Mateo 24
24
Yeshu ukwamba bya kushiwuka kwa Litala lya Nyambi
(Mako 13:1-2; Luka 21:5-6)
1Yeshu wafumine mu Litala lya Nyambi, pe oho ayilenga bandongesha bendi bezile mukumumonesha mitumbwe ya matala eshe yazikiwile kuyo. 2Yeshu wambile kukwabo ngayi, “Mukumona byuma ebye nimwabyo ndi? Mwashikuma nikumitongweza ngayi, kowa limanya limo lilihayilu ya limanya lyamina, likabula kwandumukila hanci.”
Makando na malwa
(Mako 13:3-13; Luka 21:7-19)
3Oho Yeshu ekalile ha Lipili lya Oliveta, bandongesha bendi bezile kukwendi kwaninkayabo, pe bambile ngayi, “Tutongweze shikati oho ebye bikatendiwe, kami shimonekesho shiti shakwiza kwobe na sha kukotoka kwa kaye?”
4Yeshu wakumbwile kukwabo ngayi, “Keyenu, kutina muntu wamina amyongeze. 5Ndaba babengi bakeza mu lizina lyami, bakamba ngayi, ‘Ami Kilishitu,’ pe bakongeza bantu babengi. 6Oho mukayuvwa bya zinzita na mpupo ya zinzita, hinga mukalikekula. Ndaba ebye binafwanini kumoneka ngoboni mamaninino shilolo akume. 7Ndaba litunga likafutukila litunga lyamina, kami wene ukafutukila wene wamina. Kukekala kapande na kukanka kwa litunga ku zimbalila zazingi. 8Byuma ebye nimwabyo bikenga ngonehe kutatika kwa makando a mbuyama hakuhema mwana.
9 #
Mat 10:22. “Bakamimanga na kumiyaka mu maboko abayo bakamiyandisha, pe mukazihiwa. Matunga nimwawo akamizimba ndaba ya lizina lyami. 10Ha shikati shiyo babengi bakashiya kukulupila kwabo, bakalibeba umo na wamina, bakalizimba umo na wamina. 11Bamiluwe ba mahalo babengi bakeza, pe bakongeza bantu babengi. 12Ndaba wubi wukahanya, pe shishemo sha babengi shikapola. 13#Mat 10:22. Ngoboni ou ukazumanana kukuma na ku mamaninino, niye ukapulwishiwa. 14Eze ncango zaziwahe za Wene zikashimikiwa mu kaye nimwamo kwinga wupaki ku bantu nimwabo, nihoboni mamaninino akeze.
Makalikiza amanene
(Mako 13:14-23; Luka 21:20-24)
15 # Ndan 9:27, 11:31, 12:11. “Mukamona ‘Wunyengwe Wakunonga’ ou atoyele muluwe wa Nyambi Ndanyele, hinga wemana mu mwanya wakuyela. (Niye ukulaba ayuvwishishe.) 16Pe obo bali mu Yundeya bakatinina ku mapili. 17#Luk 17:31. Ou uli hayilu ya litala lyendi hinga ahuluka na kwingina mu litala ngayi ashimbemo shuma shamina. 18Kami ou uli mu mfuba hinga aboka ngayi akashimbe shivwalo shendi. 19Makando wabo baya bakemita na baya bakuyamwisha ha matena ayo. 20Lombelenu kuli Nyambi ngayi kutina kwenu hinga kukekalako ha shikati sha mupepo, hinga ha Mutena Wakukatala. 21#Ndan 12:1; Kuh 7:14. Ndaba ha shikati shiyo kukekala makalikiza amanene, akupitakana makalikiza nimwawo ekalileko kubalika ku kutatika kwa kaye kuleta na ku shikati shino, kami kukekalako kumbili afwako. 22Shinga ayo matena akabula kushepeshiwa, shinga kowa muntu ukapuluka. Ngoboni ndaba ya baya banahatiwi, ayo matena akashepeshiwa.
23“Ha shikati shiyo ndi muntu ukamba kukwenu ngayi, ‘Monenu, Kilishitu uli kuno!’ Hinge ngayi, ‘Kilishitu uli Kuyo!’ Hinga mumukulupila. 24Ndaba Bakilishitu ba mahalo na bamiluwe ba mahalo bakeza, na kumonesha bimonekesho byabinene na bikomokesho ngayi bakashanwishe hinge bakuhatiwa ndi shinga shikatwesheka. 25Yuvwenu, namitongweze oho shikati shilolo shikume.
26 #
Luk 17:23-24. “Nohobene ndi bantu bakamitongweza ngayi, ‘Monenu, uli mu libelelengwa!’ Hinga mukayako. Hinge ngayi, ‘Monenu, unaliholeke kuyo!’ Hinga mukulupila. 27Ndaba kwiza kwa Mwana Muntu kukenga ngonehe lumuni lwa mvula lwamweshanga kubalika ku mushamuko, kukakuma na ku mponci.
28 #
Luk 17:37. “Oku nimwako kuli mutuntu, niko akungulukilanga makubi.
Kwiza kwa Mwana Muntu
(Mako 13:24-27; Luka 21:25-28)
29 # Isha 13:10, 34:4; Ezek 32:7; Yowe 2:10, 31, 3:15; Kuh 6:12-13. “Wanguwangu munyima ya makalikiza a matena ayo, mutena ukashipa, kami ngonda kukatuba wezi wendi wufwako, nyenye zikawa muyilu, pe ngovu za mayilu zikanyenkanishiwa. 30#Ndan 7:13; Zeka 12:10-14; Kuh 1:7. Niho shilimukisho sha Mwana Muntu shikamoneka muyilu. Bantu nimwabo ba hano hanci bakalila, oho bakamona Mwana Muntu heza na makumbi na ngovu na wuwahe shikuma. 31Niho ukatuma mangeloyi bendi na kutendoka kwakunene kwa mpandula, pe bakakungulula bakakuhatiwa bendi ku zimbalila zinaa za hanci, kutatika ku mamaninino amo a liyilu kutwala ku mamaninino amina.
Shilongesha sha ha mutondo wa mukuyu
(Mako 13:28-31; Luka 21:29-33)
32“Lilongeshenu bya mutondo wa mukuyu. Oho myahi yawo yikutundula na kuzobela mabizi, mukulimuka ngayi mayinza ali hahepi. 33Nohobene nanenu oho mukamona ebye nimwabyo, limukenu ngayi shikati shili kwakwipi, wuluno shinakumu. 34Mwashikuma nikwamba kukwenu ngayi, mukoka owe kukamana wufwako, hantu ebye nimwabyo binatendiwi. 35Liyilu na hanci bikamana, ngoboni mazu wami kukamana afwako.
Kowa muntu ukulimuka mutena na shikati
(Mako 13:32-37; Luka 17:26-30, 34-36)
36“Ngoboni bya mutena uyo na shikati shiyo kowa muntu ukubilimuka, hinge mangeloyi a muyilu, hinge Mwana wufwako, ndele tuhu Tate ukulimuka. 37#Shit 6:5-8. Ngoboni nehe kwekalile ha matena a Nowa,* nisho kami enze shikekale hakwiza kwa Mwana Muntu. 38Ngonehe kwekalile ha matena ayo libazi oho shilolo lize, bantu balilenga na kunwa na kuyeka na kuyekishiwa, hantu mutena uyo enginine Nowa mu wato. 39#Shit 7:6-24. Bantu kaliha balimukile shamina, hantu libazi lyakumine, pe lyabakupwile nimwabo. Kukenga nahiyo kami hakwiza kwa Mwana Muntu. 40Ha shikati shiyo balume babili bakekala mu mfuba, umo ukashimbiwa wamina ukashala. 41Bambuyama babili bakekala na kutwa mu nkunzu, umo ukashimbiwa wamina ukashala.
42“Nohobene keyenu, ndaba kulimuka mutena ou akeza Mwene wenu mufwako. 43#Luk 12:39-40. Ngoboni limukenu eshe, shinga mwine litala walimukile shikati sha wushiku osho mwizi akeza, shinga watonene, ngayi litala lyendi hinga litibiwa. 44Nohobene nenu libalakenyenu, ndaba Mwana Muntu ukeza ha shikati shiya mukubula kulimuka.
Mukamulimo wa kulunga hinge wakubula kulunga
(Luka 12:41-48)
45“Kati yani mukamulimo wa kulunga wa ngana? Nengi uya anayaka hekulyendi ha mulimo wakulama bakalitala lyendi, ngayi abapanenga byakulya ha shikati shinafwanini. 46Shikenga shashiwahe kuli uya mukamulimo, ndi hekulyendi ukamuwana hatenda milimo. 47Mwashikuma nikumitongweza ngayi, uya mukamulimo, hekulyendi ukamwinga mukakulama wuheti wendi nimwawo. 48Ngoboni ndi uya mukamulimo wamubi hakwamba mu mutima wendi ngayi, ‘Hekulyami unehala kwiza,’ 49pe ha kutatika kukama baminendi bakamilimo na kulya na kunwa hamo na bakakukolwa. 50Hekulyendi ukeza ha mutena uyo mukamulimo akabula kumutatilila naha shikati osho akubula kulimuka. 51Ukamuyuvwisha kukola shikuma, na kumuyumbila ku mbalila hamo na bakashishweka, kuya akalila na kulikekenya ku mayewe.
اکنون انتخاب شده:
Mateo 24: KK2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Testament in Nkoya © The Bible Society of Zambia, 2008.