Luk 14
14
Giĩ goon a busu nya boo
1 *Susu ǹ pii kɔ́n pinaa, Yezu woo *Fariziɛ̃n goledɛnaa goon a piɛ, màn bii ǹ bǎã nɛ. Min mɛnɛn bɛ́ walan bɛn man nə́ goã giɛ a gɔn li. 2Giĩ goon nə́ goã golee ne a yɔrɔ-a, busu kɔ́n ná a ganaa, a ná a gɔ̀nɔn yii yuyu. 3Yezu boo saa á nɔ̀n da landa sii-daraalin laanka Fariziɛ̃n la mà ǹsɛn landa siin lɛn tá toɛ min nə busulə kaka kɔ *susu ǹ pii pinaa, hinlaa ǹ ba lɛ koe wa?
4Sɛnɛ, minin mɛnɛn nə goã a li, bɛn na a lɛ si wa. Yezu tɔ́n busulə lɛ kũ, a ná a busu nya, á da á woo. 5#Mat 12.11 Bɛ kio á pɛ ǹ nɛ: «Bɛ̀ nɛgiĩ hinlaa dii tá ka goon lon, yǎa a mɛnaa tù ni, táa a n boe fufuu, haalɛ ta susu ǹ pii pinaa nɛ. A bie miɛ̃ wa?»
6Ǹ boo la ǹ nə́ bɛa sii kɛ lɛ a boo binyəə kɔ la wa.
Giã kio bǎã-n boo
7Minin mɛnɛn bɛ́, ǹ nə́ daa màn bii ǹ bǎã lɛ nɛ, Yezu boo giməə goon da bɛn manɛ, a giala, á n yiri kɔ li, mà maǹ nyɛɛnaan ǹ bǎãn boe ǹ nə́ giɛ̃ ǹ nɛ. Á pɛ ǹ nɛ:
8 #
Suu 25.6-7
– Bɛ̀ ǹ nə́ lɛ dia ka mɛn la lɔ tii kũ ǹ zɔ́n-a, n baran wo giã bǎã bibinaa nɛ wa. Bɛ bie wa bɛ̀ ǹ nə́ lɛ dia min kɔsɔ dɔ la, bɛ n guguru nsɛ nɛ, 9min mɛn bɛ́ á lɛ dia ka dinin paanan la, bɛ tɔ́n kiɛ̃ a da pɛ nɛ mà n yoo n nə n bǎã kɔ. Haya, ma n die yui kəni ka sìi ni n wo giã kio. 10Bɛ̀ ǹ nə́ lɛ dia n la, wo giã kio, màn mɛn bɛ́ toɛ, min mɛn bɛ́ á lɛ dia n la, bɛ̀ bɛ́ daa á pɛ n nɛ: «Maa giaára ganaa, n zɔ̃ n dɔ nyɛɛnɛ», sonbore, bɛ n die zín we n nɛ min tumaa yɔrɔ-a màn bii ǹ bǎã lɛ nɛ. 11#Mat 23.12; Luk 18.14 A giala min woo min, a tá n din siɛ lon, Lawa á re bɛ gisĩ, min mɛn bɛ́, n din boɛɛn koe, Lawa á re bɛ siɛ lon.
Doobaan bíi màn-bii ganaa boo
12Giĩ mɛn bɛ́ á lɛ dia la màn-bii-a ke, Yezu pɛ a dɔ nɛ: «Bɛ̀ n tá re màn-bii koe minin la penleen hinlaa tèlò-n, n baran lɛ dia n giaáran la wa, ka n dɔɔ̃nɔn nɛ, ka n tɔrɔn nɛ, ka n miãkɛn pàãman nɛ wa. Bɛ bie wa bɛn man die wusii ǹ lɛ dia n dɔ la màn-bii-a, a saraa lɛ dɔ-n ka bɛ-n gɔrɔ. 13Bɛ̀ ń minin bíi zɔ́n màn-bii ganaa, lɛ dia doobaan la ka bɔlɔkan nɛ ka siməə wolen ne ka yii tere-an nɛ. 14A laan màn kɔ́n ba bɛn lon ǹ tá re n bǐɛ̃ lɛ dòo sarɛɛ-n wa, barka tá bɛ nɛ, a giala, Lawa din nə die n bǐɛ̃ lɛ dòo sarɛɛ min peperen yii kaa pinaa.»
Yezu màn-bii gole mɛn boo da
(Mat 22.1-10)
15Bɛa boon kɛn lɛn ma kio, giĩ goon kɔ́n dɔ n màn bii ǹ bǎã lɛ nɛ, bɛ́ pɛ Yezu ni mà min mɛn bɛ́ re goɛ̃ *Lawa a kiibaa ǹ bǎã a màn bii ǹ bǎã kɛ nɛ, barka á re n diɛ bɛ ganaa.
