PĚNDARIADI 10
10
Pal᷊ahiten manga anạ i Noakẹ̌
(1Kar. 1:5-23)
1Kai ini e pal᷊ahiten manga anạ i Noakẹ̌, kụ kai i Sem, i Yafet dingangu i Ham samuring dalulung, i sire těllu kěbị nakaěbạ manga anạ i sire esẹ.
2Manga anạ i Yafet ute i Gomer, i Magog, i Madai, i Yawan, i Tubal, i Mesekh, dingangu i Tiras. 3Hiteng Gomer ute kai tumanạu Askenas, Rifat dingangu i Togarma. 4Hiteng Yawan ute kai tumanạu Elisa, Spanyol, Siprus dingangu Rodes. 5I sire e kai i upungu kal᷊awọu wansa tumanạu kanandung apeng dingangu tahanusa.
Kěbị ene tangu hiten Yafet. Apạewem bansa, ringangu kawanua e mạtanạ su wanuan sire sěmbaụ-sěmbaụ, kụ nahiạ u weran sire sěmbaụ-sěmbaụ.
6Manga anạ i Ham ute i Kus, Misirẹ̌, Libia ringangu Kanaan. 7Pal᷊ahiteng Kus e kai tumanạ u Seba, Hawila, Sabta, Raema ringangu Sabtekha. Pal᷊ahiten Raema ute kai tumanạ u Syeba ringangu Dedan. 8I Kus něhiteng anạ e esẹ arenge i Nimrod nakoạ taumata mahasa kahumotongange su dunia. 9Ual᷊ingu tul᷊umang u Mawu e i sie nakoạ tahapanganụ masaria. Ual᷊ingu ene tiasa taumata e měbẹ̌bera u, ”Karimạko Mawu e mapakakoạ i kau sěngkatau tahaanụ masaria kere si Nimrod.” 10Tětạ-tětạ u kararatuange ute sěnaung Babel, Erekh dingangu Akad, i sire těllu kěbị e su wanuam Babilonia. 11Bọu wanua ene i sie nakoạ sol᷊ong Asyur, kụ bọu ene napararisị u soan Niniwe, Rehobot-Ir, Kalah, 12dingangu Resen kụ sutal᷊oaran Niniwe ringangu Kalah. Kěbị ene e kai soa gaghuwạ.
13Pal᷊ahiten Misirẹ̌ e ute kai tumanạ u Lidia, Anamim, Lehabim, Naftuhim, 14Patrusim, Kasluhim, dingangu Kaftorim. Tau Kasluhim ene e i upung u tau Pilistin.
15Manga anạ i Kanaan ute kai i Sidon anạ i akang dingangu i Het. 16Kanaan mal᷊aing i upungu tau Yebusi, Amori, Girgasi, 17tau Hewi, Arki, Sini, 18Arwadi, Semari ringangu Hamati. Kal᷊awọu pal᷊ahentong Kanaan ene e, nẹ̌sawuhẹ̌ marau, 19hakịu pẹ̌saraěngu wanuan sire e naměnahẹ̌ bọu Sidon sol᷊ong Gerar sarang maraning Gasa, ringangu su sěmběkan daki mětẹ̌timona sol᷊ong Sodom, Gomora, Adma dingangu Zeboim, sarang maraning Lasa.
20Seng ene e kěbị pal᷊ahěnton Ham. Apạewen bansa ringangu kawanua e mětẹ̌tanạ su wanuan sire sěmbaụ-sěmbaụ dingangu piạ beran sire sěmbaụ-sěmbaụ.
21I Sem tuhang i Yafet, ute kai i upungu patikụ tau Ibrani. 22Manga anạ i Sem ute kai i Elam, Asyur, Arpakhsad, Lud dingangu i Aram. 23Pal᷊ahiteng Aram ute kai tau Us, Hul, Geter dingangu Mas. 24I Arpakhsad i amang i Selah. Dingangu i Selah i amang i Eber. 25I Eber piạ anạ e esẹ darua; i akang arenge i Peleg,#10:25: Peleg: Areng ini su ral᷊ungu werang Ibrani mangal᷊ene ”napahiạ-pahiạ”. ual᷊ingu su tempone dal᷊ohon dunia e sarung mapahiạ; karuane nisěbạ si Yoktan. 26Pal᷊ahiten Yoktan ute kai tau Almodad, Selef, Hazar-Mawet dingangu Yerah, 27Hadoram, Uzal, Dikla, 28Obal, Abimael, Syeba, 29Ofir, Hawila ringangu Yobab. Kěbị ene e hěnton Yoktan. 30Banua pětẹ̌tanakeng i sire e naěmpahẹ̌ bọu Mesa sarang Sefar, nạung kai wanua wawul᷊urange su sěmběkan daki.
31Ini e pal᷊ahiten Sem kěbị. Apạewem bansa arau kawanua e mětẹ̌tanạ su katatanakeng u sěmbaụ-sěmbaụ tuhụ asal᷊e ringangu tuhụewe weran sěmbaụ-sěmbaụ.
32Kěbị ene e hěnton Noakẹ̌, bansa l᷊awọ bansa e tuhụewe kěhị u hěnton sire sěmbaụ-sěmbaụ e. Seng i sire e napěhiteng kal᷊awọu wansa su dunia ini e samurin dalulung e.
انتخاب شده:
PĚNDARIADI 10: SXN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید