Matyo 8
8
Yeso baŋŋə wù ukə̀m
(Mak 1.40-45; Luk 5.12-16)
1Ambə Yeso nuu shi tsu bənə nə ukaʼ, nɔɔ kə aghə̂ kə n dzûmə bə wi. 2Wù ukə̀m u loʼ wə n bə təm bə tənguʼ n tənə wi dza tə̀ wi nə̀, “Mûkəbii, abə wə̀ ləghənə, wə loʼ ni ghəŋə mə nə̀ n taw.”
3Yeso n naalə shi ndòw kəwɔɔ mɔm tsu wù ukə̀m wey, dza tə̀ wi nə̀, “N ləghənu, taw kɔʼ!” Wù wey n daŋŋə taw i kɔʼ. 4Yeso n dza ndòw tə̀ wi nə̀, “Kə̂ wə nə̀ dzanə ghəə zən tə̀ wù loʼ, ndòw dii ndòw wû wə wə̀ tə̀ fɔɔngili, wə fuu ndòw maʼlə wey Mushi â dzanə, ni dii tsu nə̀ wə n taw.”
Yeso baŋŋə wù kəfwaʼ a khəmndzughu ə təsawgoʼ
(Luk 7.1-10)
5Nghee tə̀ Yeso nyi ndòwnə n naʼ i Kapenum, wù nii sàʼ kə təsawgoʼ kə Roma u loʼ wə n bə n səə wi, buʼ wi n wɔɔ kə nə̀, 6“Mûkəbii, wù kəfwaʼ wuŋ nyəŋ n ndaw nə̀ wû u wi wə n kpu doʼo, tə ngii zow ifɔɔbə.”
7Yeso n dza ndòw tə̀ wi nə̀, “N bə baŋŋənu wi.”
8Wù nii u təsawgoʼ wey n dza tə̀ wi nə̀, “Mûkəbii, n ka kɔʼ kpii dzə tə̀ wɔ ni bə n ndaw zuŋ, maŋa tsəʼlə tsu kə laŋ kə, wù kəfwaʼ wuŋ i taw kɔʼ. 9N təŋkey, mə soʼo, n loʼ n tənə daʼa kə wù tə tsəghəshi mə, mə u khə soʼonə sawgoʼ tə, tə fwaʼanə n tənə mə̀. N dza ndòw tə̀ wù ghə umɔʼ nə̀, ‘Ndòw!’ Tə n ndòw. Mə n dza tsu tə̀ u loʼ wə nə̀, ‘Bəghə fa!’ Tə n bɔɔmə bə. Mə n dza tsu tə̀ wù kəfwaʼ wuŋ nə̀, ‘Ghəŋə ndòw sa!’ Tə n bɔɔmə ghəŋə i ndòw.”
10Ambə Yeso zow tsunə ghəə ghən, dzuu zə n ngii zum wi, tə n dza ndòw tə̀ ghə̂ ghey ghə â bəghənə n baa wi nə̀, “N kùum dza bə isəŋə tə̀ ghaa nə̀, n ka kam koʼ koʼ tsə wù tə khənə ndzoʼo bəghəm i fə̀ŋ zən n naʼ zə Izree. 11N dza bə tə̀ ghaa nə̀ ndəmə aghə̂ ghə i bəghənu, ghə nuu bənə n bad kə mbi key nyi i shiə kɔʼɔ bənə tii, nsə n bad key nyi i nyiə tsunə tii, ghə i bə doʼo bə nə kəzə̂ ghi Abraham, Ayzik, nsə Yakɔb n fɔ̀ɔ wə idəŋ wə. 12Ghə i fəd dzùm maʼa shi ghə̂ ghey ghə â bayyə naŋa fɔ̀ɔ wə tə ghə nə kələm a bii. Ghə i dey fu, fəə asɔŋ.” 13Sey, Yeso n dza ndòw tə̀ wù nii u təsawgoʼ wey nə̀, “Ndow! I doʼo kə tə̀ bəghəm i fə̀ŋ zə i diinə.” Wù kəfwaʼ a wi wey n daŋŋə taw kɔʼ n nəŋə i tii zə.
Yeso baŋŋə ndəmə aghə̂
(Mak 1.29-34; Luk 4.38-41)
14Ambə n tsuʼ fə loʼ fə, Yeso n ndòw n ndaw Pita, ndòw koʼ ndòw nəwey Pita tə nyəŋ n wû wə. 15Tə n mɔm tsu wɔɔ kə wi, wû u tii wə n daŋŋə may tsu. Tə n nuu kɔʼ, khəələ fuu ndòw wi. 16Ambə n nəŋə i fənə zə, ghə̂ ghə n ney bə ndəmə tə aghə̂, ghə̂ ghey zay u bwu wə â loʼnə n kow ghə. Yeso n dzùm shi zay u bwu wey, baŋŋə ghə̂ ghey ghə â dzaŋanə adzəm. 17Tə â ghəŋə ghəə ghən ni luulə ghɔɔmə zey wù tûm ə Kəzə̀ Ayzaya â dza naŋanə nə̀, “Tə â ney nuu fə u zabə wə n kow saa, ney nuu dzaŋa tə saa.”
