YOHANES 1
1
Wisara ko mangonggo u puwawiahi
1Su panitakenge, suhoro u dunia niriadi; seng tuwei pia Wisara.
Wisara e'e ene dingang u Mawu Ruata
Dang Wisara e'e l᷊ai musul᷊ung u Mawu Ruata.
2Borong bou titae I Sie seng nuhundingang u Mawu Ruata
3Kaul᷊ie nariadi bo I Sie,
dang bou patiku ko ene,
takoae sarang simbau ko nikoa su l᷊ikuri Sie.
4Wisara e'e ko wanggili u puwawiahi,#1:4: Wisara e'e ko wanggili u puwawiahi: arako Kaul᷊i u patiku ko niriadi, pia wiahi su l᷊al᷊ung u masimbau dingang u Wisara.
dang puwawiahi ko makaonggo u kasasua su taumata.
5Kasasua e'e suminang su l᷊al᷊ung u kararundung,
dang kararundung e'e ta makapate kasasua.
6 #
Mat. 3:1; Mrk. 1:4; Luk. 3:1-2 Pia taumata ko nusumongo ko niroi u Mawu Ruata,
arenge i Yohanes.
7I sie nusumongo nuhabari kasasua e'e,
tadeau apang taumata mangimang.
8I sie sisane wal᷊inge kasasua e'e,
i sie kitang mul᷊ahabari u kasasua e'e.
9Kasasua kahingang ko mupakasua apang taumata,
seng nasongo su dunia.
10Wisara seng ene su dunia,
dunia nariadi bo I Sie,
kitang dunia wugha ngi Sie
11I Sie nusumongo su wanua-E sisane
kateho bangsa-E ta nanarima I Sie.
12Kitang pia l᷊ai taumata ko nanarima I Sie
dang mangimang si Sie;
i sire e'e ninggilenang-E haki makoa ana u Mawu Ruata,
13Ko nipahinding wal᷊inge bou taumata,
watu'u puwawiahi ko wuhu e'e asal᷊i ko bou Mawu Ruata.
14Wisara seng nariadi taumata,
I Sie natana su tal᷊oara i kite,
dang i kite seng nakawua kawawantughi-E.
Kawawantughi e'e nitarima-E
kere Ana I Yamang mang simbau.
Bo I Sie i kite makawua Mawu Ruata
dang kakindaghi-E si kite.
15I Yohanes nusumongo kere saksi-E,
I sie nuhabari:
“Ko i'i I Sie daku nihabari:
I Sie sarung sumongo samuri ngu ia,
kateho I Sie nangilembo l᷊abo bou ia,
watu'u suhoro ia ene, I Sie seng tuwei ene.”
16I Sie napene u kakindaghi;
takoae suenge
I Sie nangal᷊amati si kite.
17Tita ngu Mawu nitarima i kite bo i Musa.
Arawe kakindaghi dang kasasatia ngu Mawu Ruata
nil᷊ahe bou l᷊al᷊ung I Yesus Kristus.
18Takoae ko seng bou nakawua Mawu Ruata,
su l᷊ikuri Ahusi Yamang ko mang simbau,
ko musul᷊ung I Yamang dang marike kahingang si Sie.
Ko I Sie seng nupakal᷊ahe I Yamang si kite.
Kasaksiang i Yohanes
(Mat. 3:1-12; Mrk. 1:1-8; Luk. 3:1-18)
19Manga mangangawasa ngu tau Yahudi su Yerusalem nundoi u manga imam l᷊au manga tau Lewi tamai sarang koa i Yohanes dang pukina si sie, “I Kau i'i ko i sai?”
20I Yohanes nangaku mal᷊ahe, “Ia wal᷊inge ratu mananal᷊amati.”
21 #
Sau. 18:15, 18; Mal. 4:5 I sire nukina, “Boko kere'e i kau ko i sai? I kau i Elia?”
“Wal᷊inge” sasimbahi Yohanes.
“Apa i kau Nabi?”#1:21: Nabi: Sie ko harapi sarung sumupu dang muhabari sasongo ngu Ratu mananal᷊amati. i sire nukina l᷊ai.
“Wal᷊inge” sasimbahie.
22“Boko kere'e, habariete si kami ko i sai i kau i'i,” Angkung i sire, “tadeau i kami makasimbahi si sire ko nundoi i kami. Apa didato ngu hal᷊i u watangengu?”
23 #
Yes. 40:3
I Yohanes nusumimbahi, “Ia i'i i sie ko seng niul᷊i i nabi Yesaya:
‘Taumata ko nunggo su tana l᷊inggi:
Pakateneko l᷊al᷊eng guna ngu Mawu.’ ”
24Manga taumata ko niroi u tau Farisi#1:24: Manga taumata ko niroi u tau Farisi: arako “I sire ko seng niroi e'e ko tau Farisi” arako “i sire”. 25nukina, “Boko i kau wal᷊ingewe Ratu Mananal᷊amati, wal᷊inge i Elia, wal᷊inge l᷊ai nabi, nakurawe i kau nanahani?”
26I Yohanes nusumimbahi, “Ia nanahani dingang u ake. Kateho su tal᷊oara i kumu pia taumata ko i kumu wugha 27I Sie nusumongo samuri ngu ia; kateho sarang mamuka tal᷊i ngu sapatu-E ia ta hinonge.”
28Kaul᷊i e'e nariadi su Betania, su simbuka ngu raki bou sal᷊uhi Yordan tampa i Yohanes nanahani.
