Mateo 16
16
E bari ezgoda Devlikani katar o porauko Jonas
(Mk 7.1-23)
1Avile kai o Jesus e fariseura ta i e saduseura te zumaven le, ta mangle letar te cherel iek bari ezgoda Devlikani ta gia te sikavel kai vou avela bichaldo e Devletar.#Mt 12.38; Lk 11.16.
2A o Jesus ppenda lenge: “Kana perel e riat, tumen ppenen: ‘Ttiara ka cherel iek sukar llive, soke o miloso si lolo’; 3ta ttiarinako rano tumen ppenen: ‘Allive ka del peke, soke o miloso si lolo ta si oblakura.’ Kojamnalen, soke tumen llanen prema o miloso sar ka avel o llive a ni llanen te acharen e bare ezgode Devlikane kai nakken ande gava vreme. 4E llene bilache ta kurvaria mangen te dikken iek bari ezgoda Devlikani, a so ka delpe lenge te dikken si so avilape e Jonasea.
Ta o Jesus mukla len ta llelotar.
E levadura katar e fariseura
(Mk 8.14-21)
5E disipulura avile pe o goia rig katar e mora e Galileaki, ta bristraile te inllaren marrno. 6Ondaka o Jesus ppenda lenge:
—Arakken tumen katar e levadura e fariseonengi ta i katar e saduseura.
7A e disipulura ttode te janpe maskar pete, ta ppenena:
—¡O Jesus ppenel gua soke amen ni andam marrno! 8O Jesus acharda ta ppenda lenge:
—¿Soke ppenen kai inai tumen marrno, gia cherricha pachape si tumen? 9¿Llik akana ni acharen? ¿ni den tumen golli katar e panch marrne maskar e panch milie llene, ta pe gachin kotariche chidien?#Mt 14.17-21. 10¿Ta katar e efta marrne kai fuladen maskar e star milie llene, ta pe gachin kotariche chidien?#Mt 15.34-38. 11¿Sar ni acharen kai me ni diem tumenge orba katar o marrno kana ppendem te arakken tumen katar e levadura e fariseonengi ta i e saduseonengi?
12Ondaka acharde kai ni ppendaia lenge te arakkenpe katar e levadura e marneki, ta acharde kai ppenela lenge te arakkenpe katar so sikavena e fariseura ta i e saduseura.
O Pedro ppenel kai o Jesus si o Kristo
(Mk 8.27-30; Lk 9.18-21)
13Kana o Jesus avilo ande ppuv katar e Sesarea katar o Filipo, puchla pe disipulonen ta ppenda lenge:
—¿Ko ppenen e llene kai o Chavo e manuseko?
14Von ppende leke:
—Nesave llene ppenen kai tu san o Juan kai kristil; aver llene ppenen kai san o Elias,#Mal 4.5-6. ta i aver ppenen kai san o Jeremias o varesavo aver porauko.
15Ondaka o Jesus puchla len:
—A tumen, ¿Ko ppenen kai sem me?
16O Simon Pedro ppenda leke:
—Tu san o Mesias, o Chavo katar o Del o llundo.#Jn 6.68-69.
17Ondaka o Jesus ppenda leke:
—Blagosime san Simon, chavo e Jonaseko soke goia orba ni sikadala chuke ni iek manus, samo mo Dad kai si ando miloso. 18Ta me ppenau chuke kai tu san o Pedro, ta pe gava barr ka cherau mi kkanlliri, ta e udara katar o meripe ni ka dobin la. 19Ta tut ka dau e kluchura katar e charoina e milosoki: Sa so ppandea pe ppuv, ka avel ppanglo ando miloso, ta sa so putarea pe ppuv, ka avel putardo ando miloso.#Mt 18.18; cf. Jn 20.23.
20Ondaka o Jesus ppenda pe disipulonenge te na ppenen nikake kai vou saia o Mesias.
O Jesus ppenel kai ka merel
(Mk 8.31—9.1; Lk 9.22-27)
21Kotar angle o Jesus ttoda te ppenel pe disipulonenge kai trubula te llal ando Jerusalem ta te jal bari patnia ande va e ppurege, ta i katar e gazda e poponenge ta i katar e kovacha e zakonoke, ta te merel, ta te ustel katar o meripe pala e trin llive.#Mt 17.22-23; 20.17-19. 22Ondaka o Pedro inllarda e Jesuse pe iek rig ta ttoda te del pe lete ta ppenela leke gia:
—Gazda, te avel chuke zao tu tutar, ¡Te na avelpe gava nikada chuke!
23A o Jesus boldinailo ta ppenda e Pedroke:
—¡Le tut mandar, Satanas soke tu mange te chere man te perau! Tu ni dikke e ezgode sargo o Del, tu dikke len sargo manus.
24Ondaka o Jesus ppenda pe disipulonenge:
—Te avela vareko pala ma, morabi te bristraol vou petar, te lel po krusto#Mt 10.38; Lk 14.27. ta te llal pala ma, 25soke kogo mangela te braduil po zivoto, ka jasarel le; ta kogo jasarela po zivoto pala ma, ka malavel le. 26¿So blazil e manuseke te dobil sogo si po sueto, ta te jasarel po zivoto? ¿O pe gachin sai pochinel o manus pala po zivoto? 27Soke o Chavo e manuseko ka avel ande pe Dadeko baripe ta pe suechonenchar;#Mt 25.31. ondaka ka pochinel suakone lleneke prema so cherda pe gaia ppuv.#Jer 17.10; Ez 18.30; Rm 2.6. 28Chachimaia ppenau tumenge kai nesave llene kai si kate ni ka meren lligo ni ka dikken sar avel o Chavo e manuseko ande pi charoina.
اکنون انتخاب شده:
Mateo 16: ROM07
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuevo Testamento en Romané © Sociedad Bíblica Chilena, 2007.