm̀ gèe i lɛ̀ɛ, ḿm̀ lo pɔɔ̀ lɛ́ e m kɛ̀lɛ̀ɛ pɛ́ɛ̀ e yí, tó ma lé‐gbú doó‐mì nɔ mia lɛ́ pɛ wá o kɛ̀lɛ̀ɛ lɛ̀ɛ. Ɛ́ɛ̃́ é kɛ̀á maà mi dò fùlua, ḿm̀ lo pɛ lɛ́ m à fùlu à yía, nɔɔ̀ à lɛ̀ɛ kpolà yììsɛ.”
9Zízɛ̀ a gèe à lɛ̀ɛ, “La‐ɓo aà nu ká e kéa wì pɛ́nɛɛ. Gɔ̃́ e kéa lɛ Éɓɔ́lɔ́hã́ã̀ sùu‐là‐mì ká nɔ́ kíli. 10Ƃii Mi Gbe e nu kɛ é mia lɛ́ o gíniìa lɛɛ naa, é o la.”
Pĩ̀ã̀ lɛ́ à gbɛ̃̀ɛ̃̀ lɛ góò pɛ̀lèe gbá mɔ̀ɔ
(Máfìù 25.14-30)
11Lɛ̀ míáa o kɛ o tóó dɔpìà wɔ̃́ e kéa mɔ̀ɔ, Zízɛ̀ e ló e líé wɔ̃́ gèeè ká. E pĩ̀ã̀ dò vɔ o lɛ̀ɛ, ɓii e kɛ Zùlúsàlɛ̀ ká gbaa kɔ̀ɛ́. Míáa wa gɛ̃̀ ɓɔ̀ɔ kélɛ̀ Wálà zì tò‐mia‐là lɛ nupìà nuù. 12À mɔ́ɔ̀ wɔ̃̀ mɔ̀ɔ, Zízɛ̀ a gèe kélɛ̀, “E kɛ gɔ̃ kpànazɛ̀ dò lɛ́ e wɛ̀lɛ̀ áà lò sɛ́lɛ́ gbɛɛ yí gbèkènia ká. E ló yi, kɛ ó yíkɛ̀ gáàa nɔ à lɛ̀ɛ, kɛ é kɛ sɛ́lɛ́ líé‐sí‐mì ká, kɛ é nuá e pà zeĩ́. 13Kɛ é tĩã́ lóò táá e kília mɔ̀ɔ, e là yɛɓo‐kɛ‐mìà vũ̀ doóa súo kɛ. E pɛlèe lɛ́ à kɛɛ̀ lɛ góò káa, gbá doó doó nɔ o lɛ̀ɛ déĩ́ le. A gèe o lɛ̀ɛ, ‘Kà lɔ́ɔ́ dɔ pɛlèea ká, é tóá kíli ḿ nu.’ 14Kɛɛ gɔ̃ kpànazɛ̀ɛ lɔ̀ nyɛɛ̀ e kɛá e pà‐mìà mɔ̀. Lɛ̀ e kɛ kília, o vɔ‐mìà vɔ, kɛ ó tó à píé, ó gèe míáa lɛ̀ɛ, ‘Kòó naa gɔ̃́ e kéa é kɛ ko líé‐sí‐mì ká.’
15“Gɔ̃ kpànazɛ̀ɛ e kɛ̀ mia líé‐sí‐mì ká mɔ́ɔ̀ yíkɛ̀ gáàa sɔ̀lɔ̀ ɓo. Yé e nuá e mɛ̀ĩ́a, a gèe ó là yɛɓo‐kɛ‐mìà lɛ́ aà pɛlèe nɔ o lɛ̀ɛ súo kɛ, kɛ ó nu à wɛlɛ mɔ̀, kɛ é pɛ lɛ́ waà à gɛ̃̀ pɛlèe e kília mɔ̀ɔ, á dɔ. 16Mi bèĩzɛ̀ɛ e nu, a gèe à lɛ̀ɛ, ‘M dàa‐mì, maà pɛlèe vũ̀ doó gɛ̃̀ góò pɛlèe gbá doó lɛ́ ɓa nɔ m lɛ̀ɛ mɔ̀.’ 17A gèe à lɛ̀ɛ, ‘Ƃaà wɔ̃́ kɛ sɛ̀. I yɛɓo‐kɛ‐mì yiè ká. Yé mi è e zò dɔ i mɔ̀ wɔ̃́ nyɔ̀nɔ́ káa, ḿm̀ lo sɛ́lɛ́ vũ̀ doó kɛɛ̀ é kɛ ɓà yíkɛ̀ gáàa wì.’ 18Mi tò‐ko‐mɔ̀ zɛ̀ɛ e nu. A gèe à lɛ̀ɛ, ‘M dàa‐mì, maà pɛlèe sɔ́ɔ́li gɛ̃̀ góò pɛlèe gbá doó lɛ́ ɓa nɔ m lɛ̀ɛ mɔ̀.’ 19A gèe mi yé e kéa lɛ̀ɛ, ‘Ƃi bɛ̃̀ɛ̃, sɛ́lɛ́ sɔ́ɔ́li lɛ́ è lo kɛɛ̀ ɓà yíkɛ̀ gáàa wìa.’ 20Yɛɓo‐kɛ‐mìàa doó‐mì e nu zeĩ́, áà gèè, ‘M dàa‐mì, ɓà góò pɛlèe gbáa gɛ̃̀ e ké. Ma kpo dɔ kɛ́lɛ́ yí, ma bĩ̀ĩ̀ lɛ̀ dò mɔ̀. 21M kɛ túópìà i lɛ̀ɛ, ɓii i dóo gɔ̃ gágà dò káa mɔ́ɔ̀ wɔ̃̀ mɔ̀. Íì pɛ lɛ́ ye wá ɓà pɛ káa si. Ɛ́ɛ̃́ íì pɛ lɛ́ ìí gbaa taa ɓɛɛ ɓo.’ 22À dàa‐mì a gèe à lɛ̀ɛ, ‘I yɛɓo‐kɛ‐mì yɔɔ ká. Ḿm̀ lo i lé‐wè síì, tó m wɔ̃́ káá à ká i wĩĩ́. Ƃáà yí dɔ kélɛ̀ m gɔ̃ gágà dò ká, tó máà pɛ lɛ́ ye wá m̀ pɛ káa sì, ɛ̃́ɛ̃́ zeĩ́, máà pɛ lɛ́ m̀ḿ taa, ɓɛɛ ɓò. 23Mɛ́ e kɛ mɔṹ lɛ́ ìí gbaa m̀ pɛlèea kpɔ́lɔ̀ bɛ̀i pɛlèe kpɔ̀‐tã́ã̀‐kà wì? Ƃà kɛ̀á kília, máá nuù à gɛ̃̀ɛ̃̀, tó máà à kpɔ̀à‐mɔ̀ nì gɛ̃̀ lɛ̀ m nua ká.’ 24Lɛ̀ e kɛ kília, a gèe mia lɛ́ o kɛ dɔ̀á yia lɛ̀ɛ, ‘Kà góò pɛlèe gbá lɛ́ e à kɛ̀lɛ̀ɛ kṹ à kɛ̀lɛ̀, ká nɔ mi yé pɛlèe gbá vũ̀ doó lɛ à kɛ̀lɛ̀ɛ lɛɛ.’ 25Wa gèe à lɛ̀ɛ, ‘Ko dàa‐mì, pɛlèe vũ̀ doó lɛ à kɛ̀lɛ̀ɔ̀.’ 