Luka 22
22
Enaama y'okwita Yesu
(Mat 26:1-5; Mar 14:1-2; Yoh 11:45-53)
1Ekiro kikuru ky'Omukate Ogutatumbisiibwe, ekyetwa Pasika kikaba kiraliire kugoba. 2Aho abakuhani bakuru n'abeegesa b'Amateka bashangwa nibahiga okwo baraita Yesu. Kyonkai bakaba nibatina abantu.
Yuda naikiliza kwita Yesu
(Mat 26:14-16; Mar 14:10-11)
3Aho Sitani abanda Yuda Isikariote ayabaire ali omoiho omw'ikumi na babili. 4Akwata omuhanda agenda afumora n'abakuhani bakuru n'abakuru b'abalinzi ba Rwensinga okwo arashobora kumubakwasa. 5Bashemelerwa mara bagamba kumuha empiha. 6Kityo Yuda aikiliza mara ahiiga obushango bw'okumubakwasa embaga etaliho.
Yesu natekateka kulya Pasika
(Mat 26:17-25; Mar 14:12-21; Yoh 13:21-30)
7Omu biro bikuru by'Omukate Ogutatumbisiibwe nimwo baitiraga akataama k'okulya ahali Pasika. 8Aho Yesu atuma Petero na Yohana nabaragira ati, “Mugende mututekatekere Pasika twije tugilye.” 9Bamubaza bati, “Nogonza tugitekateke nkahai?” 10Abahorora ati, “Orwo murataha omu kigo muratanganwa omuntu ayetwekire emuga y'amaizi. Mumuhondere. Enju ey'aratahamu mube nimwo mutaha. 11Mugambire mukama w'enju muti, ‘Omwegesa nakuubaza ekiyumba ky'abagenyi mbali aralira Pasika hamoi n'abegesibwabe.’ 12Araboleka ekiyumba kihango omu gorofa kyatekatekirwe, omwo mube nimwo mushemeza.” 13Bagenda babishanga okwo yabibagambira. Batekateka Pasika.
Omukama nalya Pasika
(Mat 26:26-30; Mar 14:22-26; 1Kor 11:23-25)
14Orwo esaa yagobire, Yesu ashuntama n'abegesibwabe kuragira. 15Abagambira ati, “Mbaire nayegombire kulya Pasika hamoi nainywe ntakashasire. 16Mbagambirege, tindishuba kugilya rundi kuhika orwo elimanyika enshonga yayo omu Bukama bwa Ruhanga.” 17Akwata ekikompe. Kayamazire kusiima agamba ati, “Mutore ekikompe eki munyweho inywena. 18Kambagambire: Tinkishuba kunywa divai kulemwa kugoba orwo Obukama bwa Ruhanga buligobelera.” 19Akwata n'omukate. Kayamazire kusiima, agubegura, agubaha nagamba ati, “Ogu mubili gwange ogulikwija kutambilirwa inywe. [Mukorega mutyo okunyijukiraho.” 20Kabamazire kuragira akwata ekikompe nagamba ati, “Eki kikompe ky'obwamba bwange oburashesheka aha rwanyu, niyo ndagano empya y'obwamba bwange.] 21Kyonkai muraleba, alikwija kumbanja ataire omukono aha meza nitulya hamoi. 22Omwana w'Omuntu naija kuba nk'okwo kyakahangirwe. Kyonkai alikwija kumubanja alibona!” 23Aho abegesibwa babanza kubazangana bonene bonkai, kumanya n'ohai omuli bonene alikwija kukora atyo.
Obukuru bw'omwiru
24Omu begesibwa haimukwamu empaka, benzire kumanya omukuru kushaaga bona n'ohai. 25Yesu abagambira ati, “Abakama b'abanyamahanga abatwarwa babo babatwaza eikama. Kandi abatwazi benda kwetwa ‘Ngonza z'abantu.’ 26Kyonkai omuli inywe bitaliba bityo. Omukuru wanyu bwoli abe n'iwe aba muto wanyu bwoli. Omutwazi abe mukozi wanyu. 27N'ohai omukuru kushaaga ondijo: Ayashuntama kulya anga omukoziwe? Manya omukuru n'ogwo ayashuntama kulya. Kyonkai inye omuli inywe mba mukozi.
28“Inywe ninywe mwangumireho omu matangwa gange. 29Nk'okwo Tata yampaire obukama nanye kwakwo nimbubaha, 30mwije omu bukama bwange mulye, munywe, mushuntamire enketo muramure amahanga 12 ga Isiraeli.
Yesu nabasha okwo Petero aramwetonga
(Mat 26:31-35; Mar 14:27-31; Yoh 13:36-38)
31“Simoni, Simoni! Sitani ashabire muno kuberura nk'engano. 32Kyonkai inye nkushabiire okwesiga kwawe kutakuyuga. Kandi iwe k'oraba wangarukireho, barumuna bawe orabagumisa.” 33Petero agambira Yesu ati, “Mukama wange, inye nibatufunga hamoi, n'okufa nitufa hamoi.” 34Yesu agamba ati, “Kankugambire Petero, kir'eki enkoko etakakokoromire, oraba wanyetongire kashatu okw'otalikummanya.”
Enfulebe, omufuko n'embanda
35Yesu abaza abegesibwabe ati, “Orwo nabatumire mukagenda mutaina nfulebe ya mpiha anga mufuko anga nbiratwa, mwina ekyababuzireho?” Bahorora bati, “Tikiliho.” 36Aho abagambira ati, “Mbwenu araba aina enfulebe y'empiha agikwate; n'omufuko kutyo. Kandi ataina mbanda aguze ebeboye agure embanda. 37Kambagambire, ekyahandikirwe kyaija kugobeelera omu birabaho, bati, ‘Bakamukwatirana n'abafakare.’ Manyasi ebyo bampandikireho nibija kugobeelera.” 38Abegesibwa bagamba bati, “Rugaba, waitu leba embanda niz'ezi ibili.” Yesu abagambira ati, “Katulekelere aho.”
Yesu nashoma enshara aha Ibanga ly'Emizeituni
(Mat 26:36-46; Mar 14:32-42)
39Yesu aturuka, agya aha Ibanga ly'Emizeituni nk'okwo yakagiraga. Abegesibwabe bamuhondera. 40Kayagobireyo abagambira ati, “Mushome enshara, mutakugwa mu bilengeso.” 41Abarugaho akatambi akasaine mbali wakurasha eibare likagoba, abandama, ashoma enshara ati, 42“Tata, k'oraba noyenda onjune ekikompe eki. Kyonkai tikwo inye ndikwenda, shana okwo iwe olikwenda kibe nikwo kiba.” [ 43Aho omumalaika aruga omw'iguru amubonekera kumugumisa. 44Kayabaire ali omu kubanganwa omwoyo ashoma enshara n'amani gangi kushagaho. Ahitana empita elikushusha amatonya g'obwamba, empita egyo emagalika ahansi.] 45Kayarugire kushoma enshara, agoba abegesibwabe ashanga banagiziibwe obujune. 46Ababaza ati, “Kiki nka mwanagira? Mwimuke mushome enshara mutaija mukagwa omu bilengeso.”
