YOHANI 1
1
Ilisyu lya Bumi
1Kubwandilo aliko Isyu; umwene Isyu ali na Kyala; kangi Isyu ali yo Kyala. 2Umwene kubwandilo alinkuya na Kyala. 3Fyosa itolo fyapeleligwe mu mmyake, asobe yuyo angali kakapeligwako nakamo aka kapeligwe. 4Mmyake mo bwalimo ubumi, ubwene ubumi bula bulinkuya lumuli lwa bandu. 5Ulumuli lukumulika mungisi, loli iyene ingisi yilinkusita nukulwagania.
6 #
Mat 3.1; Mar 1.4; Luk 3.1-2 Alinkuboneka umundu uyu atumigwe na Kyala, ingamu yake ali yo Yohani. 7Umwene alisile kulusisimikisyo, ukuti alusisimikisye ulumuli lula, ko kuti bosa bitikilege muli yuyo. 8Umwene loli akali yo lumuli, loli alisile ukuti alusisimikisye ulumuli lula.
9Umwene yuyuyu yo lumuli gwa naloli, uyu ikwisa nkisu, ikummulika umundu gwesa.
10Isyu yuyuyu alimo nkisu, ikisu kyapeleligwe muli yuyo, ikyene ikisu kilinkusita nukumwagania. 11Umwene alisile mmyake, loli abene abandu bake balinkusita nukumwambilila. 12Loli bosa aba balimwambilile, aba bayitike ingamu yake, bo alinkubapa amaka ga kuyila bana ba Kyala; 13aba bo bakapapigwa mwilopa, pamo mbwigane bwa mbili, pamo mbwigane bwa mundu, loli mwa Kyala.
14Popapo Isyu yula alinkuya mundu, alinkwitugala mmyitu; tulinkububona ubukulumba bwake, ubukulumba bo ubwa Mwana yumoywene ntiga nGwise, uyu iswile ilipyana nubwanaloli. 15Umwene Yohani alinkunsisimikisya, akinkukolela alinkuti, “Uyu yo uyu nanjobaga apa natigi, ‘Uyu ikukonga pamyangu, yo nkulumba kumyangu, namanga aliko bo ngali nukuyako une.’ ” 16Ukufuma nkukelwa kwa ipyana lyake twesa twambilile ipyana pamwanya pipyana li lingi, 17namanga indagilo syalyendile mwa Mose, loli ilipyana nubwanaloli fyo fisile mwa Yesu Kristi. 18Nayumo akambonamo siku Kyala; loli uMwana gwa Kyala yumoywene ntiga, uyu ali ndupagato lwa Gwise, yo uyu atulingenie.
Ubulumbilili bwa Yohani Umosi
(Mat 3.1-12; Mar 1.1-8; Luk 3.1-18)
19Popapo abalongosi ba baYuda aba mu Yerusalemu balinkubatuma abaputi abakulumba nabanya Levi kukundalusya Yohani isya kuti, “Kali ugwe gwe ani?”
20Umwene Yohani alinkusita nukufinda, alinkwilata itolo alinkuti, “Une ngaya ne Kristi.” 21#Kukumbu 18.15,18; Mala 4.5Popapo abene balinkundalusya balinkuti, “Uli mfiki lelo? Gwe Eliya?” Umwene alinkuti, “Ngaya yo une.” Abene balinkuti, “Kali gwe nsololi yula?” Umwene alinkwamula alinkuti, “Mma.” 22Popapo lelo balinkundalusya balinkuti, “Kali po gwe ani, ulitubula ukuti tukabamule aba batutumile? Kwiyoba ukuya gwe ani?” 23#Yes 40.3Umwene alinkubabula alinkuti, “Une ne isyu lya nkoleli uyu ikukolela mmatengele uyu ikuti, ‘Amugolosyege injila ya Ntwa, bo mumo ayobile Yesaya unsololi.’ ” 24Abandu aba batumigwe naba Farisai, 25bo balinkundalusya balinkuti, “Po fiki kosya lelo, linga ukaya gwe Kristi, pamo linga ukaya gwe Eliya, pamo gwe nsololi yula?” 26Umwene Yohani alinkubamula alinkuti, “Une ngosya namisi, loli nkati mmyinu imile yumo yuyo mukammanya umwe. 27Yo ikungonga une, loli une ngabagila ukwabula utukoba twa mfilato fyake.” 28Sisisi syabonike mu Betania, isilya lila lya Yordani, kuko Yohani osyaga.
Kang'osi gwa Kyala
29Ulwa kilabo, Yohani alinkumbona Yesu ikwisa kumyake, alinkuyoba alinkuti, “Keta akang'osi ka Kyala, aka kikusosyapo ubutulanongwa bwa kisu! 30Yuyuyu yo uyu nanjobaga apa natigi, ‘Ikwisa kunyuma kumyangu umundu, uyu yo nkulumba kumyangu, namanga aliko bo ngali nukuyako une. 31Nanine ngalimmenye, loli une nisile nikosya namisi ukuti afumusigwege kubanya Israeli.’ ”
32Popapo Yohani alinkusisimikisya alinkuti, “Numbwene Mbepo ikusololoka ukufuma kumwanya ukuti ngunde, ikutugala pamyake. 33Nanine ngalimmenye, loli uyu alindumile kukosya namisi, yo alimbulile ukuti, ‘Uyu linga umbwene Mbepo ikunsololokela nukwitugasya pamyake yo uyu isakosyaga na Mbepo Mwikemo. 34Nanine nsibwene, kangi nsisisimikisye, ukuti uyu yo Mwana gwa Kyala.’ ”
Abafundigwa ba Yesu abatasi
35Kangi ulwa kilabo, Yohani alinkwima pamopene nabafundigwa bake babili, 36alinkumbona Yesu bo ikwenda, alinkuyoba alinkuti, “Keta akang'osi ka Kyala!” 37Abene abafundigwa bala babili balinkumpilika bo ikuyoba, popapo balinkunkonga Yesu. 38Umwene Yesu bo asanwike, alinkubabona bikunkonga, alinkubalalusya alinkuti, “Mukulonda fiki?” Balinkumbula balinkuti, “Rabi (ko kuti Mmanyisi), kwitugala kugu?” 39Umwene alinkubabula alinkuti, “Isaga mukete.” Popapo lelo balinkubuka, balinkwakuketa apa alipo; balinkulinda nagwe ilisiku lila. Pali po pakabalilo ka kalongo.#1.39 Akabalilo ka kalongo: yo 4 koloko namayolo.
Uyu alimpilike Yohani nukunkonga Yesu
40Yumo nkati muli balabala, ali yo Andrea, ugwamyabo gwa Simoni Peteri.#1.40 Peteri: ko kuti lwalabwe. 41Umwene alinkutala ukumwaga Simoni ugwamyabo, alinkumbula alinkuti, “Tumwagile Mesiya” (ko kuti Kristi). 42Alinkuntwala Simoni kwa Yesu. Umwene Yesu bo ambwene, alinkumbula alinkuti, “Ugwe gwe Simoni unnya Yohani, kwisakubilikiligwaga iya Kefa (ko kuti Peteri).”
Yesu ikumbilikila Filipu na Natanaeli
43Ulwa kilabo Yesu alinkulonda ukubuka nkisu kya Galilai, alinkumwaga Filipu, alinkumbula alinkuti, “Ngongaga”. 44Umwene Filipu ali gwa nkaya ka Betisaida, bali kaya kamo na Andrea na Peteri. 45Popapo Filipu alinkumwaga Natanaeli, alinkumbula alinkuti, “Tumwagile uyu bansimbile mmasimbo ga ndagilo sya Mose na mbasololi, Yesu unnya Yosefu ugwa mu Nazareti.” 46Umwene Natanaeli alinkundalusya Filipu alinkuti, “Kali sibagile ukufumamo simo inunu nkaya ka Nazareti?” Popapo Filipu alinkumbula alinkuti, “Tubuke ukakete.” 47Umwene Yesu alinkumbona Natanaeli ikwisa kumyake, alinkunjoba alinkuti, “Keta unnya Israeli naloli, uyu akaya nulusyobo nalumo mmyake.” 48Umwene Natanaeli alinkundalusya Yesu alinkuti, “Kali umenye bulebule?” Umwene Yesu alinkumwamula alinkuti, “Bo akali tasi nukukubilikila Filipu, nakubwene bo uli pankuyu.” 49Popapo Natanaeli alinkumwamula alinkuti, “Rabi,#1.49 Rabi: ko kuti Mmanyisi. ugwe gwe Mwana gwa Kyala, gwe Malafyale gwa banya Israeli.” 50Popapo Yesu alinkumwamula alinkuti, “Kwitika papo ngubulile ukuti nakubwene pankuyu? Kwisakusibonaga ingulumbapo ukusikinda na isi.” 51#Bwa 28.12Popapo Yesu alinkuti, “Naloli nikubabula une nikuti, mwisakukubonaga kumwanya kwigwike, nabandumi ba Kyala bikuti nukufyuka, bikuti nukunsololokela Nnyamundu.”
اکنون انتخاب شده:
YOHANI 1: NNBII
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
BAIBULO INONGWA INUNU © Bible Society of Malawi, 2017.