YOHANES 5
5
Kal᷊aul᷊en tau masakị su l᷊iwuạ u Betesda
1Bọu ene piạko sal᷊imbangu tau Yahudi, tangu Mawu Yesus e natamaị e sol᷊ong Yerusalem. 2Su Yerusalem marěduhu ”Tukadʼu Domba” piạko l᷊iwuạ e sěmbaụ,#5:2: Marěduhu ”Tukadʼu Domba” piạko l᷊iwuạ e sěmbaụ: arau marěduhu ”Liwuạ u Domba” piạ tampạ sěmbaụ. kụ suweran Ibrani isẹ̌sẹ̌bạ Betesda.#5:2: Betesda: Binohẹ u nạung pira-pira: Betzata. Sene piạ panonggene lima kal᷊awọe. 3Suapan panonggene tangu měngkate mal᷊awọ masasakị e mạhundal᷊oka; piạ u wuta, piạ u kempal᷊ẹ̌, dingangu lai peosẹ̌. [I sire kěbị e mẹ̌ngampal᷊ẹ̌ pẹ̌gagholangu akẹ e. 4Batụu malạekatʼu Mawu e kai kạdingạ lụl᷊intụ su ral᷊ungu talagạ e mapẹ̌gẹ̌golangu akẹ e. Kụ masasakị kahumotongange matumpa su pẹ̌gagholangu akẹ e, i sie mapia wọu sakị, balạewe měnsang sakị apa tẹ̌tal᷊udange.] 5Su tampạ ene kai piạ tau esẹ kụ seng těllum pul᷊o ual᷊u su taunge karěngụe masakị. 6Mawu Yesus nakasilo si sie rụdal᷊oka sene ringangu masingkạ u i sie seng marěngụ-děngụ masakị; tangu Mawu Yesus nakiwal᷊ọe si sie, ”Mapulu i kau e mapia?”
7Tau masakịe simimbang, ”Tuang, sini tawẹu makasowang iạ su ral᷊ungu talagạ su pẹ̌gagholangu akẹ e. Kụ těntal᷊ang iạ buhụ e kạtamaine sol᷊ong talagạ e, seng piạ taumata wal᷊ine měngal᷊imona sumuẹ̌ e.”
8Tangu Mawu Yesus něhengetangke si sie, ”Pẹ̌bangungke, hengkẹ e těpihu mase ral᷊engke.” 9Tangu su tempo ene lai tau e napia. I sie něhengkẹ e těpihe kụ bọu e rimal᷊eng.
Hal᷊ẹ̌ ene nariadi su ěllon Sabatẹ̌. 10#Neh. 13:19; Yer. 17:21 Ual᷊ingu ene manga těmbonangu tau Yahudi němpẹ̌berạ e su tau wuhu kapapia wọu sakị e, ”Sahěllo ini e kai ěllon Sabatẹ̌. I kau tawe wotonge měhengke těpihu.”
11Arawe tau ene simimbangu, ”Tau napakapian iạ kanini e, něngoro si siạ apělẹ̌hengkẹ těpihẹ̌ku ringangu apạdal᷊enge.”
12”Kụ kai i sai tangu nangoro si kau e apělẹ̌hengkẹ těpihu mase apạdal᷊eng?” ungkuěng i sire.
13Kai tau ěndaị buhu napia e wẹ̌ga wue měnsang i sai taumatane, u Mawu Yesus e seng nẹ̌těngkaghěngging sutal᷊oaran taumata l᷊awọ e.
14Su samurine Mawu Yesus e nẹ̌sombangu tau ene su ral᷊ungu Wal᷊em Mawu ringangu něhengetang si sie, ”Ini i kau e seng napia. Kụ kuhạe saụ mẹ̌dosa, tadeạu tawe saụ hombangengu limembon karal᷊akise.”
15Mase natamaị e tau ene něhabarẹ̌ su manga těmbonangu kawanuang Yahudi u kai Mawu Yesus nakakapia. 16Kụ ual᷊ingu ene i sire nanětạe mapakasusan Mawu Yesus, batụu i Sie mạpakapian masasakị su ěllon Sabatẹ̌.
