Lucas 23
23
So' Jesús qoỹauée'uo so' net'a Pilato
(Mateo 27.1-2, 11-14; Marcos 15.1-5; Juan 18.28-38)
1Qana'chi ỹima ñíseguem jeso'me, qana'chi qoỹauée'uo so' Jesús so' net'a Pilato. 2Huá'a, qana'chi qoỹa'uo na' qoỹasaxalégue da' qoỹíitapega lasouaxaset, qoỹiit'oi:
—Qo'mi selaqalégue dójo' siỹaxaua ỹátaqta naỹa't qa'en di' qadaỹi. Qataxa 'éetapega da' sa 'te da' seseeténaq ñi' let'a na' net'alpi 'me Roma lé'ec, qataxa 'enapeela't da' na'chida jeda'me net'a nec'alaxaqui.
3Qana'chi so' Pilato ỹinato' jeso'me, 'enaaco':
—¿Séetapega na'chi'am 'me 'am let'a na' judiopi?
Qana'chi so' Jesús 'enaaco':
—Já'a, na'chida da'me 'auenaac.
4Qana'chi so' Pilato 'enapego' jeso'me lasoxola'pi jen' netaxaỹáxanaxanecpi qataxa jeso'me siỹaxadipi, 'eet'oi:
—Jaỹim sa 'te da' 'uo ga' sanata lasouaxaset dójo' siỹaxaua.
5Qaláxasa jeso'me nasoxola'pi v'iỹílaxalégue da' n'áaloxodenec da' l'aqtac, 'enaac:
—Jen'me ỹasouaxatétapega't na' siỹaxadipi 'me l'acháqa' di' Judea ỹasouaxat da' lapaxaguenataxanaxac. Chiỹoqóchii'ña di' Galilea, naỹi qataxa nivíta jénjo' souqát'a.
So' Jesús qoỹauéga so' net'a Herodes
6Jeso' Pilato joca'li demachíỹa dójo', qana'chi denataxanec jeso' siỹaxaua da' chiỹoxogue da' Galilea. 7Joca'li ma'le qod'aqtaxanem jeso'me chiỹoxogue di' Galilea, qana'chi jeso'me ỹamaxa so' net'a Herodes 'me ỹilolégue di' 'aléua Galilea, qá'a jeso'me nataq'en huét'a di' Jerusalén jeso'me nolo'. 8Qana'chi so' net'a Herodes, joca'li ỹilá'a so' Jesús, qana'chi ỹátaqta mátac, qá'a sóxote qaỹóxode' saua' noloqo'te da' sétaaque da' ỹaateton jeso'me Jesús. Qá'a demachítapeelégue naale da' qoỹ'axátetac jeso'me, qataxa sétaaque da' ỹauáachiỹi da' ỹí'et ga' n'anec 'me sa qoỹauanápiỹi. 9Qana'chi ỹátaqta jalcote na' nenataxanaxacpi da' ỹinatétac jeso'me, qaláxasa so' Jesús sa ỹ'ateguet. 10Nataq'en huétauo so'me lasoxola'pi na' netaxaỹáxanaxanecpi qataxa jen' dapaxaguenataxanapeec na' naqátaxacpi, jen'me ỹátaqta jalcote na' ỹasaqátapeelégue da' 'éetapega lasouaxaset jeso'me. 11Qana'chi so' net'a Herodes qataxa so' nesoxonaqapi ỹátaqta ỹi'uéetac so' Jesús, qana'chi lapaxalégue so' napoto ỹátaqta qaỹa ga' 'ená'am da' lodiac, 'ená'am qoỹin ga' net'a. Joca'li ỹim, qataxa qoỹ'iỹílaxata so' Pilato. 12Qana'chi jeso'me nolo' so' Pilato qataxa so' Herodes qataxa nemana't, qá'a jesaa'me ỹátaqta p'aguénaxa'u.
So' Jesús qoỹaneuó'o da' nalaataguec
(Mateo 27.15-26; Marcos 15.6-15; Juan 18.39—19.16)
13Qana'chi so' Pilato lapona't so' lasoxola'pi na' netaxaỹáxanaxanecpi qataxa jeso'me net'alpi qataxa so' siỹaxadipi. 14Qana'chi 'enapéga, 'enaaco':
—'Ami 'me jaỹim 'anavíquii'uo dójo' siỹaxaua, 'oñíitapega da' na'chida da' ỹasouaxatétapega't na' siỹaxadipi. Jaỹim sóxote da' sachimaxatétapega jeda'me, qaláxasa qaỹa 'te sanata ga' lasouaxaset. 'Ami 'auauañíichiỹi da' jaỹim qaỹa ga' sanata lasouaxaset jen'me 'auasaqáitapeelégue jeda'me. 15Ñi' Herodes nataq'en, tadeno' n'iỹílaxat jeda'me. Qana'chi 'auauañíichiỹi jeda'me da' qaỹa ga' lasouaxaset, 'uootaxa da' qoỹachiỹoxotaỹi ga' nalaataguec. 16Jaỹim samaxasoxolégue qomle da' qoỹi'uaxan jeda'me. Qomle ỹim, qana'chi saxanéegue.
17Qana'chi so' Pilato na'chi 'eeta't naale da' n'onataguec da' 'uo na' qoỹisóiỹi necointáisec da' ỹivíta di' nolo' nemáxaqui, qaidi na' siỹaxadipi ỹiỹamaxadéeta jeso'me. 18Qaláxasa nemáseguem ỹima jeso'me da' ỹ'alaq, 'eet'oi:
—¡Qoỹalaat qomle jena'me siỹaxaua! ¡Díta ga'me Barrabás qoỹisóiỹi!
19Jeso'me Barrabás qoỹicondeta't joca'li, na'chi qoỹanétaaue jaso' cointáxanaxaqui ỹasouaxat joca'li qonp'agué'ne' qa'en so' net'a joca'li huá'ña di' Jerusalén, qataxa ỹasouaxat da' laataxanaxaic. 20Qaláxasa so' Pilato sétaaque da' ỹisóiỹi so' Jesús, tadeeto' ỹitaxa v'iỹílaxalégue da' denataxan. 21Qaláxasa jeso'me siỹaxadipi ỹátaqta n'áaloxodenec da' v'iỹílaqtalégue da' l'alaxac, 'eet'oi:
—¡Qoỹip'enaỹi jaso' nesodooso jena'me!
22Ỹitaxa v'iỹílaxalégue so' Pilato da' 'enapego' jeso'me siỹaxadipi, 'enaaco':
—¿Jái'chogamaxa ga' ỹí'et sa ỹiỹamaxañi jeda'me? Jaỹim qaa'le qaỹa ga' sauana lasouaxaset da' 'uootaxa náỹi da' qoỹa'uo ga' nalaataguec. Jaỹim 'chi samaxasoxolégue qomle jeda'me da' qoỹi'uaxan. Qomle qoỹimat, qana'chi saxanéegue.
23Qaláxasa jeso'me siỹaxadipi ỹátaqta v'iỹílaqtalégue da' qoỹiỹáxatapee'uo so' Jesús da' qoỹanaỹi jaso' nesodooso. Joca'li ỹágueegue da' l'alaxac jeso'me siỹaxadipi qataxa jeso'me lasoxola'pi na' netaxaỹáxanaxanecpi, qana'chi cha ỹivíd'a da' qoỹañoxot jeda'me qoỹíitapeec. 24Huá'a, qana'chi so' Pilato nañoxotela't da' ỹ'ateguet da' ỹiỹáxatapee'uo jeso'me siỹaxadipi. 25Qana'chi ỹisóiỹi jeso'me siỹaxaua 'me ỹ'atetapee'uo so' siỹaxadipi, jeso'me qoỹanétaaue jaso' cointáxanaxaqui ỹasouaxat joca'li qonp'agué'ne' qa'en so' net'a qataxa ỹasouaxat da' laataxanaxaic. Qana'chi ỹanóoue jeso'me siỹaxadipi so' Jesús da' mai'chi ỹoiquíitac.
Qoỹip'enaỹi jaso' nesodooso so' Jesús
(Mateo 27.32-44; Marcos 15.21-32; Juan 19.17-27)
26Joca'li ma'le qoỹauec so' Jesús da' sétaaque da' qoỹalaat, qana'chi qoỹaconé'uo so' siỹaxaua, lenaxat Simón, 'me l'acháqa' di' Cirene. Jeso'me chiỹaqalégue na' n'ónaxa. Qana'chi qoỹipeelégue jeso'me jaso' nesodooso so' Jesús, qana'chi ỹic'atet'ague qoỹin jeso'me.
