Jeremeia 47
47
Neges am drefi Philistia
1Y neges roddodd yr ARGLWYDD i Jeremeia am y Philistiaid, cyn i’r Pharo ymosod ar Gasa. 2Dyma mae’r ARGLWYDD yn ei ddweud:
“Edrychwch! Mae’r gelynion yn codi yn y gogledd#Jeremeia 1:13-15 fel afon ar fin gorlifo.
Byddan nhw’n dod fel llifogydd i orchuddio’r tir.
Byddan nhw’n dinistrio’r wlad a phopeth ynddi,
y trefi a phawb sy’n byw ynddyn nhw.
Bydd pobl yn gweiddi mewn dychryn,
a phopeth byw yn griddfan mewn poen.
3Bydd sŵn y ceffylau’n carlamu,
y cerbydau’n clecian, a’r olwynion yn rymblan.
Bydd rhieni’n ffoi am eu bywydau
heb feddwl troi’n ôl i geisio achub eu plant
am fod arnyn nhw gymaint o ofn.
4Mae’r diwrnod wedi dod i’r Philistiaid gael eu dinistrio,
a’r cynghreiriaid sydd ar ôl yn Tyrus a Sidon.
Ydw, dw i’r ARGLWYDD yn mynd i ddinistrio’r Philistiaid,
y bobl ddaeth drosodd o ynys Creta.#47:4 Creta Hebraeg, “Cafftor”, enw arall ar Creta, o ble daeth hynafiaid y Philistiaid – gw. Deuteronomium 2:23; Amos 9:7.
5Bydd pobl Gasa yn siafio’u pennau mewn galar,
a phobl Ashcelon yn cael eu taro’n fud.
Am faint ydych chi sydd ar ôl ar y gwastatir
yn mynd i ddal ati i dorri eich hunain â chyllyll?”
Y bobl:
6“O! gleddyf yr ARGLWYDD,
am faint wyt ti’n mynd i ddal ati i ladd?
Dos yn ôl i’r wain!
Aros yno, a gorffwys!”
Jeremeia:
7“Ond sut mae’n gallu gorffwys
pan mae’r ARGLWYDD wedi gorchymyn iddo?
Fe sydd wedi dweud wrtho am ymosod
ar dref Ashcelon a phobl yr arfordir.”
اکنون انتخاب شده:
Jeremeia 47: bnet
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Cymdeithas y Beibl 2023