ᒨᓯᓯ ᐱᖓᔪᖏᑦ 3
3
ᒎᑎᒧᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕐᓂᖅ
1“‘ᓇᓪᓕᐊᑦᑕᓪᓗ ᑐᓂᕐᕈᑎᒃᓴᖓ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᐅᒃᐸᑦ; ᐆᒪᔪᒥᒡᓗ ᐃᒻᒧᒃᓯᐅᒐᕐᓂᒃ ᑐᓂᕐᕈᑎᒃᓴᖃᕐᐸᑦ, ᐊᖑᓴᓪᓘᒃᐸᑦ ᐊᕐᓇᓪᓘᒃᐸᓪᓘᓐᓃᑦ, ᑐᓂᕐᕈᓯᕐᓂᐊᕐᑑᑉ ᐊᑕᓂᐅᑉ ᓵᖓᓄᐊᕈᑎᔭᕆᐊᖃᕐᐹ, ᐆᒪᔪᖅ ᑖᓐᓇ ᖃᓄᐃᓐᓂᖃᖏᑦᓯᐊᕐᓗᓂ. 2ᐆᒪᔪᖅ ᓂᐊᖁᐊᒍᑦ ᑎᒍᓗᒍ ᑐᖁᑕᒃᓴᕆᕚ ᑐᐱᐅᑉ ᑲᑎᒪᕕᐅᑉ ᐃᑎᕐᕕᖓᑕ ᓴᓂᐊᓂ. ᐂᕉᓂᐅᓪᓗ ᐃᕐᓂᖏᑕ ᑐᓂᕐᕈᓯᕐᑎᑦᓯᔨᐅᔪᑦ ᐆᒪᔫᑉ ᐊᐅᖓ ᓯᕐᐸᕐᓴᐅᑎᒋᔭᒃᓴᕆᕚᑦ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ. 3ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᒥᒃ ᐆᑕᒃᓴᒥᒃ ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕐᑐᒃᓴᐅᕗᖅ ᐊᑕᓂᕐᒧᑦ; ᑐᓐᓄᕐᒥᒡᓗ ᐆᒪᔫᑉ ᑭᒃᓴᐅᑎᖏᓐᓂᒃ, ᐅᕝᕙᓘᓐᓃᑦ ᓴᓂᐊᓃᑦᑐᑦ ᐃᕐᕋᕕᖏᑕ ᑭᒃᓴᐅᑎᖓᓂᒃ. 4ᑕᕐᑐᖏᒡᓗ ᐃᒡᓗᒃᑐᑦ ᑕᕐᑐᕈᑎᖏᒃ ᐊᑕᓗᑎᒃ ᑯᑦᑎᓂᖃᕐᓗᑎᒃ, ᑎᖑᖓᑕᓗ ᑭᒃᓴᐅᑎᖓ ᐲᖃᓯᐅᑎᔭᕆᐊᖃᕐᐹ ᑕᕐᑐᖏᒃ ᐲᓕᕈᓂᒋᒃ. 5ᐂᕉᓂᐅᓪᓗ ᐃᕐᓂᖏᑕ ᐃᑯᐊᓚᑎᑕᒃᓴᕆᕚᑦ ᑐᓂᕐᕈᓯᕐᕕᖕᒥ ᑐᓂᕐᕈᑏᑦ ᐃᑯᐊᓚᑎᑕᐅᔪᑦ ᖄᖏᓐᓂ ᕿᔪᐃᑦ ᖄᖏᓐᓃᑦᑐᓂ, ᑐᓂᕐᕈᑏᑦ ᑍᒤᑦᑐᑦ ᑐᓂᕐᕈᑎᐅᖕᒪᑕ ᐃᑯᒪᒃᑯᑦ, ᑎᐱᖓᓗ ᐊᑕᓂᐅᑉ ᒪᒪᕆᕙ.
6“‘ᐆᒪᔪᒥᒡᓕ ᓰᐱᒥᒃ ᒎᑦᓯᒥᒡᓘᓐᓃᑦ ᑐᓂᕐᕈᓯᕐᑐᖃᕐᐸᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᐊᑕᓂᕐᒧᑦ ᑐᓂᕐᕈᓯᕐᓗᓂ, ᑖᓐᓇ ᑐᓂᕐᕈᓯᕐᑐᒃᓴᐅᕗᖅ ᐊᖑᓴᓪᓗᕐᒥᒃ ᐊᕐᓇᓪᓗᖕᒥᒡᓘᓐᓃᑦ ᖃᓄᐃᓐᓂᖃᖏᑦᓯᐊᕐᑐᒥᒃ. 7ᓰᐱᐅᑉ ᓄᕐᕋᖓᓂᒃ ᑐᓂᕐᕈᓯᕐᐸᑦ ᐊᑕᓂᕐᒧᑦ, ᐊᑕᓂᐅᑉ ᓵᖓᓄᐊᕐᑕᒃᓴᕆᕚ. 8ᐊᒡᒐᓂ ᐃᓕᔭᒃᓴᕆᕔᑦ ᐆᒪᔫᑉ ᓂᐊᖁᐊᓄᑦ ᑐᖁᓪᓗᓂᐅᒡᓗ ᑐᐱᐅᑉ ᑲᑎᒪᕕᐅᑉ ᐃᑎᕐᕕᖓᑕ ᖃᓂᒋᔮᓂ. ᐂᕉᓂᐅᓪᓗ ᐃᕐᓂᖏᑕ ᐆᒪᔫᑉ ᐊᐅᖓ ᓯᕐᐸᕐᓴᐅᑎᒋᔭᒃᓴᕆᕚᑦ ᑐᓂᕐᕈᓯᕕᐅᑉ ᓴᓂᕋᖏᓐᓄᑦ. 9ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᒥᒃ ᑐᑯᑕᒃᓴᒥᒃ ᑐᓂᕐᕈᓯᕐᑐᒃᓴᐅᕗᖅ ᐃᑯᐊᓚᑎᑦᓯᓂᒃᑯᑦ ᐊᑕᓂᕐᒧᑦ ᑐᓂᔭᒃᓴᒥᒃ; ᑐᓐᓄᖓᓂᒃ, ᑐᓐᓄᓕᒫᖏᒃ ᐸᒥᐅᖓ ᓇᑲᓯᒪᓗᓂ ᕿᒥᕐᓗᐊᑕ ᑭᒡᓕᖓᒍᑦ, ᑭᒃᓴᐅᑎᓕᒫᖏᑦ ᐃᕐᕋᕕᖏᓐᓂᒃ ᐅᓕᒃᓯᓯᒪᔪᑦ ᐅᕝᕙᓘᓐᓃᑦ ᓴᓂᐊᓃᑦᑐᓕᒫᑦ. 10ᑕᕐᑐᖏᒃ ᐃᒡᓗᒃᑐᑦ ᑐᓐᓄᖏᒃ ᐱᖃᓯᐅᑎᓗᒋᒃ ᑯᑦᑎᓂᖏᒃᑕᓗ ᑐᓐᓄᓕᒫᖏᑦ, ᑎᖑᐊᑕᓗ ᐃᒻᒧᑎᖓ ᑐᓐᓄᖅ, ᐲᖃᓯᐅᑎᓗᒍ ᑕᕐᑐᖏᒃ ᐲᓕᕈᓂᒋᒃ. 11ᑐᓂᕐᕈᓯᕐᑎᑦᓯᔨᐅᑉ ᑐᓂᕐᕈᓯᕐᕕᖕᒥ ᐃᑯᐊᓚᑎᑕᒃᓴᕆᕔᑦ ᓂᕿᒃᓴᐅᖁᓪᓗᒋᑦ, ᑐᓂᕐᕈᑕᐅᓪᓗᑎᒃ ᐃᑯᒪᒃᑯᑦ ᐊᑕᓂᕐᒧᑦ.
