Genèse 12
12
Zhiktè a baha na Abram
1A Ndo nzi pèc pècèk a ngaɗa na Abram: Jèkeda kokwar bab ngaya, a gwoli ngaya, a gi bab ngaya, a ko do a herkeda man i da ngra ka. 2I woy a i ge ka a verzi ndohi kumba, a i da pshè ka ma, a i da gra nzlembaɗ ngaya, man a pshè ma ndohai. 3I woy a i pshè ta ma ndohai, man ta pshè ka ma. Ndo man a phomde ka, i woy a i phömdèʼa. Te ka, verzi ndohi kumba ta da ngècè mpshè ma.
4A Abram a ndo, ara man Ndo nzi pèc pècèk a gada na, a Lot a ndo a verzi nengaʼa. Mvi Abram 75, man a jèkeda kokwar Charan. 5A Abram a nco Sarai, ngwoz na, a Lot, kra kramam na, a skwi ta tèlèba, a ndohi man ta ngots te Charan, a to do aman ta dè a kokwar Canaan. A ta ndikè a kokwar Canaan. 6A Abram a mbeza a ndev kokwar, ha a ndikè a sam Sichem, a sam gètèl wof, a ma Moré. A pats nasa, ndohi Canaan ta te kokwar sa. 7A Ndo nzi pèc pècèk a ngudoko na va a di a Abram, a ngaɗa na: Kokwar haha i woya man i va ta ndohi te verzi ngaya. A Abram a nrom sam mvi skwi a Ndo nzi pèc pècèk, man a gudoko na va a dai, a pa. 8Te deɓaʼa a nslambaɗa, a ndo za a tsagi Béthel, a ngu gi na a pa. Béthel te civèɗ nkèl pats. Ai te civèɗ mvèng pats. A pa a nrom sam mvi skwi a Ndo nzi pèc pècèk, a ntsu ri a nzlembaɗ Ndo nzi pèc pècèk. 9Te deɓaʼa Abram a ndo a ma ma, ha a ndikè a kokwar Négeb.
Abram te kokwar Egypte
10A mi mbiaʼa a ngu a kokwaraʼa. A Abram a ndo aman a nza a kokwar Egypte kètè, te man mi a nga na matakwan te kokwar sa. 11Aman ndul ndul a kokwar Egypte ma, a ngaɗa na Sarai, ngwoz na: I suna, ka ngwoz ka mbikaɓai. 12Aman ndohi Egypte ta da rka ka, ta da hérè te ndav ta: na haha ngwoz na! A ta da keɗyè, a ta jèka ka nshèffè a ka. 13I tsa ka rai, goɗo: I demam na! A i nzi amba a géɗ ngaya, a i nzi a nshèffè a gèɗ ngaya. 14Aman Abram a mshkè a kokwar Egypte, ndohi Egypte ta rka, ngwoz nengaʼa mbikaɓai. 15A golahi Pharaon mbibihiaʼa ta rkaʼa, a ta ngra na Pharaon. A ta cko ngwozaʼa a gi bi Pharaon. 16A ta ga na skwi man amba amba a Abram a géɗ ngwozaʼa. A nʼngots tambakihai, zlèhai, kɗèhihai, ɓèlèlihai, ngwozi a ngurhai, mam kɗèhihai, a zlugumihai. 17Aman Ndo nzi pèc pècèk a nzlündo matakwan mbiaʼa a géɗ Pharaon a ndohi gi na a géɗ Sarai, ngwoz Abram. 18Pharaon a mbaha na Abram, a ngaɗa na: Ka gay a haha mè? Ka gaɗayè, a ka gada, nengaʼa ngwoz ga, ɓai èhèmè? 19Ka gada nengaʼa demam ga, a i woy a i cè a ngwoz, èhèmè? Na haha, co ngwoz ngaya, da skwi ngaya a deɓa, vo-do kinè a vna! 20A Pharaon a mbaha ta ndohai, a ta feda ta ma, nengaʼa, a ngwoz na, a skwi tèlèba man ta ngotso.
انتخاب شده:
Genèse 12: MOF89
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Alliance Biblique du Cameroun 1989