Saŋ 5
5
Yeesu a wodanda o ƥoof
1Cinj kaaga, Yaawuur waa a ndoofandooga xew kam Yeerusaleem, too Yeesu a reta maaga ten itam. 2Na teeru faa Yeerusaleem koy, a jeg’a ndokand naa ne’eena Ndokand ne no paal ke. Paam ndokand naaga, a jeg’a o ul o maxe. Yaawuur we kaa nqoyoogun Betesda, too a jeg’a a qul a ƥetak akaa ndeeruuna, a ƭiiftel kaa fi’na nen jibir faa geenniteena a toodook. 3A jeg’a wiin jiru mayu waa mbondooxna ɗuga jibir faaga: Fuuliin, xaruyiin, ɓoofiin. [Oxuu refna na den kaa cungoogu yaa foofi le a yo’nooxkaa, 4yaam kaa jeg’u malaaka faa fudooxiidoogna kam o ul ole leek-leek. Kaa garoogu a jumband foofi le, too oxuu eet’ina o naag teen coloƥ yaa foofi le a jumbandeena a wodooga boo ceŋ, kuu jir um a waag’ina waag o ref.] 5A jeg’a maaga o koor oxaa jir um a jeg’ina fo ten xa kiid qarɓeen tadik fo xa kiid ɓetaa tadaq. 6Yaa Yeesu a ga’na ta wondoox, a anda yee a miña o jir, too a layaan ee:
«Ndax bugaa o wod?»
7O baad oxaa a doonaan ee:
«O Yaal oxe, jegiim o leng oxaa ɓekaxama kam o ul ole yaa foofi le a yo’neena, too um naagangaa beret boo um helko fo fi’aa tus, o lakas ee coloƥ a adooxaam.»
8Yeesu a layaan ee:
«Inooxi jang o sar of, too ñaaƴ.»
9Ndak fo ndak, o koor oxaa a woda. A dalfooxa o kaf o sar um, a ref na ñaaƈ.
Kaaga xaa xew’a na bes fee na ñootnax ale. 10Yaa Yaawuur waa a nga’na oxe wodand’eena, a layaan ee:
«Xaye bes fee na ñootnax ale oo. Kebil ke ci’irang o roxondoox o sar of jayang-jayangnaa fo ten.»#Neh 13:19; Yer 17:21
11A doona a den ee:
«Oxe wodandaxama kaa layaam ee: ‹Jangi o sar of, too ñaaƴ!› »
12A laamtaan ee:
«An layong ee jangi o sar of ñaaƴ ee?»
13Kaa koy, oxe wodand’eena and’ee oxe ta refna, yaam Yeesu kaa naag’u mes a ndeer no wiin mayu waa ndeeƭna maaga.
14Taa mbaaambir naa, Yeesu a soƥaan kam Mbind Roog naa soo a layin ee:
«Refee wodandee? Ba o bakaadat koy yaam ndik kaa moƴna faaxaƭar a dalong!»
15O koor oxaa a reta a lay Yaawuur waa yee Yeesu wodand’un. 16Ten tax’u Yaawuur we a ndaabaa a Yeesu, yaam ne ta fi’oogna keene na bes fee na ñootnax ale. 17Yeesu a laya a den ee:
«Faap es kaa gen no jalaa, too mi itam mexey no calel.»
18Yaawuur we a moƴa o say koy, a mbaaƭaa maa da mbartuuna, yaam laafee bes fee na ñootnax ale soom a day teen, ndax a doon a lay ee Roog refu Faap um, a fodandooraa a Roog.
Sañ-sañ no Ƥiy onqe Roog
19Yeesu a ɓaata o lay a den ee:
«No ndigil, no ndigil, mexe layaa a nuun ee: O Ƥeenqe waagoodee dara. Ke ta fi’aa fop, kaa ga Faap um a fi’an. Kuu Faap fee a fi’aa, o Ƥeenqe kaa fi’an itam. 20Faap fee kaa fex o Ƥeenqe boo a lalan ke ta fi’aa fop, too xan a lalin a pi akaa ngupna wene, ndax nu ndam xa ton. 21Ne Faap fee a xontooxnoortaa, a ñoowdandaa, neene o Ƥeenqe a cooxtitaa o ñoow oxuu feluuna. 22Faap fee naagee o hate’aa, yaam nqeloor nuu refna, na xa ƥay no Ƥeenqe a doonun, 23ndax fop a niwit o Ƥeenqe ne da niwitna a Faap fee. Oxe niweerna o Ƥeenqe, niwee a Faap fee luliiduuna.
24No ndigil, no ndigil, mexe layaa a nuun ee: Oxuu nan-gilooxna fa lay es, a gim no xe luliidaxama, a jega o ñoow o fagkeer ole, too geenooxkee no nqeloor naa muk, yaam kaa inoor na fa nqon a rok no ñoow. 25No ndigil, no ndigil, mexe layaa a nuun ee: Waxtu fee xe mbaambir, too a fadiida sax. Waxtu feene refu waxtu fee xon we a nankaa o ñuxur no Ƥeenqe Roog, too we na nankan xan a ñoow. 26Yaam ne Faap fee fa xoox um a ñoownitaa, a ci’tu o Ƥeenqe itam ta ñoownaa. 27A ci’aan itam sañ-sañ faa ta hate’taa, yaam ten refu o Ƥeenqe no kiin oxe. 28Baa keene a jaaxɗand a nuun, yaam waxtu fee xan a gar, faa we ndefna kam poy ke fop a nankaa o ñuxur um 29soo a sutoox. We mbi’na paax xan a nqontoox, a ndok no ñoow, we mbi’na paaxeer a nqontoox, a ndet no nqeloor.»#Dañ 12:2
Ke Yeesu a seede’aneena
30«A yoqtangee dara ndax na mi soom, waagiim o fi dara. Ne um nantaa um hate’taa, too kate ne mi kaa jof bo, yaam naagiim o waaƭaa ke buguuma, ndaa ke oxe lulaxama a bugna. 31A soƥangaa yee mi na seede’anaa a xoox es, ke um layaa a waaga o ñak o jaɓel nen seede fa saƭku. 32Kaa koy, a jega o lakas oxaa na seede’anaxam, too andaam xil ee seede um ndigil kak oo. 33Refee nu lulit’a maa Saŋ boo ta lay a nuun a qool qac ke ta andna no ndigil ne?#1:19-27; 3:27-30 34Refee koy ee um war o geƈnoox no seede no kiin. O nanangaa um lay a nuun keene, kaam bug soom nu muc. 35Saŋ reeƭu o jam ole na kaƥaa, a meleƈaa, too nu mbug’a o moof o ndik sax, mbelakinoox yoora kaƥ ne ten. 36Seede es koy hupu ne Saŋ, yaam a pi ake Faap fee a doxnaxama ndax um fi a den, ndefna ndef ke um fi’aa ndiiki, kaa laltaa yee Faap fee lulaxam. 37Faap fee lulaxama fo o mem um koy sax a seede’anaxam. Nu mosee o nan o ñuxur um, nga a tagid um ne’aand,#Mace 3:17; Mark 1:11; Lik 3:22 38too fa lay um genee na nuun, yaam nu ngimee no xe ta luliidna. 39Kaa nu ƥaalaa a Pind a Tedu ke, yaam mboog ee na den nu mbaagu o njegit o ñoow o fagkeer. Den na seede’anaxam toox de! 40Ii, keene koy, too nu mbugee o ngar na mi, ndax nu njeg o ñoow!
41O ndam es, naaginum o suqtitaa no wiin we. 42Andaam a nuun a paax: Nu mbexee a Roog na qeeñ nuun. 43Kaam gar no gon Faap es, soo nu nquruloox. O lakas a garangaa no gon xoox um koy, nu mbarakooxin. 44Kaa koy, nam nu mbaagu o ngimit sax, nuun we na ƈufanaa o ndam o ngatu no wiin we, mbañ o naaɓ o ndam o ngatu na Roog? 45Ba nu mboog ee xam jamb a nuun mbaambir Faap fee. Ke na jambaa a nuun refu kebil ke Moyiis, den we ndefna yaakaar nuun. 46Nu ngim’angaa ke Moyiis a bindna, nu ngimkooga ke layuuma itam, yaam a binda kaa jofna na mi. 47Nu ngimangee ke ta bindna, nam nu mbaagu mbaag o ngimit ke um layaa?»
انتخاب شده:
Saŋ 5: SRR23
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Copyright © 2015-2023 by Eglise luthérienne du Sénégal