Záan 4
4
Zozíi yà Samalíi a ŋwnɔ́ sɔ́ bhla wɔlɩ́ kʋ́
1Tányɩ a múó, bhʋ́ Falizɩ́ɛnyʋa nú cémʋ́ Zozíi á kʋjɩ̀nyʋ̀àà ŋwʋ́ɛ́ nyú wlú a, á zù lé á plɩ́ɩ Záan a nɩ kʋjɩ̀nyʋ̀àà kʋ́, wɔlɩ́ɛ́ ɩ́mɩ́ ɩ̀ pla Zozíi a nyúkwlí. 2Bhè cɩ́cása lé Zozíi mɔ̀glʋ̀ nɩ́ ŋwʋ́ nyʋaá nyú wlú mà ɔ́ kʋjɩ̀nyʋ̀àà má ŋwʋ́ɛ́ nyʋa nyú wlú. 3Ɩ́ ka ŋnɩ́ lé Zozíi wlʋ́ Zudée lé ɔ́ yrɩ́bha Galilée. 4Bhè ɔ ká Galilée mʋ a, ɔ́ ka lé ɔ yra Samalíibhlɩɛ́ mʋ́. 5Ɔ́ mʋ lé ɔ́ ŋnɩ Samalíibhlɩ a dúó á wlele Sisáa a gɔ̀. Bhè Sisadùò ʋ́mʋ́ gɔ̀ dʋ̀dʋ̀drèè Zakɔ́bʋ nyɛ́ wá ɔ yʋ́ Zɔ̀zɛ́fʋ a kʋʋ̀. 6Bhʋ́ Zakɔ́bʋ a nyúbhukuó kʋ sáà. Zozíi sɩa náanʋ́ a, ɔ́ plɩ́ɩ nyúbhukuó gɔ̀ lé ɔ́ bɔ́ɔ sá. Yrʋ́ ya la yiosa wlú nyièdɩ ŋnɩ.
7Samalíi a ŋwnɔ́ a múó yi nyú plí ka a, ɔ́mɔ́ Zozíi srʋ ɔ́ mà: «Ɩ́ bhìè nyɛ́ mɔ́ɔ nyú ká mná àyé.» 8Bhʋ́ a tányɩɛ́, ɔ́ kʋjɩ̀nyʋ̀àà ya dú pla a ká lelilɛ mʋ́mɔɔ̀. 9Mà ɔ́mɔ́ ŋwnɔ́ɔ́ ɔ́ srʋ ɔ́ mà: «Ɛ̀kʋ̀ʋ̀ lé mɔ̀ Zúfʋyʋɔ́, ɩ̀ yrálɛ mɔ́ɔ Samalitɛ́ɛŋwnɔɔ́ mnámnányu mʋ́ a?» Máà Zúfʋnyʋa yà Samalíi a nyʋa sɔ́ nɩ́ pla pla dú. 10Lé Zozíi srʋ ɔ́, ɔ́ anɩ́: «Nɩ̀ yì la cémʋ́ Lagɔ a nyɛ́nyɛ́lɛ kʋ a, lé nɩ̀ yì la sáà nyɔɔ́ ɔ̀ yrálɛ lɛ́ mɔ̀ mnámnányuó mʋ́ a, mɔ̀ nà kɔ̀ɔ la nyú mʋ́ yráa, lé ɔ ká la mɔ̀ nyúó ʋ̀ kla duo a, nyɛ́.» 