Mako 2
2
kunyongomanisha mulume wa kalepa
(Mateo 9:1-8; Luka 5:17-26)
1Kunyima ya matena amashe, Yeshu wabokele ku Kapenauma, bantu bayuvwile ngayi Yeshu naboko uli ku litala lyabo. 2Bantu babengi bakungulukile na kwinzalisha liyo litala, kami kwabulile mwanya wakupitila ndaba bantu benzalile na mu shipana. Yeshu washimikilile lizu kukwabo. 3Niho kwezile balume banaa hinga bashimba mulume wa kalepa ha wulili. 4Kaliha batweshele kumukumisha kuli Yeshu ndaba ya likunge lya bantu. Nohobene bakandamine na kuyambulula hayilu ya litala haya ekalilile Yeshu. Oho batubwile litubwa bashezumwishililemo uyo mulume wa kalepa hinga alangana ha wulili wendi. 5Yeshu wamonene kukulupila kwabo, wambile ku mulume wa kalepa ngayi, “Mwanami, wubi wobe unayatiwili.”
6Ngoboni bakakulongesha ndayano bamo bekalile kuyo, bangungutile mu mitima yabo nakwamba ngayi, 7“Bishini ou muntu akwambila nehe? Elye lihandu! Yani ukutwesha kuyatila wubi, kaliha Nyambi tuhu ndi?”
8Wanguwangu Yeshu walimukile mu mutima wendi ngayi bekalile na kungunguta, wambile kukwabo ngayi, “Ndaba ngani mukuhanganika byuma ebye mu mitima yenu? 9Shawangu shiti, kwamba ku nou mulume wa kalepa ngayi, ‘Wubi wobe unayatiwili’ hinge ngayi, ‘Katuka ushimbe wulili wobe wende?’ 10Haya nikumimonesha mwanga mulimuke ngayi, Mwana Muntu uli na ngovu hano hanci zakuyatila wubi.” Niho ambile ku mulume wa kalepa ngayi, 11“Nikwamba kukwobe ngayi, katuka, shimba wulili wobe uye ku litala lyobe!”
12Oho bantu nimwabo hibamona, uya mulume wakatukile, washimbile wulili wendi, pe wanguwangu watutikile. Nohobene bantu nimwabo bakomokele kami bayemezele Nyambi, hibamba ngayi, “Hinga twatanga shilolo tumone shuma shanehe!”
Yeshu ukwihana Levi
(Mateo 9:9-13; Luka 5:27-32)
13Yeshu kami wabokele ku shibumbo sha Liziba lya Ngalileya. Likunge lya bantu lyezile kukwendi, niho atatikile kubalongesha. 14Oho Yeshu apitilenga, wamonene Levi mukakutelesha, mwana Alufweya hinga ekala mu litala lyakuteleshela. Wambile kukwendi ngayi, “Nkonke.” Levi wakatukile wamukonkele.
15Munyima yanebye Yeshu wekalile na kulya mu litala lya Levi. Bakakutelesha babengi na bakawubi bamukonkele, wingi wabo bekalile nendi hamo na bandongesha bendi. 16Bakakulongesha ndayano baya bengile Bafwalishi oho bamonene Yeshu halya hamo na bakakutelesha na bakawubi, bepwile bandongesha bendi ngayi, “Shumangani akulila na kunwa hamo na bakakutelesha na bakawubi?”
17Yeshu oho ayuvwile eshe, wabakumbwile ngayi, “Bantu banzimba kushinga nganga bafwako ndele bakakukola tuhu. Kaliha nezile mukwihana bakakwoloka, ngoboni mukwihana bakawubi ngayi batenguluke.”
Liyipu lya ha kuzila kulya
(Mateo 9:14-17; Luka 5:33-39)
18Shikati shamina bandongesha ba Yowano Mukakuzubilisha na Bafwalishi bazililenga kulya. Bantu bamo bezile na kwipula Yeshu ngayi, “Shuma ngani bandongesha ba Yowano na bandongesha ba Bafwalishi bazilanga kulya, ngoboni bandongesha bobe kuzila kulya bafwako?”
19Yeshu wakumbwile ngayi, “Kati bahoni ba mukashinawenga bakutwesha kuzila kulya oho mukashinawenga ushili nabo ndi? Oho mukashinawenga ushili nabo kuzila kulya bafwako. 20Ngoboni shikati shikeza oho mukashinawenga akafumishiwa kukwabo, nohoboni bakazile kulya.
21“Kowa muntu wakutopeka shitabu shashipya ha shivwalo sha mwaka, ndaba shitabu shashipya shikatabula sha mwaka, pe litubwa likendelela. 22Kami kowa muntu wakulongela waine yaipya mu mbokoshi ya mwaka. Ndi muntu ukwinga noho, pe waine yayipya ikatabula mbokoshi. kami waine yikayitika, na mbokoshi yikabipa. Ngoboni waine yayipya yayakiwanga mu mbokoshi yayipya.”
Liyipu lya ha Mutena Wakukatala
(Mateo 12:1-8; Luka 6:1-5)
23 # Nday 23:25. Yeshu wapitile mu mafuba a loto ha Mutena Wakukatala. Bandongesha bendi oho bendelenga nendi, batatikile kupulula loto. 24Bafwalishi bambile kukwendi ngayi, “Mona, ndabangani bandongesha bobe bakutenda eshe shakubula kufwanina ha Mutena Wakukatala?”
25 # 1 Sham 21:1-6. Yeshu wambile kukwabo ngayi, “Hinga mwatanga shilolo mulabe eshe atendele Ndavita shikati shiyo oho akalikizile na kushinga kulya ndi? Ndavita na bantu bendi bekalile na nzala. 26#Bal 24:9. Niye wenginine mu Litala lya Nyambi na kulya mankende ayo atupuliwile kuli Nyambi. Eshe shengile shikati oho Abiyatale hinga enga Mukulwane wa Bakankombela Nimwabo. Kuya na ndayano, ndele bakankombela tuhu nibo bafwanina kulya mankende awa. Ngoboni Ndavita walile kami wapanineko na bantu bendi.”
27Yeshu wamanishile nakwamba ngayi, “Mutena Wakukatala watendiwilile muntu, kaliha muntu walengiwilile Mutena Wakukatala. 28Nohobene Mwana Muntu niye Mwene wa Mutena Wakukatala.”
اکنون انتخاب شده:
Mako 2: KK2008
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Testament in Nkoya © The Bible Society of Zambia, 2008.