Njɔyn 5
5
Njisə̀s ə tsuʼ kèngɛchi
1Epàm mə zɨ̂nə̀, Njisə̀s ə ndùə ə Njèlusalɛ̀m ə fetuʼ fə azhi ə ghɨə Njûsfè. 2Etipìə echondɛ ə mbàyn ə̀ sèpfɨ ə Njèlusalɛ̀m, ndɨla tè nyîə nyi fumə è luʼte kwiə tsɛ te tâyn. Ewàmnè ə Ipilòzè, e tɔŋtə̂ nə Pɛtzatà. 3-4Nɔ̂yn ə ghɨ̀ ezafəke tè nyîə nyɨ̂ŋtè fumə ə telùʼ te kwiə tsɛte; è ghe efofəghe, è ghə̀ kèngɛchi, è ghɛ pɨas ewìyn əmɔ̀ʼɔve nyi mə və kwu. #5.3-4 Ŋwàʼlè shise ə kwəynsê 3e-4: Ghɨə zafə ghɛ tè nyì fu lɨmtə̂ nə môm səə. 4 È tè nyi nə shîŋə̀ tekɨ̂m tsɨ̀ə Fèzhə̀ e pə̂ sə̂ʼsə̀ m̀mo. Ashìŋə̀ kɛ ə ze kyâyn zamə, nâʼà wùə ezafə èkè vɛ ə è nji fu tso sə shi, tɛ. 5Wùə tè nyì fu mə è və zaf sə sepìŋ m̀ghɨm mta njòse famə. 6Njisə̀s ə fe è nyiŋ fu, ə kê nə è nyi mə è və zaf sə se pìŋ se tsɨse. È və ke pfɨf sê vəyn nə, “Ò kɔ̂ŋɔ̀ ndò se tɛ ə?” 7Wùə è zafə nə vɛ ə pə̀ynsə̀ nə, “Tyə̀ynsè, m kyi va wùə vîvè fàyn kə è ndəm mi andɨ̀l nâʼàpî ashìŋə̀ àkè kɛ ə tsò nə̂ʼə̀. M mɔ̂msə̀ se ndù fu, wùə ə ndùə sê mi sə shi.”
8Njisə̀s ə pîə sê vəyn nə, “Ndwi, ə njìə fèghâm fɛfe ə kwìə.” 9Kè sə ashìŋə̀, wùə ə̀təyn ə tɛ, ə ngɛtə̂ fèghâm fə vəynfe ə zhə̀tə̀ se kwì. Zɨnə mə tè kyàyn etuʼ endaʼ. 10Ghɨə chisə ghe è ghɨə Njûs yîghe ə fe za, ə ke pì sê wùə ə̀təyn nə, “Ə nda nyi etuʼ endaʼ, mə lâŋà pomə̂ va nə ò kwîə tsɛ̂ è ghâmfè.”
11Wùə ə̀təyn ə pìə sê ghənə nə, “Ə̀ pi wùə vɛ ə è tsuʼ mi nə m nji ghâm fɨmfe ə m kwi.”
12Ghənə ə pfɨfə sê vəyn nə, “Ə̀ nyi nde wùə nə vɨnə ə è pì nə ò nji ghâm fɛfe ə ò kwiə?”
13Pîza, wùə nə vɛ tè lote keva wùə vɛ ə Njisə̀s tè nyi Vəyn kə Njisə̀s tè se nyi mə è və nji ə fètə̂ ànɔ̀yn kɛ ə ke tè nyì fumə.
14Ə mòtə̀ tso, Njisə̀s ə fɨnə fe vəyn ə Ndɛ Ètsə̀mə ə pìə sê vəyn nə, “Zɨte, o tɛ zôyn. Kə ò fɨyn nəyn pi, ə va za ə ghɛ e kyayn sê ghò, ə zə kwûəmnə̀ kə nyi.”
15Wùə ə̀təyn ə ndûə tsâ sê ghɨ Njûs echisə ghɛ nə, ə fe tsuʼ Njisə̀s è zhi. 16Ghənə zhə̀tə̀ se tsə̀fsè ə Njisə̀s, kûmə̀ nə È tsuʼ wùə ə̀təyn etuʼ endaʼ. 17Njisə̀s ə pə̀ynsə̀ sê ghənə nə, “Pɨ̀a Vɨ̂m ndamə fɨaʼa kə ndò, mə M pɔŋ kyi se fɨ̀aʼà kə zamə.”
