Genesis 28
28
1Mana Isaka namulanga Yakobo, namusabila ikhabi, namulaka, namuboolela mbu Oraleera omukhasi owomubakhaana baKanaani tawe. 2Rula, otsie ePadanaramu, munzu waBetsueli, samwana mawo; winyoolelemwo omukhasi mubwenomwo, khubakhaana baLabani khootsawo. 3Ne Nyasaye Ounyalabiosi akhuheelesie ikhabi, akhunyalile okhwibulana muno, nakhwinjiyia, mbu obe omukanda kwetsimbia tsiabandu; 4nakhuheelesia ikhabi yaAburahamu, iwe nende olwibulolwo lwosi; mbu mana olie eshibala eshia wamenyamwo noli omucheni, eshia Nyasaye yamuheelesia Aburahamu. 5Mana Isaka yaseebula Yakobo; naye natsia ePadanaramu ewaLabani, omwana waBetsueli omuSiria, omusiani wabwe Rebeka, nyinabwe Yakobo nende Esau.
Esau yaleera omukhasi undi
6Ne Esau yalola mbu Isaka usabiile Yakobo ikabi nende okhumuruma ePadanaramu mbu yeenyoolele omukhasi ebweneyo khandi mbu olwa amusabiile ibaraka amulachile ari Oraleera omukhasi owokhubakhaana baKanaani tawe; 7khandi mbu Yakobo ahuliile samwana nende nyina, ne utsiile ePadanaramu; 8Esau nalola mbu abakhaana baKanaani shibachamisia Isaka samwana tawe; 9kho Esau natsia ewaIshimaeli, nameeta khubakhasi aba yali ninabo, Mahalatsi omukhaana waIshimaeli omwana waAburahamu, mbootsonyene Nebayotsi, mbu abe omukhasiwe.
Lilooro lia Yakobo nali eBeteli
10Ne Yakobo narula eBeeri-sheba, nachoomile olchutsia eHarani. 11Ne yeetsukhana niyoola habundu undi nakonaho, okhuba eliuba liali nilimalile okhuyeela; nabukula lichina elala khukeenako akaliho, niyeeyichikhakhwo omurwe, niyeeyalisia habundu tsana okhukona. 12Mana naloora lilooro, mbu obuniinilo nibusinjisiibwe khushibala, ne omurwe kwabwo kuulile mwikulu; khandi lola, abamalaika baNyasaye mbabo, nibaniinanga nende okhwishilakhwo. 13Khandi lola, OMWAMI yali nasinjiile hekulu khubwo, naboola mbu Isie nisie OMWAMI, Nyasaye wakuukawo Aburahamu, khandi Nyasaye waIsaka; eshialo eshia okonilekhwo, ekhuheelesia, iwe nende olwibulolwo; 14nolwibulolwo luliba shinga olufu olwokhushibala, nawe olilandaala khulubeka lwamumbo, nende ebukwe nende enotsi, nende esautsi; ne mwiwe, khandi mulwibulolwo, nimwo omwa abebilibwa biosi bieshibala balinyoolelamwo ikhabi. 15Khandi lola, endiho halala ninawe, khandi ndalakhulindanga aha otsia hosi, nikhukalusia mushialo shino; okhuba shindilikhulekha butswa tawe okhuula olwa ndiliba nimalile okhukhukholela ako kosi aka ndakhakhuboolela. 16Mana Yakobo nasisimukha mundoolo, naboola mbu Khane OMWAMI ali habundu hano, nasi shimanyilenje ta. 17Naria, naboola ari Habundu hano nahoburiisii muno. Hano shihachweya okhuba inzu yaNyasaye tawe, khandi shino neshilibwa shiomwikulu.
18Mana Yakobo nahuuna mumabwibwi nabukula lichina lienelo elia yali niyeeyichishenjekhwo omurwe, nalisinjisia libe isiilo isongookhu, natsukhakhwo amafura khumurwe kwalio. 19Nakulikha habundu tsana eliira mbu Beteli; ne eliira lielitaala elo khale lialinji Luzu. 20Mana Yakobo yeetsuba eshiitsubo, naboola mbu Nyasaye naba nali halala ninasi, niyaninda khunjila yino eya enziilakhwo, nende okhumbeelesia ebiliibwa ebia endia, nende ebiifwalo ebia ndifwala, 21mbu mana engalushe eweefwe mumulembe, kho OMWAMI alabeetsanga Nyasaye wanje, 22nelichina lino elia esinjisiye mbu libe isiilo, liliba inzu yaNyasaye; ne khubiosi ebia olimbeelesinjia, nasi toto mwene ndilikhuheelesinjia eshitonye shielikhumi.
اکنون انتخاب شده:
Genesis 28: OUV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Oluluyia Union Version © Bible Society of Kenya 1975