26Lɛ̀ e kɛ kília, gɔ̃́ɛɛ a gèe kélɛ̀, ‘Ḿm̀ gèe ka lɛ̀ɛ kélɛ̀, mia séĩ́ lɛ́ pɛ lɛ o kɛ̀lɛ̀ɛ, óò lo nɔ́ à dò nɔɔ̀ o lɛ̀ɛ tĩã́. Kɛɛ mi lɛ́ pɛ wá à kɛ̀lɛ̀ɛ, é kɛ bɛ̃̀ɛ̃ à nyɔ̀nɔ́ lɛ́ e à kɛ̀lɛ̀ɛ káa, óò lo à kṹũ̀ à kɛ̀lɛ̀. 27Kɛɛ m dàa‐gbe vɔ̀ ké o yí, lɛ́ òó gbaa naa ḿ kɛ o líé‐sí‐mì káa, kà nu o ká lɛ̀ e kéa mɔ̀, ká o zɛ m wɛlɛ mɔ̀.’ ”
Zízɛ̀ e dà Zùlúsàlɛ̀ pɛlɛí géli wà kpɛ̀ɛ ká
(Máfìù 21.1-11; Máà 11.1-11; Zɔ̃̀ɔ̃́ 12.12-19)
28Zízɛ̀ e wɔ̃́ e kéa gèe, áà lò míáa líé Zùlúsàlɛ̀. 29Lɛ̀ Zízɛ̀ e ɓɔ Bɛ́fézì wà Bɛ́fénì ká kɔ̀ɛ́, ɛ̃́ɛ̃́ lɛ́ e kɛ gbaa Ɔ́lè‐tɔ̃̀ũ̀ sɔ́nɔ́ɔ, e là tòà‐píé‐mìàa o pèèlɛ vɔ, 30áà gèè o lɛ̀ɛ, “Kà lo pɛ́lɛ lɛ́ e ka líé yia yí. Yé kaà kɛ ɓɔpìà à yía, káà lo sòofàné nyɔ̀nɔ́ gɛ̃̀ɛ̃̀ dɔ̀á e yèleèe zɛ̀ ká. Mi gbɛɛ lɛ̀ɛ́ yà do à là. Kà à fóló, ká nu à ká. 31Yé mi dò aà ka wɛ̃́ĩ́‐lɔ̀ɔ kɛ kélɛ̀, ‘Mɛ́ e kɛ lɛ́ kà fòlòa,’ kà gèe à lɛ̀ɛ kélɛ̀, ‘Ko Dàa‐mì láà nàà à ká.’ ”
32Míá e o vɔɔ, o ló, o pɛ séĩ́ gɛ̃̀ nɔ́ lɛ̀ zí Zízɛ̀ a gèe à káa lɛ́ ɓe. 33Lɛ̀ o kɛ sòo e kília fólópìàa, mia lɛ́ wà pɛ lɛɛ, wa gèe o lɛ̀ɛ kélɛ̀, “Mɛ́ e kɛ lɛ́ kà pɛ́ɛ fòlò?”
34Wa gèe kélɛ̀, “Ko Dàa‐mì láà nàà à ká.” 35O ló à ká Zízɛ̀ píé. Lɛ̀ e kɛ kília, o wà sɔ káá sòoa là, ɛ̃́ɛ̃́ o gbũ Zízɛ̀ mɔ̀ yà à là pìè. 36Lɛ̀ e kɛ sòoa là, áà lòa, o wà sɔ káá zi gbùò mɔ̀ píé.
37Lɛ̀ e ɓɔ Zùlúsàlɛ̀ ká kɔ̀ɛ́, lɛ́ e ɓɔ zi lɛ̀ lɛ́ è kpɔ Ɔ́lè‐tɔ̃̀ũ̀ wĩĩ́ áà yɔ̀ɔ̀ bèía mɔ̀ɔ, là tòà‐píé‐mìà kù gbùò zɛ̀ɛ, o gbɛ̃̀, wáà o wúú wɛ̀lɛ̀ lɛ̀í Wálà zúo gèeè ká, wáà à tɔ́ ɓɔ̀ wɔ̃́ kpàna‐kpànazɛ̀ séĩ́ lɛ́ waà à gɛ̃̀ɛ mɔ́ɔ̀ wɔ̃̀ mɔ̀. 38Wa gèe kélɛ̀, “Lúà é kpɔ́ mia Líé‐sí‐mì lɛ́ è nu ko Dàa‐mì tɔ́ yía mɔ̀. Zò‐yà‐gé è kɛ Wálà‐pà, ɛ̃́ɛ̃́ Wálà tɔ́ è ɓɔ.”
