Yoa 6
6
Yésus a ve bizu'u bi bôte bidi
(Mt 14:13-21; Mk 6:30-44; Lk 9:10-17)
1E mvuse valé, ane Yésus a nga téé a dañe mañe me Galilé ya Tibériad, e kindi'i ya yat. 2Nkunda bôt anen wo zu wo tôñe nye, amu be nga yen bitua bi mam a nga bo e be minkôkon. 3E nde ñhe Yésus a nga ke e nkôle yôp, a ntoo wé, baa beyé'é bé. 4Valé Pak é ntoo bebé, abô'ô Beyude. 5Eyoñe Yésus a lômeya mis a lôbô, a yen ane beta nkunda bôt a zu be nye, e nde a nga jô Filip na: E ne bia ye ke kuse belet vé na bôte ba be di' 6A nga jô nalé a ve'ele nye; amu émien a mbe a yemek jam a ye bo. 7Ane Filip a nga yalane nye na: Belet tañe bedenié mintete mibaé, é vo'o yiane môt ase na a nyoñe ve mon ôfus. 8E nde ñye'é wé wua, André, monyañe Pierre a zu jô na: 9Mongô éziñ a ne va, a bili belet étaan a kos ébaé: ve jôme té é ne jé asu abime abui bôte di' 10Ane Yésus a nga jô na: Jo'ane bôt e si. Bilo'o bi mbe abui vôm ate. E nde ñhe beyôme befam, tañe bebé toyini étaan, be nga mane tabe si. 11Ane Yésus a nga nyoñe belet nyô, a mane ve akéva, a ye kab je bôte be nga tôtoone si, kose fe avale da, abim ese be nga kômbô. 12Eyoñe be maneya jaé, e nde a nga jô beyé'é bé na: Kelane mia to'é afufus ese da te buk, jôm éziñ é bo te ja ntuk. 13Ane be nga tôkane afufuse nga buk, e belet étaan ya bôte ba be nga di, be jalé minkoé awôm a mibaé. 14Ayene be nga yen étua jam a nga bo, bôte be nga ke ba jô na: E bebela, e môte nyô e nye a ne *nkulu mejô a zu e si ndôn. 15Eyoñe Yésus a yemeya na ba kômbô zu bi nye a ngule na be tele nye njô bôt, ane a nga kôlô valé a sôlan, a beta bulan e nkôle yôb émien étam étam.
Yésus a wulu e mendim me mañ yôp
(Mt 14,22-27; Mk 6,45-52)
16Eyoñe ngô'é é boya, ane baa beyé'é bé be nga siliki e mfa'a ya mañ 17be kele dañe éfunga été a ke e kindi'i mañe ya Kapernawum. Dibi e maneya vin, Yésus a ngenane teke zu koone be, 18ngul évuñulu kik é nga vuñ e mañ été va. 19Eyoñe be fuleya éfunga e nté bestad mewôm mebaé a betaan, nge mewôm melale kik, ane be nga yene Yésus a za'a a wulu e mañe mañ yôb a ntoo bebé a éfunga, e nde be nga ko woñ. 20Ane a nga jô be na: Mamiene le, te koone woñ. 21Be nga kômbô ñhe na be nyoñe nye éfunga été, a été été, ane éfunga é nga kui kindik, vôm be nga ke.