17Arawe Mawu Yesus e něhengetang si sire, ”I Amang-Ku e mang kạhalẹ̌ e sarang orasẹ̌ ini, dingangu Iạ e mal᷊aing mělẹ̌hal᷊ẹ̌.”
18Manga wawera ene makadiadi naungu manga těmbonangu tau Yahudi e sauneng mědeạu měmate si Sie. I sire měmpẹ̌kẹ̌koạ kerene wal᷊inewe kětạu ual᷊ingu i Sie lụlampa atorangu agama mạanun ěllon Sabatẹ̌, kaiso kai lai ual᷊ingu i Sie nẹ̌bera u Ruata kai i AmangʼE; mangal᷊ene i Sie mětẹ̌těngkasul᷊ungu watangengʼE ringangu Ruata.
Kawasang Ahusẹ̌
19Mawu Yesus simimbang si sire ene kerei, ”Pangimangke Ahusẹ̌ e tawe makakoạ apa-apa ringangu kawasanʼE sẹ̌sane. I Sie kětạeng měkẹ̌koạ apang ikẹ̌kasilonʼE kẹ̌koateng i AmangʼE. U apang kẹ̌koateng i Amang e ene lai kẹ̌koateng u Ahusẹ̌ e. 20Batụu i Amang kụkěndagu Ahusẹ̌ dingangu mělẹ̌lahẹ u kěbị apang kẹ̌koatengʼE hala. Sude wue i Amang sarung lai mělahẹ u munara limembong kasěllahe hakịewen i kamene měmpẹ̌dal᷊inaụ. 21I Amange mapẹ̌bẹ̌bangung u taumata nate ringangu měgěllịu pẹ̌bawiahẹ̌ tutune ringangu kakalẹ̌; kerene lai Ahusẹ̌ e mẹ̌gěllịu pẹ̌bawiahẹ̌ kakalẹ̌ su taumata kụ mapulu ghělikangʼE pẹ̌bawiahẹ̌! 22I Amange tawe měhukung si sai-sai. Kěbị kawasa waugʼu měhukung e seng nisarakangʼE su AhusʼE. 23I Amang nẹ̌koạ ene tadeạu kal᷊awọu taumata měngadatẹ̌ Ahusẹ̌ e kerẹewe lai i sire měngadatẹ̌ si Amang. Taumata kụ ta měngangadatẹ̌ Ahusẹ̌ e mal᷊aing ta měngangadatẹ̌ si Amang něndolohu Ahusẹ̌ e.
24Mambeng těngadẹ̌ manga wawera-Ku ini e: I sain dụdaringihẹ̌ hengetang-Ku ringangu mạngimang si Sie něndolohʼu Iạ e, mạnaghuang pẹ̌bawiahẹ̌ kakalẹ̌. I sie tawe sarung ihukung; batụu i sie kai seng nal᷊iwirẹ̌ bọu papate ringangu makahombang pẹ̌bawiahẹ̌. 25Pangimangke: Sarung duměnta tempone – arau sembeng tempone – taumata nate sarung makaringihẹ̌ tingihʼu Ahusʼu Ruata. Kụ i sain nakaringihẹ̌ e sarung mẹ̌biahẹ̌. 26Kerẹewe i Amang kawe puěngu pẹ̌bawiahẹ̌, i Sie napakariadin AhusʼE lai puěngu pẹ̌bawiahẹ̌. 27I Sie seng nangonggọ su AhusʼE kawasa waugu mẹ̌hukung, u i Sie kai Ahusʼu Taumata. 28I kamene abe ral᷊inaụ makaringihẹ̌ hal᷊ẹ̌ ini e, batụu sarung duměnta tempone u patikụ taumata nate makaringihẹ̌ tingihʼE. 29#Dan. 12:2 Mase sumẹ̌bang bọu kubul᷊ẹ̌. Taumata kụ nạung měkẹ̌koạ mapia e sarung mẹ̌bangung kụ mẹ̌biahẹ̌. Arawe taumata kụ nạung měkẹ̌koạ dal᷊akị e sarung mẹ̌bangung tadeạu ihukung.”