Yesu nakwatwa
(Mat 26:47-56; Mar 14:43-50; Yoh 18:3-11)
47Yesu kayabaire akyali omu kugamba atyo, aijwa embaga eyebembeirwe omuntu alikwetwa Yuda, omoiho omw'ikumi na babili. Ailira ahali Yesu kumunywegera. 48Kyonkai Yesu amubaza ati, “Iwe Yuda, nonywegera Omwana w'Omuntu kumubanja?” 49Abo yabaire ainabo kabaaboine ebyaija kubaho, babaza Yesu bati, “Rugaba, waitu tutemese embanda?” 50Omuli bonene harugwamu omoi agiteza omwiru w'Omukuhani Nyamukuru amutemaho okutwi kwa bulyo. 51Kyonkai Yesu amugambira ati, “Lekelera aho!” Akwata omwiru ogwo okutwi amukiza. 52Yesu abaza abakuhani bakuru, n'abakuru ba Rwensinga, n'abagurusi ababaire bamuzinzire, ati, “Mwanzinda nk'omushuga, mwaija n'embanda n'enkoni z'erungu? 53Orwo nkasiiba nainywe buli kiro omuli Rwensinga timukankwataga. Kyonkai mbwenu esaa yanyu niy'egi orwo mwina amani g'omwilima.”
Petero nayetonga Yesu
(Mat 26:57-58,69-75; Mar 14:53-54,66-72; Yoh 18:12-18,25-27)
54Bakwata Yesu bamukurukumbya bamutwete ow'Omukuhani Nyamukuru. Petero amuhondera nasigara enyuma. 55K'abantu babaire bahembire omuliro omu ndaragati ya nyakabuga, bakashuntama kwota, Petero nawe abashuntamamu. 56Omuzana kayamuboine okwo ashuntamire aha muliro, amulebage amwekomya, agamba ati, “Omushaija ogu nawe yaba aina Yesu.” 57Kyonkai Petero ayetonga okwo yaba ainawe, agamba ati, “Iwe mukazi, Yesu ogwo tindikumumanya.” 58Ahanyuma kake omuntu ondijo nawe amubona, agamba ati, “Naiwe kwakwo oli wabo.” Kyonkai Petero ahorora ati, “Iwe mushaija, inye tindi wabo.” 59Esaa ehinguraho nk'emoi, omuntu ondijo aija ataho akakumu ati, “Mazima, omushaija ogu nawe yaba aina Yesu; aha rw'okuba Munyagalilaya.” 60Ndi Petero ahorora ati, “Iwe mushaija tindikumanya by'olikugamba.” Orwo yabaire akyagamba atyo, enkoko ekookoroma. 61Omukama akubuka aleba Petero. Petero aijuka ekigambo ky'Omukama, okwo yabaire amugambiire ati, “Kir'eki enkoko etakakokoromire, oranyetonga kashatu.” 62Nikwo Petero kuturuka aheru akalira muno.
Yesu nibamujaamya nibamutera
(Mat 26:67-68; Mar 14:65)
63Abashaija ababaire bakwete Yesu bamujaamya, bamutera. 64Bashuba bamubunda aha maisho bamugambira bati, “Baasha! Ayakutera n'ohai?” 65Bamurogotaho n'ebindi bingi, bamushekelera.
Yesu omu rukiiko rw'abagurusi
(Mat 26:59-66; Mar 14:55-64; Yoh 18:19-24)
66K'obwire bwakeire abagurusi b'embaga bahurura, abakuhani bakuru n'abeegesa b'Amateka babulimu. Bamutwara omu rukiko, bagamba bati, 67“K'oraba oli Kirisito otugambire.” Yesu abagambira ati, “Kandabagambira timunyikilize, 68kandi kandababaza timumporore. 69Kyonkai kuruga mambwenu Omwana w'Omuntu naija kusingira aha bulyo bwa Ruhanga Omushoborabyona.” 70Bona bamubaza bati, “Ahosi iwe oli mwana wa Ruhanga?” Yesu abahorora ati, “Inywe n'inywe mwakigamba okwo ndiwe.” 71Bagamba bati, “Tukyayetaga bujuliziki obushagiire aha? Ekyo yagamba twakyehulilira nikiruga omu kanwake.”
اکنون انتخاب شده:
Luka 22: RHAY01
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Ruhaya DC Bible © Bible Society of Tanzania, 2001.