18Wâmnè zɨnə ə nə̀, ghɨə Njûs ghe chisəghe è kyiŋə èndom se zhwiə Njisə̀s, kûmə̀ nə È paʼà kəm chike lâŋ etuʼ endaʼke, pîza ə pa pîə nə Zhə̀fè tè nyi Pɨ̀a Vəyn, famə endom, È və nə̀yn ngɨŋə̂ Vəyn sə̂ nyi èghɨ yî Zhə̀fè.
Zhə̀fè nə̀ fo àtyaʼ sê Va Vəyn
19Njisə̀s ə ke pə̀ynsə̀ ghənə nə, “M pîə sê ghàyn səmɔʼ nə Vâ Fèzhə̀ vayn kàʼa è nəyn ghɛze sə və ngɨŋ, È nə̀ kə èghɛ zɛ È fe Pɨ̀a e nə̂. Ghɛ zɛ ə Pɨ̀a nə̀, ə̀ nyì kepî zəynze ə Vayn nə̂. 20Kûmə̀ nə Pɨ̀a nyiə kɔŋə̀ Vayn, È chwìtə̀ Vəyn è ghɛghe əkɨ̂m ghɛ ə È nə̀ È ngɨŋə̂ Vəyn. È tə chwîtə̀ Vəyn è ghɛ ghaʼâghè ghe tsɛ̂ pîə ghɨnə zôyn ə ghàyn əkɨ̂m ə nyi èkaynze. 21Kè kə Pɨ̀a zòmsə̀ ghɨghe, È və fo ghənə è ndamze, eghɨ kèpî famə endom, Vayn fo kəpî èndam sê nâʼàpî ndè vɛ È kɔ̀ŋɔ̀ se fo endam. 22Kèpî famə endom, Pɨ̀a saʼa kəpî va wùə. È və fo tyaʼa sê Vâ Vəyn nə È və saʼa ə̀ghɨ. 23È nəyn nyi kə ghɨghe əkɨ̂m ə ngɨmnə̂ Vayn kè eghɨ kə ə ngɨmnə Pɨ̀a. Nâʼàpî ndè vɛ ə è ngɨmnə va Vayn, vayn kàʼa è ngɨmne Pɨ̀a vɛ ə È tom Vâ ə̀təyn.
24M pîə sê ghàyn səmɔʼ nə nâʼàpî ndè vɛ ə è zɨə ghɛ zɨme ə pomə̂ sê Vəyn vɛ ə È tom Mi, kyi ndam zɛ ə ze tə mîə va. Ə tə saʼa va vəyn, pîza mə e və kàynè tsɛ elùʼ ekwu ə njiə elùʼ endam. 25M pîə sê ghàyn səmɔʼ nə shîŋə̀ kè pə̀ ndò, mə kə kàynè kwəyn, kə ghɨə ekwuəghe tə zɨə wâmnè ə Va Fèzhə̀zè, ə ghɨ ghɛ ə zɨ zəyn ə ndamə. 26Kè kə Pɨ̀a è ngɨŋə̂ Vəyn nyi eluʼ vɛ ə ndame ndô ətəyn, ə̀ nyì kepî famə endom ə È nə̀yn nə Vayn ə nyi eluʼ vɛ ə ndame ndô ətəyn. 27È və fo kepî Vayn ètyaʼke nə È və saʼa ə̀ghɨ kûmə̀ nə Vâ ə̀təyn nyi Vɛ ə tɔŋtə nə Va Wùə. 28Kə ghàyn ə nyi è kaynze kûmə̀ zɨ̂nə mə; shîŋə̀kè nyiə pə̂ mə ghɨ ekwuə nâʼà ə̀kɨ̂m tə zɨə èwâmnè ə Vəyn, 29ə fɨ pəyn ə ghənə ə tè shyə̀: ghɨ ghɛ ghe nyi mə ghə nə̀yn ghɛ ə chûŋə̀ tə zômə̀ ə ndam, ə ghɨ ghɛ ghe nyi mə ghə nə̀yn pi tə zômə̀ ə poynse ghənə.
Tsɛ̀ esaʼ sə Njisə̀sè
30M vayn kàʼa m nəyn ghɛ zhîze ə Mì atyaʼ. M saʼa kə kə Pɨ̀a Vɨ̂m pì nə M saʼ, saʼ Zɨmze nyi səmɔʼ kûmə̀ nə M saʼa chîəva kə M kɔŋə̀ sə Mì ə ngɨŋ, pîza M saʼa kə kə Vɛ È tom Mi kɔ̂ŋɔ̀ nə mə saʼa.
