Mateo 21
21
Chijaw Na Chakel A Toos Jesus Na Inmothok Tod Jerusalem
(Mark 11:1-11; Luke 19:28-40; John 12:12-19)
1Idi man-eesop ires Jesus cha Jerusalem, kimowan ired Bethphage a sa-kod na Chontog na Olivas. Engidagwas si Jesus na chegwen disipolos ton 2kigwan to i “Tahejod ma otik a siyodad a iyaysongbob. Apaman a onmothok kayod man, gwariy sebien jon donkey a iyay-iket, pati kilaw to. Ogas joy iket cha et ala jo did jay. 3No gwariy mengibaged si-kayo, kowan jo i ‘Mesepol na Afo wi,’ et itolok na toon chakos.”
4Epasamak iwan say metongpal i kigwan na profita nonta bayag den:
5“Kowan mo ired ma naiyan-iyan cha Zion i #21:5 Zion i sa-kin ngaran na Jerusalem.
‘Si-neng jo, manmomothok aliy ari yo.
Ebaba tan mansasahay cha donkey a
kilaw a donkey.’” #21:5 Zechariah 9:9
6Kimowan ma ira ma disipolos Jesus et imag chiy inbilin to. 7Intolod cha ma donkey tan kilaw tod kad-an Jesus a in-ap-ap chiy ta-kep na baro red beneg cha et iyansahay si Jesus. 8Sema iren chakel a toon gwared man, in-ap-ap chiy ta-kep na baro red kalsara. Sema iren echom, engala ira na panga-panga na kejow, et in-ap-ap ched kalsara. 9Sema iren iyangkedagwas tan sema iren kaono-onod, kekineljaw ira i “Hosanna cha Polin David! Mabindisjonan i into-no din Afo Chiyos! Sapay koma maychejaw si Afo Chiyos a gwared dangit!”
10Idi simekep si Jesus cha Jerusalem, keninotheng iriy man-iiyan chiwan a kigwan cha i “Siya jay?” 11Et sema iren tothoon iyay-olo-olop cha Jesus, kigwan cha i “Si-kathos Jesus a profiten i-Nazareth na Galilee.”
Chiyagchag Jesus Iriy Kedinahod Timplo
(Mark 11:15-19; Luke 19:45-48; John 2:13-22)
12Et simekep mes Jesus chiwa bo-dayan na timplo, et chiyagchag to ira ma kedinaho tan sema iren ketinongkal na naiyaytangdal cha Afo Chiyos. Tingwang to pay iriy damisaan iren ma naena-dat na pilak tan tokkongan iren ma naiyandaho na kalapati. 13Kigwan tod si-kara i “Iyaysolat cha esel Afo Chiyos i ‘Say baliy ko, mengechanan na baliy a pankararagan na too,’ nem si-kayo, inpanbalin jo na dogad a pandoko-dokoan jo na echom.” #21:13 Isaiah 56:7; Jeremiah 7:11
14Et kimowan iriy ekorab tan epilay cha kad-an Jesus chiwa timplo, et inpamapteng to ira. 15Nem sema iren aafo na papari tan mamaistoro na dinteg, bimonget ira nonta mita riy kaskasdaaw a naimag Jesus tan sema iren aanak a kekineljaw chiwa timplo i “Hosanna cha Polin David!” 16Isonga, inbaga red Jesus i “Nat mowan iki-ngeli ma niyankona iren ma aanak?”
Kigwan Jesus i “Ahow, kowan iki-ngeli. Eg jo aya bisay iyaysolat cha esel Afo Chiyos a kigwan to i:
‘Mengipabo-day ka na esel a podnon mengichayaw cha si-kam
ired temi na aanak tan ngoyat.’ ” #21:16 Psalm 8:2
17Et bintihan iren Jesus, et imekal chiwa siyodad a kimowan cha Bethany a kejo-kowan to.
Sema Kejow A Nagwariy Dawes To
(Mark 11:12-14,20-24)
18Nonta dadabi, idi man-ooli di ires Jesus cha Jerusalem, aofa. 19Gwariy mita thon kejow a fig cha kilig na kalsara, et kimowan a si-nengen to no gwariy dawes to, nem mabolong bengat. Isonga, kigwan men Jesus chiwa kejow i “Sapay koma eg ka wa mandawe-dawes!” Et iyakpit men chakos.
20Idi mita iren ma disipolos to man, iyasdaaw iren pasiya et kigwan cha i “Ngoy inpasing niyay a kejow a fig a iyakpit a chakos?”
21Et insongbat Jesus i “Sejay a konen kod si-kayo, podnon no gwariy pamati yod Afo Chiyos tan eg kayo manchegwa-chegwa, kabaalan jo ngon inges toy inpasing kod ja kejow. Nat setan bengat, nem mebedin a konen jod ma chontog i ‘Mo iba-tok i angel mod baybay,’ et metongpal. 22Isonga, no gwariy ibaga yod Afo Chiyos, egwathen jo basta patien jon may-i-kan.”
Sema Salodsod Maypangkep Na Karebengan Jesus
(Mark 11:27-33; Luke 20:1-8)
23Et simekep mowan si Jesus cha bo-dayan na timplo. Idi mantotoro, sema iren aafo na papari tan iyangkaama, kimowan ired kad-an to et kigwan cha i “Ngoy karebengan mon mengipesi-pesing iren tan? Siyay engi-kan nitha karebengan mo?”
24Insongbat Jesus i “Gwara nin i ibagak cha si-kayo. No songbathan jo, igwanggwang kod si-kayo no nengoy karebengan kon mengema-emag iren jay. 25Sejay i salodsod ko. Siyay engi-kan cha John na karebengan ton memonjag na too? Si Afo Chiyos ono too?”
Iyantatabalan cha wa i “Ngoy konen tayo? No konen tayo i si Afo Chiyos i engi-kan na karebengan John, konen to emo i ‘No setan ngarod, apay nga eg jo piyati?’ 26Nem no konen tayo i too bengat i engi-kan, ketahot kiya na pesing na chakel a tood si-kathayo tep napiyati ra i agpayson profites John.” 27Isonga, kigwan cha wed Jesus i “Nat amta wi.”
Et kigwan ngon Jesus i “Angken si-kak ngo, ekak igwanggwang cha si-kayo no siyay engi-kan na karebengan kon mengema-emag iren jay.”
Sema Arig Maypangkep Na Chegwen Aanak
28Et kigwan Jesus iyay a arig i “Nengoy nemnem jon jay? Gwariy dahin chegwiy anak ton daleki. Kimowan cha pangodowan a kigwan to i ‘Anak ko, tahen pan-obded ma garden na grape niman.’ 29Kigwan na anak to i ‘Ekak onkowan,’ nem idi engkay, iyanbabawi et kimowan ngo chechan a iyan-obda. 30Kimowan iwa dahid orichiyan a anak to, et kigwan toy man-inges. Kigwan niwa orichiyan i ‘Ahow ngarod, Papang, onkowanak,’ nem nat kimowan ketchin iyan-obda.” 31Et kigwan Jesus i “Tiwa ngarod, siyen ja chegwiy engamag niwa piyan na awecha?”
Kigwan cha i “Sema pangodowan.”
Kigwan Jesus i “Kosto tan. Sejay a konen kod si-kayo, podnon sema mabesol a inges toy para singil na binis tan sema iren bibiin naengipabayad na angel cha, medebas iren mayka-chom iy say si-kayod pantorayan Afo Chiyos. 32Tep kimowan alis John a Naemonjag, et intoro thoy mapteng a panbiyag, nem nat piyati yo. Nem sema iren para singil na binis tan sema iren bibiin naengipabayad na angel cha, piyati ra. Et angken sini-neng jo wen emati wa ira, eg kayo pay iyanbabawi, tan eg jo pay piyati.”
Sema Arig Na Naengi-chen Na Garden A Grape
(Mark 12:1-12; Luke 20:9-19)
33Kigwan men Jesus i “Iki-ngeli yoy sa-ki pay a arig. Gwariy toon iyantanem na grape cha mabenaw a garden to. Iyalad to et emaong na pemespesan na grape a ma-mag na tafiy. Engitgwen pay na ekayang a baliy a panbantayan na naiyanbantay na garden. Et inpa-bang to ma garden tod echom a naengi-chen et kimowan cha sa-kin ili. 34Idi mimothok i timpo na siborasan na grape, engito-no ma mahagarden na bagaen to ired naengi-chen say a-daen na bagaen i bingay to. 35Nem idi mimothok ira ma bagaen, piyegpeg-as iren ma naengi-chen i sa-ki, biyono riy sa-ki, tan chinchintog chiy sa-ki.
36“Engito-no mowan iwa mahagarden ira na bagaen ton mas chakel iy say pilmiro, nem inges toy inpasing cha met laeng cha si-kara. 37Idi iyakcheng ma iwan, into-non ma mahagarden i anak ton kigwan tod nemnem to i ‘Rispiktaren chiy anak ko.’
38“Nem idi mita iren ma naengi-chen i anak to, kigwan cha i ‘Sejay i menegwid niya garden. Bonoen tayo et say a-daen tayo ja tawid to.’ 39Ida ra wen inkowan ched ma awas na garden et biyono ra.”
40Et inbagaan Jesus ira ma iyanki-ki-ngel i “Isonga, no onmothok aliy mahagarden, ngoy pesing to ired ma naengi-chen?”
41Insongbat cha i “Bonoen to ira ma mangkahedsel, et ipiyal to ma garden tod ma echom a mengi-kan na bingay to no timpo na siborasan na grape.”
42Inbaga wen Jesus cha si-kara i “Eg jo aya bisay iyaysolat cha esel Afo Chiyos a kigwan to i:
‘Sema bathon kigwan iren
ma naengamag i
nagwariy silbi tho,
si-kathoy iyanbalin a
kapategan a bathon
naengibahed na baliy.
Si Afo Chiyos i engipasing
niwan
et kaskasdaaw cha
nemnem tayo.’ #21:42 Psalm 118:22-23
43“Isonga, konen kod si-kayo i sema karebengan a mayka-chom cha pantorayan Afo Chiyos, ma-kal cha si-kayo, et may-i-kan ired ma naengibiybiy cha panbiyag chen podno iren naematid Afo Chiyos. 44Sema ma-kas chiya batho, mebosak, tan sema may-i-kasan niya batho, mepiksit.”
45Idi inki-ngelan na aafo na papari tan Pharisees iwan, amta ra i sema ari-arig ket, maypangkep cha si-kara. 46Isonga, piyan chen chedmethen si Jesus, nem tiyakothan chiy tothoo tep chakel cha si-kariy naengibilang Jesus a profita.
اکنون انتخاب شده:
Mateo 21: KAR
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 Wycliffe Bible Translators, Inc. All rights reserved.