11Bhʋ́ ŋwnɔ́ɔ́ srʋ ɔ́ sɔ́kʋ́ mà: «À tʋ́ʋ̀, nɩ́ mʋ́plilɛ ka à, lé nyúbhukuó trʋ̀ mʋ́, dɛ́gbá nà kà bhʋ́anɩ nyúó bhá à? 12Mɔ̀, ɩ zi à tɩtɔ Zakɔ́bʋ kʋ́ ʋ? Ɔ́mɔ́ nyɛ́ àmɔ̀ nyúbhukuó lɩ̀à, ɔ́mɔ́ mɔ̀glʋ̀ ɔ́ mná a nyú lé ɔ yúó yà ɔ mnaá sɔ́ mná sáà a nyúó.» 13Lé Zozíi srʋ ɔ́, ɔ́ anɩ́: «Nyɔ yi nyúó lɩ̀à mná lé mnátʋ yi àyɩ mɔ́ bhlá, 14mà mɔ́ɔ, nyɔɔ́ ɔ̀ yi nánɩ nyúó ná kɔ́ɔ́ mnáada nyɛ́ a mná a, mnátʋ nɩ́ kɔɔ́ kɔ́ɔ̀kɔ́ bhlá. Nyúó ná kɔ́ɔ́ nyɛ́ a, ʋ́ yio mʋ́ kʋ̀ nànɩ́ cémʋ́ nyúdɔ̀lʋ́ɔ́ ʋ̀ nyɛ́ kɔ́ɔ́ ʋ̀ nɩ́ bhɩada ka a.» 15Ŋwnɔ́ɔ́ anɩ́: «À tʋ́ʋ̀, nyɛ́ mɔ́ɔ bhʋ́anɩ nyúó, bhè mnátʋ nɩ ka kɔ́ɔ̀kɔ́ mɔ́ɔ bhlá, bhè nɩ ka yɩ́ sɔ́kʋ́ dɛ́ nyú plí ka yi.»
16Zozíi anɩ́: «Mʋ lé wle ɩ̀ nyɩ̀tʋ, lé kà yi.» 17Ŋwnɔ́ɔ́ anɩ́: «Nɩ́ sí.» Zozíi anɩ́: «Nɩ̀ cí mànɩ́ nɩɩ́ sí a, nà wɔlɩ́ mɛ́, 18yà cɩ́cása yuwle a gbɩ́ bhá, lé ànɔ̀ɔ̀ ɔ̀ kɔ̀ɔ̀ gbó mʋ́ ɩ̀ kʋ̀ lɛ́ a, ɔ nɩ́ ɩ̀ nyɩtʋ ŋwɔ́ɔ. Ɛ̀ nɩ̀ ŋwɔ́ɔ ɩ́mɩ́ a, cɩ́cása ɩ̀ ŋwʋ́ɛ́.» 19Ŋwnɔ́ɔ́ anɩ́: «À tʋ́ʋ̀, ɩ́ yì saá mà Lagɔ a nékʋ́cinyɔ ɩ̀ ŋwɔ́ɔ̀! 20Ɩ̀ lɛ́bhɛɛ, kíkéé lɩ̀à wlú à tɩtɩa Samalitɛ́ɛnyʋa bʋbɔlɛ wá Lagɔ, lé amɔ Zúfʋnyʋa a cí mànɩ́ Zelízalɛ́mʋ ʋ̀ ŋwɔ́ɔ Lagɔ a bʋbɔ̀da.» 21Zozíi anɩ́: «Ŋwnɔ́ɔ̀, ka ná cɩ́cása, mà a yi yɩ́ ʋ́ kʋ lé à nɩ ka yɩ́ à Tʋ́ Lagɔ kíkéé lɩ̀à wlú lé Zelízalɛ́mʋ sɔ́ bʋbɔ̀ kà mʋ. 22Amɔ Samalitɛ́ɛnyʋa, Lagɔ̀ɔ̀ a nɩ́ yì a, ʋ́mʋ́ a bʋbɔlɛ, àmɔ̀ Zúfʋnyʋa, à yìò, ɩ́zà à bʋbɔlɔɔ́, àmɔ̀ mʋ́ Lagɔ na ká plɩ́ɩ lé ɔ ká ʋ́ yrúkanyʋa neé saà. 23Tányɩ yi ʋ́ kʋ, ɩ́zà ɛ́ ya yɩ́ sáà ŋnɩ, lé cɩ́cábʋ̀bɔ̀nyʋ̀àà à bʋbɔlɛ à Tʋ́ Lagɔ a, ʋ́ blɔ̀blɔ̀zùzùò ʋ́mʋ́ nà kà a tíe lé cɩ́cása a mnɩ́ á na kʋ́ʋ́ bʋbɔ̀. Bhʋ́anɩ Lagɔ̀bʋ̀bɔ̀nyʋ̀àà ámá à Tʋ́ Lagɔ mʋ́mɔ. 24Lagɔ ŋwɔ́ɔ Zuzu, mɔ̀ɔ nà kʋ̀ʋ̀ bʋbɔ̀ a, bʋbɔ̀lʋ̀ʋ̀ blɔ̀blɔ̀zùzùò mʋ́ lé cɩ́cása a mnɩ́.» 25Ŋwnɔ́ɔ́ anɩ́: «Ɩ́ yì sáà mà Kláyɩ́sɩ yie, à ʋ́neésanyɔ, ɔ nɩ yi a, ɔ́mɔ́ ɔ̀ yi àmɔ̀ wɔlɩ́ɛ́ fɩ́ɛ́ mʋ́ sɩsa à.» 26Bhʋ́ Zozíi srʋ ɔ́ mà: «Mɔ́ɔ ɔ̀ cíle lɛ́ mɔ̀ gɔ̀ a, mɔ́ɔ ŋwɔ́ɔ Kláyɩ́sɩ.»
27Wɔlíɛ́ kʋ á neé bhè blà ɔ́ kʋjɩ̀nyʋ̀àà pla, neé mna a sɛ́fʋɔ́, céé á ŋnɩ Zozíi yà ŋwnɔ́ɔ́ sɔ́ cícíwɔlɩ neé a. Sɩ́tɛ̀ ɩ́ kʋ lé a nyièdɩ a nyɔ nɩ́ ɔ́ wɔlɩdrè kʋ́ yráa mà: «Wɔlɩ́ gbá ɩ̀ yrálɔɔ́ kʋ́ a? Ɩ́zà wɔlɩ́ gbá yɔ̀sɔ́ a cíé à?»
28Ŋwnɔ́ɔ́, bhʋ́ ɔ́ tɩ ʋ́ ɔ nyúkonyìdèè, lé ɔ́ mʋ dú a nyʋa srʋ ka. 29Ɔ́ mʋ a, ɔ́ pá wɔlɩ́: «A yi, a yi a ká dʋdʋ̀ mà nyɔ! Ɔ́ srʋ mɔ́ɔ ná kpɩkpɩ a mnɩ́ a wɔlɩ́ɛ́ fɩ́ɛ́ yáa nɩ a, Kláyɩ́sɩ nɩ ká lɛ́ ʋ́ kʋʋ?» 30Ŋwnɔ́ɔ́ pá lɛ́ sɩ́tɛ̀ wɔlɩ́ a, nyʋaá wlʋ́ dú á yi Zozíi dʋdʋ̀ kà.
31Bhè ɔ́ kʋjɩ̀nyʋ̀àà kʋ ɔ gɔ̀ á bhibhio bhlà, á nie: «Kanyɔɔ̀, kà yɩ́ li à!» 32Bhè Zozíi nie: «Lelilɩɛ́ ɩ́ ka lé ká li a, a nɩ́ɩ́ yìì.» 33Ɔ́ kʋjɩ̀nyʋ̀àà ŋwúŋwuole, á nie mà: «Áa lɔɔ́ lelilɩɩ?» 34Bhʋ́ Zozíi srʋ á mà: «Ná lelilɩɛ́ ɩ́mɩ́ ŋwɔ́ɔ mà, nyɔɔ́ ɔ̀ cíe mɔ́ɔ a, wɔlɩ́ɛ́ ɔ́ yrá a, ɩ nii lé nɔnʋɔ́ ɔ́ nyɛ́ mɔ́ɔ a, ɩ bhɩʋ́ zɔ̀. 35Amɔ mɔ̀glʋ̀ nɩ́ lɛ́ cí mànɩ́ cɩ́ a mɔ̀na a mnɩ́ sɩ́ká a fáfátanyɩ ya ŋnɩɩ? Mà, mɔ́ɔ ná anɩ́ bhá yɩ́ kʋ́ a dʋdʋ̀ lágbɩ̀ɛ̀, sɩ́ká ya wá zalɩmà, á ya wá fáàda ŋnɩ. 36Nyɔ nɩ mʋ sɩ́kálàgbaá sɩ́ká gbalà kà lé a nɩ nyɛ́ ɔ nɩ dá a, ɔ́ɔ gʋ́gwlàlaá kʋ́ kɔ́ɔ́ ʋ̀ nɩ́ bhɩada ka a zà. Bhʋ́ a tányɩɛ́ nyɔɔ́ ɔ̀ glɩɛ, lé ànɔ̀ɔ̀ ɔ̀ fá a, gá mʋ́ lɔlɔ bhlálaá. 37Núnúó á pá a, lé à ŋwɔ́ɔ mà: Ànɔ glɩɛ, lé ànɔ fá a, á ŋwɔ́ɔ cɩ́cása à. 38Lágba à kà a nɔnʋ a nɩ́ zrɩ a, a mnɩ́ mʋ́ ɩ́ fa amɔ fá ka, nyʋa àna yɛ́ kalɩmɛ lé à zrɩɩ, ɩ́zà amɔ yɛ́ bʋ̀zɛ.»
39Wɔlíɛ́ ŋwnɔ́ɔ́ cí Zozíi a zà lé ɩ̀ ŋwɔ́ɔ mà, ɔ́ srʋ mɔ́ɔ ná kpɩkpɩ a mnɩ́ a wɔlɩ́ɛ́ fɩ́ɛ́ ɩ́ nɩ a, ɩ́ nɩ lé dúó mnɩ́ a Samalitɛ́ɛnyʋa kɔ́kɔ́mnɩ́ ka yɩ́ la Zozíi a fádùò. 40Ɩ́ kà ŋnɩ́ lé Samalitɛ́ɛnyʋa yio srʋ ka mà ɔ kʋ àyɩ ámá gɔ̀, ɩ́ nɩ lé Zozíi zi á gɔ̀ yri sɔ́. 41Lé nyʋaá à kà Zozíi a zà fádùò a, á zumò sɔ́kʋ́ lé á plɩ́ gɔ̀, ɔ cícíwɔlɩɛ́ a zà. 42Lé á srʋ ŋwnɔ́ɔ́ mà: «Nànɩ wɔlɩ́ɛ́ ɔ́ srʋ mɔ̀ lé ɩ̀ cí lɛ́ a, ɩ́ a múó a zà à nɩ́ yɩ́ lɛ́ ɔ́ zà fádùò ka a, mà àmɔ̀ mɔ̀glʋ̀, à pʋɔ nyúkwlí, lé à yì saá mà ɔ́ɔ yì lé ɔ ká cɩ́cása kɔ́ a nyʋa ʋ́ neé saà.»
Zozíi ŋnɩ Galilée lé mɔ̀ɔ a nyʋaá gboloó kʋ́
43Yri sɔ́ɔ plɩ́ a, Zozíi ɔ́ɔ mʋ Galilée. 44Ɔ́mɔ́ mɔ̀glʋ̀ ɔ́ ya wá cí mà, Lagɔ a nékʋ́cinyɔ nɩ yi ɔ bhlé#4.44 A zɛlɩɩ sáà Matíe 13.57; Málɩ́kɩ 6.4; Lúkɩ 4.24. a, ɔ bhílie nɩ́ ŋwʋ́ ʋ́ mɔ́. 45Sɩ́tɛ̀ ɩ́ kʋ bhè ɔ́ pla Galilée a, nyɔ nɩ́ tuo, á yio nyúzɔ kʋ́. Máà tányɩɛ́ mʋ́ á mʋ Flíiflíiglɩ̀sɩ́sɩ̀ɛ̀ a zà Zelízalɛ́mʋ a, wɔlɩ́ɛ́ fɩ́ɛ́ ɔ́ nɩ mɔ̀ɔmɔ̀ a, gáàgá mʋ́ á yɛ́lɩɩ́.
