Mateo 7
7
Sema Maypangkep Na Pengowis Na Echom Tayo
(Luke 6:37-38,41-42)
1Intoloy Jesus a iyantoro i “Enog i kiyowis i echom jo say nat kowisen to kayo ngon Afo Chiyos. 2Tep sema pengowis jo na echom jo, inges to ngoy pengowis Afo Chiyos cha si-kayo. Tan sema kabenay na kaasi yod echom jo, inges to ngoy kabenay na kaasin Afo Chiyos cha si-kayo. 3Apay nga si-nengen moy iyaytoning cha matha na echom mo iy eg mo si-nengen i balengen cha matham? 4Tan apay nga konen mod echom mo i ‘Itolok mon a-kalen ko ta iyaytoning cha matham’ iy gwara ngoy iyaybalengen cha matham? 5Si-kam a naengibili-biling a naengamag na mapteng, ekal mo nin itha balengen cha matham say marigwes i peni-neng mo, et mebedin a a-kalen mo wiy iyaytoning cha matha na echom mo.”
6Intoloy Jesus a engowan i “Enog i intoro ma esantoan a esel Afo Chiyos cha toon naiyandisjon niwan tep may-arig cha aso tan kechel. Tep angken no epateg i i-kan jod ma mabonget a aso, kedathen to kayo pay, tan angken no pirlas i ichetog jod kechel, ikathi-kathin to pay.”
Sema Pekiadok Tayod Afo Chiyos
(Luke 11:9-13)
7Et kigwan Jesus pay i “Pemasig kayon manbaga-baged Afo Chiyos, et i-kan toy jowan ibaga. Pemasig kayon mengena-enap, et sepolen jo ma jowan anafa. Pemasig kayo pay a menogtogtog na bengbeng, et medokathan et say mahasekep kayo. 8Tep sema naiyanbaga-baged Afo Chiyos, may-i-kanan. Sema naengana-anap, sepolen to. Tan sema naenogtogtog, medokathan i bengbeng para cha si-katho. 9Tep si-kayon awa, no manbagay anak jo na tinapay, ampet siya iy i-kanan jo na batho? 10No manbaga na paideng, ampet siya iy i-kanan jo na oleg? 11Isonga, si-kayo wen mabesol, no amta yon mengi-kan cha anak jo na mapteng, si Awejon gwared dangit, sinto pay amta thon mengi-kan cha si-kayo na mapteng!
12“Isonga, seta piyan jon a-magen na echom jod si-kayo, si-katho ngo komay a-magen jod si-kara tep sejay i torod ma dinteg Moses tan sola-solat iren ma profita.
Chegwen Sakepan: Sema Ekofit Tan Sema Mabenaw
(Luke 13:24)
13“Sekep kayod ekofit a sakepan tep sema mabenaw a sakepan tan sema inam-ay a chalan, ontorong cha inpiyirno, et chakel i nasimekep chiwan. 14Nem ekofit a sakepan tan sema edigat a chalan, ontorong cha biyag a nagwariy pengingkaan to, et otik i naenafol niwan.
Chegwen Kilasin Dawes: Sema Mapteng Tan Sema Ngaaw
(Luke 6:43-44)
15“Tanchaani yo iriy naiyan-ite-itek a profiten onkowan cha kawad-an jo tep aanos i kasi-neng chen inges toy kalniro, nem say podnon ogadi ra, inges toy emanekot a aso. 16Amtaen jo ired ma naimag chen inges to ngoy pengamta yo na kejow cha dawes to. Tep eg naaalay dawes na grape cha do-bet a iyasbithan, tan eg naaala ngoy dawes na fig cha mawini. 17Say mapteng a kejow, naiyandawes na mapteng, nem say ngaaw a kejow, naiyandawes ngo na ngaaw. 18Tep sema mapteng a kejow, nat mahadawes na ngaaw, tan sema ngaaw a kejow, nat mahadawes ngo na mapteng. 19Sema emiin a kejow a ngaaw i dawes to, metongba et maykepil med afoy. 20Isonga, sema pengamta yo iren ma profiten naiyan-ite-itek, chiwa naimag cha.
Sema Iren Eg Mayka-chom Cha Pantorayan Afo Chiyos
(Luke 13:25-27)
21“Sema iren mayka-chom cha pantorayan Afo Chiyos cha dangit, nat emiin a naengowan cha si-kak i ‘Afo, Afo,’ no diket sema bengat iren naengamag na piyan Awak a gwared dangit. 22No onmothok aliy akow na pengowis Afo Chiyos na tothoo, chakel i toon mengowan cha si-kak i ‘Afo, Afo, nonta naengipadto kawi, naiyosal miy ngaran mo. Nonta naenagchag kawi na dimonyos tan naengamag kawi na chakel a milagro, naiyosal mi pay i ngaran mo.’ 23Nem isongbat kod si-kara i ‘Eg tahejon polos am-amta. Si-kayon naengamag na ngaaw, betik kayo!’ ”
Chegwen Engamag Na Baliy: Sema Edaing Tan Sema Egwenggweng
(Luke 6:47-49)
24“Isonga, emiin a naengi-ngel et naengamag na nakigwan ko, may-arig chiwa edaing a toon engitegwen na baliy ton inko-ko thod batho. 25Et idi pimekes ma diy oran a bimarakan i kolos et pimekes aliy chahem cha baliy, eg iyat-atgwang iwa baliy tep sema iyaybekaan to, iyay-amag cha batho. 26Emiin a naengi-ngel na nakigwan ko nem nat naimag cha, may-arig chiwa egwenggweng a toon engitegwen na baliy tod charat. 27Idi pimekes ma diy oran a bimarakan i kolos et pimekes aliy chahem cha baliy, iyatgwang iwa baliy et kolpin echaral.”
28Idi iyakcheng si Jesus a iyantoro iren man, iyasdaaw iriy too niwa inpasing ton iyantoro 29tep sema toro-toro tho, gwariy karebengan ton nat inges toy toro-toro na mamaistoro na dinteg.
اکنون انتخاب شده:
Mateo 7: KAR
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 Wycliffe Bible Translators, Inc. All rights reserved.