Jɔn 8
8
Weyzən wey ghə â kwunə nə̀ tə nyə̀ŋ ghi weynum u loʼ wə
[1Ambə ghə̂ a sali nuu ndow n ndaw tə ghə, Yeso n kee nuu kɔʼ ndòw n kaʼ u Oliv. 2Tsətsə wey n zòw kə utsuʼ, Yeso n nuu tsu dzəŋŋə ndòw n Ndaw Kəzə̀ i nii zə n Yerosalem. Ghə̂ adzəm n zuŋŋə bə n səə wi, tə n doʼo tsu, kaʼ ndòw ni dii ghə n ghəə ghə. 3Ghə̂ a dii a Kəlaŋ ghə nsə ghə̂ a tə Falasi ghə n ney bə weyzən u loʼ wə ghə kwunə wi nə̀ tə nyəŋi ghi weynum nə̀ a way num wi. Ghə n ney teyyə naŋa bə wi n sə̂ kə aghə̂. 4Ghə n dza ndòw tə̀ Yeso nə̀, “Wù dii wə, ghey kwu nyi ndòw weyzən wən tə nyəŋi dzəŋinə ghi weynum u loʼ wə nə̀ a way dzə num wi. 5Laŋ kə Mushi kə dii nə̀ a khə ni təmmə wey ndzoʼo weyzən wən nə atay. Wə dza nə̀ ngee tii?” 6Ghə â sey dza ni mɔm koʼ Yeso, tə ghə i loʼ ni kuu saʼ n tow kə wi n ghɔɔmə i wi. Yeso n fəd gham tsu, kaʼ ndòw ni tɔ̀ɔ aghəə aghəd n waa kəwɔɔ. 7Nghee tə̀ ghə teynə fu, bəbə wi n ghəə ghə, tə n təmi kɔʼ, dza ndòw tə̀ ghə nə̀, “Wù wey tə loʼnə fa nə̀ tə ka kam ghəŋə koʼ ghə i bəbə zə, tə doʼo tsu wù kəsə̂ ni təm ndow weyzən wən nə itay.” 8Tə n kəm gham dzəŋŋə i tsu, tɔ̀ɔ ndòw kə aghəə aghəd. 9Ambə ghə zow tsunə sey, ghə n zey ni nuu fəmɔʼ fəmɔʼ, ni ney nuu tsu ghi gheynyim ghə isə, nuu may tsu adzəm. À n bə doʼo səə tsu kə Yeso n nəŋə wi ghi weyzən wey tə teynə. 10Yeso n nuu təmi kɔʼ, bəb ndòw tə̀ weyzən wey nə̀, “A weyzən, ghə̂ ghey ghee? Wù loʼ ka doʼo səə ni dza nə̀ wə khə ni kpu ə?”
11Weyzən wey n beeli ndòw wi nə̀, “Ngaŋ! Mûkəbii, wù loʼ ka doʼo səə dzə.”
Yeso n dza ndòw tə̀ wi nə̀, “Mə soʼo n way ni dza sey. Nuu ndòw i zə zə̀, kə wə nə̂ kee kəm ghəŋŋə ghəə a bəbə ghə.”]#8.11 Màʼlə u loʼ u khə way dəŋə kən.
Yeso loʼ kədaa tə̀ mbi
12Yeso n ghɔɔmə kpiʼi ndòw aghəə tə̀ nɔɔ kə aghə̂ key nə̀, “N loʼ kədaa tə̀ ghə̂ a mbi ghə adzəm. Wù wey tə dzûmənə mə, î bwey koʼ way nə kələm, tə i fədlə keeli daa key kə fuunə muu zə.”
13Ghə̂ a tə Falasi ghə n dza ndòw tə̀ wi nə̀, “Wə nya tiilə dza aghəə bòʼ wû wə n nəŋə wɔ, ghey way ni bəghəm dzə nə̀ ghəə zey wə dzanə loʼ isəŋə.”
14Yeso n beeli ndòw ghə nə̀, “Abə n tsəmə tiilə dza kə wû wuŋ wə n nəŋə mə, ghəə ghey n dzanə loʼ isəŋə, n təŋkey, n khənu luʼu key n nuu bənə tii nsə luʼu key n ndòwnə tii. Abə ghaa, ghaa kee khə dzə way luʼu key n nuu bənə tii nkee luʼu key n ndòwnə tii. 15Ghaa saʼa aghəə n jìi zey wù sɔŋtsuʼ saʼanə tii, abə mə, n saʼa dzə way wù. 16Abə n tsəmə saʼa kənə wù, saʼ zuŋ i loʼ tsətsəghə, n təŋkey, n saʼa dzə way n nəŋə mə, Bày wuŋ wən tə tûmnə mə loʼ ghi mə ni saʼa ghə̂ ghə. 17Ghə tɔ̀ɔ naŋa n laŋ kə ghaa nə̀, abə dzuu a ghə̂ abəghə bəghəm dzəŋinə nə ighəə, i sey dii nə̀ ghəə zey ghə dzanə, loʼ isəŋə. 18Sey, n tiilə dza wû wuŋ, Bày wey tə tûmnə mə, tə u təmi tiilə soʼonə bòʼ mə̀.”
19Ghə n bəb ndòw tə̀ wi nə̀, “Bày wə loʼ ghee?”
Yeso n dza ndòw tə̀ ghə nə̀, “Ghaa khə way mə, khə soʼo way Bày wuŋ. Abə ghaa mə̂ khənə Bày wuŋ, ghaa mə̂ khə soʼo mə̀.”
20Yeso â ghɔɔmə ghəə ghən nə̀ tə dii aghəə n Ndaw Kəzə̀ n Yerosalem, n səə luʼu key ghə naŋŋənə khə̀ə wə tii. Wù umɔʼ n way ni kwu wi n təŋkey nəŋə zey ghə â khə ni kwu wi â ka kam bə.
Ghaa way ni ndow n luʼu key n ndownə tii
21Yeso n kəm dza ndòw tə̀ ghə̂ ghey nə̀, “Mə i nuulənu, ghaa i kəŋə mə, kəŋə kìi. Luʼu key n ndòwnə tii, ghaa way ni bə fu. Abə ghaa, ghaa î kee kpu kə n ghəə a ghaa a bəbə ghə.”
22Ngəd tə Təjuu tə n bəbə n wû i ghə nə̀, “Tə dza nə̀, ‘Luʼu key n ndownə tii, ghaa way ni bə fu.’ Tə dza i wey wû u wi ə?”
23Yeso n beeli ndow ghə nə̀, “Ghaa shi fa n mbi, mə n kee nuu shi tsu bə idəŋ. Ghaa loʼ ghə̂ a mbi, n kee way dzə wù mbi zən. 24À wey loʼ ghə i tii zə n mə dza bənə tə̀ ghaa nə̀ ghaa î kpuu kə n ghəə a ghaa a bəbə ghə. Abə ghaa ka bəghəm nə̀ n loʼ wù wey n loʼ nə ghii wə, ghaa i ndzəmə kpuu kənu n ghəə a ghaa a bəbə ghə.”
25Ghə n bəb ndòw tə̀ wi nə̀, “Wə baa loʼ ndee?”
Yeso n dza, “N loʼ wù wey n mə buʼ dza dzənə tə̀ ghaa nə̀ n loʼ wi. 26N khə ndəmə aghəə ni dza bòʼ ghaa, mə n khə soʼonə ndəmə aghəə ni tsəʼlə saʼ tii n kow ghaa, a kee loʼ nə̀ ghɔɔmə i wù wey tə tûmnə mə, loʼ tsə kə isəŋə, sey ghəə zey n zownə n wɔ wi, à loʼ i ghii n bɔɔmə dza ndownə tə̀ ghə̂ a mbi.”
27Ghə n ka zowkeeli nə̀ tə sey ghɔɔmə kuum Bày wi. 28Sey, Yeso n dza ndòw tə̀ ghə nə̀, “Abə ghə î kɔʼlə naŋa kɔʼnə Waa wù sɔŋtsuʼ n zat kə fəkaʼ, ghaa i daŋŋə keeli tsu nə̀ n loʼ wù wey N loʼnə ghii wə. Ghaa i keeli tsu soʼo nə̀ n ghəŋŋə dzə̀ way ghə i loʼ zə n daʼa kuŋ, n kee ghɔɔmə kə ghəə zey Bày wuŋ dza bənə tə̀ mə nə̀ n dza. 29Wù wey tə tûmnə mə loʼ ghi mə, tə ka mə naŋa taʼa dzə n nəŋə mə, n təŋkey, n ghəŋŋə ndòw kə ghəə zey i ghəŋŋənə wi nə̀ tə i duʼlə.” 30Nghee tə̀ Yeso ghɔɔmənə ghəə ghən, ndəmə aghə̂ n bəghəm fu tə̀ wi.
À loʼ isəŋə i bəghəshiənə wù
31Sey, Yeso n dza ndòw tə̀ ghə̂ a Təjuu ghey ghə â bəghəmnə tə̀ wi nə̀, “Abə ghaa bɔɔmə bwey ndòwnə n jii zən n diinə, ghaa î ndzəm loʼ ngəd tuŋ tə. 32Ghaa i keeli isəŋə, isəŋə i tii zə i bəghəshi ghaa.”
33Ghə n dza ndòw tə̀ wi nə̀, “Ghey loʼ waa a waa ghə Abraham, ghey ka kam doʼo koʼ tsə kɔd kə wù loʼ kə, wə loʼ ngee ni dzaa tə̀ ghey nə̀, ‘Ghaa i keeli ibəghəshi ə?’”
34Yeso n dza ndòw tə̀ ghə nə̀, “N ndzəmə dza bə tə̀ ghaa nə̀, wù wey tə ghəŋŋənə ghəə a bəbə ghə, loʼ kəkɔd tə bəb zə. 35Kɔd kə way dzə ni doʼo tən dzə n ndaw Mûkəbii ə wi tə̀ a loʼ waa kəbii fu, a loʼ kə waa kəbii fu tə doʼlə tənənə fu nə kəbii. 36Sey, abə Waa wù sɔŋtsuʼ chi zəghə tsunə wɔ, wə sey nya ndzəm loʼ n ngəŋ. 37N khənu nə̀ ghaa loʼ waa a waa ghə Abraham, a kee loʼ nə̀, ghaa kəŋənə jìi ni wey mə, n təŋkey, ghaa ləghə way ni bəghəm ghɔɔmə zuŋ. 38N ghɔɔmə bə ghəə ghey n koʼ neynə n wɔ Bày wuŋ, abə ghaa, ghaa ghəŋŋə ndòw ghəə ghey bày ghaa dzanə tə̀ ghaa.”
39Ghə n beeli dza ndòw tə̀ wi nə̀, “Bày bày ghey loʼ Abraham.”
Yeso n dza ndòw tə̀ ghə nə̀, “Abə ghaa mə ndzəm loʼnə waa a waa ghə Abraham ghə, tə̂ ghaa mə bɔɔmə ghəŋŋə ndòw kə ghəə ghey tə â ghəŋŋə tsənə. 40N ghɔɔmə tsə kə isəŋə zey n zow ney bənə n wɔ Zə̀ kə, ghaa u kee kəŋənə jìi ni wey mə. Ghəə ghən ghaa ghəŋŋənə, Abraham â ghəŋŋə tsə way sey. 41Ghaa bɔɔmə ghəŋŋə kə ghəə ghey bày ghaa â ghəŋŋənə.”
Ghə n dza ndòw tə̀ wi nə̀, “Zə̀ kə loʼ bày ghey wey ghey khənə, ghey u loʼnə waa a wi ghə, ghey way dzə waa a kəmbay.”
42Yeso n dza ndòw tə̀ ghə nə̀, “Abə Zə̀ kə mə ndzəm loʼnə bày ghaa, ghaa mə ləghə mə, n təŋkey, n nuu bə n səə Zə̀ kə, n ka bə dzə n ngəŋ zuŋ, a mə tûm bə Kəzə̀. 43A loʼ kee ghaa zowkeeli way ghəə ghey n dzanə ə? A loʼ n təŋkey, ghaa ləghə way ni zow ghɔɔmə zuŋ. 44Ghaa loʼ kə tə̀ a loʼ bày ghaa, tɔŋŋə Satan, moʼlə tə ghaa tə loʼ kə ni ghəŋŋə ghəə ghey bày ghaa ləghənə. Ni ney nuu bə tə̀ mbi a nə kaʼnə, tə weyyə aghə̂, tə ka kam təmi koʼ tsə nə isəŋə, n təŋkey, tə khə dzə way isəŋə i loʼ zə n kow wi. Abə tə badlanə ghəə ghə, tə sey ghɔɔmə shiə bə kə ghəə ghey a loʼnə n fə̀ŋ ə wi, n təŋkey, tə loʼ wù badla wə aghəə wə, a loʼ də̀ŋ kə ghəə a badla ghə. 45N kee ghɔɔmə kə isəŋə, a wey loʼ ghə i tii zə ghaa ləghə way ni bəghəm tə̀ mə. 46À loʼ ndee n fəŋŋə kə ghaa tə loʼnə ni dza bə ghəə zey n ghəŋə bəəbənə. Abə i loʼ nə̀ n ghɔɔmə isəŋə, a kee loʼ kee, ghaa ləghə way ni bəghəm tə̀ mə ə? 47Wù wey tə loʼnə wù Kəzə̀, zownu ghəə zey Zə̀ kə dzanə. Zuŋ key ghaa kee zow way ghɔɔmə i Kəzə̀ zə loʼ nə̀ ghaa way dzə ghə̂ a Kəzə̀.”
Yeso tsəghəshi Abraham
48Ghə̂ a Təjuu ghey n dza tə̀ Yeso nə̀, “I sey dii nə̀, ghey mə ka nɔʼ dzə ni dza nə̀ wə̀ loʼ wù Samaria, nsə nə̀ zay kə bəbə kə loʼ n kow wɔ.”
49Yeso n beeli ndòw ghə nə̀, “Zay kə bəbə kə way dzə n kow mə. N fuu nkɔʼlə tə̀ Bày wuŋ, ghaa u kee ngɔɔmə way mə. 50N kəŋə dzə way jìi nə̀ ghə̂ ghə i fuu bə mə n kɔʼlə mə. Wù loʼnu tə kee ləghənə nə̀ ghə̂ ghə i fuu bə mə n kɔʼlə mə, à loʼ wi, tə i saʼa fuunə tə̀ mə. 51N dza bə isəŋə tə̀ ghaa nə̀, wù wey tə ney naŋanə ghɔɔmə zuŋ zə, nə kpu koʼ way.”
52Ghə̂ a Təjuu ghey n dza tə̀ wi nə̀ “Ghey n ndzəm keeli nya nə̀ zay kə bəbə kə loʼ n kow wɔ. Abraham mâ khə kpu, tûm tə Kəzə̀ tə n bə kpu soʼo, wə u kee dzanə nə̀ abə wù naŋŋənə ghɔɔmə zə zə̀ tə nə kpu koʼ way. 53Naʼa bày bày ghey Abraham mâ kpu, wə dza i dza nə̀ wə̀ tsəghəshinu Abraham ə? Kasə tûm tə Kəzə̀ tə ma kpu, wə kee boʼo loʼ ndee?”
54Yeso n beeli ndòw ghə nə̀, “Abə a mə loʼ nə̀ n kɔʼlə wû wuŋ, kɔʼlə n tii n mə loʼ kənunu. Wù wey tə fuunə mə n kɔʼlə mə loʼ Bày wuŋ, tə wey ghaa dzanə nə̀ a loʼ Zə̀ kə ghaa. 55Ghaa khə dzə way wi, abə mə, n kee khənu wi. Abə n dza bənə nə̀ n khə way wi, i sey dii nə̀ n badla soʼo aghəə tə̀ a loʼ ghaa. N kee khənu wi, mə u naŋŋənə ghɔɔmə i wi zə. 56Wû wə a nyûmə tənə bày bày ghaa Abraham nə i mə mbɔŋ koʼ tsuʼ fey n nə bəghənə tii. Ambə tə koʼ tsunə, tə n duʼlə nay ndòw.”
57Ghə̂ a Təjuu ghey n dza tə̀ wi nə̀, “Wə ka kam buʼ kɔʼ kùm num tə nghəm ntaa, wə u dzanə nə̀ wə â koʼ Abraham ə?”
58Yeso n dza ndòw tə̀ ghə nə̀, “N dza bə isəŋə tə̀ ghaa nə̀, tə̀ ghə ni bə ji Abraham â loʼ nə̀ n loʼnu.”
59Nghee ghə zow tsu sey, ghə n kuumə kɔʼ atay ni təmmə wi tii, Yeso n kee nyì doʼo tsu, nyaʼi nii nuu tsu fu n Ndaw Kəzə̀.
انتخاب شده:
Jɔn 8: WEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید