ᤗᤠᤶᤍᤡᤰ 22
22
ᤛᤠᤶᤒᤠᤴ ᤜᤢᤱᤔᤠ ᤌᤡᤶ
1“ᤀᤠᤳᤋᤡᤸᤗᤧ ᤐᤡᤳᤔᤠ ᤀᤡᤃᤪ ᤔᤧᤸᤗᤢᤰ ᤂᤢ᤺ᤳᤋᤢᤀᤠᤱ ᤂᤧᤴ ᤛᤧᤖᤢ ᤀᤡᤃᤪ ᤛᤱᤄᤢᤍᤣᤛᤢᤏᤧᤓᤃᤪ ᤂᤧᤸᤗᤧ ᤗᤳᤇᤠ ᤐᤡᤳᤔᤠ᤺ᤸᤗᤧ ᤁᤢᤗᤧᤰᤘᤠ ᤐᤡᤳᤔᤠ ᤅᤠᤛᤡ ᤏᤢ ᤔᤧᤸᤗᤢᤰ ᤌᤡᤰᤗᤧ ᤁᤢᤗᤧᤰᤘᤠ ᤔᤧᤸᤗᤢᤰ ᤗᤡᤛᤡ ᤜᤢᤅᤢᤖ ᤐᤥᤱ᤹॥ 2ᤂᤢ᤺ᤴᤍᤪᤡᤰᤐᤧᤸᤗᤧ ᤜᤡᤶᤔᤡᤴ ᤛᤧᤛᤢᤖ ᤕᤠᤰᤐᤠ ᤔᤧᤍᤢᤔᤢ ᤜᤧᤰᤁᤩᤠᤱ ᤔᤧᤜᤡᤵᤋᤢᤸᤗᤧ ᤂᤧᤴ ᤛᤡᤏᤧᤓᤃᤪ. ᤂᤧᤴ ᤁᤧᤛᤧᤵᤐᤠ ᤔᤏᤠᤴ ᤔᤏᤠᤛᤧᤵᤔᤠ ᤀᤠᤵᤋᤡᤰᤁᤥ ᤔᤧᤎᤠᤏᤧᤴ॥ 3ᤁᤖ ᤏᤠᤶ ᤗᤡᤱ ᤆᤢ᤺ᤳᤋᤠᤱᤏᤧᤓᤃᤪ. ᤂᤧᤴ ᤂᤢ᤺ᤴᤍᤪᤡᤰᤐᤠ ᤁᤧᤛᤧᤵᤐᤠᤴ ᤀᤠᤵᤋᤡᤰᤁᤥ ᤌᤠ᤹᤺॥ ᤁᤧᤄᤢ᤺ᤵᤐᤠᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤠᤶᤒᤠᤴ ᤜᤢᤅᤢᤖ ᤐᤥᤱ᤹॥ ᤜᤢᤱᤔᤠᤖᤧ ᤗᤠᤃᤡ ᤂᤧᤸᤗᤧ ᤌᤣᤀᤠᤱ ᤔᤧᤃᤳᤋᤢᤴᤏᤧᤓᤃᤪ. ᤂᤢ᤺ᤳᤋᤢᤒᤠᤴ ᤁᤢᤜᤢᤱᤛᤧ ᤂᤧᤴ ᤁᤧᤄᤢ᤺ᤵᤐᤠᤴ ᤕᤥᤰ ᤐᤥᤱᤔᤠᤖᤧ ᤗᤠᤃᤡ ᤔᤧᤛᤱᤄᤢ ᤔᤧᤍᤣᤛᤢᤖ ᤐᤥᤱ᤹॥ 4ᤂᤢᤏᤧ᤹ ᤂᤢ᤺ᤳᤋᤢᤛᤡᤒᤠ ᤌᤰᤛᤠᤜᤠ᤹ ᤁᤢᤜᤡᤱᤘᤧᤳ ᤁᤳᤋᤢᤛᤡᤒᤠ ᤂᤥᤔᤧᤍᤧᤳᤏᤧᤓᤃᤪ. ᤂᤧᤴ ᤁᤢᤶᤒᤠᤒᤠ ᤐᤡᤳ ᤀᤡᤃᤪ ᤀᤍᤱ ᤀᤡᤃᤪ ᤔᤧᤸᤗᤢᤰ ᤆᤩᤠᤛᤠᤱ ᤂᤧᤴ ᤂᤢ᤺ᤳᤋᤢᤒᤠᤸᤗᤧ ᤏᤡᤗᤧᤱ ᤁᤢᤗᤧᤰᤘᤠ ᤜᤢᤅᤢᤖ ᤐᤥᤱ᤹॥
5“ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤎᤰᤛᤠᤴ ᤐᤩᤠᤱᤛᤡᤀᤥ ᤀᤡᤃᤪ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤆᤠᤖᤠᤶᤛᤧ ᤗᤧᤖᤢ ᤜᤧᤰᤁᤩᤠᤱ ᤌᤰᤛᤠᤴ ᤐᤣ᤺ᤰᤁᤠᤱ ᤕᤠᤵᤔᤡ᤺ᤸᤗᤧ ᤁᤢᤒᤩᤠᤱᤛᤡᤀᤥᤒᤠ ᤁᤢᤈᤠᤴ ᤆᤍᤣᤛᤢ ᤐᤡᤖᤢᤏᤧᤓᤃᤪ ᤂᤧᤴ ᤔᤏᤠ᤺ᤸᤗᤧ ᤕᤠᤵᤔᤡ᤺ᤸᤗᤧ ᤜᤠᤴᤋᤡ ᤁᤧᤒᤥᤱᤒᤠᤴ ᤂᤢᤏᤧ᤹ ᤁᤢᤒᤩᤠᤱᤛᤡ ᤀᤡᤃᤪ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤁᤢᤈᤠᤴ ᤐᤡᤖᤢᤀᤠᤱ ᤛᤠᤶᤒᤠᤴ ᤜᤢᤅᤢᤖ ᤐᤥᤱ᤹॥
6“ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤒᤩᤠᤱᤛᤡᤀᤥ ᤔᤡ ᤋᤢᤵᤋᤢ ᤜᤧᤰᤁᤩᤠᤱ ᤔᤡᤴ ᤜᤠ᤹ᤖᤢᤖ ᤐᤣ᤺ᤰᤁᤠᤱ ᤕᤠᤵᤔᤡ᤺ᤸᤗᤧ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵ ᤏᤢ ᤂᤧᤵᤔᤥ ᤁᤧᤗᤡᤱᤒᤠ ᤀᤡᤃᤪ ᤁᤢᤈᤠ ᤔᤧᤜᤧᤃᤢᤀᤠᤱ ᤀᤡᤔᤧᤄᤣ᤺ᤰᤂᤢ ᤔᤧᤕᤢᤰᤂᤢᤒᤠ ᤆᤠᤎ᤺ᤱᤔᤠᤴ ᤌᤩ᤺ᤱ ᤔᤡᤍᤡᤰ ᤐᤣ᤺ᤰᤏᤧᤓᤃᤪ ᤔᤡ ᤁᤧᤜᤠ᤺ᤶᤒᤠ ᤔᤏᤠ᤺ᤸᤗᤧ ᤛᤠᤶᤒᤠᤴ ᤜᤢᤅᤢᤖᤀᤣ ᤐᤥᤱ᤹॥
7“ᤁᤢᤓᤠ ᤔᤏᤠᤎᤡᤰᤗᤧ ᤁᤢᤜᤡᤶᤒᤣᤛᤠᤱᤒᤠᤴ ᤕᤠᤱ ᤀᤡᤃᤪ ᤛᤠᤔᤠ ᤕᤢᤱᤔᤠ ᤐᤡᤖᤢ. ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤁᤢᤜᤡᤶᤔᤥᤗᤠᤶ ᤂᤧᤴ ᤔᤧᤄᤢ᤺ᤳᤋᤢᤀᤠᤱ ᤂᤧᤴ ᤁᤧᤄᤢ᤺ᤵᤐᤠᤴ ᤔᤧᤍᤧᤶᤛᤢᤏᤧᤓᤃᤪ. ᤂᤧᤴ ᤁᤧᤄᤢ᤺ᤵᤐᤠᤸᤗᤧ ᤏᤡᤗᤧᤱ ᤕᤠᤖᤡᤰ ᤕᤖᤡᤰ ᤜᤢᤅᤢᤖ ᤐᤥᤱ᤹॥ 8ᤁᤖ ᤂᤧᤴ ᤂᤢ᤺ᤴᤍᤪᤡᤰᤐᤠᤴ ᤔᤧᤴᤕᤠᤱᤄᤢᤴᤏᤧᤓᤃᤪ. ᤂᤧᤴ ᤜᤡᤶᤍᤠᤱᤒᤧᤸᤗᤧ ᤁᤢᤜᤡᤶᤒᤣᤛᤠᤱᤒᤧᤸᤗᤧ ᤁᤢᤛᤠᤔᤠᤀᤥ ᤜᤢᤰᤌᤧᤰᤋᤢᤀᤠᤱ ᤘᤠ᤹ᤒᤡ ᤔᤣ᤺ᤶᤒᤡ ᤂᤧᤴ ᤏᤡᤱᤘᤠ᤹ ᤂᤥᤔᤠᤖᤧ ᤗᤠᤃᤡ ᤂᤢᤏᤧ᤹ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤥ ᤐᤣ᤺ᤰᤗ ᤐᤥᤱ᤹॥ 9ᤁᤧᤖᤧᤰ ᤐᤖᤡᤰᤐᤠ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤴᤎᤱᤅᤥ. ᤐᤡᤳ ᤀᤡᤃᤪ ᤀᤍᤱ. ᤀᤡᤃᤪ ᤔᤧᤸᤗᤢᤰ. ᤆᤠᤱᤍᤣ᤺ᤳ. ᤀᤡᤃᤪ ᤁᤢᤓᤠ ᤁᤧᤔᤠᤒᤠ ᤆᤡᤃᤰᤘᤠᤴ ᤀᤥᤛᤣ᤺ᤴᤎᤠᤱ ᤐᤥᤱᤅᤠᤱ ᤁᤢᤓᤠᤖᤧ ᤂᤧᤴ ‘ᤀᤠᤱᤃᤠ᤹ᤀᤡᤴ’ ᤐᤠ᤺ᤳᤋᤢᤏᤧᤓᤃᤪ. ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤱᤜᤠ᤹ ᤔᤧᤍᤠᤖᤢᤛᤡᤖ ᤐᤥᤱ᤹॥ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤧ ᤀᤠᤳᤋᤡᤴ ᤀᤠᤵᤋᤡᤰᤛᤠᤒᤠ ᤔᤧᤗᤣ᤺ᤳᤋᤢ. ᤂᤢᤏᤧ᤹ ᤁᤢᤜᤡᤶᤒᤣᤛᤠᤱᤒᤠᤴ ᤏᤡᤗᤧᤱ ᤕᤠᤖᤡᤰ ᤕᤖᤡᤰ ᤂᤧᤸᤗᤧ ᤐᤡᤖᤢᤖ ᤐᤥᤱ᤹॥
10“ᤁᤢᤓᤠ ᤔᤏᤠ᤺ᤸᤗᤧ ᤁᤢᤜᤡᤶᤒᤣᤛᤠᤱᤒᤧᤴ ᤀᤍᤱ ᤀᤡᤃᤪ ᤐᤡᤳ ᤀᤡᤃᤪ ᤔᤧᤸᤗᤢᤰ ᤀᤡᤃᤪ ᤘᤣ᤹ ᤌᤰᤛᤠ ᤁᤵᤔᤠ ᤐᤡᤖᤢ. ᤜᤧᤰᤁᤩᤠᤱ ᤂᤧᤴ ᤜᤠ᤺ᤳᤗᤧᤀᤠᤱ ᤔᤧᤴᤏᤡᤀᤣ ᤛᤡ᤹᤺ ᤀᤡᤃᤪ ᤂᤧᤴ ᤁᤠ᤺ᤴ ᤀᤡᤃᤪ ᤂᤧᤴ ᤔᤧᤏᤠ᤺ᤳᤋᤢ ᤔᤧᤍᤣᤛᤢᤏᤧᤓᤃᤪ. 11ᤂᤧᤴ ᤏᤧᤵᤔᤠᤱᤗᤧ ᤂᤢᤴᤇᤡ᤹ᤗᤢᤶᤔᤥᤒᤠ ᤂᤧᤔᤠ᤹ᤀᤡᤴ ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤀᤥ ᤜᤢᤰᤁᤣ᤺ᤳᤋᤧᤛᤢᤒᤠ ᤔᤣ᤺ᤴ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤠᤱᤜᤧᤰᤏᤧᤳᤛᤡᤀᤠᤱ ᤐᤠᤴ ᤋᤱᤛᤢᤖ ᤐᤥᤱ᤹॥ ᤂᤧᤒᤩᤠᤱ ᤂᤧᤴ ᤌᤰᤛᤠ᤺ᤸᤗᤧ ᤁᤢᤴᤍᤠᤱᤒᤧᤴ ᤂᤧᤴ ᤐᤠ᤺ᤴᤏᤥ ᤋᤧᤴᤗ ᤐᤥᤱ᤹. ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤶᤒᤠᤴ ᤜᤢᤱᤔᤠ ᤔᤧᤒᤥᤱᤏᤧᤴ॥ 12ᤁᤖ ᤌᤰᤛᤠᤴ ᤔᤧᤄᤢ᤺ᤳᤋᤢ ᤔᤧᤍᤣ᤹ᤖᤢᤒᤠᤏᤧᤓᤃᤪ ᤂᤧᤴ ᤌᤰᤛᤠ ᤀᤥᤃᤧᤔᤧᤵᤐᤠᤸᤗᤧ ᤁᤢᤴᤍᤠᤱᤒᤠᤴ ᤜᤠᤴᤋᤡ ᤐᤥ᤺ᤰᤂᤧᤒᤠᤸᤗᤧ ᤁᤢᤗᤧᤰᤘᤠ ᤐᤡᤔᤠ ᤐᤥᤱ᤹॥ 13ᤌᤰᤛᤠᤴ ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤛᤩᤧᤖᤢᤏᤧᤓᤃᤪ ᤂᤧᤴ ᤌᤰᤛᤠ ᤀᤥᤃᤧᤔᤧᤵᤐᤧᤸᤗᤧ ᤂᤧᤴ ᤁᤢᤛᤡᤘᤧᤳ ᤌᤰᤛᤠᤴ ᤋᤠᤖᤢᤀᤠᤱ ᤀᤥᤛᤣ᤺ᤴᤎᤠᤱ ᤆᤥᤃᤢᤖ ᤐᤥᤱ᤹॥ ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤛᤩᤧᤖᤢᤒᤠᤏᤧᤓᤃᤪ ᤂᤧᤸᤗᤧ ᤁᤢᤗᤧᤰᤘᤠ ᤜᤢᤱᤔᤠ ᤔᤧᤒᤥᤱᤏᤧᤴ॥
14“ᤁᤢᤓᤠᤖᤧ ᤜᤡᤶᤒᤣᤛᤠᤱᤒᤠᤗᤠᤶ ᤁᤢᤓᤠ ᤌᤰᤛᤠ ᤌᤧᤳᤗᤱ ᤋᤠᤖᤢ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤴᤍᤠᤱᤒᤠᤴ ᤜᤥ᤺ᤵᤋᤧᤸᤗᤧ ᤂᤧᤴ ᤌᤰᤛᤠᤴ ᤁᤠ᤺ᤴᤍᤧ ᤀᤡᤃᤪ ᤛᤩᤧᤏᤣᤃᤓᤪ ᤂᤧᤴ ᤌᤧᤳᤗᤱ ᤁᤧᤏᤠ᤺ᤰᤐᤠ ᤔᤏᤠ᤺ᤸᤗᤧ ᤂᤧᤸᤗᤧ ᤁᤢᤗᤧᤰᤘᤠᤀᤥ ᤁᤢᤔᤧᤴ ᤐᤡᤖᤢᤖ ᤐᤥᤱ᤹॥ 15ᤁᤖ ᤁᤢᤴᤍᤠᤱᤒᤧᤸᤗᤧ ᤏᤡᤛᤢᤖᤀᤣ ᤂᤧᤴ ᤌᤰᤛᤠᤴ ᤛᤩᤧ ᤀᤡᤃᤪ ᤁᤠ᤺ᤴᤍᤧᤏᤧᤓᤃᤪ ᤂᤧᤴ ᤔᤏᤠ᤺ᤸᤗᤧ ᤁᤢᤔᤧᤴ ᤜᤢᤱᤔᤠ ᤔᤧᤒᤥᤱᤏᤧᤴ॥ ᤂᤧᤴ ᤌᤰᤛᤠᤴ ᤏᤠᤶᤕᤠᤰᤁᤥ ᤋᤠᤖᤢᤀᤠᤱ ᤘᤕᤧᤒᤠᤏᤧᤓᤃᤪ ᤂᤧᤴ ᤜᤠᤴᤋᤡ ᤁᤧᤒᤥᤱᤒᤠᤴ ᤂᤧᤴ ᤌᤰᤛᤠ᤺ᤸᤗᤧ ᤁᤢᤏᤠᤶᤕᤠᤰᤁᤥ ᤂᤰᤔᤠ ᤐᤥᤱᤗᤥ॥
ᤂᤠᤛᤡᤱᤏᤡ᤺ᤵᤔᤠ ᤏᤢ ᤛᤠᤶᤕᤥ ᤛᤠᤰᤌᤡᤶᤜᤠ᤹
16“ᤐᤠ᤺ᤴᤔᤧᤶᤓᤢ᤹ᤀᤣ ᤁᤧᤕᤧᤵᤔᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤁᤢᤓᤠ ᤔᤏᤠ᤺ᤸᤗᤧ ᤗᤧᤔᤢ ᤛᤢ᤺ᤴᤍᤢᤀᤠᤱ ᤂᤧᤴ ᤀᤡᤵᤋᤢᤏᤧᤓᤃᤪ. ᤂᤧᤴ ᤔᤏᤠ᤺ᤸᤗᤧ ᤔᤣ᤺ᤰᤂᤡᤶᤛᤠᤔᤠ ᤔᤧᤴᤇ᤻ᤕᤠ᤺ᤸᤗᤧ ᤁᤢᤗᤠᤃᤡ ᤕᤠᤱ ᤜᤢᤅᤢᤀᤠᤱ ᤂᤧᤴ ᤔᤣ᤺ᤳ ᤆᤥᤃᤢᤖ ᤐᤥᤱ᤹॥ 17ᤁᤖ ᤂᤧᤴ ᤔᤧᤴᤇ᤻ᤕᤠ᤺ᤸᤗᤧ ᤁᤢᤶᤒᤠᤴ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤐᤡᤔᤠ ᤔᤧᤍᤧᤴᤏᤧᤴᤏᤧᤓᤃᤪ. ᤂᤢᤏᤧ᤹ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤛᤠᤰᤌᤡᤶ ᤁᤢᤀᤡᤛᤡᤰ ᤔᤣ᤺ᤰᤂᤡᤶᤛᤠᤔᤠᤸᤗᤧ ᤁᤢᤔᤧᤸᤗᤢᤱ ᤜᤢᤱᤔᤠ ᤐᤥᤱ᤹॥
18“ᤛᤠᤶᤔᤠᤱᤆᤩᤠᤱ ᤁᤧᤕᤠᤱᤔᤠ ᤁᤡᤳᤆᤠᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠᤴ ᤁᤢᤜᤡᤱᤘᤧᤳ ᤗᤧᤵᤔᤠ ᤔᤧᤏᤢ᤹ᤏᤧᤴ॥
19“ᤀᤠᤳᤋᤡᤴ ᤔᤏᤠ᤺ᤸᤗᤧ ᤌᤰᤛᤠ᤺ᤴᤏᤢ ᤀᤡᤶᤔᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤧᤴ ᤔᤏᤠᤴ ᤛᤧᤵᤔᤠ ᤐᤥᤱ᤹॥
20“ᤀᤠᤳᤋᤡᤸᤗᤧ ᤕᤜᤘᤣ ᤍᤠᤱᤒᤠᤴᤏᤢ᤺ᤸᤗᤧ ᤘᤣ᤹ ᤁᤢᤓᤠ ᤔᤠᤱᤅᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢ᤹. ᤂᤧᤴ ᤔᤏᤠᤴ ᤔᤧᤱᤔᤠ ᤐᤥᤱ᤹॥
21“ᤘᤣ᤹ ᤗᤠᤈᤣ᤹ᤒᤠ ᤔᤏᤠᤴ ᤋᤢᤰᤂᤣ ᤔᤧᤈᤠ᤺ᤳᤋᤧᤶᤔᤡᤴᤏᤧ᤹. ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤘᤣ᤹ ᤗᤠᤈᤣ᤹ᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ॥ 22ᤔᤣᤔᤣᤍᤢᤔᤠᤜᤠ᤹ ᤀᤡᤃᤪ ᤕᤧᤳᤇᤠᤒᤠ ᤕᤧᤳᤇᤠᤔᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤧᤶᤛᤡᤶᤔᤧᤴᤏᤧ᤹॥ 23ᤂᤡᤏᤡ᤹ ᤜᤧᤰᤁᤣ ᤁᤧᤈᤥᤃᤢᤶᤏᤧᤓᤃᤪ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡ ᤔᤧᤓᤠᤰᤁᤠᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤱᤛᤡᤱ᤹॥ 24ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤕᤠ᤺ᤰᤗᤧ᤹ᤀᤠᤱ ᤂᤡᤏᤡ᤹ ᤔᤧᤱᤏᤡᤱ᤹॥ ᤂᤡᤏᤡ᤹ ᤔᤣ᤺ᤳᤜᤠ᤹ᤀᤠᤱ ᤔᤣᤔᤣᤍᤢᤔᤠ ᤔᤧᤒᤥᤱ᤹. ᤂᤧᤒᤩᤠᤱ ᤂᤡᤏᤡ᤹ ᤛᤠᤀᤣᤜᤠ᤹ᤀᤠᤱ ᤕᤧᤳᤇᤠᤒᤠ ᤕᤧᤳᤇᤠᤔᤠ ᤔᤧᤒᤥᤱ᤹॥
25“ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤀᤥ ᤁᤢᤓᤠ ᤕᤠᤱᤃᤧᤛᤠ᤹ᤒᤠ ᤔᤏᤠᤴ ᤂᤡᤏᤡ᤹ ᤛᤡᤱᤏᤠᤳ ᤕᤠᤱ ᤁᤧᤒᤡᤖᤢᤶᤔᤡᤸᤗᤧ ᤂᤡᤏᤡ᤹ ᤛᤡᤱᤏᤠᤳᤍᤠᤱᤒᤠ ᤁᤢᤀᤡᤛᤡᤰ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤕᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤍᤠ᤺ᤰᤋᤠᤶᤔᤡᤴᤏᤧ᤹॥ 26ᤂᤡᤏᤡ᤹ ᤜᤡᤶᤒᤣᤛᤠᤱᤒᤠᤸᤗᤧ ᤁᤢᤛᤢᤱᤄᤣᤰᤘᤠᤴ ᤕᤠᤱᤅᤥ ᤁᤧᤕᤢᤰᤂᤢᤶᤔᤠᤱ ᤘᤠ᤹ᤏᤧᤓᤃᤪ. ᤏᤠᤶᤎᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤧᤴ ᤂᤢᤏᤧ᤹ ᤏᤢ᤺ᤰᤋᤧᤶ ᤐᤡᤖᤧᤶᤔᤧ᤹. 27ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤂᤧᤴᤗᤰ ᤗᤳᤇᤠ ᤂᤠᤶᤔᤠ ᤁᤳᤋᤢ॥ ᤂᤧᤴ ᤜᤥ᤺ᤵᤐᤡᤸᤗᤧ ᤂᤢᤏᤧ᤹ ᤌᤧᤔᤠᤀᤥ ᤀᤡᤶ᥅ ᤂᤧᤸᤗᤧ ᤀᤠᤱᤃᤠ᤹ ᤐᤣᤗᤡ ᤑᤠᤰᤁᤠᤏᤧᤓᤃᤪ ᤂᤧᤸᤗᤧ ᤁᤢᤒᤣᤗᤡᤴ ᤀᤠᤱᤃᤠ᤹ ᤂᤧᤵᤛᤢᤱ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤏᤢ᤹ᤒᤠ ᤆᤥ᤺ᤰᤁᤠ॥
28“ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤧ᤹ᤕᤠ ᤔᤧᤔᤧᤳᤋᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤀᤠᤵᤑᤣᤰ ᤛᤢᤘᤠᤱᤒᤠ ᤗᤠᤶᤗᤥᤒᤠᤴ ᤔᤠᤱᤍᤣ ᤛᤠᤱᤃᤪᤠ ᤔᤧᤔᤧᤳᤋᤧᤶᤔᤡᤴᤏᤧ᤹॥
29“ᤂᤡᤏᤡ᤹ ᤀᤠᤱᤃᤠ᤹ᤀᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤐᤥᤃᤢᤃᤧᤴ ᤁᤢᤈᤠ ᤏᤢ ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤘᤧᤳᤋᤧᤛᤖᤧ ᤁᤢᤘᤠ᤹ᤔᤠᤗᤠᤶ ᤗᤠ᤹ᤖᤢᤖ ᤕᤧᤶ ᤘᤠ᤹ᤖᤀᤣ ᤀᤠᤒᤡᤖᤧᤶᤔᤧ᤹॥
“ᤂᤡᤏᤡ᤹ ᤋᤢᤶᤒᤠ ᤛᤠᤜᤠ᤹ ᤀᤠᤱᤃᤠ᤹ᤀᤥ ᤋᤥ᤺ᤴᤍᤧᤶᤛᤡᤶᤔᤧ᤹॥ 30ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤐᤡᤳᤌᤰᤛᤠᤜᤠ᤹ ᤏᤢ ᤔᤧᤸᤗᤢᤰᤜᤠ᤹ᤗᤠᤶᤒᤠᤀᤠᤱ ᤋᤥ᤺ᤴᤍᤧᤶᤔᤧ᤹॥ ᤋᤃᤡ ᤁᤧᤎᤠᤵᤐᤠ ᤐᤡᤳᤛᤠᤳᤋᤡᤴ ᤀᤡᤃᤪ ᤔᤧᤸᤗᤢᤰᤛᤠ᤺ᤳᤋᤡᤴ ᤏᤢᤛᤡ ᤕᤧᤴ ᤌᤠᤖᤡᤰ ᤁᤢᤶᤔᤠ᤺ᤴᤏᤢ ᤘᤠ᤹ᤖ ᤜᤧᤰᤁᤩᤠᤱ ᤕᤧᤳᤇᤡ ᤕᤧᤴ ᤁᤧᤳᤋᤡᤸᤗᤧ ᤂᤧᤴ ᤀᤠᤱᤃᤠ᤹ᤀᤥ ᤋᤥ᤺ᤴᤍᤧᤶᤔᤧ᤹ᤀᤥ॥
31“ᤂᤡᤏᤡ᤹ ᤀᤠᤱᤃᤠ᤹ ᤀᤠᤗᤠᤃᤡ ᤛᤣᤛᤣ ᤔᤏᤠ ᤐᤥᤱᤔᤠ ᤐᤥᤱ᤹॥ ᤁᤸᤗᤧᤆᤥᤃᤢᤸᤗᤧ ᤋᤠᤶᤓᤢᤱᤅᤥᤒᤠ ᤌᤰᤛᤠᤜᤠ᤹ᤖᤧ ᤔᤧᤓᤢᤕᤢᤛᤡᤒᤠ ᤌᤰᤛᤠ ᤛᤠᤴ ᤂᤡᤏᤡ᤹ ᤔᤧᤈᤧᤶᤔᤡᤴᤏᤧ᤹॥ ᤂᤧᤴ ᤛᤠᤴ ᤁᤥ᤺ᤳᤆᤥᤜᤠ᤹ ᤗᤠᤵᤑᤢᤛᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥”
اکنون انتخاب شده:
ᤗᤠᤶᤍᤡᤰ 22: LIFOTNT
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2009, 2023, Wycliffe Bible Translators, Inc. All rights reserved.