39Lɛ̀ e kɛ kília, Fálásíì‐mìà yé o kɛ mia gbũa fĩ̀ã̀a, o dò wa gèe Zízɛ̀ lɛ̀ɛ, “Tísɛ̀, à gèe ɓà tòà‐píé‐mìàa lɛ̀ɛ ó o lɛ̀à ga.”
40Zízɛ̀ a gèe o lɛ̀ɛ, “Ḿm̀ gèe ka lɛ̀ɛ, míá o kéa, o lɛ̀à gaà è kɛ̀á káa, é kɛ bɛ̃̀ɛ̃ gɛ̀lɛ̀ vɔ̀ o kéa káa, wáá gbɛ́ɛ̀ gágà.”
Zízɛ̀ e gbóó ɓo Zùlúsàlɛ̀ wɛ̃́ĩ̀
41Zízɛ̀ e nu pɛ́lɛɛ ká kɔ̀ɛ́. Lɛ̀ a gɛ̃̀ à làa, e gbɛ̃̀ áà gbóó ɓò 42weeá kélɛ̀, “È kɛ̀á vɔ̀ íì pɛ́ è lo zò‐yà‐gé nɔɔ̀ i lɛ̀ɛ, ɓáà dɔ lúó e kéa káaò. Kɛɛ ìí bɛ̀i pɛ nì o kília gɛ̃̀ɛ̃̀ dɛɛ ká. 43Lúó lɛ́ i dàa‐gbe vɔ̀ ò lo gbã́ã́ ɓoò à ká ɓà gàlà mɛ̀ĩ́ píé déĩ́ le, ɛ̃́ɛ̃́ lɛ́ o nìɛɛ̀ è lo kɛɛ̀á i mɔ̀ lɛ̀ séĩ́ mɔ̀, tó wáà i kɛ̀, tó mi lɛ̀ɛ́ bɛ̀i góò i yía, à lúó lɛ́ɛ̀ lo ɓɔɔ̀ i là. 44Óò lo mia lɛ́ o i yía kpɔ́ɔ̀ i mɔ̀, o ka yí sìè féfé le. Òó ló gɛ̀lɛ̀ kpùlù doó fèle tóò wɔ̀ɔ̀á e wɔ̀lɔ̀ mɔ̀. Ƃii ìí gbaa lúó lɛ́ Wálà e nuá i píéa dɔ.”
Zízɛ̀ e ló Wálà‐kà wì
(Máfìù 21.12-17; Máà 11.15-19; Zɔ̃̀ɔ̃́ 2.13-22)
45Zízɛ̀ e wàà sálà‐ɓò‐Wálà‐lɛ̀ɛ‐kà wì. E gbɛ̃̀ gbaa, áà mia lɛ́ o kɛ pɛ lɔ̀ɔ̀ dɔpìà yia, áà o yí lùò, 46áà gèè o lɛ̀ɛ, “À bɛ̃̀ɛ̃ɛ̃̀ lɛ Wálà là kíía yí kélɛ̀, ‘M̀ ká lɛ́ɛ̀ lo kɛɛ̀ sɛ̀nɛ‐ɓòà‐wì‐kà ká. Kɛɛ kaà à kɛ gbaa bĩ̀ĩ̀pìà ká kã̀ã‐mìà lɛ̀ɛ.”
47Zízɛ̀ e pɛ zɔ̃̀ɔ̃̀ sálà‐ɓò‐Wálà‐lɛ̀ɛ‐kà wì lúó séĩ́ ká. Sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìà, e bɛ̀i, mia líé‐sí‐mìàa, wa naa ó à zɛ. 48Kɛɛ òó gbaa zi lɛ́ ò lo à zɛɛ̀ à káa gɛ̃̀. Ƃii mia séĩ́ o kɛ o tóó dɔpìà Zízɛ̀ mɔ̀. Míáa òó gbaa naa wɔ̃́ lɛ́ e kɛ à gèepìàa dò é die o là.
انتخاب شده:
Lúù 19: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mann New Testament © Bible Society in Liberia, 1978.