Yésus a ne bidi ya ényiñ
22Bia-tyé, e nkunda bôt ô mbe ô tele e kindi'i mañe ya yat, be nga yene na éfunga éfe é nji bo vôm ate, fo'o ve jia jia, a na Yésus baa beyé'é bé be nji dañ éfunga jia, beyé'é be nga ke fo'o v'étam étam. 23Ane bifunga bife bi nga ke so e Tibériad a zu bebé a vôme bôte be nga di bidi éyoñe Nti a nga mane ve akéva. 24Eyoñe nkunda bôte wuna ô nga yene na Yésus a nji bo valé, ja'ane beyé'é bé, ane be nga dañ e bifunga bite a ke ba jeñe Yésus e Kapernawum. 25Ayene be nga yene nye e kindi'i mañe ya yat, ane be nga jô nye na: A Rabbi, wo te zu vana éyoñ évé' 26E nde Yésus a nga nyoñe nkobô a jô be na: E bebela, bebela émien, ma jô mia na, mia jeñe ma sake amu na mia te yene bitua bi mam, v'amu na mia te di belet a jaé. 27Bo'an ésaé bidi, sake bidi bia ndaman, ve bidi bia tabe akekui ényiñe ya nnôm éto, bidi Mone Môt a ye ve mia, amu e nye Zambe Esaa a nga kpwele ndem. 28E nde ñhe be nga jô nye na: Bia yiane bo jé ane bia ye bo bisaé bi Zambe' 29Ane Yésus a nga yalane be na: Esaé Zambe é ne na mi buni'i e môt Zambe a nga lôm. 30E nde be ke be nga jô nye na: Ndeme éziñ fé wo bo na bi yen a buni wo? Jé fo'o wo bo' 31Amu na b'ésaa bangan be nga di *manna e fé été, avale Ntilan ô ne na: Me nga ve be belet ja so yôb na be di. 32Ane Yésus a nga jô be na: E bebela, bebela émien, ma kate mia na, sake Môze nye a nga ve mia belet ja so yôp, Esaa wom e nye a ve mia benyaa bidii ba so yôp. 33Amu na belet Zambe e nje é ne môt a so yôb a zu ve si ndôn ényiñ. 34E nde be nga jô nye na: A Nti, ke wo ve ñhe fo'o bia belet éte kom ése. 35Ane Yésus k'a nga jô be na: Ke ma me ne belet ya ényiñ, e môt a zu be ma, aa ye wô'ô zaé, a môt a buni ma, aa ye wô'ô évé ne tya. 36Ke me nga mane kate mia, mi yene fe ma, ve mi teke buni. 37E bôte bese Tate a ve ma ba ye zu e be ma, a môt ase a zu be ma maa ye wua nye atan, 38amu me nga so yôp, sake na me bo nkômbane wom mamien, ve nkômbane môt a nga lôme ma. 39E nkômbane môt a nga lôme ma kik ô ne na, e bôte bese a nga ve ma, me bo te ve'ele jañele wua ya été, ve na me wômôlô be bese e môse wo ye su'ulan. 40Amu na nkômban Esaa wom ô ne na, e môt ase a yene Mon a buni fe nye, a bi ényiñe ya melu mese, a mamien ma ye wômôlô nye e môse wo ye su'ulan. 41Beyude be nga ke ñhe ba so'o nye amu a nga jô na: Ma me ne belet ja so yôp, 42be nga ke ba kobô na: Ye sake Yésus mone Yôsep nyô, e nye bia bebien bia kôme yem ésaa baa nyia? Ve amu jé a nga zu jô éyoñe jina na, me nga so yôp' 43E nde Yésus a nga nyoñe nkobô a jô be na: Te mia kôsa ke mia nyiñ. 44Teke'e ne môt éziñ a ne zu be ma nge Tate a nga lôme ma a nji zu a dutu nye, a mamien ma ye wômôlô nye e môse wo ye su'ulan. 45Amu Ntilan ô ne e bekalate bekulu mejô na: Bôte bese ba ye nyoñe ñye'elane Zambe. E môt ase a maneya wô'ô mame ma so be Tate a nyoñe ñye'elan été, môt ate nye a zu be ma. 46Môt éziñ a nji yene Tate, nga fo'o ve nyô a nga so be Zambe, e nye a nga yene Tate. 47Bebela, bebela émien, ma kate mia na, e môt a buni e nye a bili ényiñ ya nnôm éto. 48Ma me ne bidi ya ényiñ. 