Jonashi 1
1
Jonashi ishigapitsavetanakarira Tasorintsi
1Impo yogari Tasorintsi iniakeri Jonashi, itomi Amitai, ikantiri:
2«Maika viro, piatakera apatotakara pankotsi paitacharira Ninive pinkamantaigakerira pinkantaigakerira ikantake Tasorintsi nompogereaigakeri, noneaigakeritari pairo yogagavageigaka ikañovageigakara.»
3Kantankicha yogari Jonashi tera inkematsateri onti ikogavetaka irishigapitsatanakerimera Tasorintsi. Nerotyo iatantakarira agatagetira pitotsi paitacharira Jope, ario kara ineapaakero omarane pitotsi panikyarira oatanake Tarisuku; impo ipunatanakero ovashi yomatetanaka iatanakera.
4Kantankicha yogari Tasorintsi ikantake ontanpiatanakera omarane tampia, ovashi otampiavagetanake kara jiririri ovoresekantanaketyo nia panikyatyo ontintsiraavagetanakero omarane pitotsi.
5Yogaegiri tavageigatsirira pitotsiku omarane itsarogavageiganaketyo kara, impo paniropage iriroegi iniaiganakeri itasorintsiegite ikaemageigamatityo kara. Impo ovashi yovuokajaigakero magatiro arakintsipage kameti gasakonaniri otenatai. Yogari Jonashi, onti yagutanake oteniku pitotsi ario kara imagasevagetake.
6Impo yogari shintarorira pitotsi iatake inakera Jonashi, ikantapaakeri:
«¿Tyara pikantakara viro maika magasevagetakevi? ¡Tinaanakenityo piniakerira pitasorintsite! Impo irirorakari tsarogakagaigakaene impugamentaigakaera kameti ganiri aokajaiga.»
7Impo, yogaegiri tavageigirorira pitotsi omarane ikantavakagaiganaka paniropage iriroegi ikantaigi:
«Atsi tsamenityo agoigakerira tyani kañotagantaigakai okañotantakarira maika.»
Impo ovashi yogotantaigakari yogotantapiniigaririra, inti okatinkatanake Jonashi iriro kañotagantakero.
8Iriroegi ikantaigiri:
«Atsi kamantaigena tatoita oponiantaka okañotantakarorira maika atsipereantaigakarira. ¿Tatoita pantira viro? ¿Tyara piponiakara? ¿Tyara opaita pigipatsite? ¿Tyani pitovaireegi viro?»
9Yogari Jonashi ikanti:
«Nanti evereo, inti nokematsati Notinkami, irirori inti Tasorintsi timatsirira enoku, vetsikagetakerorira omaraane nia ontiri aikiro kipatsi.»
10Yogari Jonashi ikamantaigakeri tavageigatsirira pitotsiku omarane, irirori onti ishigapitsatakari Tasorintsi, impo iriroegi ikemaigavakerira itsarogavageiganaketyo kara, aikiro ineaigavakerotari inkaare pairotyo ogagavagetanaka ovoresekantavagetanakera,
11iriroegi ikantaigiri:
«¿Tyara okantakara pikañotantakarorira maika? ¿Tyara nonkantaigakempi maika kameti omaireatanaeniri inkaare ganiri ovoretai?»
12Irirori ikanti:
«Vuokajaigena, kameti ompeganaempaniri ovoretakera. Nogotasanotake naro kañotagantakero opokantakarira omarane tampia.»
13Yogaegiri tavageigatsirira pitotsiku omarane ishintsiigavetanakarotyo ikomajaigavetanakarora kameti iragatakoigakemera otsapiaku, kantankicha teratyo iragaveaigero, pairotari ogaganaka otampiatasanovagetanakera.
14Impo iniaigamatanakerityo Tasorintsi ikantaigakerira:
«Notinkami, atsi gara pogamagaigana pintentagantaigakenarira yoga kañotankicharira maika. Ariorika tera irovetsike terira onkametite, gara pikisaviiganari inkamakera, virotari kogankitsi onkañotakempara maika.»
15Iroro yagataigakera iniaigakerira, inoshikaigakeri Jonashi yovuokajaigakerira, ovashi opeganaa tampia ontiri ovore.
16Antari ineaigakerora okañotakara maika, yogaegiri tavageigatsirira pitotsiku omarane yogavageiganaketyo kavako ovashi ishineventaiganakari Tasorintsi ipinkatsaiganakeri, aikiro yovetisaigakeneri piratsi itagaigakenerira ishineventaigakarira aikiro ikantaigakerira kantakanira inkematsaigakeri.
17Yogari Tasorintsi itigankake imarane timaatirorira omaraani nia, onti ikañovetakarira omani imaranesanorikatyo kara, ovashi inigakeri Jonashi. Ario kara imagakotake mavati kutagiteri ontiri aikiro mavati sagiteri anta isegutoku.
اکنون انتخاب شده:
Jonashi 1: JON20
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Proyecto Biblia Matsigenka © Sociedad Bíblica Peruana.