Ghə̂ ghey ghə i doʼlənə tsətənəghə tə Yeso tə
(Luk 9.57-62)
18Ambə Yeso koʼ tsunə nə̀ ghə̂ ghə n ngii tsuŋ dzəŋ tsəghə kɔʼ wi, tə n dza tə ngəd tə wi tə nə̀ ghə daŋ shi ndòw n nguŋ ə inyi i loʼ zey. 19Wù dii u kəlaŋ u loʼ wə n bə n səə wi, dza tə̀ wi nə̀, “Wù dii wə, mə î dzûmənu wɔ n luʼu kə ghaa key wə ndòwnə tii.” 20Yeso n dza ndòw tə̀ wi nə̀, “Kəŋ u khə ghə n bùʼ wə ni tyi nyì doʼo tii, nnən mə idəŋ mə a khənə ghə n ndaw tə, Waa weynum kee khə way luʼu kə ni doʼo zayyə.”
21Wù loʼ n ndow bə kpiʼi, tə â loʼnə dzûmə ə Yeso, dza ndòw tə̀ wi nə̀, “Mûkəbii, zəghə maʼa tsu mə tə̀ n ndòw tsəllə bə dzə bày wuŋ.”
22Yeso n fəd dza ndòw tə̀ wi nə̀, “Dzûmə bə mə̀, zəghə maʼa ghə̂ a kpuu ghə tə̀ ghə tsəllə ndòw ghə̂ a ghə a kpuu ghə.”
Yeso buu naŋa tuŋutuŋu tə inyi
(Mak 4.35-41; Luk 8.22-25)
23Yeso n nyi kɔʼ nə kəfən ghi ngəd tə wi tə, nuu ndow nə u daŋa wə. 24Ambə ghə ndòwnə, zəŋ i taw i loʼ zə n kaʼ ni tsəghə fu nə inyì, fə̀n kə n loʼ tə̀ kə i məllə. Yeso n fədlə bweeli i wi zə. 25Ngəd tə wi tə n ndòw zhim nuu kɔʼ wi, dza tə̀ wi nə̀, “Bəghəshi ghey a Mûkəbii, ghey i nay kənu!”
26Yeso n dza ndòw tə̀ ghə nə̀, “À loʼ kee ghaa tsəŋənə sa a? Ghaa loʼ ghə laʼ bəghəm i fə̀ŋ ə?” Tə n nuu kɔʼ, daŋŋə kə̀m ndow zəŋ zey nsə tuŋutuŋu tə dzuu tey, dzuu n bɔɔmə fuŋ doʼo ndòw mɔŋ. 27Dzuu zə n ngii zum ghə̂ ghey, ghə n bəbə nə̀, “À wən loʼ ndzoʼo wù ghaa wə? Zəŋ nsə tuŋutuŋu tə dzuu tə zow daŋŋə tə̀ wi!”
Yeso dzùm shi avəətsəə n kow ghə̂ ghə abəghə
(Mak 5.1-20; Luk 8.26-39)
28Ambə Yeso ndòw bənə n naʼ i Gadara, n nguŋ ə nyì i loʼ zey. Tə n kpii tsu ghi gheynum a loʼ ghə abəghə ghə â loʼnə n zay u bwu wə n kow ghə, ghə shiə bənə n dzuu a təsay. Ghə n tɔɔbə tənə sa, wù n way ni tsəghə jìi fu. 29Nghee tə̀ ghə koʼ tsunə Yeso, ghə n buʼ shi kɔʼ mmbɔŋ dza nə̀, “Wə ləghə kee n wɔ ghey ə Waa Kəzə̀? Wə n bə ni bə chɔd ghey nə̀ nəŋə i ka kam kpii ə?”
30Nɔɔ kə ufeelibu kə loʼ kə â kuʼlə loʼ fu, kə zəə kaabənə. 31Zay u bwu wey n buʼ Yeso n wɔɔ kə dza nə̀, “Abə wə dza i dzùm shi ghey, tûm nyi ndòw ghey n kow feelibu wey.”
32Yeso n dza ndòw tə̀ ghə nə̀, “Ndòw na.” Sey, ghə n zəghə tsu ghə̂ ghey, nuu nyi ndòw n kow feelibu wey. Nɔɔ kə ufeelibu kə tii kə kədzəm n kwɔ̀ɔ tsu ndòw nə ukaʼ, ndòw nyi ndòw nə inyi, kuŋ nay i ndòw. 33Ghə̂ ghey ghə â laalənə tə̀ feelibu u tii wə n nyəŋ nuu ndòw inaʼ, ndòw dza ndòw zəzəə fə tii fə nsə ghəə zey i shinə ghi ghə̂ ghey ghə â khənə zay u bwu wey tə̀ ghə̂ ghə. 34Sey ghə̂ ghə n nuu bə adzəm fu inaʼ, bə ni bə koʼ Yeso. Ambə ghə koʼ tsunə wi, ghə n buʼ wi n wɔɔ kə, dza nə̀ tə zəghə naʼ i ghə.
انتخاب شده:
Matyo 8: WEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید