NAANAA 13
13
Abramu kɛ̃kɔ̃ana kũ Lutuo
1Akũ Abramu bò Misila à sù Nɛgɛvi kũ a nanɔo kũ a aruzɛkɛnɔ pínki kũ Lutuo. 2Abramu bi aruzɛkɛdemɛ, à pɔ́kãdenɔ vĩ dasi kũ andurufuuo kũ wuraao. 3Bona Nɛgɛvi à sɔ̃̀sɔ̃ gu kũ guo ari à gɛ̀ɛ à kào Bɛtɛli, gu kũ à bùraa kàtɛn káaku Bɛtɛli dagura kũ Aio, 4gu kũ à sa'oki bòn yã. Akũ à Dikiri sìsi gwe.
5Lutu dìgɔ̃ tɛ́ kũ Abramuo lɛɛlɛ. À sãnɔ kũ zùnɔ kũ bizakutanɔ vĩ se. 6Ń pɔ́kãdenɔn dasi, gu pìi sɛ̃̀ dí mɔ́ḿma ń pínkiro. A yã mɛ́ à tò oni fɔ̃ ògɔ̃ kú gu dokɔ̃nɔ lɛɛlɛ doro. 7Akũ lɛ́kpakɔ̃a gɛ̃̀ Abramu pɔ́dãrinɔ kũ Lutu pɔ́dãrinɔ dagura. Zĩ kũ̀a sɔ̃ Kanaanɔ kũ Pɛrizinɔn kú bùsuu pìn. 8Akũ Abramu pì Lutunɛ: À mana lɛ́kpakɔ̃a gɔ̃ kú ó daguraro, ke ma pɔ́dãrinɔ kũ n pɔ́dãrinɔ dagura, zaakũ danɛnɔn ó ũ. 9Ǹ bùsu gwa da n arɛ pínki. Ò kɛ̃kɔ̃a. Tó n gɛ ɔzɛi, mani gɛ́ ɔplai. Tó n gɛ ɔplaimɛ sɔ̃, mani gɛ́ ɔzɛi. 10Kũ Lutu gu gwà, à è Yoda guvutɛ pínki mɔtɔ vĩ manamana. Ari Dikiri gɔ̃ gɛ́ Sɔdɔmu kũ Gɔmɔrao kakatɛ, guvutɛ pì de lán Dikiri swadakoo bà, lán Misila bùsuu bà, ari à gɛ̀ɛ pɛ́ Zoaa. 11Akũ Lutu Yoda guvutɛ sɛ̀ pínki. Ò kɛ̃̀kɔ̃a, akũ Lutu dà zɛ́n à tà ifãboki kpa. 12Abramu gɔ̃̀ Kanaanɔ bùsun, Lutu sɔ̃ à kú Yoda guvutɛ wɛ̃tɛnɔ dagura. À bùraa kàtɛ Sɔdɔmu sarɛ. 13Sɔdɔmudenɔ sɔ̃ ò vãni, durunnakɛri sànɔmɛ ń ũ Dikiri kĩnaa.
14Lutu tanaa gbɛra Dikiri pì Abramunɛ: Gu kũ ń zɛ́n ǹ wɛ́ sɛ́ ǹ gugbãnduru kũ gɛ̀nɔmidɔkio kũ ifãbokio kũ ifãlɛtɛo gwa. 15Zĩtɛ kũ n è pínki, ma kpàmma, anigɔ̃ de mɔkɔ̃n kũ n burinɔ pɔ́ ũ ari gɔrɔ sĩnda pínki. 16Mani tó n burinɔ kɛ dasi lán bùsu'atɛ̃ bà. Tó gbɛ̃ke ni fɔ̃ à bùsu'atɛ̃ naro, de ani fɔ̃ à n burinɔ naro. 17Ǹ futɛ ǹ gɛ̃ bùsuu pìn ǹ a gbã̀na kũ a yàasaao gwa, zaakũ ma kpàmmamɛ. 18Abramu fùtɛ à gɛ̀ɛ à vùtɛ Mamare gbiri lí kũ ò kú Ɛblɔnunɔ sarɛ, akũ à Dikiri gbagbaki bò gwe.
انتخاب شده:
NAANAA 13: BB2005
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bisã Bible © SIM International, 2005.