Jean 5
5
Yèsu a mʼmbel ndo a sam nhèyè-va iyam
1Te deɓaʼa ndohi Juif ta gu ngolala. A Yèsu a ndo Jérusalem. 2A ntamagi kokwar Jérusalem, man ta baha na ntamagi tambakhai, nhèyè-va iyam a zhè a pa. Ta baha na a ma Hébreu, Béthesda. Ntamagi zlam a pa, 3a ndohi matakwan kumba, ndohi mandazlai, ndohi vedal, ndohi man ta gwora [ta zhèr aman iyam a gidè va. 4A pats ngiɗè, pats ngiɗè, gol Bi Zhiklè a shkèhai a sam nhèyè-va iyam, a ngeda iyam. Aman iyam a gidè va, ndo man a dè a pa nshèlèkuraʼa, a mbél na, ko matakwan mèmè a nʼnga na.]
5Ndo ngiɗè a zhè a pa, mʼmana tʼhai a matakwan, mvi 38. 6Aman Yèsu a nrkaʼa, a ntsenaʼa, a mʼmana tʼhai nʼnzi a zhè, a ngaɗa na: Ka woy a ka mbél ngaya te matakwan dè? 7Ndo matakwan a ngaɗa na: Bai, i ngatsa ndo man a ndyè a iyam ɓai. Aman iyam a dè gidè va, a i shkè, ndo ngiɗè nʼngelamay ma. 8A Yèsu a ngaɗa na: Slambaɗa, co sam mʼmènè ngaya, a ko do! 9A nasa nasa ndo matsa mʼmbela, a nco sam mʼmènè na, a ndo. A pats nasa, pats nshèk va.
10A ndohi Juif ta gaɗa na ndo man a mbel na: A patsna pats nshèk va, ambaɓai aman ka zhüɓ sam mʼmènè ngaya. 11A ndo matsa a ngaɗa ta: Nengaʼa man a mbelyè, a ngaɗayè: Co sam mʼmènè ngaya, a ko do! 12A ta dzhoɗo: Ngaɗa ka wa, ngaɗa ka, co sam mʼmènè ngaya, a ko do, wa? 13Aman ndo man mʼmbela a sun ndo mʼmbulo ɓai. A nʼngatsa Yèsu ɓai, a géɗ man ndohi kumba a samaʼa. 14Te deɓaʼa Yèsu a nʼngots ndo matsa te gi Zhiklè, a ngaɗa na: Na haha, ka mbela ma, anai ka gu mali asaɓai! Man ka da gau, skwi mwuɗitpa holholaʼa a da ga ka. 15A ndo matsa a mdo, a nʼngreda ta ndohi Juif: Ndo man a mbelyè sa, nengaʼa Yèsu. 16A ndohi Juif ta pi va a Yèsu, a géɗ man a gu skwi ar haha a pats nshèk va.
17A Yèsu a ngaɗa ta: Bab ga a gi mizlinè ani haha ba, a i ba i gi mizlinè. 18A ndohi Juif ta woy maya aman ta keɗaʼa holholaʼa, a géɗ man a ngu mizlinè a pats nshèk va genè ka ɓai, aman a géɗ man a baha na Zhiklè Bab ga, a lèmdè va na a Zhiklè.