Ahusi Domba ngu Mawu Ruata
29Ndai mal᷊ou, i Yohanes nakawua si Yesus nasongo sarang koae, bou e'e i Yohanes nangul᷊i, “Tuhungete Ahusi Domba ngu Mawu Ruata, ko mangumu dosa ngu dunia. 30Seng I Sie ko daku nihabari sarung sumongo samuri ngu ia, kateho nangilebe l᷊abo bou ia, watu'u suhoro u ia nipahinding, I Sie seng tuwei ene. 31Horo ia wugha ngi Sie, sumbal᷊i ia nusumongo manahani dingang u ake tadeau komol᷊ang u Israel matitong I Sie.”
32I Yohanes l᷊ai nangonggo u kasaksiang i'i, “Ia nakawua Roh u Mawu Ruata nul᷊umintu bou l᷊angi kere paluma bou e'e natana si Sie. 33Su tempo e'e ia mborong wugha ngi Sie. Kateho Mawu Ruata ko nuparenta si sia panahani dingang u ake seng nangul᷊i si sia, ‘Boko i kau makawua Roh u Mawu Ruata l᷊umintu, bou e'e natana su singkatau, ko I Sie e'e sarung manahani dingang u Roh u Mawu Ruata.’ 34Ia sisaneku seng mbuae nakawua si Sie,” Angkung i Yohanes, “dang ia nangonggo u kasaksiang himoneu ko I Sie Ahusi Mawu Ruata.”
Manga Tumatuhu I Yesus ko kahimotongange
35Ndai nal᷊ou i Yohanes sau ene su tampa e'e dingang u tumatuhu-E sire rua. 36Su tempo i sie nakawua si Yesus nusumahe, i sie nangul᷊i, “Tuhungete seng e'e! Ahusi Domba ngu Mawu Ruata.”
37Tumatuhu i Yohanes rarua e'e nakaringihi e'e, turusi tamai nutumuhu si Yesus 38I Yesus nuwihu sarang l᷊ikuri, dang nakawua si sire rua katuhue si Sie. I Sie nukina, “Apa reakeng i rua?”
Sasimbahi i sire rua, “Rabi, su apa i Rabi natana?” (Rabi mangal᷊enge meteri.)
39I Yesus nangul᷊i, “Maite tuhunge ngi rua.” I sire rua tamai dingang I Sie dang nakawua su apa i Sie natana. Tempo e'e pukul᷊i pa wawul᷊aeng. L᷊ou e'e i sire natana singkahindo dingang-E
40Singkatau bou i sire rua ko seng mbuae nakaringihi apang ko niul᷊i i Yohanes bou e'e natamai nutumuhu si Yesus, I sie e'e ko i Andreas ana u singkatau ngi Simon Petrus. 41Masahawu-sahawu i Andreas nundea si Simon, ana u singkataunge, dang nuhabari si sie, “I kami seng nusuma dingang I Mesias!” (Mesias musul᷊ung I Kristus: Ratu Mananal᷊amati.) 42I Andreas nangunturi si Simon sarang koa I Yesus. I Yesus nutaeri si Simon, wuhue nangul᷊i, “I kau Simon ana i Yona. I kau sarung isigho si Kefas.” (Kefas musul᷊ung i Petrus, mangal᷊enge: wul᷊uri watu.)
I Yesus nukui si Filipus l᷊au i Natanael
43Ndai nal᷊ou I Yesus namutusi makoa sarang Galilea. I Sie nusombang i Filipus, dang nangul᷊i si sie, “Maite tuhu si Sia!” 44I Filipus asal᷊ie bou Betsaida, tampa katanakeng i Andreas l᷊au i Petrus. 45I Filipus nusuma i Natanael dang nangul᷊i si sie, “I kami seng nusuma u taumata ko nisigho ngi Musa su l᷊al᷊ung u Buki Tita ngu Mawu Ruata, dang ko nihabari u manga nabi. I Sie e'e I Yesus bou Nazaret, ana i Yusuf.”
46Kateho i Natanael nusumimbahi, “Apa botonge pia simbau ko mapia nusumongo bou Nazaret?”
Sasimbahi Filipus, “Maite i kau sisane ngu putuhung”
47I Yesus nakawua si Natanael nusumongo, wuhue nangul᷊i u hal᷊i i sie, “Tuhungete, e'e tau Israel tutunge. Takoae manga hal᷊i l᷊eo si sie.”
48I Natanael nukina si Yesus, “Kirapa I Tuang nakakil᷊al᷊a si sia?
I Yesus nusumimbahi; su horo i Filipus nukui si kau, Ia seng nakawua si kau su pung u kau ara e'e.”
49I Natanael nangul᷊i, “Tuang Guru, i Tuang ko Ahusi Mawu Ruata! Ko I Tuang Ratu ngu tau Israel!”
50I Yesus nangul᷊i, “I kau mangimang; kitang ual᷊ingu Ia nangul᷊i Ia seng nakawua si kau su pung u kau ara e'e? I kau sarung makawua kaul᷊i hal᷊i ko mborong nangilembo l᷊abo bou e'e!” 51#Kar. 28:12“Tingari, pangimangte i kau sarung makawua l᷊angi mawuka, dang apang malaikati u Mawu Ruata lintu awi su tingo ngu Ahusi Taumata.”
انتخاب شده:
YOHANES 1: PLT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید