Luke 6
6
Sema Maypangkep Na Sabbath
(Matthew 12:1-8; Mark 2:23-28)
1Nonta sa-kin timpo na Sabbath a akow na pan-inana na Hodjos, man-aahad ires Jesus cha payow a etaneman na wheat. Sema iren disipolos to, emekpek ira na dawes ton kiyothim cha, piyolipol chen maokisan say kakanen cha. 2Nem gwara ngo iriy echom a Pharisees chiwan a engowan cha Jesus i “Apay nga nat jowan patiiy dinteg tayon Hodjos a iyayparit i pan-ani na timpo na Sabbath?” 3Et insongbat Jesus i “Sigoradon bisa yo ma inpasing David nonta aofa iren ma echom to. 4Simekep si David chiwa baliy Afo Chiyos, et ida tho ma tinapay a iyaytangdal cha Afo Chiyos a iyaypalobos cha dinteg i papari bengat i mengan niwan. Nem kiyakan ngorechan David, et in-i-kanan to ngoy echom to.” 5Et kigwan Jesus i “Si-kak a Anak na Too, gwariy karebengan kon mengipalobos na ma-mag no timpo na Sabbath.”
Sema Dahin Otik I Diwa Tho
(Matthew 12:9-14; Mark 3:1-6)
6Idi afil alin akow a Sabbath, simekep si Jesus cha synagog a mantoro. Gwariy dahid man a otik i gwanan a diwa tho. 7Gwara ngo pay iriy echom a mamaistoro na dinteg tan Pharisees a chiyan bantayes Jesus say amtaen cha no pemapteng to ma too no timpo na Sabbath. Tep man-aanap ira na kagol a pengicharoman ched si-katho. 8Nem amten Jesus i gwared nemnem cha, et kigwan tod ma dahin otik i diwa tho i “Gomali. Akgwat ked ja sangoanan mi.” Et imakgwat iwa dahi et kimowan chiwan.
9Et kigwan Jesus ired ma echom i “Nengoy nemnem jo? Iyaypalobos chiwa dinteg tayon ma-mag i mapteng no timpo na Sabbath? A-magen tayo komiy mapteng ono ngaaw? Mena-cha na too ono memono na too?” 10Sini-neng Jesus cha si-karen emiin et kigwan tod ma dahin otik i diwa tho i “Iokjad moy diwam.” In-okjad toy diwa tho et mimapteng men kosto. 11Nem sema iren mamaistoro na dinteg tan sema iren Pharisees, bimonget iren pasiya, et iyantabtabal ira no nengoy a-magen ched Jesus.
Pinispis Jesus I Sawal Na Chegwen Disipolos To
(Matthew 10:1-4; Mark 3:13-19)
12Nontan a timpo, timiyed si Jesus cha chontog a mankararag. Gwared man na sandabin mankakararag cha Afo Chiyos. 13Idi dadabi, tiya-gway to iriy disipolos to, et pinispis toy sawal na chegwed si-karen ngiyaranan to na apostolis. 14Sema iren pinispis Jesus, si Simon a ngiyaranan to pay na Peter tan si Andrew a ahi tho, si James ni John, si Philip, si Bartholomew, 15si Matthew, si Thomas, si James a anak Alphaeus, si Simon a iyanngaran na Zealot tep intakchel toy ili tho, 16si Judas a anak James, tan si Judas Iscariot a enraidor Jesus.
Iyantoros Jesus Tan Engipamapteng Na Mansekit
(Matthew 4:23-25)
17Idi iyakcheng iwan, chimalong ires Jesus cha chekdan et imakgwat chiwan. Chakel i echom ton disipolos a esi-si-nop chiwan, pati chakel a toon edafo di ired Judea tan Jerusalem tan sema iren siyodad na Tyre tan Sidon a gwared kilig na baybay. Kimowan ired man say manki-ngel na itoron Jesus tan say a-kalen toy sahit cha. 18Et sema iren mandigat tep iya-janan ira na dimonyos, chiyagchag Jesus ira ma dimonyos a gwared si-kara. 19Et sema emiin a toon gwared man, inpahat chen mengapkap Jesus tep emangkedafoy panakabalin cha si-katho, et sema panakabalin toy engipamapteng cha si-karen emiin.
Sema Toon Magesat Tan Sema Toon Mechosa
(Matthew 5:1-12)
20Et sini-neng Jesus ira ma disipolos ton kigwan to i:
“Magesat kayon iyangkebitheg tep mayka-chom kayod pantorayan Afo Chiyos.
21“Magesat kayon aofa niman tep no sa-ki din akow, mepsel kayo wa.
“Magesat kayon mannanangis niman tep no sa-ki din akow, onngi-ngi kayo.
22“Magesat kayo no owesen cha kayo na too, eg cha kayo egwathen, omangen cha kayo, tan chechalen chiy ngaran jo tep naemati kayod si-kak a Anak na Too. 23No mepesamak ira man, panchadsak kayo tan panjaptok kayod pan-imdengan jo tep sema kongkonen iyay-ejan cha dangit para cha si-kayo, banay a pasiya. Tep sema pesing na toon manpadigat cha si-kayo, inges toy nainpasing iren ma afo-afo ra len naiyanpadigat na profita nonta bayag da.
24“Nem kakaasi kayon babaknang tep igwat jo waliy mapteng na inpanbiya-biyag jo. Nagwara wiy a-daen jo.
25“Kakaasi kayon iyapsel niman tep no sa-ki din akow, maopa kayo wa.
“Kakaasi kayon manngi-ngi-ngi niman tep no sa-ki din akow, on-engos tan onnangis kayo.
26“Kakaasi kayon nachijaw na emiin a too tep inges niwan i nainpasing ngo iren ma afo-afo ra len iyanchaya-chayaw na naiyan-ite-itek a profita.”
Sema Penmek Tayod Tothoon Naengontred Si-kathayo
(Matthew 5:38-48; 7:12)
27“Nem si-kayon manki-ki-ngel, konen kod si-kayo i semek jo iriy naengontred si-kayo, tan amag joy mapteng ired ma toon naengowes cha si-kayo. 28Chawat jod Afo Chiyos a bindisjonan to ira ma naemotbot kayo tan ikararagi yo ira ma naengipadigat cha si-kayo. 29No gwariy menedpak na tamil mo, pesedpak mo pay i piig. No gwariy mengeda na ta-kep na barom, i-kan mo ngoy kamisitam. 30No gwariy mengibaga na kompormid si-kam, i-kan mo, tan no gwariy mengeda na kokowam, enog i inpilit a ioli tho. 31Et seta piyan jon a-magen na echom jod si-kayo, si-katho ngo komay a-magen jod si-kara.
32“No sema bengat iren mahasemek cha si-kayo i ensemek jo, gwara ayay kongkona yo? Tep angken sema iren mabesol a too, ensemek cha ira ma mahasemek cha si-kara. 33Et no sema bengat iren naengamag na mapteng cha si-kayo i na jo na mapteng, gwara ayay kongkonaen jo? Tep angken mabesol a too, naimag cha ngo tan. 34Et no ibodoran jo bengat i toon amta yo i ioli chiy biyodod cha, gwara ayay kongkonaen jo? Angken mabesol a too, nainbodoran chiy echom cha tep sigoradoen chen ioli iren ma echom cha ma biyodod cha. 35Nem sema a-magen jo ngo koma, semek jo ira ma naengontred si-kayo tan amag joy mapteng cha si-kara. Tan ipabodori yo ira, angken nat namnamaen jo i ioli chiy biyodod cha. Tep no setan i a-magen jo, banay i kongkonaen jo, et anak to kayon Afo Chiyos a Kahejangan. Tep si Afo Chiyos, mahaasi ired ma ngaaw a too tan sema iren toon nat naiyansalamat cha si-katho. 36Mesepol a mahaasi kayon inges tos Awejon mahaasi.”
Sema Maypangkep Na Pengowis Na Echom Tayo
(Matthew 7:1-5)
37Intoloy Jesus a engowan i “Enog i kiyowis i echom jo say nat kowisen to kayo ngon Afo Chiyos. Enog i inbasolan i echom jo say nat ibasolan to kayo ngon Afo Chiyos, no diket pakawani yoy echom jo say pekawanan to kayo ngon Afo Chiyos. 38I-kani yoy echom jo, et i-kanan to kayo ngon Afo Chiyos. Et say i-kan Afo Chiyos, mesolok pay tep singen mesedsed, mejakjak, et ma-choman ingkathod onjo-tat. Tep sema karakel na i-kan jo, ingesen to ngoy karakel na i-kan Afo Chiyos cha si-kayo.”
39Et in-arig ngon Jesus i “Mebedin ayen ibalnay na ekorab i sa-kin ekorab? No a-magen to man, sigoradon ma-kas iren chegwed ebot. 40Et nagwariy naiyan-achal a ekayang iy say maistoro tho. Nem no iyakcheng a etoroan, mebedin ngon may-inges chiwa maistoro tho.
41“Apay nga si-nengen moy iyaytoning cha matha na echom mo iy eg mo si-nengen i balengen cha matham? 42Tan apay nga konen mod echom mo i ‘Itolok mon a-kalen ko ta iyaytoning cha matham’ iy eg mo si-nengen i balengen cha matham? Si-kam a naengibili-biling a naengamag na mapteng, ekal mo nin itha balengen cha matham say marigwes i peni-neng mo, et mebedin a a-kalen mo wiy iyaytoning cha matha na echom mo.”
Chegwen Kilasin Dawes: Sema Mapteng Tan Sema Ngaaw
(Matthew 7:16-20; 12:33-35)
43Kigwan pay Jesus i “Say mapteng a kejow, nat naiyandawes na ngaaw, tan say ngaaw a kejow, nat naiyandawes ngo na mapteng. 44Naaamtaan i kilasi na kejow cha dawes to. Tep eg naaalay dawes na fig cha do-bet a iyasbithan, tan eg naaala ngoy dawes na grape cha mawini. 45Inges to ngo ired ma too. Sema mapteng a too, mapteng i naimag to tep mapteng i iyaykamid cha nemnem to. Nem sema ngon ngaaw a too, ngaaw ngoy naimag to tep ngaaw ngoy iyaykamid cha nemnem to. Tep angken nengoy gwared nemnem na too, si-kathoy nabimo-day cha temi tho.”
Chegwen Engitegwen Na Baliy: Sema Manemnem Tan Sema Egwenggweng
(Matthew 7:24-27)
46Et kigwan pay Jesus i “Apay nga inngaran jod si-kak i Afo iy eg jo a-magen i nakigwan ko? 47Sema toon onkowan cha kad-an kon mengi-ngel na konen ko et a-magen to, konen kod si-kayo no ngoy kay-arigan to. 48May-arig chiwa toon engitegwen na baliy ton inko-ko thod batho say chiwan i kaybekaan to. Et idi bimarakan i kolos et into-kan to ma baliy, nat egwedgwed tep eki-det a iyatgwen. 49Nem sema toon mengi-ngel na konen ko, nem eg to a-magen, may-arig chiwa toon engitegwen na baliy tod pithek. Nat inko-ko thod bathon mengitegwen na baliy tod man. Et idi bimarakan i kolos et into-kan to ma baliy, iyatgwang a chakos et kolpin echaral.”
انتخاب شده:
Luke 6: KAR
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 Wycliffe Bible Translators, Inc. All rights reserved.