16Yezu pɛ-n kɛnɛn: «Giĩ goon ne, á màn-bii gole zɛnaa, á min gigiã bíi a ganaa. 17Màn lɛ a bii biikoo bɛ́ á dɔ, giĩ lɛ ná a dí-nyali dia, a bɛ́ á min mɛnɛn bíi, mà a pɛ bɛn manɛ mà ǹ daa mà màn tumaa nə́ n yɔrɔ bɔ á nya. 18Sɛnɛ, ǹ tumaa pɛ kɔn kio ganaa, mà giĩ lɛ sabarɛbaa. Ǹ bibinaa mà dí-nyali lɛ ganaa mà asɛ na á wuru goon pii, mà asɛ doamaa nɛ a wo ga bɛ ganaa. Mà asɛ na a nyankoe a sabarabaa. 19Ǹ goon dɔ mà asɛ na á buu kɔsɔ ǹ dii fù pii, mà asɛ n woe ǹ kiɛ di-a á giɛ ǹ ganaa. Mà asɛ na a nyankoe a sabarɛbaa. 20Ǹ goon kɔsɔ dɔ, mà asɛ na á lɔ tii saa sisia, mà bɛ lɛ nɛ, asɛ a boe la a wo lɛ-dia lɛ-a wa.
21Dí-nyali lɛ wusoo á woo bɛa boon kɛn lɛn pɛ a goledɛnaa nɛ. Kiondɛnaa lɛ foo tɔ́n yoo, á pɛ a dí-nyali lɛ nɛ mà a wo fufuu kiwi lɛ a zaman bǎãn nɛ ka a ziin ni, a da kun ka doobaan nɛ ka bɔlɔkan nɛ ka yii tere-an nɛ ka siməə wolen ne. 22Bɛ kio, dí-nyali lɛ wusoo á daa pɛ mà goledɛnaa ganaa, mà a bɛ́ mà sii mɛn, mà bɛ nə́ n zɛnaa. Sɛnɛ, mà bǎã tá tɔn na a tan. 23Goledɛnaa tɔ́n pɛ a dí-nyali lɛ nɛ mà a wo don ziin la ka dù gɔrɔn lɛ-an nɛ, a minin kũ ka pàã nɛ ǹ daa, màn mɛn bɛ́ toɛ, kion lɛ pã. 24A giala mà asɛ n pii ǹ ni, mà bibinaa a bíi wolen kɛn lɛn kɔ́n ba re asɛ a màn-bii lɛ nɛ̀n diɛ wa.»
N piã ka sii yii ni n kɔ Yezu lɛ
(Mat 10.37-38)
25Zaman gole na á goã koe zii lɛ kun ka Yezu ni. Á n yɔrɔ bɔyaa á pɛ ǹ nɛ: 26#Mat 10.37 «Bɛ̀ min mɛn daa kɔ masɛ lɛ, bɛ̀ a masɛ soɛ kɔ ǹ di-n wa, ka ǹ dan nɛ, ka a lɔ nɛ, ka a nɛnyaanan nɛ, ka ǹ dɔɔ̃ngiĩn ni ka ǹ dɔɔ̃nlɔn nɛ wa, haalɛ a dinmaa, ǹ dɛnaa ba boe la a masɛ a kialandɛnaa baa wa. 27#Mat 10.38; 16.24; Mar 8.34; Luk 9.23 Min mɛn bɛ́, a ba n yii boe a din-a masɛ a lɛa, a fuu si a ganaa, a kɔ masɛ kio lɛ wa, bɛa dɛnaa ba boe la a masɛ a kialandɛnaa baa wa.
28Bɛ̀ min tá re sanabolo doe, ǹ dɛnaa n giɛ̃ tán bɔrɔ, a na a giɔ̀mɔ nimi a kaa kun. Bɛ̀ á re boe la a dɔ a nya, a tɔn na a dí giala kɔ. Kaa die na a ba bɛ zɛnɛɛ wa? 29Bɛ̀ a ná a giala wɔ, a ná a boo la á dɔ á nya wa, min mɛnɛn tumaa bɛ́ re yii, bɛn man die yaa we a ganaa, 30maǹ die pii mà giĩ kɛ ná a kion gòã daa, a boo la á dɔ á nya wa.
31Bɛ̀ kii á die woe zia biɛ ǹ miã kii kɔsɔ ganaa, a n giɛ̃ tán bɔrɔ, a ga a din pàã ganaa. Bɛ̀ á dɔ̃ mà asɛ á boe la ka sɔraasi duu fù ni, a n da ǹ miã kɛ lɛ die ka sɔraasi duu fuə ne, a n woe. Kii mɛn na a ba bɛ zɛnɛɛ wa? 32Bɛ̀ a ba boe la wa, a n bɛa kii goon kɛ lɛ toɛ sɔsɔɔ, a minin dia a li ǹ na a nyankɔ mà a daa ǹ kiɛ̃ zia lɛ la ǹ kɔn wɔ ma. 33Bɛa yɔrɔ kɛ lɛ la, min woo min tá ka bii, a ná a ba n yii boe a gɔn màn-a wa, bɛ ba boe la a masɛ a kialandɛnaa baa wa.
Kialandɛnaa na á kɔnbɔ ka yìsi ni
(Mat 5.13; Mar 9.50)
34Taãn nɛ yìsi n màn sonbore lɛa. Sɛnɛ, bɛ̀ yìsi a kɔɔ̃nbaa nə́ n bɔ a nɛ, maǹ wàa zɛnɛɛ a tɔn wusoo a kɔɔ̃n kɔ? 35A ba màn kɔ́n bǐɛ̃ koe tán nɛ wa, a ba wuru bǐɛ̃ kɔ ǹ màn dɔ din biɛ wa. A là n ka zũ kanaa nɛ. Too bɛ́ ka lon ka n too kɔ koe!»
انتخاب شده:
Luk 14: SBPE2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.