46Lé Zozíi yrɩ́bha lé ɔ́ mʋ Galilée a dúó á wlele Kanáa a, dúó mnɩ́ ɔ́ nɩ wá lé nyúó cɩ́cɩ wá duváa mʋ́ a.
Zozíi yalɩma lóo a cóyʋ a yʋ́
(Matíe 8.5‑13; Lúkɩ 7.1‑10)
Dúó á wlele Kapɛnayʋ́mʋ a, nyɔ a múó ɔ̀ ŋwɔ́ɔ mɔ̀ɔmɔ̀ a lóo a nɔnʋzrɩ̀nyɔ kádɔ a, ɔ́ yuwliyʋ nɩ́ yà. 47Ɔ́mɔ́ nyɔɔ́ nú mà Zozíi ya Zudée wlʋ́ ɔ́ ya Galilée yi a, ɔ́ yio bhibhie ka ɔ ká Kapɛnayʋ́mʋ yi mà ɔ yʋ́ʋ̀, ɔ́ɔ kúé a, ɔ́ kɔ́ɔ́ yalɩmà. 48Bhʋ́ Zozíi srʋ ɔ́ mà: «Amɔ, a nɩ nɩ́ zʋ̀zʋa yà lɛ̀wɔ̀lɩ sɔ́ yɛ́ a, a nɩ́ ka kɔ́ɔ̀kɔ́ fádùò ka a.» 49Lé lóo a nɔnʋzrɩ̀nyɔ̀ɔ̀ srʋ ɔ́ mà: «Ɩ́bhìè Kanyɔɔ̀ yi, dɛ́ɛ́ ná yʋ́ɔ́ nɩ́ àyɩ kú a!» 50Zozíi anɩ́: «Mʋ mà nà yʋ́ɔ́ gà.» Nyɔɔ́ bhá Zozíi a cícíwɔlɩɛ́ cɩ́cása kʋ́ lé ɔ́ yrɩ́bha.
51Ɔ́ kʋ mʋmʋnyùzɔ kʋ́ lé ɔ cóyuo yio srʋ ka, á anɩ́: «Nà yʋ́ɔ́ gà!» 52Lé ɔ́ yrá á, ɔ́ anɩ́: «Glíiyie gbá mʋ́ yʋ́ɔ́ a yíjɩ̀ gbɩ a?» Á anɩ́: «Káàla a kosúgbòsa a tányɩ bhʋ́ wɔtrɔɔ́ dúò.» 53Bhʋ́ yʋ́ɔ́ ɔ tʋ́ luo mà, tányɩɛ́ a múó ɛ́mɛ́ mnɩ́ Zozíi srʋ ɔ́ la mà: «Mʋ mà nà yʋ́ɔ́ ya kwɩ́ neé wlʋ́.» Ɩ́mɩ́ wɔlɩ́ɛ́ lɩ̀à nɩ lé nyɔɔ́ yà ɔ gbó a mnɩ́ a nyʋaá fɩ́ɛ́ sɔ́ bháa ʋ́ Zozíi a fádùò a kalɛɛ́ kʋ́.
54Ɩ́mɩ́ ŋwɔ́ɔ Zozíi a sɔ́ lɛ̀wɔ̀lɩ̀ɛ̀ ɔ́ nɩ tányɩɛ́ mʋ́ ɔ́ wlʋ́ Zudée lé ɔ́ yrɩ́bha Galilée a.#4.54 A zɛlɩɩ sáà 2.11.
اکنون انتخاب شده:
Záan 4: NEY
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© (Active), Wycliffe Bible Translators, Inc. All rights reserved.