Marcos 9
9
1So' Jesús nataq'en 'enaaco':
—Ỹátaqta 'eesa da'me 'ami senapegalo, da' 'uo naỹi na'me ỹalquétauopi jen'me maliaxa sa ỹileu qomle, cha ỹivíd'a da' ỹauáat'eguet da' livídaxac da' l'onataxanaxac ñi' Dios qataxa da' lañoqtaxanaxac da' ỹimatalquéna.
Qonadálaxat da' nec'atenaguec so' Jesús
(Mateo 17.1-13; Lucas 9.28-36)
2Joca'li ỹinoxodéegue saua' seis noloqo'te, qana'chi so' Jesús náicapee'to saua' Pedro, Jacobo, Juan, da' tadísee'mec jeso' qasoxonaxa. Huá'a, qana'chi qonadálaxat da' nec'atenaguec, dauanáxa'n qoỹi'n saa'me. 3Jaso' lapoto ỹátaqta 'uo da' laqasélgaxac qataxa ỹátaqta qaỹa 'te 'ená'am da' lapagaxa, ỹátaqta qaỹa 'te siỹaxaua jen' 'aléua taa'le 'ená'am qa'en da' lapagaxa jaso' lapoto. 4Qana'chi saa'me ỹilótr'a so' Elías qataxa so' Moisés da' dosétrapegue' so' Jesús. 5Chan'eesa so' Pedro 'enapego' so' Jesús, 'enaac:
—'Am 'me paxaguenataxanaxaic, ¡ỹátaqta ỹiỹamqáchiiñi da' na'chi souqat'éna! Sauoqo'oi gaua' 'adipili'chídii', 'oonolec qasenaq ga' 'adepe'l, qataxa da' Moisés, qataxa da' Elías.
6Qá'a saa'me lasoxoñii's ỹátaqta d'oi' joca'li, chan'eesa so' Pedro sa nomguet da'me 'enaac. 7Qaama'le janac so' ló'oc talóo'te saa'me. Qana'chi so'me ló'oc na'chi chimaqpégooue so' n'aqtac, 'enaac:
—Naqaida da'me ỹalec 'me ỹátaqta ỹauotaxat, ỹátaqta 'anaquiáxañiỹa qomle.
8Qana'chi joca'li nelodíseguem, qana'chi qaỹa 'te ỹilód'a, na'chisóta so' Jesús 'oonolec.
9Joca'li ma'le huenótreegue chiỹoqodalégue so' qasoxonaxa, qana'chi so' Jesús huaqátetapegoovlo saua' lasoxoñii's da' qaỹa 'te ga' ỹ'axátrem dójo' lauanáxanaxa'j, na'chidáta qomle ỹitaxa n'iỹílaxaseguem jen'me siỹaxaua lec'óxot. 10Chan'eesa saa'me ỹátaqta n'emáxade'n ỹasouaxat da'me lauanáxanaxa'j, qaláxasa nachimaxatétapega'salo da' 'éeta ga' náaue da'me ỹitaxa n'iỹílaxaseguem da' chiỹaqánỹi jaga' napa'lai't. 11Qana'chi qoỹinatétac so' Jesús, qoỹinaac:
—¿Tá'nooqo'chi na'me dapaxaguenataxanapeec na' naqátaxacpi 'chi 'éetapega 'uáiñi qomle da' nóvi' ga' Elías?
12Qana'chi so'me 'enaaco':
—'Eesa ga' Elías da' 'uáiñi da' nóvi' qomle, da'me ỹiỹamaxachiñi ỹima na' nasoxocpi. Qaláxasa ¿jái'chi 'éete' naua' nidii's l'aqtaqa ñi' Dios 'chi nataq'en ỹ'axa't da' 'éeta qomle ga'me siỹaxaua lec'óxot? Da' 'uo da' ne'queténaxac qoỹin qataxa da' n'otánaguec. 13Qaláxasa da'me 'ami senapegalo da' so' Elías sóxote da' nóvi'. Qaláxasa so'me mai'chi qoỹoiquíitac ỹima ga'me qoỹíit'ec, qá'a ỹátaqta ỹipaquíchiỹi da' n'aqtaguec 'me ỹ'axa't naua' nidii's l'aqtaqa ñi' Dios.
