DUKU 22
22
An‑na a ɔ bɛn Chudasi a, Chisɔsi ma tachɛ koe a
(Matiu 26:1-5, 14-16; Maki 14:1-2, 10-11; Chɔn 11:45-53)
1Mbɛ tima ni gbɛ che an na bɛn chɛ ko a, min tɔ ni biidi dɛnfɛ daun bɛnɛ. An ni an bɛn chɛ chee wan to, an dɔ kun bɔ a ɔ bɛnɛ. 2A tima chɛ a, mɔɛ miin ni Chu n tɛ ɔ Yataa a, an 'na mansa nu, an bɛ Chu n 'na sawa kan mɔɛ n na, an toen ni an ni Chisɔsi fa nun dɔ. Koe min na mu, an chianden fan ni mɔɛ n ma na gbunɛ a bea.
3Mbɛ Chisɔsi fɛ den tan kun ma fea chɛ n tɛ ɔ, dɔndɔ ni wan nɔ, min tɔ ni Chudasi. A tɔɛ ma sien fan ni to, an dɔ, Isikayɔti. Sitana bea‑a wan an Chudasi chɛ fɛ. 4Mbɛ a ta‑a wan mɔɛ chɛ n tena, miin mbe Chu n tɛ ɔ Yataa a, an 'na mansa chɛ nu, a basan poesi n ya ɔ sɔɛ n na, Yataa 'a kata kun ma. Mbɛ a‑a a kun puin an na, a si Chisɔsi ma tachɛ koe ma. 5An bu ɔ dia‑a wan kaka, mbɛ an dɔn‑da an ni kɔpɔɛ ɛnden be a ma. 6Mbɛ a dɔn‑da dɔbɛn chɛ ma. Mbɛ a bun‑da a ya a kan‑da, ɛ chia chɛndɛ chɛndɛ ma sɔn buɛ min dɔ Chisɔsi ma tachɛ koe a, mɔɛ tɔɛ chɛ n mbe ee kun, an ni min dɔ sɔn.
Chisɔsi‑a a ma bɛn, kun bɔ a ɔ bɛnɛ ko a
(Matiu 26:17-25; Maki 14:12-21; Chɔn 13:21-30)
7Mbɛ biidi dɛnfɛ daun tee chɛ che‑a. A tee chɛ a ni, an ni sa tɔngbɔɛ n fa, kun bɔ a ɔ bɛn chɛ ko a. 8Mbɛ Chisɔsi‑a Pita sɔ, an fea Chɔn na, a ɔ, “Wo ta, wo ni daun fenɛ ɔ bɛn, mmɔ ɛ min daun‑da, kun bɔ a ɔ bɛn chɛ ko a.”
9Mbɛ an dɔ, “I toen mu nn ni kaina minan dɔ bɛn daun fen chɛ daun koe a?”
10Mbɛ a ɔ an ma, “A yen ko, ni wo ma‑a wo kunɛ a don‑da duu ɔ, kaminɛ ɛ wo tan‑da wan, ɛ ta‑a yii a da ɔ. Wo bea a fɛ, wo ni don chen chɛ a, ɛ don‑da min na. 11Mbɛ wo‑a a fɔ chen ti chɛ ye, wo ɔ, n toen mu n ni a ɔ sɔn, ni dumu gbu ɛ mende, n mbe kun bɔ a ɔ daun fen chɛ daun kaina, mmɔ bɛ wo gbɛɛ a. 12Ɛ dumu ɔ bɛnden ba yian‑da wan wo a, banda chenɛ banda a. Wo ko ɔ ko ɔ bɛn nɔ.”
13Mbɛ an ta‑a. Mbɛ Chisɔsi na‑a bai miin gbɛɛ fɔ an ye, a bɔ‑a wan a a. Mbɛ an‑na daun fen chɛ gbu ɔ bɛn, kun bɔ a ɔ bɛn chɛ ko a.
Chisɔsi‑a daun fenɛ dankama daun, an bɛ a fɛ denɛ n na
(Matiu 26:26-30; Maki 14:22-26; 1 Kɔyindi 11:23-25)
14Mbɛ kun bɔ a ɔ daun chɛ tima chɛ che‑a kɛn, Chisɔsi si‑a wan daun chɛ tena, an bɛ a 'a sɔ mɔɛ n na. 15Mbɛ a‑a a fɔ an ye, a ɔ, “Kun bɔ a ɔ daun fen chɛ daun koe a di wan n ye kaka mmɔ bɛ, n mbe na to mɔnɛ ɔ bia‑a. 16Koe min na mu, n ni a ma din wo tena, mbɛ n mbe ee daun fen chɛ sima daun‑da to. Ni n‑na a daun to, fɔ dechee tima min na Yataa‑a a 'a mansaya ɔ yian, mbɛ a‑a a 'a mɔɛ n kun ka fion.”
