Eltibi 9
9
Ji li ka ane kpee
1Ano wo n jo tir bade nsol nyia kpee fere kohlo asi re, etinginne a nnea ngbere a nsol nyi bo kp'limi wob go abo nya Esowo, wo nnene nehme kahn joare elkoro ni nong kpi bo sik afii etehn nne.
2Ejum ajehng j'nehm ji kpo gbo tub bo ane kpee, atingane a abiane, anobonbo a asabsab, ane ba li saang a ba ki li saang, ane ba kpo lim ajom ka Esowo a ba kil jo lim ajom ka Esowo.
Ana li a nnooba nne ano wo tob li a nne abiafem;
ana li a ane ba kpo ko nwongo, ano wo tob li a ane ba kpo fahl nwongo akoko.
3A wo li ebi ejum ji li go ejum ajehng ajehng ji kp'jolo go njini, ji li re, ejum ajehng j'nehm ji kpo gbo tub ane kpee. Budu o, ab'bi ebrur go nitim ane, esahl tob wob bo go ntim ana bo li go elkpin, tete bo kpo song jol a akvne.
4Nne awohng awohng no li elkpin kpi ekunukpu, jol mbv nyi li elkpin kp'gake nob sehnge egabi ji ma kpo.
5Tibre ane ba li go elkpin kp'kahne re bo bahke kpoko,
wo akvne ejumjum bo nehme kahn,
eltuuru bo kpeem kpi, jol abing ebo ane ebyini
6Elkoro ebo, a etehnne ebo,
go eteele ala ebo ebtan fi ekidi eblab;
bo nehm ma kpe lim ejum ajehng ajehng bade nsol nyi kp'jolo go njini
7Song, wo song li nsol alehke enya a eyebatahng, wo amahm ema a eyebeltim tibre Esowo ebtaame tv ejum ji a kp'limi.
8Jo liibi a babare nsol ngare kpekpe, fvfo wo fere jo kak elna akehng go esi ngare kpekpe.
9Jo li elkpin a nkal ewa no kpo kor-a, go afung kpe kpe nya elkpin ena ni ki lohng ejumjum, ni Esowo m-a ka go njini, afung enya kpee nyao nya ki lohng ejumejum. Tibre ejum ji a, ji li ka go elkpin, fvfo go eltum ni a kp'nyennge jo lim go njini.
10Ejum ajehng ajehng ji a kake abo enya re wo lim, lim a eko eko eja kpee, tib go ejahbe akvne ji a fi no, eltum alimi go limm, jol ntoobo, jol elkahne afii ngbere limm.
11Me n tob nyehn ejum jehko go njini nyia:
Nne no kpo ware abahl abeke sang kpo be ga ane bako,
jol nne eko sang kpo ko esehnge ebta,
jol nne a ngbere sang kpo bel nsol alehke,
afii agburu afang jol ka ebangbanag nne,
afii nnoobo jol ka nne elkahne;
Kpo jol go enobesi, nne l'jol go edi ji fuumu no go ngare nyi fuumu no.
12Fvfo, nnene nehme kahn ana ngare ny'nye bahke bake:
Ana bo kpo ko arim eblum bob nsahre,
afii ana nruk kpo gbo ekpoko,
ano wo ebi ngare kpo bob ane ana ekpoko, kpo gbede na bo.
Ngbere nyi ga nob sehnge elgboolo
13Fvfo n kehm kpe tob nyehn ntugare nyehko nyi li bada ngbere go njini nyia, nyi liim na egbuuru nkpoko esi ejum.
14Mojahbe awohng jolo go, a abon amohk ane ba lene o. Owo ntul no kpi eko kehm ba yiimi ebta a bo, sennge bo kak, fere si nkpak ngbe sennge ekahme nfam kak.
15Nnenlum awohng lene o no jolo nkpak, wo á bele ngbere, fvfo a ko ngbere enye tahre nfam nyio. Jol nnene buumem nkpak a nne noo.
16Ano wo m bungu no re, <<Ngbere nyi ga nob sehnge atahne.>> Wo bo rodo ngbere nyi nkpak nyio daange, jol alum enye bo nehme kpe wuk.
17Anaange alum nya nnea ngbere nya ga fuumun re nne wuk,
sehnge elrabe ni mfiladi no agboolo ane.
18Ngbere nyi ga nob sehnge nsol ebta,
wo nne abiafem awohng kpo rannge anoobo nsol gbalee.
اکنون انتخاب شده:
Eltibi 9: EKA-011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2024 Luke Initiative for Scripture Translation