Kal᷊awọu karal᷊ahẹ mạanun Mawu Yesus
30”Iạ e tawe makakoạ apa tuhụ kapulu-Ku hala. Iạ kětạeng mělẹ̌hukung tuhụewe ilẹ̌orong Duata. Kụ putusang-Ku e adilẹ̌, u Iạ e tawe mẹ̌kakoạ kapulu-Ku sẹ̌saku, kaiso kai kapulung Amang kụ něndolohʼu Iạ.
31Kereu Iạ e kai mẹ̌sẹ̌sahidim batangeng-Ku hala, sasahidi-Ku e tawe hinong pangimangeng. 32Kai piạbe taumata wal᷊ine mẹ̌sẹ̌sahidim batangeng-Ku, kụ Iạ masingkạ u sasahidine e mambeng těngadẹ̌. 33#Yoh. 1:19-27, 3:27-30 I kamene seng něndolohu rarolohang sol᷊ong anung Yohanes kụ i sie seng nẹ̌sahidi kahěngang mạul᷊ịu watangeng-Ku. 34Hal᷊ẹ̌ ini e Takụ ihabarẹ̌, bal᷊inewe tadeạu Iạ e piạ u mẹ̌sahidi, kaiso kawe mědeạu i kamene iapakasal᷊amatẹ̌. 35I Yohanes e kai tabidạu sol᷊o rụděllị kụ mapạsěnnangu tualagẹ̌. Kụ kětạeng kadodọ tempo e i kamene mal᷊uasẹ̌ manarimạ tualagẹ̌ ene. 36Arawe sasahidi-Ku e kai limembong kasěllahe wọu sasahiding Yohanes. Apang kẹ̌koateng-Ku orasẹ̌ ini e, ute kai munara nitilakehʼi Amang si Siạ, mělẹ̌lahẹ i Amange seng něndolohʼu Iạ. 37#Mat. 3:17; Mrk. 1:11; Luk. 3:22 Dingangu i Amang kụ seng něndolohu Iạ e mal᷊aing apẹ̌sẹ̌sahidin Iạ e. I kamene mambeng bẹ̌dang ta nakạdingihẹ̌ tingihʼE arau nakasilo ghahịʼE. 38Manga hengetangʼE tawe naresọ su naung i kamene batụu i kamene tawe nangimang si Siạ e kụ seng nịdarolohʼE. 39I kamene měmpạngěndung Binohẹ Susi batụu i kamene mẹ̌ngiral᷊ingu ringangu kakakoạ kerene i kamene mạnaghuang pẹ̌bawiahẹ̌ tutune ringangu kakalẹ̌. Kụ Binohẹ Susi e sẹ̌sane mẹ̌sẹ̌sahidin Iạ e. 40Arawe i kamene tawe mapulu ruměnta su anu-Ku tadeạu makahombang pẹ̌bawiahẹ̌ kakalẹ̌.
41Iạ e tawe mẹ̌dareạ daralo wọu taumata. 42Iạ e makạkiral᷊a si kamene. Iạ masingkạ i kamene tawe kumakěndagu Ruata su ral᷊ungu naung i kamene. 43Iạ e riměnta ringangu kawasang Amang-Ku, kaiso i kamene tawe něnarimạu Iạ. Arawe kereu taumata wal᷊ine duměnta ringangu kawasane hala, ute i kamene měnarimạben sie. 44Kereapa i kamene makapangimang kamagengu i kamene kawe mědeạu makiralo su sěndinganengu, kụ tawe mapulu mẹ̌gausẹ̌ daralo asal᷊e wọu Ruata mang Sěmbaụ? 45Abe pěngěnnau Iạ sarung mapẹ̌sal᷊ang kamene su těngon Amang. U mapẹ̌sal᷊ang kamene e kai i Musa, i sie ěndaị pělẹ̌harapeng i kamene. 46Kereu i kamene mangimang si Musa, ute i kamene sarung mangimang si Siạ, u apan nịbawohẹ e ute mạanun Iạ. 47Arawe kamageng i kamene tawe mangimang su apang kụ bẹ̌bohekang i Musa e, ute kereapa wue i kamene mangimang apang Takụ ipěbẹ̌bera si kamene?”
انتخاب شده:
YOHANES 5: SXN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید