1 Cronicl 13
13
Dafydd eisiau symud yr Arch
(2 Samuel 6:1-11)
1Dyma Dafydd yn gofyn am gyngor ei swyddogion milwrol (gan gynnwys capteiniaid yr unedau o fil ac o gant). 2Dwedodd wrth y gynulleidfa gyfan, “Os mai dyna dych chi eisiau, ac os ydy’r ARGLWYDD ein Duw yn cytuno, gadewch i ni anfon at bawb ym mhob rhan o Israel, ac at yr offeiriaid a’r Lefiaid yn eu trefi, i’w gwahodd nhw ddod i ymuno gyda ni. 3Gadewch i ni symud Arch ein Duw yn ôl yma. Wnaethon ni ddim gofyn am ei arweiniad o gwbl pan oedd Saul yn frenin.” 4A dyma’r gynulleidfa’n cytuno. Roedd pawb yn teimlo mai dyna oedd y peth iawn i’w wneud. 5Felly dyma Dafydd yn galw pobl Israel i gyd at ei gilydd – o afon Shichor yn yr Aifft i Lebo-chamath, er mwyn symud Arch Duw yno o Ciriath-iearîm. 6Dyma Dafydd a phobl Israel i gyd yn mynd i Baäla (sef Ciriath-iearîm) yn Jwda, i nôl Arch Duw. Roedd yr enw ‘Arch Duw’ yn cyfeirio at yr ARGLWYDD sy’n eistedd ar ei orsedd uwchben y cerwbiaid.
7Dyma nhw’n gosod yr Arch ar gert newydd, a’i symud hi o dŷ Abinadab, gydag Wssa ac Achïo yn arwain y cert. 8Roedd Dafydd a phobl Israel i gyd yn dathlu’n llawn hwyl o flaen Duw, ac yn canu i gyfeiliant telynau a nablau, tambwrinau, symbalau ac utgyrn. 9Pan gyrhaeddon nhw lawr dyrnu Cidon, dyma’r ychen yn baglu, a dyma Wssa yn estyn ei law i afael yn yr Arch. 10Roedd yr ARGLWYDD wedi digio gydag Wssa, a dyma fe’n ei daro’n farw am estyn ei law a chyffwrdd yr Arch. Bu farw yn y fan a’r lle o flaen Duw. 11Roedd Dafydd wedi gwylltio fod yr ARGLWYDD wedi ymosod ar Wssa; a dyma fe’n galw’r lle yn Perets-Wssa (sef ‘y ffrwydriad yn erbyn Wssa’). Dyna ydy enw’r lle hyd heddiw. 12Roedd Duw wedi codi ofn ar Dafydd y diwrnod hwnnw. “Sut all Arch Duw ddod ata i?” meddai. 13Felly wnaeth Dafydd ddim mynd â’r Arch adre i Ddinas Dafydd. Aeth â hi i dŷ Obed-edom, dyn o Gath. 14Arhosodd Arch yr ARGLWYDD yn y tŷ gyda theulu Obed-edom am dri mis. A dyma’r ARGLWYDD yn bendithio teulu Obed-edom a phopeth oedd ganddo.
اکنون انتخاب شده:
1 Cronicl 13: bnet
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Cymdeithas y Beibl 2023