Wuɗi kra Zhiklè
19A Yèsu a mʼmbeɗa ta a ma: A vava, a vava, i gaɗa kinè: Kra a slaha man a gi skwi a ri na azɓai, ko staɗ. Sèi skwi man a rka, Bab na a giaʼa. A skwi man nengaʼa a giaʼa, kra nengaʼa ba, a giaʼa. 20A bab kra a woy kra nengaʼa, a nʼngra na skwi tèlèba man a giaʼa. A di a ngra na skwi mbiaʼa holholaʼa, a kin da rzl kinè a pa. 21Ara man Zhiklè a slèmbèɗdè ndohi mʼmetsaʼa, a va ta nshèffè, lèmèlèmè kra nengaʼa, a vi nshèffè a ndo man a woyaʼa. 22Zhiklè a gi kita a ndo azɓai. Aman kita tèlèba a feda a ri kra, 23aman ndohi tèlèba ta da slébèrdè kra, ara man ta slébèr-dè Bab na. Ndo man a slébèrdè kra azɓai, a slébèrdè Bab na man a zlindkoɗa azɓai lèmèlèmè arsa. 24A vava, a vava, i gaɗa kinè: Ndo man a tsena ma ga, a nco ma nengaʼa man a zlindekayè a ndav na, a nʼngotso nshèffè a mèdèp, a ngècè kita a gèɗ na azɓai, aman a ntsoko gèɗ na auda te mʼmetsai, a nʼndo a nshèffè. 25A vava, a vava, i gaɗa kinè: Patsa a di a shkè, ani a zhè ma, aman ndohi mʼmetsaʼa ta tsena daʼai kra Zhiklè. A tengahi man ta tsenaʼa, ta da nzi a nshèffè. 26Ara man nshèffè a zhè te ri Babaʼa, lèmèlèmè a mva na kra nengaʼa, a nshèffè a zhè te ri na. 27A mva na wuɗi-bai, aman a slaha a ngi kita, te man nengaʼa kra-ndo. 28Kin hur gèɗ ɓai! Pats ngiɗè ndohi dzavihai tèlèba ta da tsena daʼai nengaʼa. 29A ta da shkè auda. Ndohi man ta gu skwi man amba, ta slambaɗkaɗauda a nshèffè. A ndohi man ta gu skwi man ambaɓai, ta slèmbèdè a kita.
Ndohi malwuɗihi Yèsu
30I slaha a i gi skwi a géɗ ga ɓai; i bèzlè kita, ara man i tsenaʼa. Kita ga nzuraʼa. I woy skwi ara man iyè i woya ka ɓai, aman skwi man nengaʼa man a zlindekayè a woyaʼa.
31Aman i goɗ a géɗ va ga, ar skwi man i ngreda kinè, skwi nzura ka ɓai. 32Aman ndo ngiɗè a hodko kinè malwuɗi ga, a i suna, skwi man a ngreda kinè a géɗ ga, zuraʼa. 33Kin zlündo ndo a sam Jean, a nengaʼa a nʼngreda kinè ma zuraʼa. 34I ngreda kinè ma ndo ka ɓai, aman i gaɗa kinè ma haha, a kin mbél kinè. 35Nengaʼa skwi nhél sam nday-ndayaʼa. A kin woy a kin wuffè nʼnzi kètè a sam man a helaʼa. 36Aman ma malwuɗi ga a fena ma malwuɗi Jean. A mizlinè man Bab ga a mvayè man i giaʼa, aman i ndevaʼa, mizlinè sa a ngredyè a sam kinè, ara man Bab ga a nzlindekayè. 37A Bab ga man a zlindekayè, a ngredyè a sam kinè. Kin tsena daʼai nengaʼa ɓai, kin rka va nengaʼa ɓai. 38A ma nengaʼa a nzi te ndav kinè azɓai, te man kin cè nengaʼa man a zlündo, a ndav kinè ɓai. 39Va-war te ɗèlèwèr Zhiklè! Kin hur, kin ngècè nshèffè a mèdèp te nengaʼa. Nengaʼa a ngredyè a sam kinè. 40Kin woy a kin shkè a sam ga a kin ngècè nshèffè ɓai.
41I woy aman ndohi ta slebardyè ɓai. 42Aman i sen kinè, mwoy-ndo Zhiklè a te ndav kinè ɓai. 43I shkè a nzlembaɗ Bab ga, a kin cyè ɓai. Aman ndo ngiɗè a shkè a nzlembaɗ na, kin da cè nengaʼa. 44Aman kin woy aman ndohi ta slebarde kinè, kin woya man a Zhiklè ka ɓai, ncè-a-ndav kinè mè? 45Kin hur ɓai, i da pin kinè a sam Bab ga. Ndo ngiɗè a pin kinè, nengaʼa Moise, man ndav kinè a zhèr skwi te ri nengaʼa. 46Aman kin co ma Moise a ndav kinè, ar agassa kin cyè ba; aman nengaʼa a Windo a géɗ ga. 47Aman kin ca ɗèlèwèr nengaʼa a ndav ɓai, kin cè ma ga a ndav kinè ɗè?
انتخاب شده:
Jean 5: MOF89
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Alliance Biblique du Cameroun 1989