Jean 2
2
Ngolala nfi ngwoz a gai te Cana
1Te mʼmèn mamakarʼa ta gu ngolala nfi ngwoz a gai te kokwar Cana, te Galilée. 2A mam Yèsu a zhè a pa. A ta baha na Yèsu a golahi nengaʼa ba a ngolala. 3A barassa a ndeva ta gèɗ, a mam Yèsu a ngaɗa na Yèsu: 4Barassa a nʼndev na. A Yèsu a ngaɗa na: Ma ngaya dè, ngwoz! Pats man a ga a mshkè di ɓai. 5A mam na a ngaɗa ta ndohi mizlinè: Skwi mèmè man a da gaɗa kinè, va-gau! 6Kreblomhi 6 a pa. Ta peda a pa, a ndohi Juif ta pèn va a vna. Kreblom staɗ, duzlakhi te pa 5. 7A Yèsu a ngaɗa ta: Va-ndha kreblomhi a iyam! A ta ndheda. 8Yèsu a ngaɗa ta: Va-ngelaʼa, va-da a sam bi skwi nʼndai! A ta daʼa. 9Aman bi skwi nʼndai a ntor barassa man a matsa iyam (a sun sam man a shkè te pa ɓai, sèi ndohi mizlinè man ta ɓol iyam, ta suna), bi skwi nʼndai a mbaha na baki ngwoz sa, a ngaɗa na: 10Ndohi tèlèba ta vi barassa man a jèn nshèlèkuraʼa; te deɓaʼa man a keɗ ta ndohi ma, ta sa na njénɓiaʼa a gèɗ. Aman ka ngheda barassa njénaʼa, a ka ckoɗ a deɓa.
11Nasa nrkedi nshèlèkuraʼa, man Yèsu a gau, te kokwar Cana, te Galilée, a nʼngreda nʼnjèl nengaʼa auda. A golahi nengaʼa ta co a ndav.
12Te deɓ skwi haha, Yèsu a mam na, a kramamhi na, a golahi na, to do a kokwar Capernaum, aman ta nza a pa a vata ɓai.
Yèsu a til gi Zhiklè
(Mt. 21,12-13; Marc 11,15-18; Luc 19,45-46)
13Ndul ndul ar ngolala Pâque ndohi Juif. A Yèsu a mdo a kokwar Jérusalem. 14A nʼngots ndohi mpre zlè, ndohi mpre tambakhai, ndohi mpre nkuɗhomhai, a ndohi nhumbèɗè sulai te gi Zhiklè, man ta nza te pa. 15A Yèsu a ntsaffa mènèwèɗ teɓa, a ndzar ta tèlèba auda te gi Zhiklè, a tambakihi ha, a zlehi ba. A wusheda Suli ndohi nhumbèɗè Suli aussa, a nzukda table aussa, a ngaɗa ta ndohi mpre nkuɗhomhai: 16Va-helda skwi kine auda, kin ngwoda gi Bab ga a gi luma bai! 17A golahi nengaʼa ta hur ma haha, ara man a Windo te ɗèlèwèr Zhiklè: Srak a keɗyè a hai a géɗ gi ngaya.
18A ndohi Juif ta mbeɗa na a ma: Ka nga skwi ga nga nrkedi mè aman a ka gi a haha? 19Yèsu a mʼmbeɗa ta a ma: Va-mbeɗda gi Zhiklè nkezlaʼa haha aussa, te mʼmèn makar i ɗizlèʼa. 20A ndohi Juif ta gaɗa: Ta rom gi Zhiklè nkezlaʼa haha mvi 46. Ka, ka woy a ka ɗizlèʼa te mʼmèn makar genè ɗè? 21Aman Yèsu a ngaɗa ta a géɗ gi Zhiklè nkezlaʼa, a géɗ va na. 22Aman a nslambaɗkaɗauda te ndev ndohi mʼmetsaʼa ma, golahi nengaʼa ta hur ma haha, ara man a gaɗa ta. A ta co ma ɗèlèwèr Zhiklè a ndav ta, a ma man Yèsu a gaɗa ta.
Yèsu a sun ndohi tèlèba
23Aman Yèsu a zhè te kokwar Jérusalem, te ngolala Pâque, ndohi kumba ta rka nrkedi man a gau, a ta co nzlembaɗ na a ndav. 24Aman Yèsu, nengaʼa a nfa gèɗ a tengaʼa ɓai. Aman nengaʼa a sen ta tèlèba. 25Ko ndo ngiɗè a nʼngra na ɓai, a sun skwi man a zhè te ndav ndo.
انتخاب شده:
Jean 2: MOF89
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Alliance Biblique du Cameroun 1989