ငဝ်ႈၵမ်ႇၽႃႇ 2
2
1ၼင်ႇၼၼ်လႄႈ ၸႃႉၸဵမ်ၵၢင်ႁၢဝ်လိၼ်မိူင်းဢိၵ်ႇတင်းၶိူင်ႈပိူင်ၵႃႈမီးတင်းသဵင်ႈတင်းလူင်ယဝ်ႉၸွတ်ႇတူဝ်ႈလႄႈမီးယူႇဢေႃႈ။- 2မိူဝ်ႈဢၼ်ႁွတ်ႈထိုင်ဝၼ်းသတ်ႉတမႃႉၼၼ်ႉၸိုင်၊ ၽြႃးပဵၼ်ၸဝ်ႈယဝ်ႉၸွတ်ႇတူဝ်ႈ ၵႃႈဢၼ်ႁဵတ်းပဵၼ်ၼၼ်ႉလႄႈ လွင်ႈတၢင်းဢၼ်ႁဵတ်းပဵၼ်ၼၼ်ႉ ယဝ်ႉၸွတ်ႇတူဝ်ႈယဝ်ႉၸင်ႇ၊ ၼႂ်းဝၼ်းၼၼ်ႉမၼ်းၸဝ်ႈယူႇၼိမ်ၼိမ်သေဢေႃႈ။- 3ၽြႃးပဵၼ်ၸဝ်ႈပၼ်တၢင်းလီတီႈ ဝၼ်းသတ်ႉတမႃႉၼၼ်ႉလႄႈ ႁႂ်ႈမူတ်းၸၢင်ႇဢေႃႈ။ လွင်ႈမၼ်းၸမ်ႉ ၵွပ်ႈပိူဝ်ႈဢၼ်လွင်ႈတၢင်းဢၼ် မၼ်းၸဝ်ႈႁဵတ်းပဵၼ်ၵႃႈမီးတင်းသဵင်ႈတင်းလူင်ၼၼ်ႉ ယဝ်ႉၸွတ်ႇတူဝ်ႈလႄႈ ၼႂ်းဝၼ်းၼၼ်ႉ မၼ်းၸဝ်ႈယူႇၼိမ်ၼိမ်သေဢေႃႈ။
4လွင်ႈတၢင်းၸိူဝ်းၼႆႉၸမ်ႉ၊ ပဵၼ်ငဝ်ႈႁၢၵ်ႈဢထုၵ်ႉပတ်ႈတီႉၵၢင်ႁၢဝ်တင်းလိၼ်မိူင်း ၼႂ်းၶိင်ႇၵႃႇလႃႉ တၢင်းဢၼ်ၽၢၼ်ႇသၢင်းႁဵတ်းပဵၼ်ၼၼ်ႉ၊ ဝၼ်းဢၼ်ထႃႇဝရႃႉၽြႃးပဵၼ်ၸဝ်ႈ ႁဵတ်းပဵၼ်လိၼ်မိူင်း ဢိၵ်ႇတင်းၵၢင်ႁၢဝ်ၼၼ်ႉဢေႃႈ။- 5တူၼ်ႈၵႃႈႁႆႊၼႃး ဢမ်ႇပႆႇမီးၵႃႈတီႈလိၼ်သေတူၼ်ႈ၊ တူၼ်ႈၶဝ်ႈႁႆႊၼႃးဢမ်ႇပႆႇယႂ်ႇမႃးသေတူၼ်ႈ။ လွင်ႈမၼ်းၸမ်ႉ ထႃႇဝရႃႉၽြႃးပဵၼ်ၸဝ်ႈ ဢမ်ႇပႆႇႁႂ်ႈၽူၼ်တူၵ်းၵႃႈၼိူဝ်လိၼ်လႄႈ ၵူၼ်းဢၼ်တၵ်းႁဵတ်းႁႆႊႁဵတ်းၼႃးဢမ်ႇပႆႇမီးသေၵေႃႉသေၵူၼ်း။- 6ၵူၺ်းၵႃႈဢၢႆလိၼ်ဢွၵ်ႇၵႃႈတီႈလိၼ်လႄႈ ႁႂ်ႈၼႃႈလိၼ်တင်းသဵင်ႈတင်းလူင်ယမ်းဢေႃႈ။
7ဝၢႆးၼၼ်ႉ၊ ထႃႇဝရႃႉၽြႃးပဵၼ်ၸဝ်ႈဢဝ်မုၼ်ႈလိၼ်ႁဵတ်းၵူၼ်းလႄႈ ပဝ်ႇၸီႇဝႃႉဢသၢၵ်ႈသႂ်ႇ ၵႃႈၼႂ်းၶူႈလင်မၼ်းသေယဝ်ႉ၊ ၵူၼ်းၸင်ႇပဵၼ်သတ်ႉတဝႃႇ ဢၼ်ဢသၢၵ်ႈလိပ်းယူႇဢေႃႈ။
8ထႃႇဝရႃႉၽြႃးပဵၼ်ၸဝ်ႈၵေႃႈ၊ ၽုၵ်ႇသွမ်ႈသူၼ်ဢူးယဵၼ်ႇၽၢႆႇၼႃႈဝၼ်းဢွၵ်ႇ ၵႃႈတီႈဢေႇတိၼ်ႇသေယဝ်ႉ၊ ၶျႃးတီႈယူႇပၼ်တီႈၵူၼ်း ဢၼ်မၼ်းၸဝ်ႈႁဵတ်းၼၼ်ႉၵႃႈၼႂ်းတီႈၼၼ်ႈဢေႃႈ။
9ထႃႇဝရႃႉၽြႃးပဵၼ်ၸဝ်ႈ ႁႂ်ႈတူၼ်ႈဢၼ်ႁၢင်ႈလီဢၼ်လီၵိၼ်ၵူႈၸိူဝ်ႉၵူႈပိူင် ဢွၵ်ႇပဵၼ်မႃး ၵႃႈၼႂ်းလိၼ်ၼၼ်ႉဢေႃႈ။ ၵႃႈၼႂ်းၶိုင်ႈၵၢင်သူၼ်ဢူးယဵၼ်ႇၼၼ်ႉ၊ မီးတူၼ်ႈဢသၢၵ်ႈဢေႃႈ။ တူၼ်ႈဢၼ်ႁူႉၸႅင်ႈလွင်ႈဢၼ်လီလွင်ႈဢၼ်ဢမ်ႇလီၼၼ်ႉၵေႃႈမီးဢေႃႈ။
10ၼင်ႇႁိုဝ်တၵ်းႁႂ်ႈသူၼ်ဢူးယဵၼ်ႇၼၼ်ႉယမ်းၸိုင်၊ ၼမ်ႉႁွင်ႈႁွင်ႈၼိုင်ႈ ဢွၵ်ႇလႆၵႃႈၼႂ်းဢေႇတိၼ်ႇၼၼ်ႉလႄႈ တႅၵ်ႇသီႇသိၵ်ႈပဵၼ်ၼမ်ႉႁွင်ႈသီႇႁွင်ႈ ၵႃႈတီႈၼွၵ်ႈဢူးယဵၼ်ႇၼၼ်ႉဢေႃႈ။- 11ၼမ်ႉႁွင်ႈပထမႃႉၸမ်ႉ၊ လႆႈၸိုဝ်ႈၽီႉသူၼ်ႇဢေႃႈ။ ၼမ်ႉႁွင်ႈၼၼ်ႉလႆၵႂႃႇၵႃႈတီႈႁိမ်းမိူင်းႁႃႇဝီႉလႃႉ ဢၼ်မီးၶမ်းၼၼ်ႉတင်းႁူတ်ႈဢေႃႈ။- 12ၶမ်းမိူင်းၼၼ်ႉလီၼႃႇဢေႃႈ။ ႁၵ်ႉပတေႇလႃႉတင်းသႅင်ၸၢႆးၶႃးယွတ်ႇၵေႃႈမီးဢေႃႈ။- 13ၼမ်ႉႁွင်ႈတူႉတီႉယႃႉၸမ်ႉ၊ လႆႈၸိုဝ်ႈၵီႉႁုၼ်ႇဢေႃႈ။ ၼမ်ႉႁွင်ႈၼၼ်ႉလႆၵႂႃႇၵႃႈတီႈ ႁိမ်းမိူင်းၵူႉသႃႉတင်းႁူတ်ႈဢေႃႈ။- 14ၼမ်ႉႁွင်ႈတႃႉတီႉယႃႉၸမ်ႉ၊ လႆႈၸိုဝ်ႈႁီႉတၵေႇလႃႉဢေႃႈ။ ၼမ်ႉႁွင်ႈၼၼ်ႉလႆၵႂႃႇၵႃႈတီႈၽၢႆႇၼႃႈမိူင်းဢႃႇသူႉရီႉဢေႃႈ။ ၼမ်ႉႁွင်ႈၸတုၵ်ႉထႃႉ ၸမ်ႉ၊ လႆႈၸိုဝ်ႈ ဢူႉၽရတ်ႉဢေႃႈ။
15မိူဝ်ႈၼၼ်ႉထႃႇဝရႃႉၽြႃးပဵၼ်ၸဝ်ႈ ဢဝ်ၵူၼ်းလႄႈ ဝႆႉၵႃႈၼႂ်းသူၼ်ဢူးယဵၼ်ႇၼၼ်ႉ ႁႂ်ႈလႆႈပႂ်ႉတူၺ်းပႂ်ႉႁဵတ်းဢေႃႈ။- 16ထႃႇဝရႃႉၽြႃးပဵၼ်ၸဝ်ႈဝႆႉပိင်းၺၢပ်ႈတီႈၵူၼ်းၼၼ်ႉလႄႈဝႃႈ၊ မႂ်းမီးဢၶႂၢင်ႉဢၼ်လႆႈၵိၼ်တူၼ်ႈၵႃႈဢၼ်မီးၵႃႈၼႂ်းသူၼ်ဢူးယဵၼ်ႇၼႆႉ တင်းသဵင်ႈတင်းလူင်ဢေႃႈ။- 17ၵူၺ်းၵႃႈ တူၼ်ႈဢၼ်ႁူႉၸႅင်ႈလွင်ႈဢၼ်လီ လွင်ႈဢၼ်ဢမ်ႇလီၼၼ်ႉၸိုင်၊ မႂ်းဢမ်ႇလႆႈၵိၼ်။ ၼႂ်းဝၼ်းဢၼ်ၵိၼ်ၼၼ်ႉ၊ မႂ်းတၵ်းလႆႈတၢႆ ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။
18ထႃႇဝရႃႉၽြႃးပဵၼ်ၸဝ်ႈဝႃႈ၊ ၵူၼ်းၸၢႆးဢမ်ႇလီယူႇၵေႃႉလဵဝ်ၵူၺ်း။ ၵဝ်တၵ်းႁဵတ်းၵေႃႉဢၼ်တၵ်းၸွႆႈၵမ်ႉၸွႆႈထႅမ် ဢၼ်ထုၵ်ႇမၼ်းၵိုင်ႇမၼ်းလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။- 19ထႃႇဝရႃႉၽြႃးပဵၼ်ၸဝ်ႈဢဝ်လိၼ်ႁဵတ်းတရိၵ်ႈသၢၼ်ႇၵႃႈၼိူဝ်လိၼ်တင်းသဵင်ႈတင်းလူင်ဢိၵ်ႇတင်းၼူၵ်ႉၵၢင်ႁၢဝ်တင်းသဵင်ႈတင်းလူင်ယဝ်ႉၸင်ႇ ဢဝ်မႃးၵႃႈတီႈဢၼ်ၵူၼ်းမီးၼၼ်ႉႁႂ်ႈလႆႈႁူႉလွင်ႈဢၼ်ၵူၼ်းတၵ်းႁွင်ႉႁဵၵ်ႈၸိုဝ်ႈသဵင်ၸိူဝ်ႉၼင်ႇႁိုဝ်ၼၼ်ႉဢေႃႈ။ ၸွမ်းၵႃႈၼင်ႇဢၼ် ၵူၼ်းႁွင်ႉႁဵၵ်ႈသတ်ႉတဝႃႇဢၼ်ဢသၢၵ်ႈလိပ်းယူႇ ၵႃႈမီးတင်းသဵင်ႈတင်းလူင်ၼၼ်ႉသေလႄႈ မီးၸိုဝ်ႈမီးသဵင်ႁင်းၽႂ်ႁင်းမၼ်းဢေႃႈ။- 20ၼင်ႇၼၼ်လႄႈၵူၼ်းၼၼ်ႉတၢင်ႇပၼ်ၸိုဝ်ႈပၼ်သဵင် တီႈတူဝ်ယဵၼ်ႇတူဝ်ငႄႈတင်းသဵင်ႈတင်းလူင်၊ တီႈၼူၵ်ႉၵၢင်ႁၢဝ်တင်းသဵင်ႈတင်းလူင်၊ တီႈတူဝ်ႁၢႆႉတင်းသဵင်ႈတင်းလူင်ဢေႃႈ။ ၼႂ်းဝႃႈၼၼ်သေၵေႃႈ ၵေႃႉဢၼ်တၵ်းၸွႆႈၵမ်ႉၸွႆႈထႅမ် ဢၼ်ထုၵ်ႇမၼ်းၵိုင်ႇမၼ်း ဢမ်ႇပႆႇပေႃႇပႆႇမီး။
21မိူဝ်ႈၼၼ်ႉ ထႃႇဝရႃႉၽြႃးပဵၼ်ၸဝ်ႈ ႁႂ်ႈတၢင်းၼွၼ်းဢၼ်ၼူၵ်ႇၼႃႇတူၵ်းႁွတ်ႈၵႃႈၼိူဝ်ၵူၼ်းၼၼ်ႉလႄႈ ၼႂ်းမိူဝ်ႈဢၼ်မၼ်းယင်းတိုၵ်ႉၼွၼ်းလပ်းယူႇၼၼ်ႉ၊ မၼ်းၸဝ်ႈဢဝ်လုပ်ႇၶၢင်ႈမၼ်းလႅမ်ႈၼိုင်ႈဢွၵ်ႇသေယဝ်ႉ၊ ႁႂ်ႈၼိူဝ်ႉပဵၼ်တၢင်တူဝ်လုပ်ႇၼၼ်ႉလႄႈၶိုၼ်းငီႇငႅၼ်ႈၵၼ်သေဢေႃႈ။- 22ထႃႇဝရႃႉၽြႃးပဵၼ်ၸဝ်ႈဢဝ်လုပ်ႇၶၢင်ႈဢၼ်မၼ်းၸဝ်ႈဢဝ်ဢွၵ်ႇၵႃႈၼႂ်းၵူၼ်းၼၼ်ႉႁဵတ်းၵူၼ်းယိင်းလႄႈ ဢဝ်မႃးၸူးၵႃႈတီႈၵူၼ်းၼၼ်ႉဢေႃႈ။- 23ၵူၼ်းၼၼ်ႉလၢတ်ႈလႄႈဝႃႈ၊ တေႃႈလဵဝ်ၼႆႉ ၵေႃႉၼႆႉပဵၼ်လုပ်ႇၵႃႈၼႂ်းလုပ်ႇၵဝ်၊ ပဵၼ်ၼိူဝ်ႉၵႃႈၼႂ်းၼိူဝ်ႉၵဝ်ဢေႃႈ။ ပိူဝ်ႈဢၼ်ဢဝ်မၼ်းဢွၵ်ႇၵႃႈၼႂ်းၵူၼ်းလႄႈ တၵ်းလႆႈႁွင်ႉႁဵၵ်ႈမၼ်း ၵူၼ်းယိင်းဢေႃႈ၊ ဝႃႈၼင်ႇၼႆဢေႃႈ။- 24ၵွပ်ႈပိူဝ်ႈလွင်ႈတၢင်းၼၼ်ႉလႄႈ ၵူၼ်းၸၢႆးတၵ်းလႆႈၽၢတ်ႇၵၼ်တင်းပေႃႈမႄႈမၼ်းသေလႄႈ ၸပ်းၸွမ်းမေးမၼ်းသေယဝ်ႉ၊ သွင်ၶႃၼၼ်ႉ တၵ်းလႆႈပဵၼ်ၼိူဝ်ႉပဵၼ်လိူတ်ႈဢၼ်လဵဝ်ၵၼ်ဢေႃႈ။- 25ၶဝ်ၽူဝ်မေးသွင်ၵေႃႉၼၼ်ႉယူႇတူဝ်ပူၺ်ယူႇလႄႈ ၵၢင်းလွတ်ႈတင်းတၢင်းဢၼ်ဢၢႆၵၼ်ဢေႃႈ။
اکنون انتخاب شده:
ငဝ်ႈၵမ်ႇၽႃႇ 2: CBMS
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Copyright © 2021 by OMF International, Shan Baptist Churches Fellowship