So' Jesús n'óota 'en so' nesoq 'me 'uo so' lé'ec nataqtáqaic
(Mateo 17.14-21; Lucas 9.37-43)
14Joca'li ma'le n'iỹílaxadeta saa'me ga' huétr'a saua' lasoxoñii's, qana'chi ỹilód'a so' jalcote siỹaxadipi nalo'sopa saa'me. Nataq'en huétauo jen'me dapaxaguenataxanapeec na' naqátaxacpi, da' dapetétrapegue' saa'me. 15Qana'chi joca'li qoỹila'aguet so' Jesús, qana'chi ỹátaqta ỹima ỹ'aalát'ec, qataxa qonaqalégaq'aguet so'me da' qoỹip'iỹen. 16Qana'chi so' Jesús denataxan, 'enaaco':
—¿Jái'chi ga'me 'anqolguíchiitapiỹi?
17Qana'chi 'uo so' 'oonolec ỹalquétauo 'me ỹ'at, 'enaac:
—'Am 'me 'am paxaguenataxanaxaic, jen' ỹalec 'am ñauée'uo, jen'me 'uo ñi' lé'ec nataqtáqaic 'me 'en qaỹaua naua' l'aqtaqa. 18Qá'a gamachaqaiga p'aiỹi, qana'chi ñi'me lé'ec nataqtáqaic na'chi ỹacho'ot da' d'ait'egue qa'en. Huá'a, janac qa'en jan' l'ali na' nedégaxat, qataxa ỹatoxoỹaxana't qa'e'n naua' lodaitel. Qana'chi naqaida da' lamá'asa da' qaỹa 'te l'añaxac qa'en. Qataxa sóxote da' siỹáxanoovlo naua' 'adasoxoñii's, da' qaidi ỹ'odédaiỹi ñi' lé'ec nataqtáqaic, qaláxasa sa ỹañoxo't.
19Qana'chi so' Jesús ỹ'ato', 'enaac:
—¡Jaigamaa na'me nójo' siỹaxadipi, qá'a sa d'amaqtenataxan! ¡Sóxote huo'oi saua' noloqo'te da' 'ami souetaavlo, qataxa sóxote huo'oi saua' noloqo'te da'me 'ami ñiuálaxaitapee'to! Ỹa jaỹim 'anavíquii'uo na' nesoq.
20Qana'chi qonauéga so'me so' nesoq. Mané'e joca'li ỹilo'ot so' Jesús so' lé'ec nataqtáqaic, qana'chi copete qa'en so' nesoq, qana'chi necocátapiiñi, qataxa janac qa'en jan' l'ali jen' nedégaxat. 21Qana'chi so' Jesús ỹinatétac so' let'a so' nesoq, 'enaac:
—¿Jái'chi laỹóqte' saua' noloqo'te ca'li lapoqot da'me dójo'?
Qana'chi so'me 'enaaco':
—Nañáxat'ai. 22Qataxa jalcote naale ñi' lé'ec nataqtáqaic huánỹi qa'en na' dóle' qataxa na' noxop da'me sétaaque ỹalaatec. Chan'eesa qaa'le qomle 'auañoxot, qana'chi n'óota da' qo'mi 'auchoxode'n, qo'mi 'alecochiỹalo.
23Qana'chi so' Jesús 'enapéga so'me, 'enaac:
—Qomle 'auaqanatet da' 'au'amaqtenataxan, qá'a ga'me d'amaqtenataxan, qana'chi qaỹa 'te ga' laqalaic.
24Chan'eesa so' let'a so' nesoq ỹátaqta ỹ'alaq, 'enaac:
—¡S'amaqténataxan, jaỹim 'alecochíỹa, qaidi nichíỹigue da' ỹ'amaqtenataxanaxac!
25Qana'chi so' Jesús joca'li ỹilá'a da' sóxote jalcote na' siỹaxadipi, qaama'le nelaxa so' né'ec nataqtáqaic 'me qaỹaua 'aue'n na' l'aqtaqa qataxa sa demachíỹaac 'auen na' siỹaxaua, 'am senapéga da' 'ocá'ai na'me nesoq, qataxa 'ená'te 'av'iỹílaxaue na'me.
