LUKA 23
23
Yesu ali nkyeni mwa Pilati
(Mat 27.1-2,11-14; Mar 15.1-5; Yoh 18.28-38)
1Popapo ikilundilo kyabo kyosa kilinkusumuka, kilinkuntwala Yesu kwa Pilati. 2Balinkwanda ukumohela balinkuti, “Umundu uyu twagile ikukisofya ikikolo kyitu, kangi ikukanisya ukusonga isongo kwa Kaisari; ikwiyoba mwene ukuya yo Kristi Umalafyale.” 3Umwene Pilati alinkundalusya Yesu alinkuti, “Bati uli Malafyale gwa baYuda?” Umwene Yesu alinkumwamula alinkuti, “Bo lilyo kuyoba.” 4Popapo Pilati alinkubabula abaputi abakulumba nifilundilo alinkuti, “Ndikuyagamo yimo inongwa mmundu uyu.” 5Abene balinkumilisya fiyo balinkuti, “Ikubalundulania abandu, ikumanyisya nkisu kyosa kya mu Yudai, ukwanda mu Galilai ukwisakufika na kuno.”
Yesu ali nkyeni mwa Herodi
6Umwene Pilati bo apilike sisisi, alinkulalusya alinkuti, “Ngimba umundu uyu gwa nkisu kya Galilai?” 7Bo asyagenie ukuti gwa mbulagili bwa Herodi, alinkuntuma kwa Herodi; namanga yope alimo nkaya ka Yerusalemu mmasiku gago. 8Umwene Herodi bo ambwene Yesu, alinkusekela fiyo; namanga akabalilo akatali alondaga ukummanya, papo ampilikaga itolo, kangi asubilaga ukukibona kimo ikika ukufuma kumyake. 9Herodi alinkundalusya Yesu amasyu ga mingi, loli Umwene alinkusita nukumwamula limo. 10Bope nabaputi abakulumba nabamanyandagilo balinkwima papo, balinkumohela si nyingi fiyo. 11Popapo Herodi nabasikali bake balinkumwangalila Yesu nukunjwelula; bo bamfwikile unselekesye ugu gukung'alika alinkungomokesya ku kwa Pilati. 12Popapo Herodi na Pilati balinkwenda nukumanyana musi gugo; namanga bwila bali kilugu.
Situmuligwe ukuti Yesu agogigwege
(Mat 27.15-26; Mar 15.6-15; Yoh 18.39—19.16)
13Popapo Pilati alinkubabungania abaputi abakulumba nabalagili ba bandu, 14alinkubabula alinkuti, “Mundwalile umundu uyu mukuti nsofyabandu; keta, une bo nundalusisye nkyeni mmyinu, ngayagamo yimo inongwa mmundu uyu muli isi mukumohela. 15Yope na yu Herodi akasyagamo simo, buno angomokisye kumyitu; keta, akabombamo simo isi simbagile ukuti agogigwege; 16po ngimba nikumwabula bo numfundile.”#23.16 Amasimbo gamo gikongelelako: 17 Lelo bwila pa Kyaka kya Pasa syalondigwaga ukuti Pilati ababulilege yumo umpinyigwa. 18Abene loli balinkukolela pamopene bosa itolo balinkuti, “Nsosyepo uyu, loli utwabulilege yu Baraba;” 19(uyu abikigwe munnyololo panongwa ya kulundukana uku kwatupwike nkaya, na panongwa ya bugogi.) 20Umwene Pilati alinkwandisya ukuyoba nabo, namanga alondaga ukumwabula Yesu; 21loli abene balinkukolela fiyo balinkuti, “Nkomele, nkomele pakipingika.” 22Umwene alinkuyoba nabo utwa butatu alinkuti, “Papo fiki, abombile mbibi ngi? Buno ngayagamo yimo inongwa iya kungogelamo; po ngimba nikumwabulaga bo numfundile.” 23Abene loli balinkumilisya ukukolela fiyo ukuti, akomeligwege pakipingika; popapo unjwego gwabo gulinkuntola Pilati. 24Bunobuno alinkutumula ukuti, isi bikusuma syo sibombigwege. 25Alinkumwabula uyu bandondaga, uyu abikigwe munnyololo panongwa ya kulundulania ikisu nubugogi; loli alinkubapa Yesu ukuti bambombelege sisyo biganile.
