Juan 17
17
Indasal ni Jesus u Disepulus na hide
1Nadid, tu pákkakagi ni Jesus ti iye hide a bagay ay timmangad siya ti langet sakay kinagi na, “Ama, dimmemát dán u odas. Parangalan mu dán u Anak mo, para parangalan nakabe. 2Dipo inatáddinák mo ti kapangyariyan tu atanan a tolay para maatádden ko ti biyag a awan ti kahád u atanan a tolay a inyatád mo nikán. 3Sakay sa iye u gusto a kagiyán nu biyag a awan ti kahád: u matukuyan ka nu tolay hide a hiko la u tunay a Diyos, sakay matukuyan di be u pinaangay mu he. 4Impakapospos ku dán u karangalan mo he ti munduwáy, dipo natupad ku dán u impatarabaho mo nikán. 5Kanya nadid, Ama ay atáddinák mo ti karangalan a konna tu karangalan ko nikuna a hodák palla niko tu itod bagu a lalangán i munduway.
6Inpakilala taka tu tolay hide a inyatád mo nikán ti munduwáy. Kao mo hide sakay inyatád mo hide nikán, sakay sinunud de u upos mo. 7Tukoy di dán a u atanan a inyatád mo nikán ay gábwat niko. 8Dipo intoldu ko nide u atanan a intoldu mo nikán sakay tinanggap di iye. Siguradu hide a talaga gábwaták niko sakay maniwala hide a pinaangayák mu he.
9Ipagdasal ko hide. Awanák magdasal para tu taga-mundu hide nan para tu inyatád mo hide nikán, dipo kao mo hide. 10U atanan a tolay a kao ko ay kao mo, sakay u atanan a kao mo ay kao ko, sakay maparangalanák tu pamamag-itan de. 11Sakay nadid ay soliyák dán niko, iwahak ku dán i munduwáy, pero hide ay manatile hide he ti munduwáy. Ama a Banal, bantayan mu ped hide tu pamamag-itan nu kapangyariyan nu ngahan mo, a inyatád mo nikán, tán magin essa hide a konna nikita. 12Mentaras a kagumanák de ay iningatan ko hide tu kapangyariyan a inyatád mo nikán. Iningatan ko hide sakay awan ti nepahamak nide, puwera la tu tolay a nagehyok tu kákkepahamak na para matupad u kinagi tu Kasulatan tungkul nikuna. 13Pero nadid ay soliyák dán niko. Kákkagiyán ko i bagayan iye hide mentaras a hodák palla he ti munduwáy tán magkahod hide ti kasayaan a konna nikán. 14Intoldu ku dán nide u upos mo. Tunay u ingál nu taga-mundu hide nide, dipo awan dán hide makamundu a konna nikán a bakán a makamundu. 15Awan ko idasal a alapán mu dán he hide ti munduwáy, nan ingatan mo hide para awan hide matalo ni Satanas. 16Awan hide makamundu, konna nikán a awan tagamundu. 17Ilaan mu hide tu pamamag-itan nu tatahoden; u upos mo ay tatahoden. 18Pinaangayák mu he ti munduwáy, konna bi hod ay pinaangay ku be hide ti munduwáy, para magtoldu. 19Sakay alang-alang nide ay inlaan ko i sadile kuwáy niko, tán melaan be hide niko tu pamamag-itan nu tatahoden.
20U dasal ko ay bakán la a para nide, nan pate be tu maniwala hide nikán tu pamamag-itan nu pagtoldu de. 21Ama ipagdasal ko niko, a nakwa magin essa hide a atanan a konna nikita. Ni kodya ka a hod nikán sakay hodák be niko, nakwa hide ay hod nikita, para maniwala u taga-mundu hide a hiko u nangpaangay he nikán. 22Inatádden ko hide ti karangalan a konna tu inyatád mo nikán, para magin essa hide a konna nikita. 23Hikán ay hod nide sakay hiko ay hod nikán, tánni tatahoden a magin essa hide. Tán matukuyan nu taga-mundu hide a pinaangayák mu he, sakay matukuyan di be a mahal mo u maniwala hide a konna tu págmahal mo nikán.
24Ama, gusto ko a makaguman tu angayan ko u tolay hide a inyatád mo nikán, tán ketan di be u karangalan a inyatád mo nikán, dipo mahalák mo bagu pa a nilalang i munduway. 25Ama, a Banal maski ni awan ka tukoy nu taga-mundu hide ay tukoy taka, sakay tukoy nu maniwala hide a hiko u nangpaangay he nikán. 26Inpatengge taka nide, sakay tulos-tulos ko iye a gimitán para u págmahal mo nikán ay hod be nide sakay hikán be ay hod nide.”
انتخاب شده:
Juan 17: MBJC
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.