1 Mose 23
23
Abalahami wusumbila Sala biziami
1Sala wuzinga khama mosi makumole tsambudi di mimvu, miomio mimvu mizinga Sala. 2Sala wufua mu tsi Kanana, ku Kiliati-Alaba, dibangudulu Hebeloni. Abalahami wusadisa matanga ayi wudila nketo andi. 3Buna Abalahami wutelama ayi wubika mvumbi nketo andi, wuyenda mokana ayi bana babakala ba Heti ayi wubakamba: 4«Ndidi nzenza ayi nkibi, luphananu tini ki ntoto mu ntoto eno muingi ndizika nketo ami wufuidi.» 5Buna bana babakala ba Heti bavutudila Abalahami ayi bankamba: 6«Wutuwa, mfumu. Nzambi wukutula mfumu va khati ka beto, zika mvumbi yi nketo aku mu ziami kilutidi kitoko va khati ka biziami bieto. Kuisi ko mutu mu beto makayimina ziami kiandi muingi wuzikila mvumbi aku.»
7Buna Abalahami wutelama ayi wufukama vantuala basi tsi, bana ba Heti. 8Ayi wubakamba banga buabu: «Ti kedika mvumbi yi nketo wumbikidi yifueti ba yeno mu ziami, lunguila ayi lundebila Efeloni, muana Tsowali, 9muingi kandiekudila phaka matadi yi Makapela yi kavuidi, ku tsuka tsola andi. Kandiekudila yawu mu thalu yifueni mu meso meno, muingi yiba ziami kiami va khati ka beno.»
10Efeloni phe wuba wukala va khati bana ba babakala ba Heti, Efeloni muisi heti wuvutula mvutu kudi Abalahami vantuala bana ba heti, babo babakota va muelo mbanza andi, ayi wukamba: 11« Mfumu, wunguila. Disifuana ko mu tekisa tsola ayi phaka matadi yidi momo. Vantuala zikhomba ziami, kedika, ndiveni yawu. Zikila momo nketo aku.»
12Buna Abalahami wufukama vantuala basi tsi, 13ayi wukamba Efeloni va meso ma basi tsi: «Ti tidi, wunguila. Ndikuveni thalu yi tsola, kikinina yo buna mandizikila momo nitu nketo ami.» 14Efeloni wuvutudila Abalahami ayi wunkamba: 15«Mfumu ami, wunguila. Tini ki ntoto kiaki ki khama ziya zi sekeli bi palata buna mbi biobio va khati minu ayi ngeyo? Zika nketo aku.» 16Buna Abalahami wuwizana ayi Efeloni. Wuntezila thalu mbongo zikankamba mu matu ma bana ba heti, khama ziya zi sekeli bi palata, mu thalu yithekolo yi lumbu bina. 17Tsola Efeloni yiba ku Makapela va thadisi yi Mamele, tsola ayi phaka matadi, ayi minti mimio mu tsola ku ndambu ayi ndambu bisiamusua, 18biyika mvuilu yi Abalahami va meso ma basi heti, va meso ma babo babakotanga va muelo mbanza.
19Landila diodio, Abalami wuzika nketo andi Sala mu phaka matadi yi tsola Makapela va thadisi yi Mamele, dibantedilanga Hebeloni, mu tsi Kanana. 20Bana ba babakala ba Heti basiamisa mvuilu biziami ayi tsola ayi phaka matadi yiba muna kudi Abalami.
اکنون انتخاب شده:
1 Mose 23: YOM-CD
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©2024 Seed Company in coordination with Forum Communautaire des Traducteurs de la Bible et Alphabétisation