17Mbɛ Chisɔsi‑a kɔpu ya, gbɛ ni min dɔ. Mbɛ a‑a Yataa wai bɔ, mbɛ a‑a a fɔ, a ɔ, “Wo kɔpu chɛ bia, mbɛ wo‑a chɛ sima kai kai a a wo nyɔn ma. 18Koe min na mu, n ni a ma din wo tena, mbɛ n mbe ee gbɛ chɛ min‑da to, aan Yataa ni a 'a mansaya ɔ yian.”
19Mbɛ a‑a biidi#22:19 Biidi chɛ dɛnfɛenɛ ni, koe min na yisinɛ nii a ɔ. chɛ dɔndɔ ya. Mbɛ a‑a Yataa wai bɔ, mbɛ a‑a a ɔ kai kai, mbɛ a‑a a du du an ma, a ɔ, “N gboo an nɛ, n mbe min be tena wo ko a. Wo chɛ ma tima ɔ tima, wo yii na chii koe a n na.” 20An ban‑da kɛn kun bɔ a ɔ daunɛ chɛ‑a, a‑a an ko dɔndɔ gbe chɛ an ma kɔpu wɛɛ a. A‑a a ya wan, mbɛ a ɔ, “N wii an nɛ, n mbe min na bɔn tena wo ko a. Yataa ɛ an ya tena, mbɛ a‑a dɔbɛn nama chɛ a 'a mɔɛ n na.
21“Chɛɛ wo a yen bɛ, mɔɛ min mbe na tena n ma tachɛ‑a, ɛ nɛ si ɔ daun chɛ‑a mmɔ bɛ an na. 22N fan, Mɔ Gbu 'a Denɛ, n mbe na tena wan fa‑a, yɔ Yataa‑a a ɔ bɛn buɛ min dɔ. Chɛɛ koe chɛ miin mbe mɔɛ chɛ tan‑da, a yau gba a ko a, mɔɛ min mbe n ma tachɛ‑a.”
23Mbɛ a fɛ denɛ n bun‑da an nyɔn dɔ tisa‑a, ni nyɔn mbe na tena ko bonda chɛ sima ma‑a an tɛ ɔ.
Chisɔsi‑a bai sa, a si yaɔsɔya ma
24Mbɛ an bun‑da an nyɔn kɔɔsa bia‑a, a si mɔɛ ma, min mu mɔ chenama a an tɛ ɔ. 25Mbɛ Chisɔsi‑a a fɔ an ye, a ɔ, “Mansa nu, mɔɛ chɛ n ko a, miin ma Chu mɔ n na, an mbe an 'na gbasaya yian fan an na. Chɛɛ an mansa chɛ dɔ n sin mbe an fandi chee wan mɔɛ n dia nyɔɛ n na. 26Chɛɛ wo tana, wo ma ma ka yɔ mɔɛ chɛ nu. Mɔɛ min toen mu a ni ma mɔ chenama a wo tɛ ɔ, a ni ma yɔ den mɛsɛ, mbɛ wo ya ɔ sɔɛ wɛɛ ni ma yɔ bɔi denɛ. 27Koe min na mu, mɔ fea n yen ko. Dɔndɔɛ ɛ si ɔ, dɔndɔɛ sin mbe na‑a daun fenɛ a a tena, ɛ a be a ma. Nyɔn mu mɔ chenama a an fea chɛ tɛ ɔ? Mɔɛ min mbe ka si ɔ, a bɔɛ ɛ daun fenɛ be‑a a ma, an mu mɔ chenama a. Chɛɛ n mbe wo tɛ sanche wo ma wai n fan chɛ koe a.
28“Wo to‑a wan n fɛ tima ɔ yansama ko a, n 'na ko yawaenɛ n gbɛɛ ɔ. 29A sin, Fa‑a gbasaya be buɛ min dɔ n ma ma koe a mansa a, n bɛɛ n mbe an gbasaya chɛ be‑a wo wɛɛ ma. 30Chɛ‑a a ma wan, tima min na Yataa ɛ n 'na mansaya ɔ yian‑da, mmɔ bɛ ɛ daunɛ chɛ‑a wan to, mmɔ ni mmɔ min, daun chɛ bɛn ba chɛ ɔ. A tima chɛ a, wo wɛɛ wo e ma‑a wan mansa n na, mmɔ 'a Isɔɛɛ dambi tan kun ma fea chɛ n kun ma.”
Chisɔsi ɔ te, Pita ɛ a wakoe kɔɔsa bia chɛ‑a wan
(Matiu 26:31-35; Maki 14:27-31; Chɔn 13:36-38)
31Mbɛ Chisɔsi‑a a fɔ Pita ye, a ɔ, “Saimɔn, a yen ko, Yataa dɔn‑da Sitana ye, a ni wo gbɛɛ ɔ siman, yɔ sɛnɛ sa mɔɛ ɛ chin fenɛ ɔ fɛ buɛ min dɔ. 32Saimɔn, chɛɛ n‑na samunɛ chɛ i ko a, i chenɛ ni sɔ gban i 'a danaya ɔ n na. A sin, ni i‑a i ya a yɛ to n ma, a ma i bɔɛ n bɛɛ, an chenɛ ni sɔ gban an 'na danaya ɔ n na.”
33Mbɛ Pita ɔ, “Fa, chɛɛ n ma bɛnden fan mu, an ni mɔ fea sa pimbi chenɛ a dɔndɔ a, mbɛ an‑na mɔ fea fa kaina dɔndɔɛ.”
34Chɛɛ Chisɔsi ɔ, “Pita, n ni a ma din i tena, mbɛ tɛ kɔnɛ e na konchee sayi chɛ ma, e kɔɔsa bia chɛ‑a wan gba sawa, a si n sɔn koe ma i boo ɔ.”
Chisɔsi ɔ te, an ni an ma bɛn
35Mbɛ Chisɔsi‑a a fɔ an ye, a ɔ, “Wo wo yii na chii tima chɛ a, tima min na n na‑a wo sɔ Yataa 'a bai ɔ yian koe a mɔɛ n na. Wo nii ma ta ni kɔpɔ a wo boo ɔ, wo ma ta ni bɔɔ a, a basan kɔɔwa fean bɔɛ wɛɛ a. Fen kɔ fen ma gbɔsɔɛ‑a wo bia wan a tima chɛ a?”
Mbɛ an dɔ, “Fen kɔ fen ma gbɔsɔɛ ma nn bia ni.”
36Mbɛ Chisɔsi ɔ, “Chɛɛ sanche gbɛ, ni kɔpɔɛ ɛ mɔɛ min boo ɔ, a ni a ya, a basan a 'a chia a tachɛ bɔɔɛ a. A sin, ni chɛɛ chɛ mɛ ee mɔɛ min boo ɔ, a ni a 'a doma kai ma tachɛ, a ni dɔndɔ san. 37Wo e chɛ ma‑a koe n na, Yataa 'a gboo‑a a fɔ wan, a ɔ, mɔɛ n mbe n bia‑a wan, yɔ an mbe sawa yɔn mɔ wa chɛ n bia buɛ min dɔ. N ni a ma din wo tena, mbɛ chɛ sin fan mbe ma‑a. Koe min na mu, ko ɔ ko min nyɛnden mu, a si n ma, ɛ bɔ‑a wan a a.”
38Mbɛ an dɔ, “Fa, i ya a na, chɛɛ chɛ mɛ fea n yen ko nɛ.”
Mbɛ a ɔ, “A kun‑da gbɛ.”
Chisɔsi‑a samunɛ chɛ Wodifi kɔnkɔɛ ɔ
(Matiu 26:36-46; Maki 14:32-42)
39Chisɔsi bɔ‑a wan Chuusaɛn duu ɔ, yɔ a ni a ma buɛ min dɔ tee, mbɛ a ta‑a Wodifi kɔnkɔɛ chɛ ɔ, an bɛ a fɛ denɛ n na. 40An che‑a kɛn nɔ, a‑a a fɔ an ye, a ɔ, “Wo samunɛ ma ti bia, Sitana ma na a ma, wo ni wo kan kɔ sɔ Yataa a.”