31Ə M wamnə̀ kûmə̀ ngɨŋ zɨ̂mè, ə ghɛ zɛ M pî, ə gha vayn kàʼa pomə nə ə̀ nyi eghɛ səmɔʼ. 32Pîza, wùə nyì ndô kə È wàmnə̀ ə Mì azhəm, M ke nə ghɛ zɛ ə È pìə kûmə̀ Mi nyi mə ə pomə̂. 33Njɔyn nyi wùə vɛ ə ghàyn tom ndùətom saynse se vəyn, è və wàmnə̀ elùʼ ə səmɔʼve. 34E va chi nə M kyi sə̂ kyi wùə m̀sɔ̀ŋ nə è və nyi tsɛ èsaʼ Vɨ̂mvè. Pîza, M tsâ sê ghàyn kûmə̀ ètsɛ̂ esaʼa Njɔynze kə ghàyn pomə sê Mi ə ghàyn kyi sɔzaze. 35Njɔyn tè nyi kə lâm, ə è fuə fɨnə panə, ghàyn tè nyîə saŋnə̂ se chùmtè epayn ə vəynze kè sə fendiŋə̀ fə ashìŋə̀fè nyî. 36Pîza, M kyi ndô tsɛ̀ èsaʼ è tsɨ̂ə tsɛ vɛ Njɔyn tè kyi. Fɨ̂aʼ tɛ M nə̂, mə nyi tefɨaʼ tɛ ə Pɨ̀a Vɨ̂mvè tè fo nə Mə nə̂, fɨ̂aʼ tə təynte wâmnə̀ ndò ə Mì azhəm chwîtə̀ nə ə̀ Mi tè tom Pɨ̀a. 37Pɨ̀a vɨ̂m vɛ È tom Mi, wâmnə̀ kə pî ə Mì azhəm. Ghàyn paʼà tyəmə̂ zɨə kyə̀ ə̀ Vəyn, ghàyn paʼà tyə̂m fe Vəyn. 38Ghàyn ndə̀mə̀ va tom ə̀ vəyn ə ghàyn ətəm, kûmə̀ nə ghàyn pomə̂ va sê Vɛ ə È tom. 39Ghàyn fɛtə̂ zaʼlə̂ Ŋwàʼlè ə̀ Fèzhə̀ kûmə̀ nə ghàyn kwàʼtə̀ nə ə fètə̂ ə̀təyn ghàyn nə̀ fe endam zɛ ə ze mîə va. Ŋwàʼlè ə̀ Fèzhə̀ nə zɨ̂yn è wàmnə̀ kəpî kûmə̀ Mi. 40Pîza, ghàyn e kɔ̂ŋə̀ va se pə̀yn se Mi kə ghàyn ə kyî èndam zɛ ə ze tə mîə va.
41M kyiŋə va nə wùə m̀sɔ̀ŋ ə tsîtə̀ Mi. 42Pîza M ke ndô kyì əghɨ̀ ghɛ ə ghàyn nyi ghəynghe, pa ke nə ghàyn kyi va kɔ̂ŋ ə Fezhə̀zè ə ghàyn ə təm. 43M pəyn è tyaʼa Pɨ̀a Vɨ̂mkè pîza ghàyn ghe tàʼa fiə mi, mə shîŋə̀ kɛ ə wùə pə̀yn è kə vəynke nə atyaʼ, ghàyn ə fiə vəyn. 44Ghàyn kɔ̂ŋɔ̀ sə̂ fiə ètsîtè sê ngɨŋ saynse, pîza kɔŋə̀ va se fiə etsîtè sê Vɛ È nyì və̂yn mɔ̀ʼ, nyi Fèzhə̀, ə ghàyn ə nyi kàʼa pomə zayn sê Mi ə? 45Kə ghàyn nə kwaʼtə̀ nə ə̀ nyi Mi vɛ ə M tə ghâmə̀ ghàyn sê Pɨ̀a Vɨ̂mvè nə ghàyn tè pâʼà fi Mi. Mosîs, ə vɛ ghàyn ndə̀m kwaʼtè zaynze ə vəyn ewìyn nyi vɛ ə è tə lotə pîə nə ghàyn nə̀ pofsə̂ ndò. 46Ə ghàyn tè pomə sê Mosîs mə ghàyn ə pomə sê Mi kûmə̀ nə è və tə nyàʼ kûmə̀ Mi. 47Pîza kə ghàyn tàʼa pomə̂ eghɛ zɛ ə è tè nyâʼ, ghàyn kàʼa ə ghàyn pomə zayn ghɛ zɛ M piə ə?”
اکنون انتخاب شده:
Njɔyn 5: bfm
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید