maṯa 3
3
asa 3
yuwana mamadan na ŋuɽun ŋuŋun
mks. 1:1-8, lk. 3:1-17
1na ŋwamon ŋwono na yuwana mamadan wila gi ḏuməḏɩjo liji kiḏɩwer ḏeḏi yauḏia, 2nuleicɩno, wɩrlal galo ŋuɽun ŋalo ŋun ŋɩki, gi gwune ŋele ŋeḏi kanyin ŋo gɩṯo. 3kweno gwiro gwun gwuməḏugwe nebi gwun gwan isaia, nuarno;
ŋwal ŋweḏi gwiji gwete gwun gwaṯornɩḏe
galo uro kiḏɩwer, nuarno,
ṯuḏɩnil ṯaṯ galo ḏeḏi gwele gwun gwiro elo,
nyaṯuḏɩni daṯ duŋun muma.
4na yuwana gwaṯɩkani giria ŋun ŋiro jola jeḏi gamɩla, na gwaṯɩkani ŋɩma gi lɩbuɽi, na gwaṯeʼe jama na laiya leḏi geḏo.
5na liji leḏi urucəlim lɩmətuḏo lugwun, na leḏi yauḏia wei na lun luwəɽeico ḏɩrawe galo ḏun ḏan urḏun. 6nulbabṯaije gi ḏɩrawe ḏun ḏan urdun, nalteije ŋuɽuna ŋagin ga ŋun ŋɩki.
7nuaŋu liji lutu lun liro lɩbarɩsi na lun liro lisadugi nalwila gi ḏibabṯajɩno, nuleicɩno, nyaɽe nye nyeḏi juŋə, əḏi gwiro gwaŋɩjaje nuarno nyalabɩre gi ḏɩɽeḏa ganu ḏun ḏila? 8ɽil nyaɽe nyun nyajilnyilɩŋe nyalmouwɩrla ga muma; 9na nya lo luməḏɩni nyalanarno, anəṯi babaŋ gwun gwan ibraim, gi gwune nyi gweiceijɩno elo gwəṯi ŋɩma gwədiɽijo ibraimŋ nyaɽe gi nyɩdol nyeno. 10na gwunnɩno ŋuɽi ŋo gɩṯo kalo ge dro de jaɽe. na jaɽe wei jun jate jaṯɩɽe nyaɽe nyiŋir no gwouɽəne ga na gwagelini kigo. 11gwerkwe nyi gwajibabṯaije ŋau ŋe ŋeḏi ḏuwɩrla ga ŋuɽun ŋun ŋɩki. namɩni gwun gwila gɩdo lugwi ŋu gwətəno ŋɩma lugwi; na nyi gwate gwɩdeleḏo gwaɽe jɩwɩḏe juŋun no. ŋu gwajibabṯaije gwuɽɩwə gwe gwun gwɩpiḏo pɽul na igo. 12na jɩrda juŋun jo gi ḏi ḏuŋun, jujumuje gaɽa muma, nuwəɽeice ŋwona ŋwuŋun ldu ŋuɽulo ŋuŋun namɩni dɩrda dalnuni igo ye yun ŋate yaṯai no.
ḏibabṯaijɩno ḏeḏi yeau
mks. 1:9-11, lk. 3:21-22
13na yecu wila jalil ḏi yuwana gwun gwijo gi ḏɩrawe ḏun ḏan urdun, gwar gwəbabṯaijɩno lugwun. 14namɩni yuwana akajo nueicɩno, nyi gwiro gwun gwibunyaŋa, ŋa gwinyibabṯaije namɩni ŋa ŋawila lugwi a? 15na yecu wɩrlijo ŋuɽuna nueicɩno, ouwɩrico mino, gi gwune ŋiŋir lage ilṯɩmi ŋuɽuna wei ŋun ŋiŋir. nuouwɩrico. 16gwune nubabṯaijɩni, na yecu diɽeḏelo ŋau ganu; na kanyin iḏinijo nuaŋu gwuɽɩwə gweḏi elo nugwulə gwiro gi gɩɽidir nujaḏaṯa lugwun, 17na ŋwal gwulə kanyin nalarno, kweno gwiro ŋaɽe ŋinyi ŋun ŋaṯiəmɩnyi, na ŋaṯɩnyiŋiri ḏugwore.
اکنون انتخاب شده:
maṯa 3: OTR1966
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuba, Otoro New Testament
© British and Foreign Bible Society, 1966.