41Mbɛ a ka‑a wan an baima ɛnden na, mbɛ a‑a a kumbai gbangban, mbɛ a bun‑da samunɛ chɛ‑a. 42A ɔ, “Fa, ni i 'a dɔbɛnɛ mu, a ma ko yawaen chɛ ni ka n teen na. Chɛɛ chɛ gbɛɛ ɔ, n ta faa ma koe, an ma ma. Chɛɛ i ta faa ma koe, an ni ma.” 43Mbɛ maeka ka‑a banda bu ɔ, mbɛ a bɔ‑a a ya a, mbɛ a‑a faa be a ma. 44A faa yɔn‑da wan a ɔ benden ba a, mbɛ a‑a samunɛ chɛ a sɔɛ gbɛɛ a. Taa min ni bɔ tena a ma, a maen fan ni yɔ wii, ɛ bɔn‑da kaka duu ma.
45A ban‑da kɛn samun‑da, a‑a a kɔɔ sɔ wan, mbɛ a ta‑a a fɛ den chɛ n tena. A‑a an tan fan sa ɔ chinɔɛ ɔ. Koe min na mu, an bɛɛ faa n yɔnden ba ni, min‑na a ma, an gboo ɔ fa‑a. 46Mbɛ a‑a an na kunɛ, a ɔ, “Wo e ka sa ɔ chinɔɛ an dɔ? Wo wo kɔɔ sɔ, wo ni samunɛ ma ti bia, ko ɔ ko ma na wo yiima ɔ chɛ chɛ a si Yataa ma.”
An na‑a Chisɔsi bia‑a
(Matiu 26:47-56; Maki 14:43-50; Chɔn 18:3-11)
47A yen ko, Chisɔsi to‑a koɔ an na, mbɛ mɔ fanka an na‑a, mbɛ an‑na a tan. A fɛ den tan kun ma fea chɛ n dɔndɔ, min tɔ ni Chudasi, an ni sɔ ɔ mɔɛ chɛ n ya ɔ. Mbɛ a wan Chudasi chɛ na‑a wan Chisɔsi baima gbɛdɛn, min mbe a ma, a ni Chisɔsi kɔndɔn. 48Chɛɛ Chisɔsi ɔ, “Oo, Chudasi, n fan, Mɔ Gbu 'a Denɛ, e n fan ma tachɛ‑a kɔndɔnɛ ɔ?”
49Chisɔsi fɛ den chɛ n‑na a ɔ yen kɛn, koe min ni na tena ma‑a, an dɔ, “Fa, nn ni nn 'na chɛɛ chɛ mɛ n ya, nn ni butuinɛ chɛ an na?” 50Chu n 'na tɛ mɔ wa Yataa tena, a 'a bɔi denɛ, a ni wan an mɔɛ chɛ n tɛ ɔ. Mbɛ Chisɔsi fɛ denɛ dɔndɔɛ, a‑a chɛɛ chɛ mɛ ya, a‑a an bɔi den chɛ boo nyima ɔ too tɛ a a gbeda.
51Chɛɛ Chisɔsi ɔ, “Sɛmbɛ, ɛn to ka.” Mbɛ a tu‑a kamin chɛ too a, mbɛ a too chɛ yɛ‑a to a gba ɔ.
52Chu n tɛ mɔɛ nu Yataa a, an 'na mansa nu, an na‑a na wan Chisɔsi bia koe a. An bɛ an na‑a na poesi n ya ɔ sɔɛ n na Yataa 'a kata ɔ, a basan Chu gbakoo n na. Mbɛ Chisɔsi‑a a fɔ an ye, a ɔ, “Wo nii wo wandi tɔɔ na koe a, chɛɛ chɛ mɛ n na wo boo ɔ, a basan kɔn ma tɛenɛ n na, n bia koe a. Kanka ma chianden ma n na. 53Mmɔ‑a tee sɛsɛ wa chɛ gbɛɛ ban Yataa 'a kata ɔ, wo ma n bia ni. Chɛɛ wo ta tima an che‑a ka wo faa ma koe ma koe a, tima min na Sitana 'a gbasaya ɛ wɛ dunya chɛ kun ma.”
Pita‑a kɔɔsa bia chɛ Chisɔsi wakoe ma
(Matiu 26:57-58, 67-75; Maki 14:53-54, 65-72; Chɔn 18:12-18, 25-27)
54Mbɛ an‑na Chisɔsi bia, mbɛ an ta‑a a a, Chu n tɛ mɔ wa Yataa a, a 'a chenɛ a. Pita‑a a sɔ wan an fɛ, chɛɛ a ma dɔn ni a ni gbɛn an ma gbɛdɛn. 55A tima chɛ a, mɔɛ n‑na ta sa wan tɛ mɔ wa chɛ 'a chen chɛ kata tɛtɛ ma, mbɛ an si‑a a fɛ. Pita wɛɛ don‑da wan kata chɛ ɔ, mbɛ a si‑a an baima ta chɛ fɛ. 56Mbɛ bɔi den musuma tɔngbɔ dɔndɔ‑a a yen si ɔ ta chɛ fɛ. A‑a a ma fɛn tiin, mbɛ a‑a a fɔ, a ɔ, “Kamin chɛ ni wan Chisɔsi fɛ.”
57Chɛɛ Pita‑a kɔɔsa bia chɛ wan bai chɛ ma, a ɔ, “N bian musu, n ma kamin chɛ sɔn.”
58Tima ɛnden ben‑da, mbɛ kamin dɔndɔ wɛɛ‑a Pita yen. Mbɛ a ɔ, “I wan, a fɛ denɛ dɔndɔ gbu mu i a.”
Chɛɛ Pita ɔ, “Mɔna, n fan ma.”
59Awa dɔndɔ bendenɛ gbakɔ, kamin dɔ mende wɛɛ chii‑a wan bai chɛ ma, a ɔ, “Kamin chɛ ni wan gbu Chisɔsi fɛ, a mu min na, Kadidi mɔɛ mu a wɛɛ a.”
60Chɛɛ Pita ɔ, “Mɔna, tea kan kɔ kan mbe ee bai chɛ ɔ, e ka min fɔ‑a. N ma a sɔn.”
A to‑a bai chɛ an fɔ‑a, mbɛ tɛ kɔnɛ konchee‑a. 61Mbɛ Mansa Chisɔsi‑a a ya a yɛ, mbɛ a‑a Pita ma fɛn. Mbɛ a puin‑da Pita yii ma, mbɛ Mansa Chisɔsi na‑a a fɔ wan a ye, a ɔ, “Pita, tɛ kɔnɛ e na to konchee‑a sayi chɛ ma, e kɔɔsa bia chɛ‑a wan gba sawa, mbɛ i ma n sɔn.” 62Mbɛ Pita bɔ‑a baa ma, mbɛ a puyɛ‑a di a.
63Mɔɛ miin ni ka Chisɔsi kun ma fɛn tena, an bun‑da a ma yɛn‑da, an mbe ta‑a a gbasi‑a. 64Mbɛ an yɛ‑a wan to, an‑na a ya a chii koa a, an mbe ta‑a a fɔ‑a, an dɔ, “Nyɔn mbe ka i gbasi‑a? A ɔ yian bɛ nn na.” 65Mbɛ an yɛ‑a wan to, an‑na a main chia sɛsɛ a.
An na‑a Chisɔsi a, chiti tɛ mɔɛ n chen kɔɔ
(Matiu 26:59-66; Maki 14:55-64; Chɔn 18:19-24)
66Banda ɔ ka‑a kɛn, mbɛ Chu gbakoo n bɛn‑da kaina dɔndɔ. Chu n tɛ mɔɛ nu Yataa a, an 'na mansa n bɛɛ ni wan an bɛn chɛ ɔ, a basan Chu n 'na sawa kan mɔɛ n na. Mbɛ an gbɛɛ‑a a ma, an na‑a Chisɔsi a an chen kɔɔ. 67Mbɛ an‑na a fɔ a ye, an dɔ, “A ɔ yian bɛ nn na, ni i wan mu kunka mansa chɛ a.”
Mbɛ a ɔ, “Ni a bɔ‑a n fan da a, wo ee dan‑da a a. 68A sin, ni n‑na wo ɔ tisa, wo ee na‑a n yɛman‑da. 69Chɛɛ a ka gbɛ sanche ma, n fan, Mɔ Gbu 'a Denɛ, n mbe ma‑a wan si ɔ Yataa boo nyima ɔ, gbasaya gbɛɛ ɛ min boo ɔ.”
70Mbɛ an gbɛɛ‑a a fɔ, an dɔ, “Mbɛ i wan mu Yataa 'a denɛ a?”
Mbɛ a ɔ, “Wo‑a an fɔ ka.”
71Mbɛ an dɔ, “Siiya ee to chɛ ma. Mmɔ ban‑da bai a min‑da a wandi gbu da a.”
انتخاب شده:
DUKU 22: KONONT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Testament in Kono © The Bible Society of Sierra Leone, 2006.