Mateo 20
20
Nguli ya bakamilimo ba mu mfuba ya shinyanca
1“Ndaba Wene wa muyilu ukufweka ngo mwine litala, watutikile lumenemene kuya na kushinga bakamilimo ba mu mfuba yendi ya mikabo ya shinyanca. 2Waliyuvwashanine nabo ngayi abapane shiliva yimo ha mutena, oho abatumine mu mfuba yendi ya mikabo. 3Oho shikati shashingile kukuma sha wumutanu na binaa watutikile ku mwanya wakulandishila, wamonene bamina hinga bemana hamunkanda kwakubula kutenda shamina. 4Wabatongwezele ngayi, ‘Yenunga nenu mukatende milimo mu mfuba ya mikabo, na nami nikamipana binafwanini.’ 5Pe niho bayile. Wayile kami oho shikati shashingile kukuma ku sha walikumi na bibili na shikati sha wulikumi na mutanu. 6Oho shashingile kukuma ku shikati sha wulikumi na mutanu na babili, wayile, pe wawanine bamina hinga bemana, niho ambile kukwabo ngayi, ‘Munemanini bihi kuno mutena nimwawo kwakubula kutenda shamina?’ 7Bakumbwile kukwendi ngayi, ‘Ndaba kowa muntu unatwihana.’ Wambile kukwabo ngayi, ‘Yenunga nenu mukatende milimo mu mfuba ya mikabo.’
8 # Bal 19:13; Nday 24:15. “Ku shikati sha mazolo, mwine mfuba wambile kuli mukakutwaminina bakamilimo ngayi, ‘Ihana bakamilimo, pe ubapane mali abo, utatike na ba mamaninino, kutwala ku bamabalikilo.’ 9Oho bezile, baya benginine ha milimo ku shikati sha wulikumi na mutanu na wubili, muntu na muntu watambwile shiliva yimo. 10Pe oho bakakutatika bezile, bahanganikile ngayi bakatambuula kupitakana baminabo, ngoboni nanibo batambwile shiliva yimo muntu na muntu. 11Oho batambwile, bekalile na ntongawishi kuli mwine mfuba, 12pe bambile ngayi, ‘Aba balume ba mamaninino banatende milimo mu shikati shimo, ngoboni unabezekele hamo nanetu, etu, tunatende milimo nimwayo kami tunayuwu ntukumina ya mutena.’
13“Ngoboni wakumbwile kuwamina ngayi, ‘Muhoni, kukutenda shibi nifwako, kati kaliha twaliyuvwashanine ngayi mwanga nikupanike shiliva yimo ndi? 14Shimba shobe uye. Shinengi shifungo shami ngayi nipane ba mamaninino ngonehe ninakupana. 15Kati kaliha nikufwanina kutenda byami ngonehe nikushinga ndi? Kati uli na mwili ndaba ya shishemo shami ndi?’ 16#Mat 19:30; Mak 10:31; Luk 13:30. Nohobene ba mamaninino bakenga bakulimeneka, kami bakulimeneka bakenga ba mamaninino.”
Yeshu ukwamba ka wuhatu ha bya lufu lwendi
(Mako 10:32-34; Luka 18:31-34)
17Oho Yeshu ayilenga ku Yelushalema, watwalile bandongesha bendi ba likumi na babili ku mbali. 18Pe wabatongwezele ngayi, “Monenu, tuli nakuya ku Yelushalema, oko Mwana Muntu akapanikiwa ku bakankombela ba bakulwane na bakakulongesha ndayano. Kami bakamuyata afwe. 19Bakamupana ku Bakamatunga obo bakamukumangiza na kumuzipola na kumukoleka, ngoboni ha mutena wa wuhatu ukashangukila ku wumi.”
Kunyepa kwa mukaza Zebende
(Mako 10:35-45)
20Niho mukaza Zebende ezile kuli Yeshu hamo na bana bendi ba balume babili, washungumanine kukwendi, pe niho amunyepele shuma shamina.
21Niye wambile kukwendi ngayi, “Ukushinga bishini?” Wambile ngayi, “Yitabila ngayi aba bana bami ba balume mwanga bakekale, umo ku liboko lyobe lya shilyo, wamina ku liboko lyobe lya shimoho mu Wene wobe.”
22Ngoboni Yeshu wakumbwile ngayi, “Kulimuka eshe ukulomba wufwako. Kati mukutwesha kunwina mu shinwino sha makando eshe nikanwina ndi?”
Bambile ngayi, “Tukutwesha.”
23Yeshu wambile kukwabo ngayi, “Mwashikuma mukanwina mu shinwino shami, ngoboni kwikala ku liboko lyami lya shilyo, hinge ku liboko lyami lya shimoho, kaliha ami nikafungulasho, myanya eye yikapanikiwa kukwabo baya Tate awahishilileyo.”
24Oho baya bandongesha likumi bayuvwile ebye, bapilaminine muntu na mukonzowendi. 25#Luk 22:25-26. Ngoboni Yeshu wabehanine nimwabo, wambile ngayi, “Mukulimuka ngayi, bamyene ba bakamatunga bali na nyala ha bantu, kami babilolo babo bali na ngovu za ndayano ha bantu. 26#Mat 23:11; Mak 9:35; Luk 22:26. Ngoboni hinga kwinga noho kukwenu. Haya nimwendi ukushinga kwinga wamunene kukwenu, enge mukamilimo wenu. 27Kami nimwendi ukushinga kwinga ntwamina, enge ndungo yenu. 28Ndaba hinge Mwana Muntu, kaliha wezile ngayi bamutendele milimo, ngoboni wezile mukutenda milimo, kami mwanga apane wumi wendi mu kukuliza bantu babengi.”
Yeshu ukunyongomanisha tushishitwa babili
(Mako 10:46-52; Luka 18:35-43)
29Oho Yeshu na bandongesha bendi bafumine ku Yeliko, likunge lyalinene lya bantu bamukonkele. 30Tushishitwa babili bekalile kunkumo ya mukwakwa oho bayuvwile ngayi Yeshu ulinakupita, babilikizile ngayi, “Obe Mwana Ndavita, tuyuvwileko nceshe!”
31Likunge lya bantu babakalihilile ngayi bamwene, ngoboni babilikizile shikuma ngayi, “Mwene, tuyuvwileko nceshe, obe Mwana Ndavita!”
32Niho Yeshu emanine wabehanine. Wabepwile ngayi, “Mukushinga nimitendele bishini?” 33Bakumbwile ngayi, “Mwene, tukushinga ngayi utoneshe meho wetu.”
34Yeshu wabayuvwilile nceshe, pe wakwatile ha meho wabo, wanguwangu meho wabo amonene, pe bamukonkele.
اکنون انتخاب شده:
Mateo 20: KK2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Testament in Nkoya © The Bible Society of Zambia, 2008.