Marike 13
13
Yiezu ɛ́ lè Dɔfĩn zũ-bɛhɔ́ wúarɔ́ bòo ɛ̀ bie
Mat 24.1-2; Lik 21.5-6
1Ɛ́ bòo lɛ ɛ́ Yiezu ɛ́ zɔn lɔ́ lé Dɔfĩn zũnù hũn, ɛ́ piè kɛ̀ránzuú dɔ̀ ɛ́ khie ɛ́ bie àá ɔ́ ɛ́ nɛ làa: «Kɛ̀ránlɔ, húi hɔ́pe sɛ̃̀nlɛ̀a sɔ lɛ ɓàakɛrɔ́ hɛ̀, húi lépe zũnù lɛ tɔn dɛ̃̀ sãàrɔ́ hɛ̀!» 2Ɛ́ Yiezu ɛ́ zɔn kɔ̃́niɛ ɔ̀ ɛ́ nɛ làa: «Kɔ́ loo lepe zũ-bɛhɔ́ lɛ ɛ́ tɔn dɛ̃̀? Ɛ́ sɛ̃̀nlè ɛ́ yá ɓén dìń ɓá ńkɔnù sɛ̃̀nlè lɔ̀n wɛ̀; hɔ̀ míkùi ɛ́ ɓén khɛ̀rɛ́kɛ ɛ́ khíi síɛ.»
Lè sɛ̃́ɲíi fìi ɓánlɔ́ bòo
Mat 24.3-14; Lik 21.7-19
3Ɛ́ Yiezu ɛ́ van yòó kɛsí hɔ́ Olive vɛ̃̀hɛ̃ ɓúkìe lɔ̀n ɛ́ sɛ́sɛ́a lè Dɔfĩn zũ-bɛhɔ́. Ɛ́ Piɛre àá Zaake àá Zãn àá Andere lɛ wi yán àá ɔ́ ɓɛ́ dòonún ɛ́ zɔn ɛ́ ɔ̀ dìenin ɛ́ nɛ làa: 4«Zɛ̃́ní lé pɛ̃̀hṹ lɛ ɛ́ hɔ́pe bòo sɔ ɛ́ ɓén wé hũn ɛ̀ lɛ́ kiè ǹ; hɔ̀ iè ńɓùo ɛ́ temu ɓén zɛ̃́ní pehɔ̀ ɲunù vɛ tĩ́nlén?» 5Ɛ́ Yiezu ɛ́ zɔn bie ɛ́ lɛ́ ɓà ǹ ɛ́ nɛ làa: «Mì ɓɛ́ɓɛ́ míte ǹ nɛ nìnbírɔ dɔ̀ ɛ̀ bí khɛ̃̀ní miɛ ɛ̀ yínin wɛ̀. 6Iè hɔ̀ lɛ ɛ́ nìnbirìe bìkuì ɛ́ wóo ɓén hĩ́ní ɓen niǹ yèrè lɔ̀n, ɛ̀ hɔ́rɔ ɛ́ wóo ɓén bie nɛ mípe ɛ́ temu iè ɔ̀pe Kirisa. Ɛ́ ɓɛ́ ɓén khɛ̃̀níkɛ nìnbirìe bìkuì ɛ́ yínin. 7Pɛ̃̀hṹ lɛ kɛ́ mí ɓen ɛ́ hɔ̀ hĩɛ̀ lɛ ɛ́ tɛ́ lúwi miɛ ǹ bòo ɛ̀ ɲí, ɛ̀ mì lò ɛ́ hɔ̀ hĩɛ̀ lɛ van ɛ́ tɛ́ viì ni bòo ɛ̀ ɲí, ɛ̀ mì bí nɛ mi hũn ɛ̀ yen wɛ̀; iè hɔ̀ lɛ ɛ́ hɔ́pe sí fɔ́ɓán ɛ̀ hɔ̀ wé, kɛ́ hɔ́ pɛ́wi ɲɛùn yí lé dímíɲɛ́ vénlɔ́ wɛ̀. 8Ɛ́ dàa dɔ̀ nìɛ ɛ́ wóo ɓén hĩ́ní ɛ́ khíi tɛ́ hɔ́ hĩɛ̀ àá dàa dɔ̀ nìɛ, ɛ̀ bɛ́záanú dɔ̀ ɛ́ hĩ́ní ɛ́ khíi tɛ́ hɔ́ hĩɛ̀ àá bɛ́záanú dɔ̀, ɛ̀ hɔ̀ vuò dɔ̀ ɛ́ lé sṹsùnù ɛ́ wóo ɓén vɛ zɛ̀kɛ́ hũn, ɛ̀ hɔ̀ hĩn-bɛ̃hɛ̃ ɛ́ wóo ɓén kań. Hɔ̀ ɓén dìń kɛ̀a ie le sɛ̃́ɲíi lɛ a hṹnu lɛ tenlɔ́ dɛ̃un ɛ́ wóò sɛ̃̀nɛ́hã̀á yí. 9Kɛ́ hɔ́ ɓen kɛ́ mípe, ɛ̀ mì ɓɛ́ɓɛ́ míte ǹ sãàní iè hɔ̀ lɛ ɛ́ ɓɛ́ wóo ɓén dàá miɛ ɛ́ dàá vɛ hɔ lìe lènlén vuò hũn, ɛ̀ ɓɛ̀ wóo ɓén nàa miɛ ɓɛ̀ Zuifuɓɛ ńkóoɓánlɔ̀n zĩhĩ́ɛ hũn, ɛ̀ ɓɛ̀ wóo ɓén ve miɛ ɓɛ̀ pànkɛ́ ɓàasiè àá ɓɛ́ bɛ́zɛ̀ɓɛ̀ yíe ǹpe yènsénín, bòo lɛ ɛ́ wé ɛ̀ mì yí niǹ bòo ɛ́ bie ɛ̀ lɛ́ ɓà ǹ. 10Kɛ́ ɛ̀ dí hɔ́ bòo míkùi híɛhɔ́, ɛ́ lé Bentĩnu ɛ́ fɔ́ɓán ɛ̀ lè buie ɛ̀ lɛ́ hɔ́ dàa míkùi nìɛ ǹ vé. 11Kɛ́ ɓɛ́ ɓen ɓaakɛa miɛ ɛ́ dàá vaá-vɛ hɔ lìe lènlén, ɛ̀ mì bí nɛ mi hũn ɛ̀ yenkɛ hɔ bòo lɛ ɛ́ mí ɓén vɛ bie bòo hũn wɛ̀; kɛ́ pehɔ̀ yìi hũn, ɛ̀ hɔ̀ biehĩ́ lɛ mii ɛ̀ bie iè hɔ̀pe lɛ ɛ́ Dɔfĩn ɛ́ ɓén lɛ́ miɛ ǹ, iè hɔ̀ lɛ ɛ́ hɔ́ yá ɓén lé àá mí viì, kɛ́ lé iè lè Mɛkɛ̃n-Sãanu ɛ́ te hɔ ɓén lɛ́ miɛ ǹ. 12Ɛ́ nìnbírɔ ɛ́ wóo ɓén lɛ́ ɓá zuú ɛ́ ɓɛ́ ɛ́ fé ɓé, ɛ̀ yàá ɛ́ wé hɔ́ ɓà ńmàa àá mí zuú; ɛ̀ ɓɛ̀ zɛ̀ɓɛ̀ ɛ́ wóo ɓén hĩ́ní ɛ́ pĩ́ ɓá nìɛ bòo ɛ̀ ɓɛ̀ ɛ́ lɛ́ ɓɛ́ ɛ́ ɓɛ́ ɛ́ fé ɓé. 13Ɛ́ nìnbirìe ɓɛ́kùi ɛ́ ɓén hán miɛ ǹpe yènsénín. Kɛ́ álɛ ɛ́ hɛ̃̀ mí hũn fúu ɛ́ van víeniɛ, ɛ́ ɓàasɔ ɛ́ fuen.»
À nìsũmúi yìrá bòo wérɔ bòo
Mat 24.15-28; Lik 21.20-24
14«Pɛ̃̀hṹ lɛ kɛ́ mí ɓen van loo ɔpe lɛ ɛ́ ɓɛ́ wóò nɛ “nìsũmúi yìrá bòo wérɔ” kɛ́ a wi le viì lɛ á yí fɔ́ɓán à kan hũn, — nɛ alɛ ɛ́ hɔ̀pe bòo lɛ ɛ̀ kɛ̀rán ɛ̀ ɲí hɔ́ sãàní! — Ɛ́ pehɔ̀ yìi hũn, ɛ̀ ɓɛ̀lɛ wi hɔ Zudee pɛ̃̀hɛ̃ hũn ɛ̀ zè yòó vɛ àá hɔ́ ɓúkùo viì, 15àlɛ ɛ́ yòó wi le lòo hũn ɛ̀ bí bie nɛ mii síɛ zɔ mí zunù, ɛ̀ zɔ mìí dìɛ dɔ̀ yán vé wɛ̀; 16àlɛ ɛ́ van wi mí mún hũn ɛ̀ bí bie nɛ mii khũ̀á ɓen mìí mí mùakú vé wɛ̀. 17Hɔ̀ wihĩ́ sɔ hũn, ɛ̀ hɔ̀ ɓén hièní ɓɛ́ hã́a lɛ póoniɛ ɛ́ wi lɔ̀n àá ɓɛ́lɛ nìɛ ɛ́ yìɛ́ lɔ̀n. 18Mì hɛ̃un Dɔfĩn bòo lɛ ɛ́ wé ɛ̀ hɔ̀pe bòo sɔ ɛ̀ bí wé mùn-tiɛ̀ní yìi hũn wɛ̀. 19Iè hɔ̀ lɛ ɛ́ pehɔ̀ yìi hũn, ɛ̀ ɓɛ̀ nìnbirìe ɛ́ lɔ̀n ɓén be cɛ̃̀un. Lè lɔ̀nbiè lɛ ɓén wé ɓà ńmaà ɛ́ ɲɛùn yí wé yí mi, àá bòo lɛ ɛ́ Dɔfĩn dàa mɛ́ lé dímíɲɛ́ fúu ɛ̀ ɓen dɛ̃ zoòni, ɛ̀ lɔ̀nbiè lɛ ɛ́ bĩní yí lè ǹ ɛ́ yá bĩní wé wɛ̀. 20Kɛ́ hɔ́ hṹn yí hɔ́ lɛ ɛ́ Ɲunsɔ ɛ́ fɛ́rɛ hɔ̀ wihĩ́ sɔ ǹ, ɛ́ nìnbírɔ lɛ ɛ́ hṹn dɛ̀ ɛ́ fuen ɛ́ yá wé wɛ̀. Kɛ́ á den fɛ́rɛ hɔ̀ ǹ ɓɛ̀ nìnbirìe lɛ á munɛ nɛ ɓɛ bòo ɛ̀ sĩ̀ mí ǹ bòo hũn. 21Kɛ́ nìnbírɔ ɛ́ ɓɛrɛ yú miɛ à nɛ: “à Kirisa ɛ́ wi hũ̀nún tàá à wi hũ̀nyéniń” ɛ̀ mì bí dɛsĩ̀ ɓàasɔ ǹ wɛ̀. 22Iè hɔ̀ lɛ ɛ́ pehɔ̀ yìi hũn ɛ̀ ɓɛ̀ ɓúo Kirisaɓɛ dɔ̀ àá ɓɛ́ ɓúo Dɔfĩn bɔ̀háaníriè dɔ̀ ɛ́ ɓén síɛ hĩ́ní. Ɓɛ̀ wóo ɓén wé hɔ́ yéréké bòo àá hɔ́ bɔ̀bɛ̃hɛ̃ ɛ́ dàá fĩiní ɓɛ́ nìnbirìe. Kɛ́ hɔ́ yɛ̀rɛ́ hṹn dɛ̀ ɛ́ wé, ɛ̀ hɛ̀rí ɓɛ̀pe lɛ ɛ́ Dɔfĩn ɛ́ munɛ ɛ́ ɓɛ́ pɛ́ khɛ̃̀níkɛ ɛ̀ yí nin. 23Ɛ́ mí wo ɓɛ́ɓɛ́ míte ǹ sãàní, ń lò wo sɛ̃̀nɛ́hã̀ khɛ́ hɔ́ bòo míkùi ɛ́ lɛ́ miɛ ǹ.
À nìnbírɔ Zuú khũ̀á ɓenlɔ́ bòo
Mat 24.29-31; Lik 21.25-28
24Ɛ́ hɔ́pe wihĩ́ sɔ hũn, kɛ́ lé lɔ̀nbiè ɛ́ ɓen van khie vɔ́, ɛ́ lé wurù ɛ́ ɓén yòó wé síbínú, ɛ̀ lè ńpĩ́ihṹ ɛ́ yá lɛ́ mí ńpiemu wɛ̀. 25Ɛ̀ hɔ̀ ńpĩ́inàwuò ɛ́ ɓén yòó lé hɔ́ hóohũn ɛ́ kùenkɛ ɛ́ síɛ, ɛ̀ hɔ̀ pànkɛ́a lɛ yòó wi hɔ hóohũn ɛ́ ɓén yòó zɛ̀kɛ. 26Ɛ́ ɓɛ́ nìnbirìe den wo ɓén mi-ɛ nìnbírɔ Zuú kɛ́ á ɛ́ ɓen hɔ̀ dùndùó lɔ̀n hɔ̀ pànkɛ́ bɛ́hɔ́ hũn àá lé yèn-bɛhɔ́ hũn. 27Á den wo ɛ́ tɔnkɛ ɓɛ̀ mɛlɛkɛɓɛ ɛ́ viɛní lé sṹsùnù míkùi lɔ̀n, nɛ ɓɛ vɛ ve ɓɛ nìnbirìe lɛ ɛ́ Dɔfĩn munɛ ɛ̀ ɓen kóo ɓánlɔ̀n lé sṹsùnù fìi ɓánlén fúu ɛ̀ khíi vɛ dɛ̃ pelè vénlén.»
Lè ńluunù kɛ̀ránlɔ́ lɛ ɛ́ lé ɛ́ lɛ́ bòo
Mat 24.31-35; Lik 21.29-33
28Ɛ́ Yiezu ɛ́ bĩniɛ zɔn bie ɛ́ nɛ làa: «Mì húi lé ńluunù sãàní, ɛ̀ mì dũń hɔ́ kɛ̀ránlɔ́ lɛ ɛ́ lé ɛ́ lɛ́ miɛ ǹ ɲún; pelè ńnɛ́hɛ̃ ɛ́ ɓen van yòó ɛ́ kùkúkɛ, kɛ́ pelè ɲɛkɛ̃̀a ɛ́ síɛ ɛ́ sɛ̀, ɛ̀ mì dũ kɛ́ lé yièhũn ɛ́ lúwi. 29Ɛ́ sí iè hɔ̀pe temu lɛ́ kɛ́ mí ɓiɛ̀ ɓen van loo hɔpe bòo sɔ sí kɛ́ hɔ́ ɛ́ wé, ɛ̀ mì dũń kɛ́ á nìnbírɔ Zuú ɛ́ ɓɛrɛ lúwi le zĩínù ǹ. 30Nin bie hɔ lɛ́ miɛ ǹ àá bɔ̀bín nɛ ɓɛpe zoòní nìɛ ɓɛ́kùi ɛ́ yá ɓen híkɛ ɛ́ vé, hɔ́rɔsí ɛ̀ hɔ̀pe bòo sɔ ɛ́ wɔ́ vɔ́. 31Hɔ̀ hóohũn àá lé sṹsùnù ɛ́ ɓen khíi, kɛ́ niǹ biehĩ́ ɛ́ pe yá khíi yá mi wɛ̀.»
Dɔfĩn mí dòonún ɛ́ temu dũ bòo míkùi vénlɔ́ pɛ̃̀hṹ
Mat 24.36-44
32«Kɛ́ hɔ́ ɓen kɛ́ lé sítĩnlɔ́ àá lé yìi lɛ ɛ́ hɔ́pe bòo sɔ ɛ́ ɓén wé hũn, ɛ̀ nìnbírɔ dɔ̀ lɛ dũ hɔ ɛ́ mí wɛ̀. Ɓɛ̀ hóohũn mɛlɛkɛɓɛ ɛ́ yí dũ hɔ, hɛ̀rí àpe Zuú kùusɔ ɛ́ yí dũ hɔ wɛ̀; à Yàá mí dòonún ɛ́ temu dũ hɔ. 33Ɛ́ mí ɓɛ́ɓɛ́ míte ǹ ɛ̀ mì piɛní mí yìe iè hɔ̀ lɛ ɛ́ mí yí dũ le yìi sɔ dɛ̃nlɔ́ wɛ̀. 34Hɔ̀ ɓén léɓán àá nìnbírɔ dɔ̀ lɛ lɔ́ vaá-vɛ wṹn lɔ̀n, á zɔn lɔ́ mí zũnù hũn, à lɛ́ lé mí tɔntɛ́riè nɛ ɓɛ ten bòo ɛ̀ húi, à sankɛa hɔ̀ tɔnlɔ́ ɛ́ lɛ́kɛ ɓà ǹ, hɔ́rɔ àá mí hɔ́n, à bie lɛ́ á zĩínù ɲunù hìerɔ ǹ nɛ a piɛní mí yìe. 35Ɛ́ mí piɛní mí yìe iè hɔ̀ lɛ ɛ́ mí yí dũ le yìi lɛ á zũnù ɓàasɔ ɛ́ mí dàa vɛ khũ̀á ɓen wɛ̀; hɔ̀ ɓén wé zĩ́ihṹ yée, hɔ̀ mii wé sínɛ̀hɛ̃ǹ yée, hɔ̀ mii wé kɔ̀bɛ́-wiɛ yée tàá ɲɛǹbín yée mí yí dũ wɛ̀. 36Ɛ́ mí ɓɛ́ɓɛ́ míte ǹ hɛ̀rí kɛ á van khũ̀á ɓɛrɛ fùa fùa, à bí ɓen yí miɛ kɛ́ mí dũmua wɛ̀. 37Hɔ̀pe lɛ ɛ́ nín bie àá miɛ iè mìpe mìkùi ɛ́ nín hɔ̀ khɛ́ ɛ̀ lɛ́ nin: ɛ́ mí piɛní mí yìe.»
اکنون انتخاب شده:
Marike 13: bwj
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 L’Association Nationale pour la Traduction de la Bible et l’Alphabétisation