26Qana'chi jeso'me né'ec nataqtáqaic ỹ'alaq, qana'chi copete qa'en so' nesoq. Ỹim, qaama'le cá'ai, qaláxasa 'ená'am 'en da' ỹileu. Chan'eesa jalcote na'me 'éetapega da' ỹileu so'me. 27Qaláxasa so' Jesús lasáq'a na' louaq so'me, qana'chi ỹañíseguem. Qana'chi so'me nesoq nichaachiñi.
28Qaama'le so' Jesús táaue so' 'emec, qana'chi saua' lasoxoñii's joca'li nedóde'te' so'me, qana'chi ỹinatétrac, 'enapega'salo:
—¿Tá'nooqo'chi qo'mi sa sañoxotaq da' s'odáqaiỹi so' né'ec nataqtáqaic?
29Qaama'le so'me 'enaaco':
—Jen' 'ená'am sójo' né'ec nataqtáqaic da' qoỹ'odáiỹi, na'chidáta da' tamnaxac qataxa noqouaqtela't ga' siỹaxaua.
So' Jesús ỹitaxa ỹ'axát'a da' qoỹalaat
(Mateo 17.22-23; Lucas 9.43-45)
30Joca'li quéd'ai di'me huétr'a, taidalégue di' Galilea. Qana'chi so' Jesús sétaaque da' sa qonóma. 31Qá'a so'me ỹapaxagueet'ape qataxa ỹ'axátetapeema saua' lasoxoñii's da' 'enaac:
—Jen' siỹaxaua lec'óxot qoỹanóoue qomle na' siỹaxadipi, qataxa qaidi qoỹalaat. Qaláxasa qomle ỹovi't gaua' tres noloqo'te, qana'chi n'iỹílaxaseguem chiỹaqánỹi jaga' napa'lai't. 32Qaláxasa saa'me sa ỹaỹáteeteguet joca'li da'me qoỹ'axátetapeema, qaláxasa d'oidalégue da' ỹitaxa denataxa'n.
¿Jái'chogamaxa ỹimalégue da' p'asáiỹi?
(Mateo 18.1-5; Lucas 9.46-48)
33Qana'chi sóxote ỹivídede'uo di' noic Capernaum. Qataxa joca'li huétr'a ga' l'acháqa', qana'chi so' Jesús ỹinatét'ape saua' lasoxoñii's, 'enaac:
—¿Jái'chogamaxa 'anqolguíchiitapiỹi 'ami jen' naq'aic?
34Qaláxasa saa'me sa ỹ'a't, qá'a saa'me noqolguétapega'salo joca'li quétrapegue' so' naq'aic, qana'chi necotátrapiỹi da' jái'chogamaxa p'aiỹi saa'me ga' p'asáiỹi. 35Qana'chi so' Jesús ñíiñi, qataxa ỹachimaxatalo saua' doce lasoxoñii's. Qana'chi 'enapegalo, 'enaac:
—Da' 'uo ga' sétaaque da' ne'uáuaxanaxanec, qana'chi jega'me ỹacona da' nec'átaxanaxanec, qataxa na'chiga ga' neuálaxai'ne' ỹima na' laỹipi.
36Ỹim, qana'chi ỹacona louaq so' nootolec, qataxa ỹanánỹi na' laiñi saa'me, qana'chi nesoxouo. Qana'chi 'enapegalo saa'me, 'enaac:
37—Ga' siỹaxaua da' jaỹim 'equegue, da' 'uootaxa ỹaconeguet ga' 'oonolec jen'me nootolec, naqaỹim 'me jaỹim ỹaconeguet. Qaláxasa sa na'chaỹiméta da' jaỹim ỹaconeguet, qá'a ga'me nataq'en ỹaconeguet ñi'me jaỹim namaq.
Ga' sa qo'mi nep'aguenalo naqaiga ga' sa qo'mi ỹiỹotet'alo
(Lucas 9.49-50; Mateo 10.42)
38Qana'chi so' Juan 'enapego' so'me, 'enaac:
—'Am 'me paxaguenataxanaxaic, qo'mi 'uo so' sauanáqchiỹi da' d'otáxana da'me 'adenaxat da' ỹ'odáiỹi na' né'ecpi, qaláxasa jeso'me sa qo'mi ỹalegoovlo, qana'chi sa sasenaxam da'me dójo'.
