Rut 1
1
Elimeleke roo muda pio sidadi Belem rae Israel laa le rae iso gala Moab
1-2Pes muno tee dia liurai le rae Israel, mekei-naan#1:1-2 Mekei-naan noor seri u'u NAI Maromak ta loi odi ukun atu Israel. noor ta ukun atu Israel.
Pes tempu u'u, dia atu iso gala Elimeleke. Nii vee gala Noemi.#1:1-2 Dia dale-uu Ebreu, gala Elimeleke nii signifika “Nai ta Liurai”, i gala Noemi nii signifika “lara mau”. Loruu dia ana mane ruu, iso gala Malon iso gala Kilion. Roo atu Efrata, pio sidadi Belem vere distritu Judaa.
Pes tempu u'u, rae salae ha'e vere distritu Judaa. Iso u'u batu ke Elimeleke roo posi bali sii sidadi, odi laa peni udi le rae Moab, le lua Jordaun vere parte leel sae. 3Mas le rae u'u Elimeleke mate, posi bali nii vee o nii ana noor mesa. 4Le aer iso, ana mane ruu kaben o vine atu pio rae Moab. Malon kaben o vine iso gala Rut. I Kilion kaben o vine iso gala Orpa. Mas roo peni le rae Moab rata too sagulu, 5Noemi nii ana mane ruu mos mate. Roo mate posi bali sii ina mesa: tee dia mane iso, tee dia ana iso, i tee dia ubu-ana iso.
Noemi o Rut galelu vali laa sidadi Belem
6Mas aipiil iso Noemi veki peni le rae Moab, u plii dale, “NAI Maromak nurat Nii atu vere distritu Judaa, vere u'u dia vali lapar ha'a see.” Ple'u batu ke Noemi o nii vine veu ruu mokoi sii lapar posi bali rae Moab odi galelu vali laa Noemi nii umo vere nii rae riko. 7I Noemi o nii vine veu ruu posi bali vati iso ke roo peni vere rae Moab, dara daa iso ke galelu la distritu Judaa.
8Mas aipiil iso, Noemi o nii vine veu ruu sole tili, Noemi dale le ni vine veu ruu dale, “Ple'u see! Bloi desi kimi ruu galelu vali la kimi ina noor. Pita kimi matani kimi lara bloi le kau ana ruu ke mate bali see, o mos mai a. Ple'u batu ke a negi la NAI Maromak odi matani Nii lara bloi le kimi ruu. 9Ke NAI Maromak nee le kimi ruu mane selo ke lara bloi, ple'u ke kimi lebo mori tanega.” I Noemi kopa i meku loruu, i loruu sio uru.
10Mas loruu mataar, “Tai, amaa! Kami manara dara taa amaa, odi laa mori putu o amaa nii atu noor.”
11Mas Noemi mataar, “Kau ana doben roo! Kimi na galelu laa pee! Te dia tanugu iso, se kimi dara a. A makei see, a tee eto pita ana mane seri odi aer-airuu kaben vali o kimi. 12Maske kimi ruu magees kau ana riko, mas bloi desi kimi ruu galelu vali laa. Pita a makei see, ple'u kimi tee lebo nurat tok de a veki kaben o mane vali. A riko tee nurat iso u'u see. See ple'u buta kade'e, a kaben o mane i eto ana mane seri, kimi nurat plee mane? 13Kimi nurat kimi let peni rata ana noor ha'e i kimi kaben o roo, ka? Loba ka tai! Be punu kimi tee peni pita, ma'o kimi kaben muno vali o mane selo. Iso u'u susar, loba ka tai? Mas kau lara susar pelu desi kimi noo. Pita a sinti NAI Maromak riko taa kastigu a. Ple'u bloi desi kimi tee lebo dara pita a.”
14Ma'o roo telu sio uru vali pita. I Orpa meku ni ina-ba'i Noemi i bati loor odi galelu. Mas Rut kopa dania Noemi.
15Noemi dale le Rut, “Lise laa! Orpa galelu laa nii povo i galelu laa nii luli noor. Kiti mos galelu putu o Orpa!”
16Mas Rut mataar,
“Tee lebo kasiit, mas amaa tee lebo kasuu a galelu.
I amaa tee lebo obriga a laa posi bali amaa mesa.
Pita a manara mori dara navati o amaa.
Amaa laa vere mane, a mos laa vere u'u.
Amaa peni vere mane, a mos peni vere u'u.
Amaa nii atu veki sai mos kau atu.
I amaa nii Nai Maromak veki sai mos kau Nai Maromak.
17Aer-airu amaa mate vere mane, a mos mate vere u'u.
Atu tana amaa vere mane, atu mos tana a vere u'u.
See a poi pio amaa
NAI lebo kastigu a,
Pita mate batu-bati kiti ruu.”
18Aipiil Noemi lise Rut manara loba dara u, Noemi tee soru pita.
19I loruu sole navati, rata le sidadi Belem.
Aipiil Noemi o Rut rata le Belem, atu ma'o mege kakoraa loruu. Vine noor vere ke sidadi u'u tugu la loor dale, “Iso u'u tia Noemi, ka?”
20Mas Noemi mataar laa roo dale,
“Kimi tee lebo via pita a 'Noemi',
Pita gala u'u nii signifika dale, 'lara mau'.
Bloi desi kimi via a 'Mara',
pita gala u'u nii signifika dale, 'lara pelu'.
Pita NAI Maromak iso ke Forsa Teba'a punu kau mori sai pelu teba'a.
21Pes muno a sai pio kade'e,
a o limu benu, pita a dia laki o ana mane ruu.
Mas agora NAI Maromak odi a galelu,
o limu ma'o moe.
Pita seta batu kimi via a 'Noemi',
ke NAI kastigu a?
Pita NAI taa forsa teba'a.
I NAI taa kasuu susar mai a.”
22Iso u'u ta istoria aipiil iso Noemi galelu pio rae Moab o nii vine veu Rut, atu Moab. Loruu rata le sidadi Belem, vere tempu kalobu trigu kai.
اکنون انتخاب شده:
Rut 1: BTKD
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Wycliffe Timor-Leste © 2025 Wycliffe Bible Translators Inc