Embandizo 1
1
Ebaruro ya mbere y'okutonda
1Obubere Ruhanga akatonda eiguru n'ensi. 2Ensi ekaba eli bushai etaina mishusire yona yona. Kandi enyanja ekaba ebunzirwe omwilima, na Mwoyo wa Ruhanga yarabaga aha nyanja egyo eiguru.
3Ruhanga agamba ati, “Habeho ekitangara.” Ekitangara kibaho. 4Ruhanga abona ekitangara okwo kili kirungi, akitaishurana n'omwilima. 5Ekitangara akyeta nyemishana, n'omwilima agweta kiro. Buba bwankya buba bwaigoro, ekyo kiro kya mbere.
6Ruhanga agamba ati, “Habeho eiguru omugati y'amaizi, ligataishurane.” 7Atonda eiguru, eiguru elyo litaishurana amaizi: Aga gagya eiguru yalyo, aga gagya ahansi yalyo. Nikwo byabaire bityo. 8Elyo alyeta Iguru. Buba bwankya buba bwaigoro, ekyo kiro kya kabili.
9Ruhanga agamba ati, “Amaizi agali omu nsi gateranire omu mwanya gumoi, habeho orukaru.” Biba bityo. 10Orukaru arweta Nsi, n'amaizi agateraniire hamoi ageta Nyanja. Aleba abona okwo bili birungi. 11Ashuba agamba ati, “Ensi emerwe ebimera, ebiraba enjuma n'emiti eraba ebiraba by'enjuma, buli kimoi omu ngeli yakyo.” Biba bityo. 12Ensi emerwa ebimera ebya buli ngeli ebiraba enjuma n'emiti y'ebiraba etali emoi. Aleba abona okwo bili birungi. 13Buba bwankya buba bwaigoro, ekyo kiro kya kashatu.
14Ruhanga agamba ati, “Aha iguru habeho ebilikwaka eby'okutaishurana nyemishana n'ekiro, mara bibe bumanyiso bw'ebirumo, n'ebiro, n'emyaka. 15Bibe ebilikwaka aha iguru byakize ensi.” Biba bityo. 16Atonda ebilikwaka bibili ebihango. Ekilikwaka ekihango kibe kya nyemishana, kandi ekilikuhonderaho kibe ky'ekiro. Kwakwo atonda n'enyanyinyi. 17Ebilikwaka ebyo abiteka aha iguru kuta nibyakiza ensi, 18ebya nyemishana n'eby'ekiro bibinge omwilima habone. Aleba abona okwo bili birungi. 19Buba bwankya buba bwaigoro, ekyo kiro kya kanai.
20Ruhanga agamba ati, “Omu nyanja habemu ebitondwa bingi muno ebina oburora. N'ebinyonyi biharare eiguru.” 21Kityo atonda ebinyamugenge by'amani eby'omu nyanja, n'ebitondwa byona ebina oburora ebigenda ebya buli ngeli ebijwire omu nyanja, n'ebinyonyi ebiharara ebitali bimoi. Aleba abona okwo bili birungi. 22Abiha omugisha nagamba ati, “Muzare mukanye mwijure enyanja, n'ebinyonyi bikanye omu nsi.” 23Buba bwankya buba bwaigoro, ekyo kiro kya katanu.
24Ashuba agamba ati, “Ensi ebemu ebitondwa ebina oburora ebya buli ngeli: Ebitunganwa, n'ebyekurura, n'enyamaishwa ezitali zimoi.” Biba bityo. 25Ruhanga atonda enyamaishwa ez'engeli zingi, n'ebitunganwa ebitali bya mishusire emoi, n'ebyekurura kutyo. Aleba abona okwo bili birungi.
26Nirwo yagambaiire ati, “Mbwenu tutonde abantu abalikutushusha, abalikushusha ichwe. Batware enfuru, n'enyanja, n'ebitunganwa, n'ebyekurura ebya buli ngeli, n'ensi yona.” 27Kityo Ruhanga atonda abantu abalikumushusha, abalikushusha wenene. Atonda omushaija n'omukazi. 28Abaha omugisha abagambira ati, “Muzare mukanye, mwijure ensi mugigelere. Mutware enfuru n'ebinyonyi, na buli kintu omu nsi ekina oburora ekigenda.” 29Agamba ati, “Nabaha ebimera byona omu nsi yona, eby'enjuma, buli muti ogw'ebiraba by'enjuma, bibe byakulya byanyu, 30Omu nsi omu buli nyamaishwa, buli kinyonyi, ebyekurura byona na buli kimera n'ebina oburora byona, nabibaha bibe byakulya byanyu. Biba bityo.” 31Ruhanga abona buli kintu ekyo yatonzire okwo kili kirungi muno. Buba bwankya buba bwaigoro, ekyo kiro kya mukaga.
اکنون انتخاب شده:
Embandizo 1: RHAY01
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ruhaya DC Bible © Bible Society of Tanzania, 2001.