Mberaand 6
6
Njofaƭar ne no kiin
1Ye wiin we a siwiidaa took lanq ke, boo a ndimaa xa ƥiy xa tew,#Yob 1:6; 2:1 2xa ƥiy xa koor axe Roog a nga’a yee xa ƥiy xa tew axe no wiin we a mosa lool, a ndalfooxa o njil na xa ƥiy xa tew axeene rew, a ngilig a den. 3Maaga, o Yaal oxe a laya yee: «Yiif es genkee no xoxtaa o kiin kujumaani cay, yaam o kiin njer rek a refu. Ndiiki hapanaanum xa kiid teemeed fo xa kiid qarɓeen ƭik.» 4Na jamaane faaga, wiin fodu ne sabab a ndeeƭa took lanq ke. Ye xa ƥiy xa koor axe Roog#6:4 xa ƥiy xa koor axe Roog Leng-leng kaa nqalaataa yee weene malaaka kaa mbedi’na a ndeeƭu, njeg’ina nen rew xa caaƈ xa tew. Jegee a cangin alaa farna no keene kam Biibal fee. Lakas we a nqalaataa yee xa ƥiy axe Roog kaa ndeeƭu gimu waa rew den a ndefna xa ƥiy xa tew no wiin we ngimeerna. O kimu xe waree dolnir fo o kimeer ne Biibal fee a jangnituuna. 1Kor 7:39; 2Kor 6:14-16. a ngiligna xa ƥiy xa tew axe no wiin we boo a ndim fa den xa ƥiy, weene ndeeƭu a salma-koor ake yaa fa yaaga.#Lim 13:33
5O Yaal oxe a ga’a yee coxod ne no wiin we a magna lool took lanq ke, too ñaal nuu refna a qalaat den paaxeer rek a yuuɓaa na qeeñ den.#Mace 24:37; Lik 17:26; 1Piy 3:20 6O Yaal oxe a ricooxa ke taxna ta fi o kiin took lanq ke, soo xeeñ um a gooy. 7O Yaal oxe a laya yee: «Xam moocand took lanq ke o kiin oxe sakuuma, ke xotitna no wiin we boo no cegel ke fo ƥood ke fo tiiƭ ke na asamaan, yaam ricooxaam tigi ke taxna um fi a den!» 8Kaa koy, Nowe a daawa yirmande fee no Yaal oxe.
Roog a hebooxa o wuus a Nowe
9Keeke refu a kon ake na xa taan axe Nowe. Nowe kaa reeƭu o kiin o cofu o cegee ŋañel na jamaane um, too a ñaaƴooga fa Roog.#2Piy 2:5 10Nowe a rima xa ƥiy xa tadaq, da ndef: Seem fa Xaam fa Yafet.
11Wiin we kaa laawoox’u mbaambir Roog, lanq ke a may fo a pi a yednu. 12Roog a ga’a yee wiin we kaa yaqoox, a laawoox, o kiin oo kiin#6:12 o kiin oo kiin na hebre kaa bindel «njer nuu refna». a xot a ƭat a paaxeer um took lanq ke. 13Maaga, Roog a laya a Nowe yee: «Kaam heboox o moocand fop ke na ñoowaa#6:13 fop ke na ñoowaa na hebre kaa bindel ee: «njer nuu refna».. Lanq ke kaa may fo ngiin fo’oy yaam den. Xam moocand a den boog fo lanq ke. 14Daaƴoodi a kaal#6:14 a kaal ale kaa ref itam o anddiloor olaa na yegnitaa a kar ale Kiristaa, ndax ta sing xeet fee ten na hate fee. Ɗeeti Heb 11:7; 1Piy 3:20-22. fo a patax gofeer. Fat o fi’anin fo ndok fo ndok, laarin kam oo tafil oo, boo foofi waagkee rok teen. 15O cigdel ole na kaal ale xan a ref xa noonoong teemeed tadik, o yaajel ole a ref xa noonoong qarɓeen ƥetik, soo geel um a ref xa noonoong qarɓeen tadik. 16Fat o bombin, xaƴanin o wooƥ olaa fi’na o noonoong ndeer bomb le fo a kiig ale na xa saax axe. Fat o fi’anin o don-maax olaa garitna no saax o leng. Fat o fi’anin taax-took ƭikandeer fo ndadkandeer. 17Mi o mat, xam ɓisiid o jaɓ o maak ole took lanq ke ndax um saŋik fop ke jegna njer too a ñoowaa ɗuga asamaan fee. Fop ke refna took lanq ke xan a mooc. 18Kaa koy, xam dalin fa wo ngiɓoor. Fat o rok na kaal ale, wo fo xa ƥeef fo o teef fo rew den. 19Fat o rokin kam a kaal ale itam muumeen ƭik no xos oluu na ñoowaa, ngoor fo ndew, ndax da muc fa wo. 20Ngoor fo ndew no xos oluu refna: Tiiƭ ke, muumeen ke fo ƥood ke no lanq ke, xan a ngar me wo, ndax o mucil a den. 21Wo o mat, waaƭi no fop ke waageena o ñaam, yaxandooxeen paam of ndax keene a ref ñaamel of, wo fa den.» 22Nowe a fi’ta fop ne Roog a heblit’uuna o ten.#Heb 11:7
انتخاب شده:
Mberaand 6: SRR23
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Copyright © 2015-2023 by Eglise luthérienne du Sénégal