Yesu ikukomeligwa pakipingika
(Mat 27.32-44; Mar 15.21-32; Yoh 19.17-27)
26Popapo abasikali balinkubuka nafwe Yesu, bo bikwenda balinkunkola imoni gwa nkisu kya Kireni uyu afumile kungunda, balinkuntwika ikipingika ukuti apimbe, ankongege nakyo Yesu. 27Popapo kilinkunkonga ikilundilo kya bandu ikikulumba, nabakikulu aba bikomaga kufipambaga nukundilila 28Umwene Yesu alinkusanuka, alinkuyoba nabo alinkuti, “Mwe bakikulu ba nkaya ka Yerusalemu, mungandililaga une, loli amwilililege mwibene nabaninu. 29Keta, buno gikwisaga amasiku aga bisakutigi, ‘Basayigwa abagumba, ninyanda isi sikapapamo siku, namabele aga gakongesyamo.’ 30#Hos 10.8; Buset 6.16Po bisakwandaga ukuyoba kufyamba bisakutigi, ‘Mulitugwilaga,’ na kutwamba bisakutigi, ‘Amutukupikilege:’ 31buno linga bo bikubomba bunobuno kumpiki umbisi, po sisakuyaga bulebule kumpiki umumu?” 32Balipo nabangi babili ababombambibi, aba batwaligwe ukwakugogigwa lumo nagwe. 33Lelo bo bafikile pabuyo ubu bikuti Lupaya, balinkunkomela pakipingika, bope nababombambibi bala, yumo kukiboko ikililo nuyungi kukiboko ikimama. 34#Salimo 22.18Popapo Yesu alinkuyoba alinkuti, “Gwe Tata, ubaswege, namanga bakasimanya isi bikubomba.” Balinkuyabana imyenda gyake bo bakungile ubulagusi. 35#Salimo 22.7Abene abandu balinkwima papo balinkuketa; bo abalagili ba baYuda bikunseka bikuyoba bikuti, “Abapokaga abangi, ndeke ipoke mwene, linga yo Kristi gwa Kyala unsaligwa.” 36#Salimo 69.21Bope nabasikali balinkumobela, balinkwisa kumyake, balinkumpa asiki,#23.36 Asiki: bo bwalwa ubu busasile. 37“Linga gwe Malafyale gwa baYuda, ulipokaga gwimwene.” 38Lelo bwalipo bope nubusimbe pamwanya, ubwa kuti, “Uyu yo Malafyale gwa baYuda.” 39Popapo yumo mbabombambibi bala, aba bakomeligwe lumo nagwe, alinkunhelula Yesu alinkuti, “Kali ukaya gwe Kristi ugwe? Ulipokaga gwimwene, utupokege nanuswe.” 40Loli unnine alinkumwamula, alinkunkemela alinkuti, “Nanugwe utikuntila Kyala, napa mufwene itolo ukufundigwa? 41Uswe loli twe situbagile, namanga tukwambilila ifihombigwa ifi fibagisenie nimbombo syitu; loli umundu uyu akabomba simo imbibi.” 42Popapo alinkuyoba alinkuti, “Gwe Yesu, ungumbukege bo kwingila mbutwa bwako.” 43Umwene Yesu alinkumbula alinkuti, “Naloli nikukubula une nikuti, gu musyugu kuyaga nanine mbusyuka bwa banunu.”
Ukufwa kwa Yesu
(Mat 27.45-56; Mar 15.33-41; Yoh 19.28-30)
44Lelo pali po pakabalilo ka buhano na kamo,#23.44 Buhano na kamo: bo isubalili pantu. yilinkugwa ingisi pakisu ukufika pakabalilo ka buhano na buna.#23.44 Buhano na buna: ko kuti 3 koloko. 45#Kuso 26.31-33Lyope nisuba lilinkusita nukubala, numwenda gwa kusiga ugwa Nnyumba ya Kyala gulinkutafukana pakati. 46#Salimo 31.5Popapo Yesu alinkukuta ilisyu ilikulumba alinkuti, “Gwe Tata, umoyo gwangu nikugubika mmaboko gako.” Lelo bo ayobile lilili, popapo alinkusililika. 47Umwene sarijenti bo asibwene sisisi, alinkuntufya Kyala alinkuti, “Naloli umundu uyu ali ngolofu.” 48Abandu ikilundilo kyosa aba babungene pakuketa, bo basibwene sisisi, balinkugomoka bo bikwikoma kufipambaga. 49#Luk 8.2-3Bosa nabamanyani bake, nabakikulu aba bakongaga nagwe ukufuma nkisu kya Galilai, balinkwima pabutalipo, balinkusiketa sisisi.
Ukusyiligwa kwa Yesu
(Mat 27.57-61; Mar 15.42-47; Yoh 19.38-42)
50Popapo umundu yumo uyu ali yo Yosefu ingamu, ugwa ndukomano lwa baYuda, umundu unnunu ungolofu, 51(yo akalwitike ulutumulilo lwabo nimbombo syabo), uyu afumile mu Arimatia, akaya kamo aka baYuda, umundu yuyuyu abugulilaga ubutwa bwa Kyala; 52yo alinkubuka kwa Pilati, alinkwakugusuma umbili gwa Yesu. 53Popapo alinkugusulusya, alinkuguniembetelela mmwenda umwelu, alinkugubika mwipumba ili basongwile ndwalabwe, muno nayumo akabikigwemo siku. 54Ilisiku lila lyali lyo isiku lya kwitendekekekesya, bo ilisiku lya kwandila Sabati likuya pakwanda ukukya.
55Abene abakikulu aba balisile nagwe Yesu ukufuma nkisu kya Galilai, balinkunkonga, balinkwakuliketa ilipumba, na muno bagubikile umbili gwa Yesu. 56#Kuso 20.10; Kukumbu 5.14Popapo balinkugomoka, balinkwakutendekesya inyemba nimikota iminunga. Loli pisiku lya Sabati po balinkutusya bo mumo siyilile ingomelesyo.
اکنون انتخاب شده:
LUKA 23: NNBII
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
BAIBULO INONGWA INUNU © Bible Society of Malawi, 2017.