39Qaláxasa so' Jesús 'enaaco':
—'Ená'te 'au'eláxachiỹapeguem, qá'a qaỹa 'te ỹañoxot taa'le ỹí'et ga' sa qoỹauanápiỹi da'me d'onataxana da' ỹinaxat, da' ỹim, qana'chi jaỹim ỹisouéetac. 40Qá'a ga' sa qo'mi nep'aguenalo, naqaiga ga' sa qo'mi ỹiỹotet'alo. 41Qá'a gamachaqaiga da' 'uootaxa 'ami ỹanema ga' noxop huétanỹi jaga' ỹómaxaquiole, ỹasouaxat da' 'ami ỹalémaxase'te, qana'chi ga'me ỹátaqta 'uo da' neseeténaguec.
Da' lichic ga' siỹaxaua da' 'uo ga' loic
(Mateo 18.6-9; Lucas 17.1-2)
42Gamachaqaiga siỹaxaua da' 'uootaxa ỹauec'aguet ga' loic ga' 'oonolec na'tai'me sa lecolec 'me jaỹim ỹ'amaqten, qana'chi ga'me n'óota da' qoỹicoñiteguet na' loqosot ga' qa' t'ádaic 'me namáquinaxaqui na' trigo, qana'chi qoỹasaxánỹi jaga' huaxai. 43Na' mai'chi 'adouaq da' 'uootaxa 'am ỹauec'aguet ga' 'adoic, n'óota da' 'auchíỹiiỹi. Qá'a ỹiỹamqáchiiñi da' 'aunoxoneuó'o da' nec'alaxa, da' 'oonolec na' 'adouaq, qaláxasa sa 'ená'am da' nalóchidiñi naua' 'adoua' da' 'am ỹauec'aguet da' qoỹasaxánỹi ga' ne'uaxánaqa' na' loicoló'olpi 'me huá'a ga' dóle' 'me sa qoỹalamat, 44qataxa huéta'ña na' qochi'l 'me sa ỹileu qataxa ga'me dóle' sa 'om. 45Qataxa na' 'adápia' da' 'uootaxa 'am ỹauec'aguet ga' 'adoic, n'óota da' 'auchíỹiiỹi. Qá'a ỹiỹamqáchiiñi da' 'aunoxoneuó'o da' nec'alaxa da' 'am sepo, qataxa sa 'ená'am da'me nalóchidiñi naua' 'adapia'te da' 'am qoỹasaxá'ña ga' ne'uaxánaqa' na' loicoló'olpi 'me huéta'ña ga' dóle' 'me sa qoỹañoxot da' qoỹalamat, 46qataxa na' qochi'lpi 'me sa ỹileu, qataxa na' dóle' 'me sa 'om. 47Qataxa jana' 'ad'aite da' 'uootaxa 'ocai'ỹi, nataq'en n'óota da' 'anaqat. Qá'a ỹiỹamqáchiiñi da' 'oonole jana' 'ad'aite da' 'aunoxoneuó'o da' l'onataxanaxac ñi' Dios da' ỹimata'a'téna, qataxa sa 'ená'am da' nalot'a't naua' 'ad'ai'te da' 'am qoỹasaxá'ña ga' ne'uaxánaqa' na' loicoló'olpi, 48ga'me huá'a na' qochi'lpi 'me sa ỹileu, qataxa ga'me dóle' 'me sa 'om.
49Qá'a ỹima na' siỹaxadipi qoỹ'iinec ga' dóle', qataxa ỹima na' nachítaqtaxanaxat 'me qoỹigóoue, jen'me qoỹasaxalégue na' qaa'noua. 50Na' qaa'noua, jen'me ỹátaqta nó'in. Qaláxasa da'me daqat da' l'ouáxa, qana'chi ¿qo'li ỹaqanatet da' ỹitaxa 'uo ga' taiỹet qoỹin ga'me? Qoñiit'emo' qomle ga' qaa'noua da' 'ami sega'me naléctenaxanaqte, qataxa ñi' 'oonolec da' 'oñíita ỹátaqta matapeeguet qa'en na' laỹipi.
انتخاب شده:
Marcos 9: PLGNT93
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuevo Testamento Pilagá © Sociedades Bíblicas Unidas, 1993.