Marike 14
14
Zuifuɓɛ nìkĩ́ɛ ɛ́ Yiezu ɓaàrɔ́ wṹn ɛ̀ cɛ̀
Mat 26.1-5; Lik 22.1-2; Zãn 11.45-53
1Hɔ̀ wo hàarí kɛ́ wihĩ́ bɔ̀nbɔ̀ ɲu ɛ̀ lè Nyiewɛlɔn sɛ́rí àá hɔ́ búrú lɛ ɛ́ ɲɛfĩni mí hũn lànlɔ́ ɛ́ dɛ̃. Ɛ́ Dɔfĩn khɛ̃́ndàariè hándíe àá ɔ̀ Moyiize làndɛ́ kɛ̀ránliè ɛ́ hɔ̀ bòo lɛ ɛ́ ɓɛ ɛ̀ wé ɛ́ dàá tànkɔ̀ní ɓaà Yiezu ɛ̀ ɓé ɛ̀ cɛ̀. 2Ɛ́ ɓɛ́ ɛ́ bie ɓán hũn ɛ́ nɛ làa: «Ké yí dɛ̀ hɔ̀ yá wé lé sɛ́rí zɔǹ wɛ̀, kɛ́ dàa bòo mí ɛ́ ɓɛ́ nìzã̀amáa ɛ́ khiɛní lé viì.»
Hṹnu dɔ̀ ɛ́ yurɔ́ lɛ tũnù tĩ ɛ̀ kóo Yiezu lɔ̀n
Mat 26.6-13; Zãn 12.1-8
3Yiezu ɛ́ hàarí van wi Betani lóo hũn, à Simɔn lɛ iè ɔ̀ ɓèré zũnù hũn; ɛ́ hɔ́ lɛ ɛ́ ɓɛ́ dí, ɛ́ hṹnu dɔ̀ ɛ́ van ɓɛrɛ ɓen zɔn, kɛ́ á dàa sɛ̃̀nlè ɓùe dɔ̀ lɛ tú àá yurɔ́ lɛ tũnù tĩ lɛ yàamu ɛ́ hie cɛ̃̀un, lɛ wóò lé lé vĩ̀n-cíi dɔ̀ ǹ lɛ yèrè ɛ́ ɓɛ́ nɛ naare. Á ɓɛrɛ wua lè ɓùe sɔ, à kóo hɔ̀ yurɔ́ sɔ Yiezu ɲún lɔ̀n. 4Ɛ́ ɓɛ́ nìnbirìe lɛ hṹn wi yán, ɛ́ ɓɛ́dɔ̀ ɛ́ hɛ̀ yí wɛní ɓɛ́te wɛ̀, ɛ́ ɓɛ́ khie bie ɓɛ́ ɲihĩ́ɛ hũn ɓán tĩ́ihṹ ɛ́ nɛ làa: «Hɔ̀ pe yurɔ́ lɛ tũnù tĩ sí yáakɛrɔ́ ɲún ɛ́ wo iè hɔ̀ hɔ́sɔ? 5Hɔ̀ hṹn dɛ̀ ɛ́ yìɛní ɛ́ pɔní denie#14.5 Denie dìcóoní ɛ́ hàarí iè tɔntɛ́ wu-kuì tɔnlɔ́ sàanín. Ɛ́ denie khĩɛ́ tĩ ɛ́ wo hàarí ɛ́ wé wĩhĩ́ khĩɛ́ tĩ tɔnlɔ́ sàaní. khĩɛ́ tĩ ɛ́ khíi lɛ́ màa ɓɛ̀ nìkherà ǹ.» Ɛ̀ ɓɛ̀ wo ɛ́ fi àá ɔ́pe hṹnu sɔ. 6Kɛ́ Yiezu den zɔn bie lɛ́ ɓà ǹ nɛ làa: «Mì fùansí-e hṹnu sɔ ǹ. Mí wiɛ dàá ɛ́ ɔ̀ tiɛní? Hɔ̀ iè bòo lɛ sãa á wɔ́ àá mi lò! 7Ɓɛ́ nìkherà ɛ́ wi yán fúu àá miɛ, ɛ́ mí dɛ̀ bɔ̀tente ɛ́ wé àá ɓɛ́ pɛ̃̀hṹ lɛ ɛ́ mí wɛ hũn, ɛ̀ ǹpe ɛ́ yí nin kań yán àá miɛ fúu wɛ̀. 8Hɔ̀ bòo lɛ á dɛ̀ ɛ́ wé iè pe á wɔ́. À kóo hɔ̀ yurɔ́ lɛ tũnù tĩ niǹ tɛkɛà lɔ̀n ɛ́ sɛ̃̀nɛ́hã̀ wóokɛa hɔ̀ ɛ́ dàa ɛ́ pe hɔ̀ wũ̀nlɔ́ ɛ̀ hìé. 9Ɛ́ nin bie hɔ lɛ́ miɛ ǹ àá bɔ̀bín nɛ viì yée viì lɛ ɛ́ lé Bentĩnu ɛ́ wóo ɓén vɛ buie hũn lè dímíɲɛ́ míkùi hũn, ápe hṹnu sɔ lɛ bòo lɛ á wɔ́ ɛ́ ɓiɛ̀ ɛ́ wóo ɓén liení ɛ́ yí ɛ́ bie.»
Zudaasi ɛ́ cɛ̀ à bɛ́ Yiezu máahṹ
Mat 26.14-16; Lik 22.3-6
10Á Zudaasi Yisikariyɔɔte lɛ iè pe Yiezu kɛ̀ránzɛ̀ɓɛ̀ pírú àá nìɛ ɓɛ̀ ɲu dɔ̀ ɛ́ van yú ɓɛ́ Dɔfĩn khɛ̃́ndàariè hándíe à nɛ mii dé Yiezu peɓɛ̀ núnú hũn. 11Ɛ́ hɔ́ lɛ ɓɛ́ ɲɛ́ piè bienù vɔ́, ɛ́ ɓɛ́ wɛniɛ ɓɛ́te cɛ̃̀un, ɛ̀ ɓɛ̀ nɛ ɓɛ ɛ̀ lɛ́ màa ɔ̀ ǹ. Á Zudaasi ɛ́ wo ɛ́ lè yìi dɔ̀ ɛ̀ cɛ̀ ɛ́ mii dàá dé Yiezu peɓɛ̀ núnú hũn.
Yiezu ɛ́ lè Nyiewɛlɔn sɛ́rí díe ɛ̀ dí àá mí kɛ̀ránzɛ̀ɓɛ̀
Mat 26.17-25; Lik 22.7-14; 22.21-23; Zãn 13.21-26
12Ɛ́ hɔ́ búrú lɛ ɛ́ ɲɛfĩni ɛ́ mí hũn lànlɔ́ hán wurù zɔǹ, lɛ iè lè wurù lɛ ɛ́ ɓɛ́ wóò dàá fũ̀a le Nyiewɛlɔn sɛ́rí pi-zàani, ɛ́ Yiezu kɛ̀ránzɛ̀ɓɛ̀ ɛ́ ɔ̀ dìenin ɛ́ nɛ làa: «Hɔ̀ iè yí ɛ́ kɔ́ wɛ nɛ ke vɛ sɛ́sɛ́ lé Nyiewɛlɔn sɛ́rí díe hũn ɛ̀ lɛ́ kɔ ǹ?» 13Ɛ́ Yiezu ɛ́ khie tɔrɛ mí kɛ̀ránzɛ̀ɓɛ̀ nìɛ ɓɛ̀ ɲu dɔ̀ à bie lɛ́ ɓà ǹ ɛ́ nɛ làa: «Mì lan vɛ zɔ hɔ lóo hũn ɛ́ mí ɓén vɛ sĩ́ nìnbírɔ dɔ̀ kɛ́ á tìe ɲumu ɓòonù, ɛ̀ mì bè piè máahṹ. 14Kɛ́ á ɓen van zɔn zũnù lɛ, ɛ̀ mì vɛ zɔ bie lɛ́ á zũnù ɓàasɔ ǹ nɛ a Kɛ̀ránlɔ nɛ le zũnù lɛ ɛ́ mii dí lé Nyiewɛlɔn sɛ́rí díe hũn àá mí kɛ̀ránzɛ̀ɓɛ̀ ɛ́ wi àá yí? 15Á ɓén yòó zɛ̃́ní lé lɔ́nkɔ́#14.15 Ɓɛ̀dɔ̀ ɛ́ wóò biè nɛ núnkɔ́ zũnù. zũ-bɛhɔ́ dɔ̀ lɛ sɛ́sɛ́a vɔ́ miɛ ǹ. Ɛ̀ mì sɛ́sɛ́ hɔ́ Nyiewɛlɔn sɛ́rí díe yán ɛ̀ lɛ́ kie ǹ.» 16Ɛ́ ɓɛ́ kɛ̀ránzɛ̀ɓɛ̀ ɛ́ cɔ́ van zɔn lè lóo hũn, ɛ́ van zɔn yú hɔ́ bòo míkùi kɛ̀a bòo lɛ ɛ́ Yiezu dàa bie hɔ̀ ɛ́ lɛ́ ɓà ǹ, ɛ́ ɓɛ́ sɛ́sɛ́a lè Nyiewɛlɔn sɛ́rí díe yán.
17Ɛ́ bòo lɛ hɔ́ zĩ́ihṹ ɛ́ van dɛ̃un, ɛ́ Yiezu ɛ́ van bɔ̀ɓán àá mi kɛ̀ránzɛ̀ɓɛ̀ pírú àá nìɛ ɓɛ̀ ɲu ɛ́ dàa ɓɛrɛ. 18Ɛ́ hɔ́ lɛ ɛ́ ɓɛ́ kɛsí ɛ́ dí, ɛ́ Yiezu zɔn bie ɛ́ nɛ làa: «Nin khɛ́ hɔ́ lɛ miɛ ǹ àá bɔ̀bín nɛ mipe lɛ ɛ́ dí àá mi, ádɔ̀ ɛ́ mii dé mi ɓɛ̀ nìnbirìe núnú hũn.» 19Ɛ́ ɓɛ́ kɛ̀ránzɛ̀ɓɛ̀ tĩ̀ɛ ɛ́ yòó yáà míkùi ɛ́ ɓɛ́pe àá ɓɛ́ nì-cóohɛ̃ ɛ́ ɔ̀ dìekɛnin nɛ làa: «Ɛ́ bòo ɛ́ hɔ́ iè ńpe yée?» 20Ɛ́ Yiezu ɛ́ zɔn bie lɛ́ ɓà ǹ nɛ làa: «Hɔ̀ iè mìpe pírú àá nìɛ ɓɛ̀ ɲu hũn, ádɔ̀; àlɛ ɛ́ páaníɛ zɔn ɛ́ mí núnú ɛ̀ dé àá mi lè díe dìɛ hũn. 21Hɔ̀ ɛ́ bɔn kɛ́ á nìnbírɔ Zuú ɛ́ fɔ́ɓán à hí kɛ́ à bòo lɛ ɛ́ hɔ́ dàa wɛ̃́ pie bòo hũn. Kɛ́ á nìnbírɔ lɛ ɛ́ ti-e ɛ́ dɔ́ ɓɛ́ nìnbirìe núnú hũn ɛ́ pe yìi ɓén mi hɔ. Kɛ́ ɓàasɔ yɛ̀rɛ́ hṹn yí te, ɛ̀ hɔ̀ bòo ɛ́ hṹn tṹ.»
Ɲunsɔ húmú àá piè vìerɔ́ bòo lienírɔ́ díe bòo
Mat 26.26-30; Lik 22.14-20; 1Ko 11.23-25
22Ɛ́ bòo lɛ ɛ́ ɓɛ́ ɛ́ dí, ɛ́ Yiezu ɛ́ mɔ̀ hɔ̀ búrú, à dɔ́ Dɔfĩn bɛrikɛ à yòó ɓùenkɛa hɔ̀ ɛ́ khie lɛ́ mí kɛ̀ránzɛ̀ɓɛ̀ ǹ à bie lɛ́ ɓà ǹ ɛ́ nɛ làa: «Mì fé ɛ̀ mì lɛ̀, hɔ̀pe lɛ iè niǹ tɛkɛà.» 23À bĩniɛ khie mɔ̀ lè ɲuǹlán dìɛ lɛ ɛ́ divɛ̃n ɛ́ wi hũn, à sĩ̀n dɔ́ Dɔfĩn bɛrikɛ à khie lɛ́ lé ɓà ǹ ɛ́ ɓɛ́pe ɓɛ́kùi ɛ́ ɲunkɛ. 24À bie lɛ́ ɓà ǹ nɛ làa: «Hɔ̀pe lɛ iè niǹ cãani, hɔ̀ Dɔfĩn ɲɛbíi cãani lɛ kóosí ɓɛ́ nìnbí-kuì yènsénín. 25Nin bie hɔ lɛ́ miɛ ǹ àá bɔ̀bín nɛ ń yá ɓén bĩní ɲu divɛ̃n hùúu fúu ɛ̀ vɛ dɛ̃ lé wurù lɛ ɛ́ nin dàá ɲu hɔ̀ dìvɛ̃n-fĩɛ̀ lè Dɔfĩn bɛ́záanú hũn.» 26Ɛ́ ɓɛ́ khie bɔ́ hɔ́ sɛ́rí yánbéhĩ́, ɛ̀ ɓɛ̀ hĩ́nà kãa hɔ̀ Olive vɛ̃̀hɛ̃ ɓúkìe.
Yiezu ɛ́ bie nɛ Piɛre ɓén pĩ́ ɛ́ bie nɛ mí yí dũ mí wɛ̀
Mat 26.31-35; Lik 22.31-34; Zãn 13.36-38
27Ɛ́ Yiezu ɛ́ zɔn bie lɛ́ mí kɛ̀ránzɛ̀ɓɛ̀ ǹ ɛ́ nɛ làa: «Mìpe mìkùi ɛ́ ɓén fùansí mi ǹ iè hɔ̀ lɛ ɛ́ hɔ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: “Ń ɓén lí-é pisierɔ ǹ ɛ́ ɓé, ɛ́ ɓɛ́ pirie ɛ́ zè ɛ́ saakɛ.”» 28Ɛ́ Yiezu bĩniɛ zɔn khɛ́ sĩiniɛ ɛ́ nɛ làa: «Kɛ́ ń ɓen vìé lɔ́ yìi lɛ hũn, ɛ́ nín dí mí híɛhɔ́ ɛ́ vɛ hɔ Kalile.» 29Ɛ́ Piɛre ɛ́ zɔn bie lɛ́ à ǹ nɛ làa: «Hɛ̀rí kɛ́ ɓɛ́pe ɓɛ́kùi ɛ́ ɓɛ zè ɛ̀ ɓɛ̀ kɛ́ kɔ, ɛ́ ńpe ɛ́ yá zè nin kɛ́ kɔ wɛ̀.» 30Ɛ́ Yiezu ɛ́ zɔn bie lɛ́ à ǹ nɛ làa: «Nin bie hɔ lɛ́ kɔ ǹ àá bɔ̀bín nɛ hɔpe zoòni sṹnúhṹn lɛ, á kɔ̀ɓíɛ ɛ́ yá ɓén wírí yìehɛ̃̀ ɲu, hɔ́rɔsí ɛ̀ kɔ̀ pɛ̃́ yìehɛ̃̀ tĩ nɛ kɔ́ yí dũ mi wɛ̀.» 31Ɛ́ Piɛre ɛ́ bĩniɛ zɔn bie sĩiniɛ ɛ́ nɛ làa: «Hɛ̀rí kɛ́ ń yɛ̀rɛ́ fɔ́ɓán ɛ̀ ǹ hí àá kɔ, ɛ́ ń yá pĩ́ ɛ́ bie nɛ ń yí dũ kɔ wɛ̀.» Ɛ́ ɓɛ́ kɛ̀ránzɛ̀ɓɛ̀ sí kɛ́ ɓɛ́kùi ɛ́ ɓiɛ̀ khie bie kɛ̀amu.
Yiezu ɛ́ Dɔfĩn ɛ̀ hɛ̃nnin Zɛtisemanɛ hũn
Mat 26.36-46; Lik 22.39-46
32Ɛ́ ɓɛ́ khie cɔ́ van viì dɔ̀ lɛ ɛ́ ɓɛ́ wóò ve nɛ Zɛtisemanɛ; ɛ́ Yiezu ɛ́ khie bie lɛ́ mí kɛ̀ránzɛ̀ɓɛ̀ ǹ nɛ làa: «Mì síɛ kansí hũ̀nún kɛ́ ńpe ɛ́ van ɛ́ Dɔfĩn ɛ̀ hɛ̃nnin.» 33À khie fɔ́ Piɛre àá Zaake àá Zãn ɛ́ bɔ̀ɓán àá mí. Piè tĩì ɛ́ hṹn yòó yáa, ɛ̀ hɔ̀ hũn-yenkɛà ɛ́ lò hṹn yòó ɛ́ ɔ̀ ɓaà. 34Á zɔn bie lɛ́ ɓà ǹ nɛ làa: «Niǹ tĩì ɛ́ hɛ̀ yáa cɛ̃̀un, niǹ húmú ɛ́ wo dɛ̃un. Ɛ́ mí dìń hũ̀nún ɛ̀ mì piɛní mí yìe.» 35À khie khɛ̃̀nɛ van fĩ́i à kùerɛ síɛ lè sṹsùnù lɔ̀n ɛ́ síɛ ɛ́ Dɔfĩn ɛ̀ hɛ̃nnin nɛ kɛ́ hɔ́ hṹn dɛ̀ ɛ́ wé yínin, ɛ̀ lèpe lɔ̀nbiè pɛ̃̀hṹ sɔ lɛ ɛ́ mí bí vɛ zɔ hũn wɛ̀. 36À ɛ́ bie ɛ́ nɛ làa: «Abba, Yàá, kɔ́ dɛ̀ bòo míkùi ɛ́ wóò wé; ɛ́ lépe lɔ̀nbiè ɲuǹlán dìɛ lɛ ɛ́ kɔ́ khɛ̃̀ún viɛní ɛ̀ kɔ̀ kɛ́ mi. Kɛ́ hɔ́ míkùi hũn, ɛ́ ńpe niǹ tĩì bòo ɛ̀ bí wé, kɛ́ kɔ́pe kɔ̀ hɔ́n ɛ̀ temu wé.» 37À khie khũ̀a ɓɛrɛ ɓɛ̀ kɛ̀ránzɛ̀ɓɛ̀ nìɛ ɓɛ̀ tĩ viì, ɛ́ ɓen yú ɓɛ́ kɛ́ ɓɛ́ dũmua ɛ́ vũà. Á zɔn bie lɛ́ Piɛre ǹ ɛ́ nɛ làa: «Simɔn, kɔ́ dũmua? Kɔ́ yí dàń kɔ́ yìe ɛ́ yí piɛní lépe pɛ̃̀-cíi sɔ lɛ hũn? 38Mì piɛní mí yìe ɛ̀ mì hɛ̃un Dɔfĩn bòo lɛ ɛ́ wé kɛ́ Sitũanɛ ɛ́ ɓen mii hàaní miɛ, à bí yí miɛ ǹ wɛ̀. À nìnbírɔ mɛkɛ̃nì ɛ́ pe wo wɛ ɛ́ mii wé hɔ́ bɔ̀tente, kɛ́ piè tɛkɛ̀a ɛ́ temu pànkɛ́ mí wɛ̀.» 39À sĩ̀n khie khɛ̃̀nɛ cɔ́ ɛ́ van hɛ̃nnɛ Dɔfĩn, ɛ́ bie hɔ̀pe bɔ̀cóoní sɔ. 40À sĩ̀n khie khũ̀a ɓɛrɛ ɛ́ ɓɛrɛ yú ɓɛ́ kɛ́ ɓɛ́ dũmua iè hɔ̀ lɛ ɛ́ hɔ́ dɛmu ɛ́ hɛ̀ hṹn pɔ ɓɛ. Ɛ́ bòo lɛ ɛ́ ɓɛ́ ɛ̀ bie lɛ́ à ǹ ɛ́ ɓɛ́ hɛ̀ yí dũ wɛ̀. 41Ɛ́ hɔ́ lɛ á van khũ̀a ɓɛrɛ kɛ̀a yìehɛ̃̀tĩlán, á zɔn bie lɛ́ ɓà ǹ ɛ́ nɛ làa: «Mí pɛ́wi dũmua ɛ́ vũùní? Hɔ̀ hɛ̀ wo ɓaa kɛ̀amu! Lè pɛ̃̀hṹ ɛ́ wo dɛ̃un, á nìnbírɔ Zuú ɛ́ ɓɛ́ dɔ́ ɓɛ́ bɔ̀konwériè núnú hũn. 42Mì síɛ hĩ́ní nɛ ke lan! Àlɛ ɛ́ mii dé mi peɓɛ̀ núnú hũn ɛ́ ɓɛrɛ dɛ̃un!»
Yiezu ɓaàrɔ́ bòo
Mat 26.47-56; Lik 22.47-53; Zãn 18.3-12
43Ɛ́ Yiezu ɛ́ ɲɛùn yí bie vé wɛ̀, à Zudaasi lɛ iè piè kɛ̀ránzɛ̀ɓɛ̀ pírú àá nìɛ ɓɛ̀ ɲu dɔ̀ ɛ́ ɓen dɛ̃un, kɛ́ á bɔ̀ɓán àá ɓɛ́ nìzã̀amáa lɛ dàa hɔ̀ khɛ̃́n-tɔ́hĩ́ àá hɔ́ lànlɛ̀a, lɛ ɛ́ ɓɛ́ Dɔfĩn khɛ̃́ndàariè hándíe, àá ɔ́ Moyiize làndɛ́ kɛ̀ránliè àá ɓɛ́ nìkĩ́ɛ ɛ́ te tɔrɛ. 44Àpe Zudaasi lɛ ɛ́ ti-e Yiezu mii dé ɓɛ́ nìzã̀amáa núnú hũn ɛ́ den sɛ̃̀nɛ́hã̀ bie lɛ́ ɓà ǹ nɛ a nìnbírɔ lɛ ɛ́ mí ɛ́ mii vɛ fɔ̀nfɔ̀ní kekere ɛ́ iè ɔ̀pe, ɛ̀ ɓɛ̀ wo ɓaà ɔ̀ ɛ̀ ɓɛ́ɓɛ́ nin ɛ̀ dàá lan. 45Ɛ́ bòo lɛ á Zudaasi ɛ́ van dɛ̃un lòo à van lúwiniɛ Yiezu ǹ à zɔn nɛ: «Kɛ̀ránlɔ!» À zɔn siè ɔ̀ mí bàanì hũn. 46Ɛ́ ɓɛ́ nìnbirìe lɛ bɔ̀ɓán àá ɔ́ ɛ́ wo khie koo Yiezu lɔ̀n ɛ́ ɓaa. 47Ɛ́ ɓɛ́lɛ ɛ́ hṹn wi yán ádɔ̀ ɛ́ zɔn vua mí khɛ̃́n-tɔ́nú à yòó cɛ̃́nɛ à khɛ̃́ndàarɔ wì-bɛhɔ́ tɔntɛ́ ǹ, ɛ́ ɓúo piè ɲɛkɛ̃hṹ ɛ́ khie siɛniɛ. 48Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Mí dàa hɔ khɛ̃́n-tɔ́hĩ́ àá hɔ́ lànlɛ̀a ɛ́ dàa mii ɓen ɓaà mi kɛ̀a bòo ɛ́ ń iè kɛ̃̀míbíɛ! 49Sítĩnlɔ́ míkùi hũn, ɛ̀ ǹ hṹn wi mi tĩihṹ, ɛ́ wóò kɛ̀rán ɓɛ́ nìnbirìe àá Dɔfĩn bienù lè Dɔfĩn zũ-bɛhɔ́ hũn, ɛ́ mí yí ɓaà mi wɛ̀. Kɛ́ hɔ́ wɔ́ kɛ̀amu, ɛ̀ hɔ̀ bòo lɛ ɛ́ Dɔfĩn ɛ́ khɛ́ mí bienù vɛ̃hṹ hũn ɛ̀ dàá ɲunu tí.» 50Ɛ́ pie kɛ̀ránzɛ̀ɓɛ̀ ɓɛ́kùi ɛ́ wo hṹn zɔ̀ ɛ̀ ɓɛ̀ kɛ́ á. 51Ɛ́ zufɛ̀-cíì dɔ̀ ɛ́ hṹn bɔ̀ Yiezu máahṹ, kɛ́ á wɔ́ pɔnkɔ̀-núnú dɔ̀ mí dòonún á híɛ. Ɛ́ ɓɛ́ khie ɛ́ ɓɛ ɛ̀ ɓaà ɔ̀. 52Á fùɛrɛ̀sí lépe mí pɔnkɔ̀-núnú ǹ á zɔ̀ cɔ́ àá mí tɛkɛ-khíemáà.
Zuifuɓɛ hándíe ɛ́ Yiezu lìe ɛ̀ lè
Mat 26.57-68; Lik 22.54-55; 22.63-71; Zãn 18.13-14; 18.19-24
53Ɛ́ ɓɛ́ dàa Yiezu ɛ́ dàa van ɔ̀ Dɔfĩn khɛ̃́ndàarɔ wì-bɛhɔ́ yíe. Hɔ́rɔsí ɛ̀ ɓɛ̀ khɛ̃́ndàariè hándíe àá ɓɛ́ nìkĩ́ɛ àá ɔ́ Moyiize làndɛ́ kɛ̀ránliè ɛ́ hṹn van koo ɓánlɔ̀n yán. 54Ɛ́ Piɛre ɛ́ bɔ̀ Yiezu máahṹ kɛ́ á viì ɛ́ van ni fúu ɛ́ van zɔn ɔ̀ khɛ̃́ndàarɔ wì-bɛhɔ́ dànkɔ̀, ɛ́ van zɔn kɛsí ɛ́ hɔ̀ dṹn ɛ̀ wɛni àá ɓɛ́ zũhìeriè. 55Ɛ́ ɓɛ́ khɛ̃́ndàariè hándíe àá ɓɛ́pe Zuifuɓɛ lìe lèriè lɛ kɛ́ ɓɛ́kùi ɛ́ hɔ̀ bòo lɛ ɛ́ ɓɛ ɛ̀ wé ɛ̀ dàá ɓé Yiezu ɛ̀ cɛ̀, kɛ́ ɓɛ́ den yá hɔ̀ yí wɛ̀. 56Ɛ́ nìnbirìe bìkuì ɛ́ den ɛ́ Yiezu ɲunù ɛ̀ ɓúukɛ, kɛ́ ɓɛ́ lò den yá ɲí ɓán pehɔ̀ lɔ̀n wɛ̀. 57Ɛ́ ɓɛ́dɔ̀ ɛ́ síɛ hĩ́nà dɛ̃̀ ɛ̀ ɓɛ̀ ɛ́ piè ɲunù ɛ̀ ɓúukɛ́ ɛ́ nɛ làa: 58«Ké ɲɛ́ kɛ́ á bie nɛ mí ɓén wua lepe Dɔfĩn zũnù lɛ ɛ́ ɓɛ́ nìnbirìe ɛ́ tɔn, kɛ́ sítĩnlɔ́ bɔ̀nbɔ̀ tĩ hũn ɛ̀ mì ɛ́ khíi te dɛ̀ɓuɛ̀ lɛ ɛ́ nìnbirìe níhĩ́ ɛ́ yí ten yí te wɛ̀.» 59Hɛ̀rí hɔ̀pe sí lɔ̀n kɛ́ peɓɛ̀ ɲunù den pɛ́wi yí dìcóoní wɛ̀. 60Ɛ́ Dɔfĩn khɛ̃́ndàarɔ wì-bɛhɔ́ ɛ́ síɛ hĩ́nà ɓɛ̀pe lɛ koo ɓánlɔ̀n tĩ́ihṹ ɛ́ Yiezu dìenin nɛ làa: «Kɔ́ hĩɛ ɛ́ yá bòo bie? Hɔ̀ iè ńɓùo ɛ́ ɓɛ́pe nìɛ sɔ lɛ ɛ́ bie nɛ kɔ́ wɔ́?» 61Ɛ́ Yiezu ɛ́ dú mí ɲunù à kɛ́ á. Á khɛ̃́ndàarɔ wì-bɛhɔ́ sɔ ɛ́ sĩ̀n zɔn ɔ̀ dìenin nɛ làa: «Ɛ́ kɔ́ iè wiè iè ɔ̀pe Kirisa, hɔ̀pe Dɔfĩn lɛ ɛ́ ké ɛ́ ɓàanínin Zuú?» 62Ɛ́ Yiezu ɛ́ zɔn kɔ̃́niɛ ɔ̀ ɛ́ nɛ làa: «Ũun, nín ɔ̀pe. Ɛ́ mí ɓén mi-ɛ nìnbírɔ Zuú kɛ́ á kɛsí hɔ́ Dɔfĩn pànkɛ́ ɓàasɔ ńdóonín, ɛ̀ mì lò ɓén mi-ɛ kɛ́ á ɛ́ ɓen hɔ̀ hóohũn dùndùó lɔ̀n.» 63Ápe khɛ̃́ndàarɔ wì-bɛhɔ́ ɛ́ yòó khã̀a mí pɔnkɔ̀rɔ́ à zɔn bie nɛ làa: «Ké bìe sũǹ bĩniɛ mɛ̀kóo wi ɛ̀ kè ɲí nìnbírɔ dɔ̀ bòo lɛ á mii bie? 64Mí wo ɲɛ́ kɛ́ á Dɔfĩn tòokɛ lò! Ɛ́ mí nɛ wɛrɛ̀?» Ɛ́ ɓɛ́pe ɓɛ́kùi ɛ́ nɛ a fɔ́ɓán àá húmú. 65Ɛ́ ɓɛ́dɔ̀ ɛ́ zĩ̀níkɛa ɛ́ khie ɛ́ khàaníkɛ ɛ̀ kóo piè lɔ̀n, ɛ̀ ɓɛ̀ yóò ɓún piè híɛhɔ́ ǹ ɛ̀ ɓɛ̀ kunkɛ ɓɛ́ níhĩ́ ɛ̀ ɓɛ̀ zɔ lí-è ǹ, ɛ̀ ɓɛ̀ den bie lɛ́ à ǹ nɛ a dũnkɛ a lɛ ɛ́ ti-e ɛ́ lúnin. Ɛ́ ɓɛ́ zũhìeriè ɛ́ khie fɔ́ á ɛ́ khie van ɛ́ kikiè ɛ̀ láakɛ.
Piɛre ɛ́ pɛ̃́ ɛ́ nɛ mí yí dũ Yiezu wɛ̀
Mat 26.69-75; Lik 22.56-62; Zãn 18.15-18; 18.25-27
66Hɔ̀pe sí ɛ́ wé, kɛ́ Piɛre ɛ́ hṹn van síɛ wi le dànkɔ̀ fìi hũn. Á khɛ̃́ndàarɔ wì-bɛhɔ́ tɔntɛ́ hṹnu dɔ̀ ɛ́ van ɓɛrɛ. 67Á mɔn Piɛre kɛ́ á hɔ̀ dṹn ɛ̀ wɛni, á húie ɔ̀ à zɔn bie lɛ́ à ǹ nɛ làa: «Kɔ̀pe lò ɓiɛ̀ hṹn wi àá ɔ̀pe Nazarɛɛte Yiezu.» 68Ɛ́ Piɛre zɔn pɛ̃́ à nɛ làa: «Ǹpe yí dũ dɛ́, kɔ̀ bòo sí ɛ́ kɔ́ ɛ́ bie ɛ́ ń yí dũ ɲún wɛ̀.» À zɔn lɔ́ lé dànkɔ̀ hũn ɛ́ van lɔ́ dɛ̃̀ àá zĩínù. [Ɛ́ kɔ̀bíɛ dɔ̀ ɛ́ zɔn wũamɛa.] 69Á tɔntɛ́ hṹnu sɔ ɛ́ mɔn ɔ̀ á sĩ̀n zɔn bie àá ɓɛ́lɛ dɛ̃̀ ɛ́ nɛ làa: «Àpe nùún sɔ lɛ bòo ɛ́ sɛ̃̀ ɓɛ́pe nìɛ sɔ ǹ.» 70Ɛ́ Piɛre sĩ̀n zɔn pɛ̃́. Ɛ́ pehɔ̀ ńfĩí, ɛ̀ ɓɛ̀lɛ ɛ́ dɛ̃̀ yán ɛ́ ɓiɛ̀ zɔn ɛ́ bie àá ɔ́ nɛ làa: «Kɔ̀pe ɛ́ pe wo bòo ɛ́ sɛ̃̀ ɓɛ́pe nìɛ sɔ ǹ àá bɔ̀bín iè hɔ̀ lɛ ɛ́ kɔ́ ie Kalile nùún.» 71Ɛ́ Piɛre ɛ́ zɔn bénkɛ kɛ́ à wĩ́ikɛ ɛ́ nɛ làa: «Àpe nùún lɛ ɛ́ mí bòo bie ɛ́ ńpe hɛ̀ yí dũ wɛ̀.» 72Ɛ́ pehɔ̀ lɔ̀n, á kɔ̀bíɛ ɛ́ zɔn wũamɛa kɛ̀a yìehɛ̃̀ ɲu; ɛ́ Piɛre ɛ́ den síɛ lieniɛ Yiezu bienù lɛ á hṹn khɛ́ lɛ́ à ǹ nɛ a kɔ̀bíɛ yá ɓén wírí yìehɛ̃̀ ɲu hɔ́rɔsí à pɛ̃́ yìehɛ̃̀ tĩ nɛ mí yí dũ mí wɛ̀. Á wo khie ɛ́ wírí.
اکنون انتخاب شده:
Marike 14: bwj
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 L’Association Nationale pour la Traduction de la Bible et l’Alphabétisation