12“‘ᓇᓪᓕᐊᑦᑕᓕ ᑐᓂᕐᕈᑎᒃᓴᖓ ᒎᑦᓯᐅᒃᐸᑦ, ᑐᓂᕐᕈᓯᕐᓂᐊᕐᑑᑉ ᐊᑕᓂᕐᒧᑦ ᕾᑦᔪᑎᔭᒃᓴᕆᕚ. 13ᐊᒡᒐᓂ ᓂᐊᖁᖓᓄᑦ ᐃᓕᓗᒋᑦ ᑐᖁᓪᓗᒍᓗ ᑐᐱᐅᑉ ᑲᑎᒪᕕᐅᑉ ᐃᑎᕐᕕᐊᑕ ᓴᓂᐊᓂ. ᐂᕉᓂᐅᓪᓗ ᐃᕐᓂᖏᑕ ᒎᑦᓯᐅᑉ ᐊᐅᖓ ᓯᕐᐸᕐᓴᐅᑎᒋᔭᒃᓴᕆᕚᑦ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ. 14ᑐᓂᕐᕈᑎᒃᓴᒥᓂᑦ ᑕᕝᕙᓐᖓᑦ ᑐᓂᕐᕈᓯᕐᑐᒃᓴᐅᕗᖅ ᐃᑯᐊᓚᑎᑦᓯᓐᓂᒃᑯᑦ ᐊᑕᓂᕐᒧᑦ; ᐆᒪᔫᑉ ᑭᒃᓴᐅᑎᓕᒫᖏᓐᓂᒃ, ᓴᓂᐊᓃᑦᑐᓕᒫᓪᓗ. 15ᑕᕐᑐᖏᒡᓗ ᐃᒡᓗᒃᑐᑦ ᑯᑦᑎᓂᖏᑕᓗ ᖃᓂᒋᔭᖏᓐᓃᑦᑐᖅ ᑐᓐᓄᐃᑦ, ᑎᖑᖓᑕᓗ ᐃᒻᒧᑎᖓ ᑭᒃᓴᐅᑎ, ᑕᕐᑐᖏᒃ ᐲᕋᓱᐊᓕᕈᓂᒋᒃ ᑕᒪᓐᓇ ᐲᖃᓯᐅᑎᔭᒃᓴᕆᕚ. 16ᑐᓂᕐᕈᓯᕐᑎᐅᑉ ᐃᑯᐊᓚᑎᑕᒃᓴᕆᕔᑦ ᑐᓂᕐᕈᓯᕐᕕᖕᒥ ᓂᕿᒃᓴᐅᖁᓪᓗᒋᑦ, ᑖᒃᑯᐊ ᐃᑯᐊᓚᑎᑦᓯᓂᒃᑯᑦ ᑐᓂᕐᕈᑎᒃᓴᐅᖕᒪᑕ, ᑎᐱᖓᓗ ᒪᒪᕐᓗᓂ ᑐᓐᓄᓕᒫᖏᒃ ᐊᑕᓂᐅᑉ ᐱᒋᕔᑦ. 17ᑕᒪᓐᓇ ᑕᕝᕙ ᐱᖁᔭᖅ ᑭᖑᕚᕇᓄᑦ ᑭᖑᓪᓕᒃᓴᑦᑎᓐᓄᓪᓗ ᑐᕌᕐᑐᖅ, ᓇᓂ ᓄᓇᖃᕋᓗᐊᕈᕕᑦ ᓂᕆᔪᒃᓴᐅᓐᖏᓪᓚᑎᑦ ᑐᓐᓄᕐᒥᒃ ᐊᐅᖕᒥᒡᓘᓐᓃᑦ.’”
اکنون انتخاب شده:
ᒨᓯᓯ ᐱᖓᔪᖏᑦ 3: EAIB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eastern Arctic Inuktitut Bible © Canadian Bible Society, 2012, 2021-2023.