49Bésaa benan be nga di *manna e fé été, e nde fe be nga mane wu. 50Ve belet nyuna kik é ne bidi bia so yôb na, e môt a di je a bo teke wu. 51Ma me ne vevea belet a nga so yôp; nge môt éziñ a dii belet éte, a ye bi ényiñ ya nnôm éto, e nde fe e belete ma ye ve é ne minsône miam asu ényiñe ya si nyu. 52Beyude be nga ke ñhe ba wôman e zañe jab a jô na: Aval avé môte nyô a ne ngule ya ve bia minsône mié na bi di' 53Ane Yésus a nga jô be na: Bebela, bebela émien, ma kate mia na, nge mi teke di minsône mi Mone Môt, a nyu fe metyi mé, ényiñ é se ngul ya bo be mia. 54E môt a di minsône miam a nyu fe metyi mam a bili ényiñe ya nnôm éto, a mamien ma ye wômôlô nye e môse wo ye su'ulan. 55Amu minsône miam mi ne benya bidii, a metyi mam me ne benya menyuu. 56E môt a di minsône miam a nya'a fe metyi mam e nye a too be ma, a ma fe me too be nye. 57Aval ane Tate a bili ényiñ a nga lôme ma, ajô te ma nyiñ amu Tate, avale te fe e môt a di ma, nye fe a ye nyiñ amu ma. 58E belete nyô é ne nyô é nga so yôp, sake aval ane nyô betate benan be nga di, be mane fe wu, e môt a di belete nyô a ye nyiñ ényiñe ya melu mese. 59E mame ma a nga kobô a ye'ele'e bôt *aba Zambe ya Kapernawum.
Mejô ya ényiñ ya nnôm éto a Nti, bia ke be za mfe
(Hé 3:12; 4:12-13; 10:38-39; P. ôsu 2:6-9)
60Beyé'é bé abui, éyoñe be maneya vô'ôlô nye, be nga jô na: Nkobô wu ô ne ayet; za a ne wô'ô wô' 61Eyoñe Yésus a yemeya e nleme wé été na beyé'é ba so'osane nye ajô te, ane a nga jô be na: Ye jame di da kolé mia ôbak' 62E nga ye ke kui aya nge mi nga ye yene Mone Môt a betek a ke yôb mfa'a a nga taté tabe' 63Nsisime ñwô wo ve ényiñ, ve minsôn mi nji volô jôm éziñ; e mame me nga kobô mia me ne *nsisim, me too fe ényiñ. 64Ve bôte b'éziñ be ne be mia, be ne teke buni; amu Yésus a mbe a yemek aso atata'a beza be mbe te buni a za a ye koñe nye. 65E nde a zu jô na: Ajô te ñhe me nga kate mia na, teke môt éziñ a ne zu e be ma, nge a nji nyoñe jame te ane ngab e be Tate. 66A taté éyoñ éte, beyé'é bé bevo'o abui be nga lume nye mvus, teke fe ve'ele beta wuluu nye nsamba. 67E nde ñhe Yésus a nga jô beyé'é awôm a bebaé na: Ye mia fe mia kômbô kôlô a ke' 68Ane Simon Pierre a nga yalane nye na: A Nti, bia ye ke e be za mfe? Ke wo ô bili mejô m'ényiñe ya nnôm éto, 69e nde fe na, mfa'a wongan, bi maneya buni a bi yemeya na wo ô ne Mfufubu Zambe. 70Ane Yésus a nga yalane be na: Ye mamien me nji tob mia bôt awôm a bebaé? Ve, môte wua ya be mia a ne *satan. 71A nga kobô ajô Yudas, mone Simon Iskariôt; amu e nye a ye koñe nye, a too fe môte wua ya beyé'é awôm a bebaé.
اکنون انتخاب شده:
Yoa 6: BDCB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible en langue Bulu © L'Alliance Biblique du Cameroun, 2007, 2015.