27Ỹátaqta jalcote so' siỹaxadipi 'me quétapegue' qataxa so' ỹauodipi. Ỹima jeso'me ỹauodipi noỹíitaỹi, n'alqátapiiñi, ỹasouaxat da' laquicoxo jeso'me. 28Qana'chi so' Jesús neseleeguet so' ỹauodipi, qana'chi 'enapéga, 'enaaco':
—'Ami ỹauodipi 'me 'ad'acháqadii na' Jerusalén, 'ená'te qomle da' jaỹim 'anoiñíitapeelégue. Na'chidáta qomle da' mai'chi 'anoiñíitapeela't, qataxa 'anoiñíitapeelégue na' 'ac'óqo'chipii. 29Qá'a naquéte' naua' noloqo'te qomle da' qoỹiit'oi: “Ỹátaqta máchiiñi qomle jaga'me sa decó'o qataxa jaga'me quemáloxo qataxa jaga'me sa nauanápegue' da' ỹanogaxáatauo ga' lec'óxot.” 30Huá'a, qana'chi na' siỹaxadipi 'enapéga na' qasoxonaxa, 'enaaco': “Ỹa qo'mi 'ap'áxadiñi qomle.” Qataxa qoỹinapéga jen' comadeléguepi, qoỹiit'oi: “Ỹa qo'mi 'auoxochidíñi qomle.” 31Qá'a jaga' dadála 'epaq da' 'uáiñi da' qoỹ'étec dójo', ¿jái'chogamaxa huá'a toqo' ga' qoỹíit'ec jaga'me tóxoi?
32Nataq'en qoỹapoténeeta saua' dos siỹaxa'u 'me l'onataqa naua' sa n'oi'n, da' sétaaque da' nalaataxa'u qoỹin so' Jesús. 33Joca'li ma'le, qoỹivídee'ga jeso'me 'aléua 'me lenaxat naqaic lip'inec, qana'chi qoỹip'eneuo so' Jesús qataxa nataq'en saua' dos 'me l'onataxanaxa'j da' sa nó'in. Jeso' 'oonolec qoỹana'ague na' loic qataxa so' laqáỹa qaa'le qoỹana'ague na' n'emaq. 34Joca'li ma'le qoỹitóuoxouo so' Jesús, qana'chi 'enaaco':
—'Am ỹit'a, 'auchoxoden qomle jénjo' siỹaxadipi, qá'a sa ỹaỹáten da'me ỹ'étetac.
Qana'chi jeso'me huataxanaq nalítetapiilo saua' louo so' Jesús da' jái'chogamaxa talóo'te jesaa'me. 35Ỹima na' siỹaxadipi ỹic'atéetac jeso'me qataxa ỹivíd'a na' net'alpi ỹi'uéetac, 'enaaco':
—Nec'alaxatéegue naale ga' laqáỹa. Naỹi n'óota da' mai'chi nec'alaxatela't, qomle ỹátaqta 'eesa na'chiñi ñi' net'a nec'alaxaqui 'me liquiỹac ñi' Dios.
36Nataq'en jeso'me huataxanaq ỹátaqta ỹi'uéetac so' Jesús, qana'chi qonchíi'uo da' sétaaque qonỹómaxanỹi jeso'me latáxa 'me chimaxadaic. 37Qataxa qoỹíitapega, qoỹiit'oi:
—Qomle na'chi'am 'me 'am let'a na' judiopi, n'óota qomle da' mai'chi 'anec'alaxatela't.
38'Uo jeso'me nidíisec 'me qoỹidelégue so' p'áseguem, huetalóo'te naua' l'aqtaqa na' griegopi qataxa na' latinopi qataxa na' hebreopi, 'enaaco': “Jiñi'me na'chiñi ñi' let'a na' judiopi.”
39Jeso'me 'oonolec jesaa'me 'itaxalóxoiqa 'me nataq'en qoỹicoindáseguem nataq'en ỹisouéetac jeso'me, 'enaaco':
—Qomle 'am 'eesa da' na'chi'am net'a nec'alaxaqui, n'óota qomle mai'chi 'anec'alaxatela't qataxa nataq'en qo'mi 'anec'alaxatréegue.
40Qaláxasa jeso'me mai'chi liquiáxaua qataxa nelaxa jeso'me, 'enaaco':
—¿Séetapega sa 'au'óỹa ñi' Dios? 'Am na'chi 'auená'am da' 'ane'uaxánaguec jiñi'me. 41Qo'mi di'ỹoqóta da' tasá'aguet da'me qan'queténaxac, qá'a mai'chi seseeténaqtac da'me náỹi da'me s'étaqtac sa nó'in. Jiñi'me siỹaxaua, qaa'le qaỹa 'te ga' ỹí'et sa ỹiỹamaxañi.
42Qana'chi jeso'me 'enapego' so' Jesús, 'enaaco':
—Ma'choqo' qomle jaỹim 'aueenata qomle da' 'an'iỹílaq da' 'aulo'ogue ỹima da' 'aumata'a'téna.
43Qana'chi so' Jesús 'enaaco':
—Ỹátaqta 'eesa da' senaac: na'chína naỹi da' sóxote 'am ỹiquiáxaua qomle 'ouét'a di' l'acháqa' jen' qonec'alaxatéeguepi di' piỹem.
Da' 'éeta da' nalaataguec so' Jesús
(Mateo 27.45-56; Marcos 15.33-41; Juan 19.28-30)
44Ỹamtaa'le laiñi so' nolo', qana'chi ỹima na' 'aléua ỹátaqta n'áltapiỹi, cha ỹivíde'ta da' dasíiñi jaso' c'atena. 45Qataxa ỹátaqta napídetapiỹi jaso'me c'atena, qataxa jeso'me lqapadénaxat jeso'me p'áuo jeso' tamnaxaqui let'ádaic di' Jerusalén, qaa'le colqáchiinỹi na' laiñi. 46Qana'chi so' Jesús ỹ'alaq, 'enaaco':
—'Am ỹit'a, 'am sepatáxaguet naỹi na' ỹipaqal da' mai'chi 'aulo'ogue.
Joca'li ma'le nasaxáiỹi dójo', qana'chi ỹileu.
47Qana'chi jeso'me lasoxola' so' huataxanaq joca'li ỹauáachiỹi jedójo', qana'chi ỹi'ỹoxoden ñi' Dios, 'enaaco':
—Ỹátaqta 'eesa jiñíjo' siỹaxaua da' qaỹa ga' ỹasouaxat.
48Qana'chi ỹima so' siỹaxadipi 'me ỹauáachiỹi dójo' huápiỹi jeso'me, qana'chi nelágaxataac, qaláxasa ỹátaqta ỹi'uaxaalóo'te naua' letóguel ỹasouaxat da' laquicoxo. 49Ỹima jeso'me naatetonaxau'pi so' Jesús qataxa jeso'me ỹauodipi 'me quétapegue' jeso'me joca'li chiỹoqóchii'ña di' Galilea, qana'chi sequétai'ỹa ga' huét'a joca'li ỹic'atéetac da' huápiỹi jeso'me.
So' Jesús ma'le qoỹisiiñi
(Mateo 27.57-61; Marcos 15.42-47; Juan 19.38-42)
50'Uo so' siỹaxaua ỹátaqta 'ónaxaicaloic qataxa sa 'te da' ỹí'et ga' sa nó'in, lenaxato' José, l'acháqa' di' noic Arimatea huá'ña di' 'aléua Judea. Jeso'me na'chi ỹalquétaaue so' net'alpi 'me ỹ'étac na' lasoxocpi na' judiopi. 51Jeso'me José ỹiuatétaaque da' nóvi' ga'me l'onataxanaxac ñi' Dios da' ỹilo'ogue da' ỹimata'a'téna. Qana'chi jeso'me joca'li sa ỹiỹamaxaden da'me ỹí'et jeso'me laỹi net'alpi. 52Qana'chi jeso'me ỹic'áte'uo joca'li so' Pilato da' ỹiỹáxana'uo jeso' ló'oquiaxac so' Jesús. 53Joca'li ỹim da' naqchiñi so' Jesús, qana'chi lecoxóiỹi so' huáloq pagaxaic, qana'chi ỹachánỹi jaso'me napa'lai't 'me n'onata, náaue so' qa'. Jaso'me sonaliaxa da' 'uo ga' qoỹachánỹi. 54Qana'chiso so' nolo' ỹamaxataxaqui da' qonỹamaxatet'aguet so' nolo' laqáỹa 'me mataxaqui, jeso'me ỹamtaa'le nenoxoneuo.
55Qana'chi jeso'me ỹauodipi 'me quétapegue' so' Jesús joca'li chiỹoqóchii'ña di' Galilea nataq'en jec da' dec'atenaxáatapeguee'ga jaso' napa'lai't. Qana'chi ỹauáachiỹi da' qoỹíit'ec da' ló'oquiaxac so' Jesús. 56Qana'chi joca'li v'iỹílaxade'uo ga' l'acháqa't, qana'chi qoỹaqátaxata't jeso'me codáxaqui. Ỹim, qana'chi nematréegue jeso'me nolo' mataxaqui, qoỹipaquetelégue da' lamaxasóxonaxac na' naqátaxacpi.
اکنون انتخاب شده:
Lucas 23: PLGNT93
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuevo Testamento Pilagá © Sociedades Bíblicas Unidas, 1993.